Егда́ кто́ от мирски́х свяще́нников оти́дет ко Го́споду, прихо́дят три́ свяще́нницы, и сне́млют его́ со одра́, и полага́ют на земли́ на рогози́нице. И поне́же не подоба́ет измове́ну бы́ти, обнаже́ну от свяще́нников, отира́ют его́ со еле́ем чи́стым. Та́же одева́ют его́ обы́чными его́ оде́ждами, пото́м же во всю́ свяще́нническую оде́жду, и покрыва́ют лице́ его́ возду́хом, и полага́ют свято́е Ева́нгелие над ни́м. Та́же прихо́дят свяще́нницы облаче́ны во свяще́нническия оде́жды.

Предстоя́тель же твори́т: Благослове́н Бо́г на́ш:

И начина́ют сопредстоя́щии: Святы́й Бо́же: Пресвята́я Тро́ице: И О́тче на́ш: Я́ко Твое́ е́сть Ца́рство:

И а́бие пою́т тропари́ сия́, гла́с 4:

Со ду́хи пра́ведных:

Диа́кон глаго́лет:

Поми́луй на́с Бо́же:

И а́бие во́зьмут свяще́нницы мо́щи, и прино́сят я́ в па́перть хра́ма, и полага́ют свято́е Ева́нгелие верху́ его́, я́коже предре́хом, и подсве́щники крестови́дно со свеща́ми, и начина́ет певе́ц:

Непоро́чнии в пу́ть: аллилу́иа.

Во гла́с 6.

Та́же, Блаже́ни непоро́чнии:

По пе́рвой статии́, диа́кон:

Па́ки и па́ки:

Посе́м начина́ем втору́ю статию́, на гла́с 5, на ко́емждо же конце́ стиха́ глаго́лем: Поми́луй раба́ Твоего́.

Ли́к начина́ет: За́поведи твоя́:

Поми́луй раба́ Твоего́.

Па́ки то́йже ли́к: Ру́це твои́ сотвори́сте мя́:

По 2-й статии́, диа́кон:

Па́ки и па́ки:

И па́ки начина́ет тре́тию статию́, на гла́с 3: И́мя твое́: аллилу́иа.

Па́ки то́йже ли́к пое́т: При́зри на мя́, и поми́луй мя́:

По 3-й статии́, и по непоро́чных тропаре́х, диа́кон:

Па́ки и па́ки:

Та́же тропа́рь, гла́с 5: Поко́й Спа́се на́ш с пра́ведными раба́ Твоего́, и сего́ всели́ во дворы́ твоя́, я́коже е́сть пи́сано, презира́я я́ко бла́г прегреше́ния его́, во́льная и нево́льная, и вся́ я́же в ве́дении и не в ве́дении, Человеколю́бче.

Сла́ва, и ны́не:

От Де́вы возсия́вый ми́ру Христе́ Бо́же, сы́ны све́та то́ю показа́вый, поми́луй на́с.

Та́же степе́нны, гла́с 6:

На не́бо о́чи мои́ возвожу́ к Тебе́ сло́ве: уще́дри мя́, да живу́ тебе́.

Поми́луй на́с уничиже́нных, устроя́я благопотре́бныя твоя́ сосу́ды, сло́ве.

Сла́ва: Свято́му Ду́ху, вся́кая всеспаси́тельная вина́: а́ще ко́ему се́й по достоя́нию дхне́т, ско́ро взе́млет от земны́х, восперя́ет, возраща́ет, устроя́ет горе́.

И ны́не, то́йже.

Та́же проки́мен, гла́с 6:

Блаже́н пу́ть, во́ньже и́деши дне́сь душе́, я́ко угото́вася тебе́ ме́сто упокое́ния.

Сти́х: Обрати́ся душе́ моя́ в поко́й тво́й, я́ко Госпо́дь бла́го сотвори́ тебе́.

К солу́няном посла́ния свята́го Апо́стола Па́вла  чте́ние, зача́ло 270:

Бра́тие, не хощу́ ва́с не ве́дети о уме́рших, да не скорбите́, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се, та́ко и Бо́г уме́ршыя о Иису́се приведе́т с ни́м. Сие́ бо ва́м глаго́лем сло́вом Госпо́дним, я́ко мы́ живу́щии оста́вшии в прише́ствие Госпо́дне, не и́мамы предвари́ти уме́рших. Я́ко са́м Госпо́дь в повеле́нии во гла́се арха́нгелове, и в трубе́ Бо́жии сни́дет с небесе́, и ме́ртвии о Христе́ воскре́снут пе́рвее. Пото́м же мы́ живу́щии оста́вшии, ку́пно с ни́ми восхище́ни бу́дем на о́блацех, в сре́тение Госпо́дне на возду́се: и та́ко всегда́ с Го́сподем бу́дем.

Свяще́нник: Ми́р ти́.

Чте́ц: И ду́хови твоему́.

Чте́ц, псало́м Дави́дов.

Аллилу́иа, гла́с 8:

Блаже́н, его́же избра́л и прия́л еси́ Го́споди.

Диа́кон: Прему́рость, про́сти услы́шим свята́го Ева́нглиа.

Свяще́нник: От Иоа́нна свята́го Ева́нглиа чте́ние. Зача́ло 16.

Рече́ Госпо́дь ко прише́дшым к нему́ иуде́ем: ами́нь ами́нь глаго́лю ва́м, я́ко слу́шаяй словесе́ Моего́ и ве́руяй Посла́вшему Мя́, и́мать живо́т ве́чный: и на су́д не прии́дет, но пре́йдет от сме́рти в живо́т. Ами́нь ами́нь глаго́лю ва́м: я́ко гряде́т ча́с, и ны́не е́сть, егда́ ме́ртвии услы́шат гла́с Сы́на Бо́жия, и услы́шавше оживу́т. Я́коже бо Оте́ц и́мать живо́т в Себе́, та́ко да́ст и Сы́нови живо́т име́ти в Себе́: И о́бласть да́ст Ему́, и су́д твори́ти: я́ко Сы́н Челове́чь е́сть, не диви́теся сему́. Я́ко гряде́т ча́с, во́ньже вси́ су́щии во гробе́х услы́шат гла́с Сы́на Бо́жия: И изы́дут сотво́ршии Блага́я в воскреше́ние живота́, а сотво́ршии зла́я в воскреше́ние суда́. Не могу́ Аз о Себе́ твори́ти ничесо́же: я́коже слы́шу, сужду́, и су́д Мо́й пра́веден е́сть: я́ко не ищу́ во́ли Моея́, но во́ли посла́вшаго Мя́ Отца́.

Та́же диа́кон: Го́споду помо́лимся.

Ли́к: Го́споди поми́луй.

И свяще́нник моли́тву.

Влады́ко Го́споди Бо́же на́ш, еди́не име́яй безсме́ртие, во све́те живы́й непристу́пном: убива́яй и оживотворя́яй, низводя́й во а́д и возводя́й. Ты́ прему́дростию созда́л еси́ челове́ка, и па́ки в зе́млю того́ возвраща́еши, душе́вный до́лг истязу́яй: тебе́ мо́лим, приими́ ду́шу раба́ Твоего́, и упоко́й его́ в не́дрех Авраа́ма, и Исаа́ка, и Иа́кова. И да́ждь ему́ вене́ц пра́вды твоея́, ча́сть спаса́емых, в сла́ву избра́нных твои́х: да о ни́хже труди́ся в ми́ре се́м и́мене Твоего́ ра́ди, прии́мет бога́тное воздая́ние во оби́телех святы́х Твои́х благода́тию и щедро́тами, и человеколю́бием Единоро́днаго Сы́на Твоего́, Го́спода на́шего Иису́са Христа́, ами́нь.

Седа́льны, гла́с 2:

Дне́сь разлуча́юся от сро́дства, и к Тебе́ прибега́ю еди́ному безгре́шному: в селе́ниих пра́ведных со избра́нными твои́ми упоко́й.

Та́же, глаго́лет псало́м 22.

Госпо́дь пасе́т мя́, и ничто́же мя́ лиши́т:

Аллилу́иа, три́жды, повторя́юще и про́чая псалма́, на ки́йждо сти́х аллилу́иа.

Та́же настоя́щий тропа́рь, гла́с 2:

Поне́же вси́ к то́йже ну́димся оби́тели, и под то́йжде по́йдем ка́мень, и са́ми пра́х по ма́ле бу́дем: преста́вльшемуся поко́я от Христа́ про́сим. Сицево́е бо на́ше житие́, бра́тие, сие́ на земли́ игра́лище, не су́щым бы́ти, и бы́вшым растле́тися: со́ние есмы́ непостоя́нное, дунове́нием неодержи́мое, паре́ние птенца́ преходя́щаго, кора́бль на мо́ри сле́да не имы́й. те́мже возопии́м к безсме́ртному Царю́: Го́споди, безконе́чнаго твоего́ блаже́нства сподо́би его́.

Проки́мен, гла́с 6: Блаже́н, его́же избра́л и прия́л еси́ Го́споди.

Сти́х: Тебе́ подоба́ет пе́снь Бо́же в Сио́не.

Апо́стол к ри́мляном, зача́ло 89:

Бра́тие, я́коже еди́нем челове́ком гре́х в ми́р вни́де, и грехо́м сме́рть: и та́ко сме́рть во вся́ челове́ки вни́де, в не́мже вси́ согреши́ша. До зако́на бо гре́х бе́ в ми́ре: гре́х же не вменя́шеся, не су́щу зако́ну. Но ца́рствова сме́рть от Ада́ма да́же до моисе́а, и над несогре́шшими, по подо́бию преступле́ния Ада́мова, и́же е́сть о́браз бу́дущаго. Но не я́коже прегреше́ние, та́ко и да́р. а́ще бо прегреше́нием еди́наго мно́зи умро́ша: мно́жае па́че благода́ть Бо́жия, и да́р благода́тию еди́наго челове́ка Иису́са Христа́, во мно́гих преизли́шествова. И не я́коже еди́нем согре́шшим, дарова́ние: гре́х бо из еди́наго бо осужде́ние, да́р же от мно́гих прегреше́ний, во оправда́ние. А́ще бо еди́наго прегреше́нием, сме́рть ца́рствова еди́нем: мно́жае па́че избы́ток благода́ти, и да́р пра́вды прие́млюще, в жи́зни воцаря́тся еди́нем Иису́с Христо́м. Те́мже у́бо, я́коже еди́наго прегреше́нием во вся́ челове́ки вни́де осужде́ние: та́коже и еди́наго оправда́нием во вся́ челове́ки вни́де оправда́ние жи́зни. Я́коже бо ослуша́нием еди́наго челове́ка гре́шни бы́ша мно́зи: си́це и послуша́нием еди́наго пра́ведни бу́дут мно́зи. Зако́н же привни́де, да умно́жится прегреше́ние: иде́же бо умно́жися гре́х, преизбы́точествова благода́ть. Да я́коже ца́рствова гре́х во сме́рть: та́коже и благода́ть воцари́тся пра́вдою в жи́знь ве́чную Иису́с Христо́м Го́сподем на́шим.

Аллилу́иа, гла́с 6:

Сти́х: Блаже́н, его́же избра́л и прия́л еси́ Го́споди.

Ева́нгелие от Иоа́нна, зача́ло 15:

Рече́ Госпо́дь ко прише́дшым к Нему́ иуде́ем: Оте́ц Мо́й досе́ле де́лает и Аз де́лаю. Сего́ же ра́ди па́че иска́ху Его́ иуде́е уби́ти, я́ко не то́кмо разоря́ше суббо́ту, но и Отца́ Своего́ глаго́лаше Бо́га, ра́вен Ся́ творя́ Бо́гу. Отвеща́в же Иису́с, и рече́ и́м: ами́нь ами́нь глаго́лю ва́м: не мо́жет Сы́н твори́ти о сСебе́ ничесо́же, а́ще не е́же ви́дит Отца́ творя́ща: я́же бо Он твори́т, сия́ и Сы́н та́кожде твори́т. Оте́ц бо лю́бит Сы́на, и вся́ показу́ет Ему́, я́же Са́м твори́т: и бо́льша си́х пока́жет Ему́ дела́, да вы́ чудите́ся. Я́коже бо Оте́ц воскреша́ет ме́ртвыя и живи́т: та́ко и Сы́н, и́хже хо́щет, живи́т. Оте́ц бо не су́дит никому́же, но су́д ве́сь да́ст Сы́нови: Да вси́ чту́т Сы́на, я́коже чту́т Отца́: а и́же не чти́т Сы́на, не чти́т Отца́ посла́вшаго Его́. Ами́нь ами́нь глаго́лю ва́м: я́ко слу́шаяй словесе́ Моего́ и ве́руяй посла́вшему Мя́, и́мать живо́т ве́чный, и на су́д не прии́дет: но пре́йдет от сме́рти в живо́т.

Та́же диа́кон: Го́споду помо́лимся.

И свяще́нник:

Благодари́м тя́ Го́споди Бо́же на́ш, я́ко твое́ то́чию е́сть е́же жи́ти безсме́ртне, и сла́ва непостижи́ма, и человеколю́бие неизрече́нно, и Ца́рство непрее́мно, и лицеме́рия не́сть у тебе́: все́м бо челове́ком о́бщии жития́ счини́л еси́ преде́л, житию́ испо́лншуся. те́мже тя́ про́сим Го́споди: раба́ Твоего́, и сослужи́теля на́шего бы́вшаго, и́мярек, в наде́жде воскресе́ния жи́зни ве́чныя усо́пшаго, в не́дрех Авраа́ма, и Исаа́ка, и Иа́кова упоко́й. Я́коже на земли́ в це́ркви служи́теля того́ поста́вил еси́, та́ко и в небе́сном твое́м же́ртвеннице покажи́ Го́споди: поне́же в челове́цех духо́вных досто́инством сего́ украси́л еси́, и во а́нгельскую сла́ву неосужде́нна того́ приими́: са́м на земли́ жи́знь его́ просла́вил еси́, са́м же и исхо́д жития́ его́, во вхо́де святы́х Твои́х пра́ведных вчини́: ду́х его́ со все́ми от ве́ка Тебе́ благоугоди́вшими счисли́.

Я́ко Ты́ еси́ воскресе́ние, и живо́т, и поко́й усо́пшаго раба́ Твоего́, и́мярек, Христе́ Бо́же на́ш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Антифо́н 2:

А́ще не Госпо́дь бы бы́л в на́с, никто́же от на́с проти́ву возмо́гл бы вра́жиим бра́нем одоле́ти: побежда́ющии бо от зде́ возно́сятся.

Зубы́ и́х да не я́та бу́дет душа́ моя́ я́ко птене́ц, сло́ве. увы́ мне́, ка́ко и́мам от врага́ избы́ти грехолюби́в сы́й!

Сла́ва: Святы́м ду́хом, обоже́ние все́х, благоволе́ние, ра́зум, ми́р и благослове́ние: равноде́тельный бо е́сть отцу́ и сло́ву.

И ны́не, то́йже.

Госпо́дня земля́ и исполне́ние ея́.

Аллилу́иа, три́жды, повторя́юще и про́чая псалма́.

Сла́ва, аллилу́иа: И ны́не, аллилу́иа.

Тропа́рь, гла́с 2:

В ве́ре, и наде́жде, и любви́, и кро́тости, и чистоте́, и в свяще́нническом досто́инстве благоче́стно пожи́л еси́, приснопа́мятне. те́мже тя́ преве́чный Бо́г, ему́же и рабо́тал еси́, са́м вчини́т ду́х Тво́й, в ме́сте све́тле и кра́сне, иде́же пра́веднии упокоева́ются: и получи́ши на суде́ Христо́ве оставле́ние, и ве́лию ми́лость.

Седа́лен, гла́с 5:

Ве́си Бо́же на́ш, я́ко во гресе́х роди́хомся: те́мже тя́ мо́лим, преста́вльшагося от на́с упоко́й, презира́я я́ко бла́г согреше́ния, я́же я́ко челове́к сме́ртный в житии́ соде́я, моли́твами Богоро́дицы, еди́не человеколю́бче.

Проки́мен, гла́с 6:

Блаже́н, его́же избра́л и прия́л еси́ Го́споди.

Сти́х: Па́мять его́ в ро́д и ро́д.

Апо́стол к кори́нфяном, зача́ло 158.

Бра́тие, сказу́ю ва́м благовествова́ние, е́же благовести́х ва́м, е́же и прия́сте, в не́мже и стоите́: И́мже и спаса́етеся, ка́цем сло́вом благовести́х ва́м, а́ще содержите́, ра́зве а́ще не всу́е ве́ровасте. Преда́х бо ва́м испе́рва, е́же и прия́х, я́ко Христо́с у́мре гре́х на́ших ра́ди, по писа́нием: И я́ко погребе́н бы́сть, и я́ко воста́ в тре́тий де́нь, по писа́нием: И я́ко яви́ся ки́фе, та́же единона́десятим. Пото́м же яви́ся бо́ле пяти́ со́т бра́тиям еди́ною, от ни́хже мно́жайшии пребыва́ют досе́ле, не́цыи же и почи́ша. Пото́м же яви́ся Иа́кову, та́же апо́столом все́м. Последи́ же все́х, я́ко не́коему и́звергу, яви́ся и мне́. а́з бо е́смь мни́й апо́столов, и́же не́смь досто́ин нарещи́ся апо́стол, зане́ гони́х це́рковь Бо́жию. Благода́тию же Бо́жиею е́смь, е́же е́смь: и благода́ть его́, я́же во мне́, не тща́ бы́сть, но па́че все́х и́х потруди́хся: не а́з же, но благода́ть Бо́жия я́же со мно́ю. А́ще у́бо а́з, а́ще ли они́, та́ко пропове́дуем, и та́ко ве́ровасте.

Аллилу́иа: Блаже́н, его́же избра́л и прия́л еси́ Го́споди.

Ева́нгелие от Иоа́нна, зача́ло 21.

Рече́ Госпо́дь ко прише́дшым к нему́ иуде́ем: Аз е́смь хле́б живо́тный: гряды́й ко Мне́, не и́мать взалка́тися: и ве́руяй в Мя́, не и́мать вжажда́тися никогда́же. Но ре́х ва́м, я́ко и ви́десте Мя́, и не ве́руете. Все́ е́же да́ст Мне́ Оте́ц, ко Мне́ прии́дет: и гряду́щаго ко Мне́ не изжену́ во́н, я́ко снидо́х с небесе́, не да творю́ во́лю Мою́, но во́лю посла́вшаго Мя́ Отца́. Се́ же е́сть во́ля посла́вшаго Мя́ Отца́, да все́, е́же да́ст Ми́, не погублю́ от Него́, но воскрешу́ е́ в после́дний де́нь.

Та́же диа́кон: Го́споду помо́лимся.

И свяще́нник моли́тву сию́:

Го́споди си́л, скорбя́щих ра́досте, и пла́чущих утеше́ние, и все́х в малоду́шии су́щих заступле́ние сы́й: пла́чем усо́пшаго содержи́мыя, твои́м благоутро́бием уте́шив, вся́кую боле́знь слежа́щую в сердца́х и́х исцели́, и раба́ Твоего́, и́мярек, в наде́жде воскресе́ния жи́зни ве́чныя усо́пшаго, в не́дрех Авраа́млих упоко́й.

Я́ко Ты́ еси́ воскресе́ние, живо́т и упокое́ние раба́ Твоего́, и́мярек, Христе́ Бо́же на́ш, и Тебе́ сла́ву возсыла́ем со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Антифо́н 3:

Наде́ющиися на Го́спода враго́м стра́шни и все́м ди́вни, горе́ бо зря́т.

В беззако́ния ру́к свои́х, пра́ведных жре́бий, помо́щника тя́ име́яй Спа́се, не простира́ет.

Сла́ва: Свята́го Ду́ха держа́ва на все́х: ему́же вы́шняя во́инства покланя́ются, со вся́ким дыха́нием до́льним.

И ны́не, то́йже: Ко́ль возлю́бленна селе́ния твоя́ Го́споди си́л:

Аллилу́иа, три́жды, повторя́юще по чи́ну и про́чая псалма́.

Та́же тропа́рь, гла́с 6:

Бра́тие мои́ возлю́бленнии, не забыва́йте мя́, егда́ пое́те Го́спода: но помина́йте и бра́тство, и моли́те Бо́га, да упоко́ит мя́ с пра́ведными Госпо́дь.

Тропа́рь, гла́с 6:

Напра́сная наста́ на мя́ сме́рть, и разлучи́ла мя́ е́сть от свои́х мои́х дне́сь: но преста́вивый мя́ Христе́, в ме́стех прохла́дных упоко́й.

Поми́луй на́с Го́споди, поми́луй на́с, вся́каго бо отве́та недоуме́юще, сию́ ти́ моли́тву я́ко Влады́це гре́шнии прино́сим: поми́луй на́с.

Сла́ва: Го́споди, поми́луй на́с, на Тя́ бо упова́хом, не прогне́вайся на ны́ зело́. ниже́ помяни́ беззако́ний на́ших: но при́зри и ны́не я́ко благоутро́бен, и изба́ви ны́ от вра́г на́ших. Ты́ бо еси́ Бо́г на́ш, и мы́ лю́дие Твои́, вси́ дела́ руку́ Твое́ю, и и́мя Твое́ призыва́ем.

И ны́не, богоро́дичен: Милосе́рдия две́ри отве́рзи на́м, благослове́нная Богоро́дице, наде́ющиися на Тя́ да не поги́бнем, но да изба́вимся Тобо́ю от бе́д: Ты́ бо еси́ спасе́ние ро́да Христиа́нскаго.

Проки́мен, гла́с 6:

Душа́ его́ во благи́х водвори́тся.

Сти́х: К тебе́ Го́споди воззову́:

Апо́стол к кори́нфяном, зача́ло 160.

Бра́тие, Христо́с воста́ от ме́ртвых нача́ток уме́ршым бы́сть: Поне́же бо челове́ком сме́рть бы́сть, и челове́ком воскресе́ние ме́ртвых. Я́коже бо о Ада́ме вси́ умира́ют, та́кожде и о Христе́ вси́ оживу́т. Ко́ждо же во свое́м чину́: нача́ток Христо́с, пото́м же Христу́ ве́ровавшии в прише́ствии его́. Та́же кончи́на, егда́ преда́ст Ца́рство Бо́гу и Отцу́, егда́ испраздни́т вся́ко нача́льство, и вся́ку вла́сть и си́лу. Подоба́ет бо ему́ ца́рствовати, до́ндеже положи́т вся́ враги́ под нога́ма свои́ма. После́дний же вра́г испраздни́тся, сме́рть: Вся́ бо покори́ под но́зе его́, внегда́ же рещи́, я́ко вся́ покоре́на су́ть ему́, я́ве я́ко ра́зве поко́ршаго ему́ вся́. Егда́ же покори́т ему́ вся́ческая, тогда́ и са́м Сы́н покори́тся поко́ршему ему́ вся́ческая: да бу́дет Бо́г вся́ческая во все́х.

Аллилу́иа: Блаже́н му́ж боя́йся Го́спода.

Сти́х: Си́льно на земли́ бу́дет се́мя его́.

Ева́нгелие от Иоа́нна, зача́ло 22.

Рече́ Госпо́дь ко прише́дшым к нему́ иуде́ом: се́ е́сть во́ля посла́вшаго мя́, да вся́к ви́дяй Сы́на, и ве́руяй в него́, и́мать живо́т ве́чный: и воскрешу́ его́ а́з в после́дний де́нь. Ропта́ху у́бо иуде́е о не́м, я́ко рече́: а́з е́смь хле́б сше́дый с небесе́: И глаго́лаху: не се́й ли е́сть Иису́с сы́н ио́сифов, ему́же мы́ зна́ем отца́ и ма́терь? ка́ко у́бо глаго́лет се́й, я́ко с небесе́ снидо́х? Отвеща́ у́бо Иису́с, и рече́ и́м: не ропщи́те между́ собо́ю: Никто́же мо́жет приити́ ко мне́, а́ще не оте́ц посла́вый мя́ привлече́т его́, и а́з воскрешу́ его́ в после́дний де́нь.

Та́же блаже́нны, во гла́с 2:

Во Ца́рствии Твое́м, помяни́ на́с Го́споди, егда́ прии́деши во Ца́рствии Твое́м.

Блаже́ни ни́щии ду́хом, я́ко те́х е́сть Ца́рство небе́сное.

Блаже́ни пла́чущии, я́ко ти́и уте́шатся.

Блаже́ни кро́тцыи, я́ко ти́и насле́дят зе́млю.

Блаже́ни а́лчущии, и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Дре́вле у́бо Ада́м, вкуси́вый дре́ва сне́днаго, из рая́ изгна́н бы́сть: разбо́йник же на кресте́ пове́шен, Бо́га тя́ испове́дав, в ра́й всели́ся: и мы́ спа́сшиися стра́стию Твое́ю Влады́ко, разбо́йника подража́юще, ве́рою вопие́м: помяни́ и на́с, егда́ прии́деши во Ца́рствии Твое́м.

Блаже́ни чи́стии се́рдцем, я́ко ти́и Бо́га у́зрят.

Пе́рсть взе́м от земли́ созда́вый мя́, те́ло мое́ созда́л е́сть Боже́ственным хоте́нием: ду́шу же живоно́сным дунове́нием вдохну́в, вложи́ повеле́нием святы́м. Отню́дуже тле́нию грехо́вному зле́ подведе́на мя́ воззва́л еси́ человеколю́бче, за кра́йнее благоутро́бие. но упоко́й. Бо́же, его́же прия́л еси́, со святы́ми твои́ми.

Блаже́ни миротво́рцы, я́ко ти́и сы́нове Бо́жии нареку́тся.

Егда́ душа́ от те́ла разлуча́ется, ужа́сное та́инство и стра́шное все́м: душа́ у́бо плаче́вно отхо́дит, те́ло же покрыва́ется земли́ предано́: те́мже и мы́, позна́вше коне́чный исхо́д, ко спа́су предвари́м, со слеза́ми вопию́ще: помяни́ и на́с, егда́ прии́деши во Ца́рствии Твое́м.

Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Почто́ мене́ рыда́ете лю́то, о челове́цы? почто́ всу́е мяте́теся? преста́вленный все́м провещава́ет: сме́рть бо е́сть все́м упокое́ние. отню́дуже гла́с и́ова услы́шим глаго́люще: сме́рть му́жу поко́й е́сть. но упоко́й Бо́же, его́же прия́л еси́, со святы́ми твои́ми.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще мене́ ра́ди.

Всему́дрый Па́вел предрече́ я́ве преставле́ние, все́х науча́яй, я́ко ме́ртвии воста́нут нетле́нни, мы́ же измени́мся Бо́жиим повеле́нием: те́м стра́шно и труба́ о́ная возгласи́т, от ве́ка спя́щыя от сна́ возста́вит. но упоко́й Бо́же, его́же прия́л еси́, со святы́ми твои́ми.

Ра́дуйтеся и весели́теся, я́ко мзда́ ва́ша мно́га на небесе́х.

Преста́вленный и во гро́бе лежа́й ме́ртвый, благопримири́тельный все́м вопие́т: прииди́те земноро́днии ко мне́, у́зрите добро́ту теле́сную очерне́вшу: те́мже от нея́ позна́вше бра́тие исхо́д, ко спа́су предвари́м со сле́зами вопию́ще: упоко́й того́ Бо́же, его́же прия́л еси́, со святы́ми твои́ми.

Сла́ва и ны́не, богоро́дичен:

Преесте́ственне во чре́ве твое́м Влады́чице безсе́менно зачала́ еси́ Бо́га преве́чнаго, и пло́тию того́ родила́ еси́, Бо́га же и челове́ка, непрело́жно и неслия́нно. отню́дуже и мы́ Богоро́дицу тя́ при́сно зна́юще, ро́ждшемуся из тебе́ Бо́гу ве́рою вопие́м: помяни́ и на́с во Ца́рствии Твое́м.

Проки́мен, гла́с 6:

Блаже́н, его́же избра́л и прия́л еси́ Го́споди.

Сти́х: Душа́ его́ во благи́х водвори́тся.

Апо́стол к ри́мляном, зача́ло 113.

Бра́тие, му́дрствуяй де́нь, Го́сподеви му́дрствует: и не му́дрствуяй де́нь, Го́сподеви не му́дрствует. яды́й, Го́сподеви я́ст, благодари́т бо Бо́га: и не яды́й, Го́сподеви не я́ст, и благодари́т Бо́га. Никто́же бо на́с себе́ живе́т и никто́же себе́ умира́ет. А́ще у́бо живе́м, Го́сподеви живе́м: а́ще же умира́ем, Го́сподеви умира́ем: а́ще у́бо живе́м, а́ще умира́ем, Госпо́дни есмы́. На сие́ бо Христо́с и у́мре, и воскре́се и оживе́, да и ме́ртвыми и живы́ми облада́ет.

Аллилу́иа, гла́с 6:

Блаже́н, его́же избра́л и прия́л еси́, Го́споди.

Сти́х: Душа́ его́ во благи́х водвори́тся.

Ева́нгелие от Иоа́нна, зача́ло 23:

Рече́ Госпо́дь ко прише́дшым к нему́ иуде́ем: а́з е́смь хле́б живо́тный. Отцы́ ва́ши ядо́ша ма́нну в пусты́ни, и умро́ша. Се́й е́сть хле́б сходя́й с небесе́, да а́ще кто́ от него́ я́ст, не у́мрет. а́з е́смь хле́б живо́тный, и́же сше́дый с небесе́: а́ще кто́ сне́сть от хле́ба сего́, жи́в бу́дет во ве́ки: и хле́б его́же а́з да́м, пло́ть моя́ е́сть, ю́же а́з да́м за живо́т ми́ра. Пря́хуся же между́ собо́ю жи́дове, глаго́люще: ка́ко мо́жет се́й на́м да́ти пло́ть свою́ я́сти? Рече́ же и́м Иису́с: ами́нь ами́нь глаго́лю ва́м, а́ще не сне́сте пло́ти Сы́на челове́ческаго, ни пие́те кро́ве его́, живота́ не и́мате в себе́. Яды́й мою́ пло́ть, и пия́й мою́ кро́вь, и́мать живо́т ве́чный: и а́з воскрешу́ его́ в после́дний де́нь.

Та́же псало́м 50. И кано́н, гла́с 6:

Пе́снь 1.

Ирмо́с: Волно́ю морско́ю, скры́вшаго дре́вле гони́теля мучи́теля, под земле́ю скры́ша, спасе́нных о́троцы: но мы́ я́ко отрокови́цы, Го́сподеви пои́м, сла́вно бо просла́вися.

Припе́в: Упоко́й Го́споди, ду́шу усо́пшаго раба́ Твоего́.

Тебе́ благоде́телю, и все́х Влады́це Христу́ припа́даем со слеза́ми те́пле, надгро́бную сию́ с пла́чем взыва́юще пе́снь: ве́рнаго раба́ Твоего́ упоко́й, я́ко благоутро́бен.

Е́же одесну́ю тебе́ сподо́би сло́ве, свята́го стоя́ния со избра́нными твои́ми, в наде́жде воскресе́ния уме́ршаго человеколю́бче, приле́жно мо́лимся со гла́сом хвале́ния.

В небе́сном честно́м Ца́рствии твоего́ избра́ннаго раба́ све́тло ра́доватися, от земли́ преста́вльшагося сподо́би человеколю́бче, презира́яй, я́ко благоутро́бен, душе́вныя согреше́ния.

Сла́ва: Увы́ мне́, я́ко трава́ жите́йская сла́ва вку́пе прозябе́, и а́бие у́сше. где́ во гро́бе са́н? где́ зра́к, или́ добро́та та́мо? те́мже пощади́, Го́споди, раба́ Твоего́, я́ко благоутро́бен.

И ны́не, богоро́дичен: По до́лгу вси́ любо́вию воспева́ем тя́ Де́во Пречи́стая мари́е, Ма́ти Бо́жия, я́ко неусыпа́емое и́маши моли́твы твоея́ о́ко при́сно, от прегреше́ний изба́ви ны́не и суда́ сме́ртнаго на́с.

Пе́снь 3.

Ирмо́с: Не́сть свя́т, я́коже ты́ Го́споди Бо́же мо́й, вознесы́й ро́г ве́рных Твои́х Бла́же и утверди́вый на́с на ка́мени испове́дания Твоего́.

Не́сть челове́к на земли́, и́же не согреши́, сло́ве: те́мже моле́ние приими́, на́ми смире́нными. но осла́би, оста́ви Спа́се, Твоего́ раба́ вся́ согреше́ния.

И кто́ человеколю́бец, я́коже ты́ Го́споди ми́лостив, проща́яй грехи́ и живы́м и ме́ртвым вла́стию мно́гою? те́мже то́ю спаси́ и раба́ Твоего́.

Сла́ва: Го́рняго зва́ния Спа́се, ве́рно преста́вльшагося покажи́ снасле́дника, прие́мля того́ коне́чную моли́тву сле́зную, еди́не безгре́шне.

И ны́не, богоро́дичен: Су́щая Влады́чица на́ша, Всесвята́я Де́во, моля́щи не преста́й, то́же родила́ еси́ Бо́га, преста́вльшагося ве́рно, Ца́рствия своего́ сподо́бити.

Седа́лен, гла́с 6:

Вои́стинну суета́ вся́ческая, житие́ же се́нь и со́ние е́сть. и́бо всу́е мяте́тся вся́к земноро́дный, я́коже рече́ писа́ние: егда́ ми́р приобря́щем, тогда́ во гро́б всели́мся, иде́же ку́пно ца́рие и ни́щии. те́мже Христе́, раба́ Твоего́ во стране́ живы́х, в селе́ниих пра́ведных упоко́й.

Пе́снь 4.

Ирмо́с: На кресте́ твое́ Боже́ственное истоща́ние, прови́дя авваку́м, ужа́сся вопия́ше: ты́ си́льных пресе́кл еси́ держа́ву Бла́же, приобща́яся су́щым во а́де, я́ко всеси́лен.

Я́ко су́д нестерпи́мый е́сть стра́шнаго преще́ния о́наго дне́, преста́вльшемуся в ве́ре и наде́жде воскресе́ния, оставле́ние все́х согреше́ний приле́жно у Христа́ про́сим.

Я́коже покая́нием возже́гшаго тебе́ свещу́ Христе́ све́тло, пре́жде сме́рти, раба́ Влады́ко благоутро́бне Спа́се, черто́га твоего́ сего́ све́тло сподо́би.

Сла́ва: Егда́ обнажи́ши сокрове́нная вся́, и обличи́ши Христе́ на́шя грехи́, его́же прия́л еси́ Го́споди, пощади́ благи́й, его́ помина́яй испове́дание.

И ны́не, богоро́дичен: Не забыва́й вопию́щих ти́ с пла́чем приле́жно, свята́я Богоро́дице, все́х упокое́ние, обрести́ Блага́я ве́рному Твоему́ рабу́, от на́с преста́вльшемуся.

Пе́снь 5.

Ирмо́с: Богоявле́ния твоего́ Христе́, к на́м ми́лостивно бы́вшаго, иса́иа све́т ви́дев невече́рний, из но́щи у́треневав взыва́ше: воскре́снут ме́ртвии, и воста́нут су́щии во гробе́х, и вси́ земноро́днии возра́дуются.

В ли́це избра́нных, и в сла́дости Ще́дре ра́йской, его́же в ве́ре о на́с преста́вил еси́, упоко́й: ты́ бо положи́л еси́ все́м, Спа́се на́ш, согреша́ющым челове́ком покая́ние Боже́ственное. я́ко Влады́ка, и сего́ Ца́рствия Твоего́ сподо́би.

По вла́сти я́ко Бо́г, Влады́чне ми́луеши твое́ созда́ние, его́же зако́ну челове́ческому Го́споди покори́л еси́, еди́не человеколю́бче: те́мже осла́би, оста́ви Спа́се, преста́вльшагося ве́рою грехи́, и сего́ Ца́рствия Твоего́ сподо́би.

Сла́ва: Никто́же убе́гнет та́мо стра́шнаго суда́ твоего́ Престо́ла. ца́рие си́льнии, вси́ с рабы́ вку́пе предста́нут, и гла́с судии́ стра́шный согреши́вших люде́й на су́д гее́нны отшле́т: от нея́же Христе́, изба́ви раба́ Твоего́.

И ны́не, богоро́дичен: Из тебе́ рожде́йся изба́витель преесте́ственне по естеству́ челове́ческому: его́же Де́во неневе́стная приле́жно моли́, изба́вити все́х му́к, и лю́тых и стра́шных а́дских муче́ний: спаси́ и́же от на́с ны́не преста́вльшагося ве́рно.

Пе́снь 6.

Ирмо́с: Бе́здна после́дняя грехо́в обы́де мя́, и волне́ния не ктому́ терпя́, я́ко ио́на Влады́це вопию́ ти: от тли́ мя возведи́.

Сме́рть и гро́б, и су́д на́с ожида́ет, облича́ющий дела́ вся́: от него́же раба́ Твоего́ изба́ви человеколю́бче, его́же преста́вил еси́.

Отве́рзи Спа́се мо́й, преста́вльшемуся, мо́лимся тебе́, ми́лости Твоея́ Христе́ две́рь, да ликовству́ет в сла́ве причаща́яйся весе́лия держа́вы твоея́.

Сла́ва: Изба́ви прегреше́ний Твое́ю ми́лостию Спа́се Твоего́ раба́, его́же ны́не в ве́ре преста́вил еси́: я́ко никто́же оправда́ется от де́л челове́ческих, человеколю́бче.

И ны́не, богоро́дичен: Сме́рти умерщвле́ние, и кля́твы отя́тие созда́тель, пло́тию роди́ся Богороди́тельнице, и все́х в ве́ре уме́рших спаса́ет, я́ко Бла́г и Человеколю́бец.

Та́же, ектениа́ обы́чная: Па́ки и па́ки: И моли́тва, Бо́же духо́в:

Конда́к, гла́с 8:

Со святы́ми упоко́й Христе́, ду́шу раба́ Твоего́, иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос: Са́м еди́н еси́ безсме́ртный, сотвори́вый и созда́вый челове́ка: земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́, созда́вый мя́ и реки́й ми́: я́ко земля́ еси́, и в зе́млю оти́деши, а́може вси́ челове́цы по́йдем, надгро́бное рыда́ние, творя́ще пе́снь:

Аллилу́иа.

Мы́сленно молю́, услы́шите, с труды́ бо сия́ и веща́ю: ва́с бо ра́ди сотвори́х рыда́ние, не́гли име́ти кому́ в по́льзе: но егда́ сия́ пе́ти и́мате, помина́йте мя́ иногда́ зна́емаго. мно́гажды бо вку́пе снидо́хомся, и в дому́ Бо́жии вку́пе поя́хом:

Аллилу́иа.

Воста́вше у́бо вси́ собери́теся, и се́дше сло́во услы́шите: стра́шное, бра́тие, суди́ще, иде́же и́мамы вси́ предста́ти: не́сть та́мо ра́б, ниже́ свобо́ден, ниже́ е́сть та́мо ма́лый, ниже́ вели́кий, но вси́ на́зи предста́нем. сего́ ра́ди добро́ е́сть вопи́ти ча́сто псало́м:

Аллилу́иа.

Облии́мся вси́ слеза́ми, егда́ ви́дим мо́щи лежа́щыя, и прибли́жившеся вси́ целова́ти, ра́вне же и сия́ привещава́ти: се́ оста́вил еси́ лю́бящыя тя́, не глаго́леши с на́ми про́чее. о дру́же, чесо́ ра́ди не глаго́леши, я́коже глаго́лал еси́ на́м? но си́це молчи́ши, е́же глаго́лати с на́ми:

Аллилу́иа.

Что́ го́рькия умира́ющих глаго́лы, бра́тие, я́же веща́ют, егда́ отхо́дят? бра́тий разлуча́юся, друго́в оставля́ю все́х, и отхожду́. ка́мо у́бо иду́, не ве́м: или́ ка́ко и́мам бы́ти та́мо, не ве́м: то́чию Бо́г призва́вый мя́. но па́мять твори́те с пе́снию:

Аллилу́иа.

Ка́мо у́бо ду́шы ны́не и́дут? ка́ко у́бо ны́не та́мо пребыва́ют? жела́х ве́дати та́инство, но никто́же дово́лен пове́дати. еда́ и они́ помина́ют своя́, я́коже и мы́ о́ныя? или́ они́ про́чее забы́ша пла́чущыя и́х, и творя́щыя пе́снь:

Аллилу́иа.

Провожда́йте дру́зи уме́ршыя, и со тща́нием ко гро́бу дости́гните, и та́мо внима́тельне взира́йте, и но́ги ва́шя угото́вите: вся́кая ю́ность та́мо растли́ся, вся́к во́зраст та́мо увяде́: та́мо пра́х и пе́пел и че́рвие, та́мо вся́кое молча́ние, и никто́же глаго́ляй:

Аллилу́иа.

Се́ ны́не ви́дим лежа́ща, но на́м ктому́ не предлежа́ща: се́ уже́ и язы́к умолче́, се́ уже́ и устне́ преста́ша. здра́вствуйте дру́зи, ча́да: спаса́йтеся бра́тие, спаса́йтеся зна́емии, а́з бо в пу́ть мо́й ше́ствую: но па́мять твори́те о мне́, с пе́снию:

Аллилу́иа.

Никто́же бо та́мошних па́ки оживе́, да рече́т на́м, ка́ко пребыва́ют, и́же иногда́ бра́тия и вну́цы та́мо предвари́вше ко Го́споду. те́мже мно́жицею при́сно глаго́лем: еда́ е́сть та́мо ви́дети дру́г дру́га? еда́ е́сть та́мо ви́дети бра́тию? еда́ е́сть та́мо вку́пе рещи́ псало́м:

Аллилу́иа.

И́дем путе́м ве́чным, предстоя́ще я́коже осужде́ны, до́ле маа́юще вси́ ли́цами. где́ тогда́ добро́та? где́ пе́нязи? где́ сла́ва тогда́ жития́ сего́? ничто́же си́х та́мо помо́жет на́м, то́кмо глаго́лати ча́сто псало́м:

Аллилу́иа.

Что́ мяте́шися безвре́менно, о челове́че! еди́н ча́с, и вся́ прехо́дят: не́сть бо во а́де покая́ния, не́сть та́мо про́чее осла́бы: та́мо че́рвь неусыпа́емый, та́мо земля́ темна́ и помраче́на вся́, иде́же и́мам а́з осуди́тися. Не бо́ потща́хся весьма́ глаго́лати ча́сто псало́м:

Аллилу́иа.

Ничто́же си́це е́сть удобозабыва́емое, я́ко челове́ку от челове́ка разлуча́ему: а́ще бо и ма́ло вре́мя помина́ем, но а́бие сме́рть забыва́ем, я́ко не уме́рша сего́ иму́ще. и роди́телие бо ча́да вся́чески забыва́ют, я́же от утро́б ро́ждше воспита́ша, и испусти́ша сле́зы с пе́снию:

Аллилу́иа.

Воспомина́ю ва́м, бра́тие мои́, и ча́да, и дру́зи мои́, не забыва́йте мя́, егда́ мо́литеся ко Го́споду: молю́, прошу́, и ми́л ся де́ю, навыка́йте си́м в па́мять, и пла́чите мене́ де́нь и но́щь. я́коже и́ов к друго́м реку́ к ва́м: седи́те па́ки рещи́:

Аллилу́иа.

Вся́ оста́вльше и́дем, и на́зи и ско́рбни предста́нем: добро́та бо я́ко трава́ увяда́ет, но то́кмо прельща́емся челове́цы. на́г роди́лся еси́, о окая́нне, на́г и та́мо и́маши предста́ти вся́ко: не мечта́йся челове́че в житии́ когда́, но то́кмо. всегда́ стени́ с пла́чем:

Аллилу́иа.

А́ще поми́ловал еси́ челове́че челове́ка, то́й и́мать та́мо поми́ловати тя́: и а́ще кото́рому сироте́ сострада́л еси́, то́й изба́вит тя́ та́мо от ну́жды. а́ще в житии́ на́га покры́л еси́, то́й и́мать та́мо покры́ти тя́, и пе́ти псало́м:

Аллилу́иа.

Лука́вый пу́ть, и́мже отхожду́, и́мже никогда́же си́це ходи́х, и страна́ о́на незна́ема, иде́же никто́же ника́коже познава́ет мя́. ужа́сно е́сть ви́дети водя́щыя стра́шно, призва́вшаго мя́ живото́м и сме́ртию влады́чествующа, и зову́ща на́с, егда́ хо́щет, та́мо:

Аллилу́иа.

А́ще от страны́ не́кия иду́ще, водя́щыя не́кия тре́буем, что́ сотвори́м, а́може и́дем во страну́, иде́же не познава́ем: мно́гих тебе́ тогда́ води́телей потре́ба: мно́гих тебе́ моли́тв спутеше́ствующих, спасти́ ду́шу окая́нную, до́ндеже дости́гнути ко Христу́, и рещи́ к нему́:

Аллилу́иа.

Веще́ственным страсте́м подлежа́щии, та́мо осла́бы ника́коже и́мут: та́мо у́бо обличи́телие стра́шнии, та́мо же и кни́ги отверза́ются: где́ о́крест у́зриши тогда́ челове́че? или́ кто́ и́мать та́мо помощи́ тебе́ тогда́? ра́зве живы́й благо́е что́ сотвори́л еси́, и добро́ ни́щым что́ сотвори́л еси́, поя́:

Аллилу́иа.

Ю́ность и добро́та теле́сная во вре́мя сме́рти увяда́ет, и язы́к лю́те тогда́ опаля́ется, и горта́нь изсуши́вся воспаля́ется: оче́с добро́та тогда́ угаса́ет, добро́та лица́ изменя́ется вся́, добро́та вы́и сокруша́ется, и про́чее безмо́лвствует глаго́лати ча́сто:

Аллилу́иа.

Безмо́лвствуйте у́бо, безмо́лвствуйте: лежа́щему про́чее умолчи́те и вели́кое та́инство у́зрите, стра́шный бо ча́с. умолчи́те, да с ми́ром душа́ оти́дет, в по́двизе бо вели́цем соде́ржится, и во стра́се мно́зе мо́лит Бо́га:

Аллилу́иа.

А́з у́бо ви́дех Младе́нца умира́юща, и живо́т мо́й опла́ках: возмяте́ся бо весьма́ и трепета́ше, и егда́ прии́де ча́с, возопи́: о́тче, помози́ ми, Ма́ти, спаси́ мя, и никто́же дово́лен тогда́ помощи́ ему́, то́кмо ви́дяще увяда́ют, и во гро́бе пла́чут его́:

Аллилу́иа.

Коли́цы у́бо внеза́пу восхи́тишася от саме́х сосце́в во гро́б, и спряго́шася спряжа́нием ве́чным, и сотвори́ша пла́чь неиждиви́мый, и от черто́га не воста́ша: но вку́пе бра́к, вку́пе гро́б, вку́пе спряже́ние, вку́пе и распряже́ние, вку́пе сме́х, вку́пе и пла́чь, вку́пе и псало́м:

Аллилу́иа.

Разжига́емся то́кмо слы́шаще, я́ко е́сть та́мо све́т ве́чный, та́мо исто́чник живота́ на́шего, и та́мо наслажде́ние ве́чное: та́мо е́сть ра́й, о не́мже вся́кая душа́ пра́ведных ра́дуется. сни́демся вси́ во Христе́ и мы́, да си́це возопии́м вси́ Бо́гу:

Аллилу́иа.

Всесвята́я Де́во безневе́стная, ро́ждшая све́т непристу́пный, молю́, ми́л ся де́ю и прошу́: моля́щи не преста́й Го́спода о усо́пшем рабе́ Твое́м, Пречи́стая, я́ко да обря́щет та́мо оставле́ние прегреше́ний в де́нь су́дный, всеЧи́стая. дерзнове́ние бо и́маши я́ко Влады́чица, моли́ти Сы́на твоего́ всегда́:

Аллилу́иа.

Та́же па́ки конда́к: Со святы́ми упоко́й Христе́:

Пе́снь 7.

Ирмо́с: Неизрече́нное чу́до, в пещи́ изба́вивый преподо́бныя о́троки из пла́мене, во гро́бе ме́ртв бездыха́нен полага́ется, во спасе́ние на́с пою́щих: Изба́вителю Бо́же, благослове́н еси́.

Огня́ гее́нскаго, и стра́шнаго изрече́ния я́ко ще́др изба́ви Христе́, его́же в ве́ре от ны́не прия́л еси́ раба́ Твоего́, и пе́ти тебе́ пода́ждь Твоему́ рабу́: Изба́вителю Бо́же, благослове́н еси́.

В земли́ кро́тких, и в ра́йском наслажде́нии, усо́пшаго раба́ Твоего́ ве́рно, в ме́сте селе́ния сла́вы ди́вныя Бо́же сподо́бивый, пода́ждь пе́ти тебе́: Изба́вителю Бо́же, благослове́н еси́.

Сла́ва: Вели́к су́д, ну́жда же неисповеди́мая гее́нны е́сть, бра́тие: та́мо бо ду́шы гре́шных с те́лом у́бо паля́тся, и с боле́знию слезя́т, не могу́ще вопи́ти: Изба́вителю Бо́же, благослове́н еси́.

И ны́не: Несумне́нно Бо́жию ма́терь, пою́щыя тя́ Богоро́дице Пренепоро́чная, и живу́щыя при́сно огражда́й моли́твами твои́ми, преста́вльшыяся, го́рьких муче́ний изба́ви, да с тобо́ю Христу́ вопию́т: Изба́вителю Бо́же благослове́н еси́.

Пе́снь 8.

Ирмо́с: Ужасни́ся боя́йся не́бо, и да подви́жатся основа́ния земли́: се́ бо в мертвеце́х вменя́ется в вы́шних живы́й, и во гро́б ма́л странноприе́млется: его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.

О ки́й ча́с стра́шный согреша́ющих ожида́ет, бра́тие! о ки́й стра́х тогда́! о́гнь поя́ст гее́нский, и ве́чно му́чити бу́дет. Те́мже Христе́ ще́дрый Влады́ко, от на́с преста́вленнаго ны́не стра́шнаго преще́ния изба́ви, гее́нскаго муче́ния исхи́ти во ве́ки.

О ра́дости пра́ведных, ю́же прие́млют, егда́ прии́дет судия́! та́мо бо черто́г угото́вася и ра́й, и все́ Христо́во Ца́рство: в не́мже твоя́ рабы́ веселя́щыяся покажи́, со святы́ми Христе́ во ве́ки.

Сла́ва: Кто́ постои́т Христе́, прише́ствия твоего́ стра́шному преще́нию, та́мо не́бо свие́тся я́коже сви́ток стра́шно, и паду́т зве́зды, стра́хом поколе́блется вся́ тва́рь, и све́т измени́тся: но тогда́ пощади́ сло́ве, от на́с преста́вльшагося.

И ны́не, богоро́дичен: Его́же воплоти́ла еси́ Сы́на, па́че естества́ Чи́стая, се́й е́сть судия́ и живы́х и ме́ртвых, и судя́й все́й земли́, и спаса́ет от муче́ний, и́хже хо́щет: па́че же любо́вию покланя́ющихся во изъображе́ниих тому́, и тя́ воспева́ющих Богоро́дицу во вся́ ве́ки.

Пе́снь 9.

Ирмо́с: Не рыда́й мене́ Ма́ти зря́щи во гро́бе, его́же во чре́ве без се́мене зачала́ еси́ Сы́на: воста́ну бо и просла́влюся, и вознесу́ со сла́вою непреста́нно я́ко Бо́г, ве́рою и любо́вию тя́ велича́ющыя.

Не рыда́йте вси́ и́же в ве́ре уме́ршии, я́ко Христо́с о на́с претерпе́ пло́тию и кре́ст и погребе́ние, безсме́ртия сы́ны соде́ла вся́ вопию́щыя к нему́: не вни́ди в су́д с рабо́м Твои́м.

Я́ко в ве́ре и наде́жде воскресе́ния усо́пшаго бра́та во оби́телех святы́х вчини́ти, Христо́ви усе́рдно помо́лимся ве́рнии: су́д бо та́мо гро́зный, и испыта́ние стра́шное: и никто́же са́м себе́ помощи́ мо́жет, ра́зве Блага́я дела́, и о́бщая ве́рных моли́тва, и возопии́м: не вни́ди в су́д Го́споди, с рабо́м Твои́м.

Сла́ва: В нестаре́емей твое́й сла́ве, и сла́дости ра́йской, от на́с преста́вльшагося ны́не вчини́ Бла́же, я́ко правосла́вием и покая́нием прите́кшаго к Тебе́ в ве́ре, и сотвори́ его́ избра́нна предста́теля Ца́рствия Твоего́.

И ны́не, богоро́дичен: Тя́ я́ко ма́терь жи́зни па́че естества́ су́щую Богоро́дице Де́во, благоче́стно воспева́ем ве́рнии: тобо́ю бо мы́ уме́ршии пре́жде обезсме́ртившеся, обрето́хом живо́т, и се́ тебе́ пе́снь исполня́ем.

Диа́кон: Па́ки и па́ки:

И моли́тва: Бо́же духо́в:

Ексапостила́рий:

Ны́не упоко́ихся, и обрето́х осла́бу мно́гу, я́ко преста́вихся от истле́ния, и преложи́хся к животу́: Го́споди Сла́ва Тебе́.

И лю́дие то́йжде.

Сти́х: Челове́к я́ко трава́, дни́е его́ я́ко цве́т се́льный.

Сти́х 2: Я́ко ду́х про́йде в не́м, и не бу́дет.

Сти́х 3: И и́стина Госпо́дня пребыва́ет во ве́к.

И на ки́йждо сти́х ексапостила́рий.

Та́же, Сла́ва, и ны́не:

Ны́не избра́х богома́терь отрокови́цу, я́ко роди́ся из нея́ Христо́с изба́витель все́х: Го́споди Сла́ва Тебе́.

И а́бие: Хвали́те Го́спода с небе́с:

Та́же стихи́ры, гла́с 6.

Подо́бен: Отча́янная:

Обоготворе́н в преставле́нии животворя́щим твои́м Христе́ ны́не та́инством, к Тебе́ пре́йде Боже́ственный служи́тель тво́й: приими́ в ру́це твои́ ду́шу его́ я́ко птенца́, учини́ его́ во дво́рех твои́х и во а́нгельская ликостоя́ния, и упоко́й, его́же прия́л еси́ повеле́нием Твои́м Го́споди, вели́кия ра́ди Твоея́ ми́лости.

Стра́нное сме́рти та́инство: надхо́дит бо все́м в безго́дии, естество́ растлева́ется ну́ждею, ста́рцы взима́ет, игу́мены, кни́жники, учи́тели су́етная му́дрствующыя тли́т, епи́скопы, па́стыри. но воззове́м со слеза́ми: повеле́нием Твои́м Го́споди, его́же прия́л еси́, упоко́й вели́кия ра́ди Твоея́ ми́лости.

Жи́тельствовав во благоче́стии, и укра́шен свяще́нник тво́й Христе́, жре́ц и приноси́тель Боже́ственных та́инств, твои́м Боже́ственным повеле́нием пре́йде от жите́йских мо́лв к Тебе́: его́же я́ко свяще́нника Спа́се прии́м спаси́, и с пра́ведными упоко́й, его́же прия́л еси́, вели́кия ра́ди Твоея́ ми́лости.

Сла́ва, и ны́не, богоро́дичен:

Бо́га из тебе́ вопло́щшагося позна́хом богоро́дице Де́во: того́ моли́, спасти́ся душа́м на́шым.

Та́же глаго́лют: Сла́ва в вы́шних: И по е́же: Сподо́би Го́споди: глаго́лет настоя́щыя стихи́ры, самогла́сны дамаски́новы, гла́с 1:

Ка́я жите́йская сла́дость пребыва́ет печа́ли неприча́стна? ка́я ли сла́ва стои́т на земли́ непрело́жна? вся́ се́ни немощне́йша, вся́ со́ний преле́стнейша: еди́нем мгнове́нием, и сия́ вся́ сме́рть прие́млет. но во све́те Христе́ лица́ Твоего́, и в наслажде́нии твоея́ красоты́, его́же избра́л еси́ упоко́й, я́ко человеколю́бец.

Сти́х: Госпо́дь пасе́т мя́, и ничто́же мя́ лиши́т.

Де́лом Спа́се мо́й показу́еши, я́ко Ты́ еси́ все́х воскресе́ние, сло́вом сло́ве ла́заря из ме́ртвых воскреси́л еси́: тогда́ вереи́ сотро́шася, врата́ же а́дова смути́шася: тогда́ со́н сме́рть показа́ся челове́ческая. но во е́же спасти́ твое́ созда́ние, а не во е́же осуди́ти прише́дый, его́же избра́л еси́, упоко́й я́ко человеколю́бец.

Сла́ва, и ны́не, богоро́дичен:

Все́м предста́тельница те́плая показа́лася еси́ Богороди́тельнице, все́х покро́ве, держа́ва же от Бо́га прибега́ющым к Тебе́: в ну́ждах су́щым помо́щница. Пле́нным ско́рое избавле́ние. Тебе́ бо Христо́с на ва́рвары положи́л е́сть мсти́тельницу, и засту́пницу, и сте́ну неразруши́мую, и немощны́м кре́пость непребори́мую, и ми́ра пода́тельницу душа́м на́шым.

Стихи́ры, гла́с 2:

Увы́ мне́, яковы́й по́двиг и́мать душа́ разлуча́ющися от телесе́! увы́, тогда́ коли́ко слези́т, и не́сть поми́луяй ю́! ко а́нгелом о́чи возводя́щи, безде́льно мо́лится: к челове́ком ру́це простира́ющи, не и́мать помога́ющаго. те́мже возлю́бленнии мои́ бра́тие, помы́сливше на́шу кра́ткую жи́знь, преста́вленному упокое́ния от Христа́ про́сим, и душа́м на́шым ве́лию ми́лость.

Сти́х: Ко Го́споду, внегда́ скорбе́ти ми́, воззва́х, и услы́ша мя́.

Прииди́те, у́зрим вси́ чу́до па́че ума́, и́же вчера́ с на́ми сы́й, ны́не лежи́т ме́ртв. прииди́те, позна́ем, я́ко пома́ле в погреба́льная пови́ты и мы́ сконча́емся: и́же ми́ры помазу́ющиися благоуха́нными, лежа́т смра́дни: ка́ко зла́том крася́щиися, не укра́шени лежа́т и безъобра́зни. те́мже, возлю́бленнии мои́ бра́тие, разуме́вше на́шу кра́ткую жи́знь, преста́вленному упокое́ния у Христа́ про́сим, и душа́м на́шым ве́лию ми́лость.

Сти́х: Го́споди, изба́ви ду́шу мою́ от усте́н непра́ведных.

Спаса́йся су́етный животе́. спаса́йтеся вси́ дру́зи, сро́дницы же и ча́да: в пу́ть бо иду́, и́мже никогда́же ше́ствовах. но прииди́те помяну́вше мою́ к ва́м любо́вь, после́дуйте, и гро́бу предади́те бре́ние мое́ сие́: и иму́щаго суди́ти смире́нную мою́ ду́шу, со слеза́ми Христа́ моли́те, я́ко да огня́ и́змет мя́ неугаси́маго.

Сла́ва, и ны́не, богоро́дичен:

Непроходи́мая врата́, та́йно запеча́тствованная, благослове́нная Богоро́дице Де́во, приими́ моле́ния на́ша, и принеси́ твоему́ Сы́ну и Бо́гу, да спасе́т тобо́ю ду́шы на́шя.

Стихи́ры самогла́сны, гла́с 3:

Се́ лежу́ возлю́бленнии мои́ бра́тие, посреде́ все́х молчали́в и безгла́сен: уста́ упраздни́шася, язы́к преста́ и устне́ препя́шася: ру́це связа́стеся, и но́зе сплето́стеся: зра́к измени́ся, о́чи угасо́сте, и не ви́дят рыда́ющих: слу́х не прие́млет печа́лующих во́пля, но́с не уха́ет кади́льнаго благово́ния: и́стинная же любо́вь никогда́же умерщвля́ется. те́мже молю́ все́х зна́емых, и друго́в мои́х, помяни́те мя́ пред Го́сподем, я́ко да в де́нь су́дный обря́щу ми́лость на суди́щи о́ном стра́шном.

Сти́х: Возведо́х о́чи мои́ в го́ры, отню́дуже прии́дет по́мощь моя́.

Вся́ суета́ челове́ческая, ели́ка не пребыва́ют по сме́рти: не пребыва́ет бога́тство, ни сше́ствует сла́ва: прише́дши бо сме́рти, сия́ вся́ потреби́шася. те́мже Христу́ безсме́ртному возопии́м: преста́вленнаго от на́с упоко́й, иде́же все́х е́сть веселя́щихся жили́ще.

Сти́х: Госпо́дь сохрани́т вхожде́ние твое́ и исхожде́ние твое́ от ны́не и до ве́ка.

Челове́цы, что́ всу́е мяте́мся? тече́ние ско́рое и жесто́кое е́сть, и́мже тече́м: ды́м е́сть житие́, па́ра, и пе́пел, и пра́х по ма́ле бу́дем, и я́ко цве́т увяда́ем. те́мже Христу́ безсме́ртному возопии́м: преста́вльшагося от на́с упоко́й, иде́же все́х е́сть веселя́щихся жили́ще.

Сла́ва, и ны́не, богоро́дичен:

Приста́нище тя́ спасе́ния и́мамы Богоро́дице Де́во, в пучи́не жития́ обурева́емии. те́мже моли́ от Тебе́ безсе́менно вопло́щшагося Бо́га, и неизрече́нно вочелове́чшагося, спасти́ ду́шы на́шя.

Стихи́ры, гла́с 4:

Где́ есть мирско́е пристра́стие? где́ есть привре́менных мечта́ние? где́ есть зла́то и сребро́? где́ есть рабо́в мно́жество и молва́? вся́ пе́рсть, вся́ пе́пел, вся́ се́нь. но прииди́те, возопии́м безсме́ртному Царю́: Го́споди, ве́чных твои́х бла́г сподо́би преста́вльшагося от на́с, упокоя́я его́ в нестаре́ющемся блаже́нстве твое́м.

Сти́х: Возвесели́хся о ре́кших мне́: в до́м Госпо́день по́йдем.

На́йде сме́рть я́ко хи́щник, на́йде тли́тель, и низложи́ мя, на́йде и не су́ща мя́ показа́: на́йде, и земля́ сы́й, я́ко не сы́й лежу́. вои́стинну со́ние, вои́стинну привиде́ние есмы́ челове́цы. но прииди́те, возопии́м безсме́ртному Царю́: Го́споди, ве́чных твои́х бла́г сподо́би преста́вльшагося от на́с, упокоя́я его́ в нестаре́емей жи́зни.

Сла́ва, и ны́не, богоро́дичен:

Еди́на Чи́стая и непоро́чная Де́во, Бо́га безсе́менно ро́ждшая, моли́ спасти́ся душа́м на́шым.

Стихи́ры, гла́с 5:

Помяну́х проро́ка вопию́ща: а́з е́смь земля́ и пе́пел. и па́ки разсмотри́х во гробе́х, и ви́дех ко́сти обнаже́ны и ре́х: у́бо кто́ е́сть ца́рь, или́ во́ин, или́ бога́т, или́ уБо́г, или́ пра́ведник, или́ гре́шник, но упоко́й Го́споди, с пра́ведными раба́ Твоего́.

Сти́х: Стоя́ще бя́ху но́ги на́шя во дво́рех твои́х, Иерусали́ме.

Ты́ ре́кл еси́, ве́руяй в тя́ Христе́, сме́рти не у́зрит: но я́коже а́з от све́та во све́т, све́т е́смь, та́ко просвети́теся и во мне́ в сла́ве мое́й: и́стинный бо Бо́г сы́й приидо́х спасти́, и́же во и́стинном правосла́вии чту́щих мя́ еди́наго Го́спода Бо́га, сугу́ба естество́ма пло́ти и Божества́, еди́наго же ипоста́сию. те́м си́це тя́ испове́давшаго ве́рнаго Твоего́ раба́, во све́те лица́ Твоего́ со святы́ми упоко́й, я́ко человеколю́бец.

Сла́ва, и ны́не, богоро́дичен:

Тебе́ мо́лимся, я́ко Бо́жии ма́тери, благослове́нная, моли́ спасти́ся на́м.

Стихи́ры, гла́с 6:

Нача́ток мне́ и соста́в, зижди́тельное твое́ бы́сть повеле́ние: восхоте́в бо от неви́димаго же и ви́димаго, жи́ва мя́ соста́вити естества́: от земли́ те́ло мое́ созда́л еси́, да́л же ми́ еси́ ду́шу Боже́ственным Твои́м и животворя́щим вдохнове́нием. те́мже Христе́, раба́ Твоего́ в стране́ живу́щих, в селе́ниих пра́ведных упоко́й.

Сти́х: К тебе́ возведо́х о́чи мои́ живу́щему на небеси́.

Поче́л еси́ о́бразом Твои́м ру́к Твои́х, сло́ве, созда́ние: живописа́в бо в веще́ственном зра́це, у́мнаго существа́ подо́бие, его́же и прича́стника мя́ поста́вил еси́, положи́в на земли́ нача́льствовати тва́рем самовла́стием. те́мже Спа́се, раба́ Твоего́ во стране́ живы́х, и в ски́ниях пра́ведных упоко́й.

Сла́ва, и ны́не, богоро́дичен:

Бо́га из тебе́ вопло́щшагося позна́хом Богоро́дице Де́во: того́ моли́ спасти́ся душа́м на́шым.

Стихи́ры, гла́с 7:

По о́бразу твоему́ и по подо́бию созда́вый в нача́ле челове́ка, в раи́ поста́вил еси́ владе́ти твои́ми тва́рьми: за́вистию же диа́волею прельсти́вся, сне́ди причасти́ся, за́поведей твои́х престу́пник бы́в. те́мже па́ки в зе́млю, от нея́же взя́т бы́сть, осуди́л еси́ возврати́тися Го́споди, и испроси́ти [у тебе́] упокое́ния.

Сти́х: Ко́ль возлю́бленна селе́ния твоя́, Го́споди си́л!

Разреша́ет вся́кую печа́ль сме́рть, пода́нная естеству́ Ада́мову: и́бо тле́нни бы́хом, сне́ди причасти́вшеся: позна́ем у́бо, я́ко созда́вшеся от земли́, па́ки пра́х и пе́пел бу́дем, я́коже бе́хом пре́жде. те́мже со гла́сом плаче́вным созда́теля умо́лим, преста́вльшемуся осла́бу дарова́ти, и ми́лость.

Сла́ва, и ны́не, богоро́дичен:

Тя́ Богоро́дице сте́ну неруши́мую, и наде́жду ве́рнии и́мамы. те́мже не преста́й Влады́чице, моли́ти о и́же ве́рою усо́пших твои́х рабе́х, осла́бе и́м бы́ти в суде́, егда́ ся́дет Сы́н тво́й и Бо́г: естество́ бо ты́ ве́си, я́ко вся́кими грехи́ ны́не смеси́ся, да тя́ вси́ ублажи́м.

Стихи́ры, гла́с 8:

Пла́чу и рыда́ю, егда́ помышля́ю сме́рть, и ви́жду во гробе́х лежа́щую, по о́бразу Бо́жию созда́нную на́шу красоту́, безъобра́зну, безсла́вну, не иму́щую ви́да. о чудесе́, что́ сие́ е́же о на́с бы́сть та́инство? ка́ко преда́хомся тле́нию? ка́ко сопряго́хомся сме́рти, вои́стинну Бо́га повеле́нием, я́коже пи́сано е́сть, подаю́щаго преста́вльшемуся упокое́ние.

Тле́нни ка́ко бы́хом, нетле́нный о́браз носи́вше, и дунове́нием Боже́ственным безсме́ртную прие́мше ду́шу, смеше́ни бы́вше, я́коже пи́сано е́сть? ка́ко же преступи́хом Бо́жия повеле́ния? о чудесе́, ка́ко сне́дь жи́зни оста́вльше, ядо́хом сне́дь, хода́таицу го́рькия сме́рти? ка́ко прельще́ни лиши́хомся жи́зни Боже́ственныя? про́чее возопии́м Христу́: его́же преста́вил еси́, во дво́рех твои́х всели́.

Сла́ва, и ны́не, богоро́дичен:

Покро́в тво́й Богоро́дице Де́во, врачевство́ е́сть духо́вное: в то́й бо прибега́юще душе́вных неду́гов избавля́емся.

Стихи́ры, гла́с 8. Самогла́сны:

Безме́рна е́сть блу́дно живу́щым му́ка, скре́жет зу́бный, и пла́чь неуте́шимый, мра́к несвети́мый, и тьма́ кроме́шняя, и че́рвь неусыпа́емый, сле́зы недействи́тельны, и су́д без ми́лости. сего́ ра́ди пре́жде конца́ возопии́м, глаго́люще: Влады́ко Христе́, его́же избра́л еси́, со избра́нными твои́ми упоко́й.

Подо́бен:

Возгласи́т труба́, и я́ко от сна́ ме́ртвии воста́нут, живо́т небе́сный прия́ти жела́юще, наде́яшася на тя́ созда́теля и Го́спода: не осуди́ у́бо раба́ Твоего́, сме́ртен бо безсме́ртне, на́с ра́ди бы́л еси́. сего́ ра́ди пре́жде конца́ возопии́м, глаго́люще: Влады́ко Христе́, его́же избра́л еси́, со избра́нными твои́ми упоко́й.

Се́ и стихи́и, не́бо и земля́ изменя́тся, и вся́ тва́рь в нетле́ние облече́тся: разруши́тся тле́ние, и поги́бнет тьма́ в прише́ствии твое́м: и́маши бо па́ки приити́ со сла́вою, я́коже пи́сано е́сть, возда́ти кому́ждо, я́коже соде́ла. Влады́ко Христе́, его́же избра́л еси́, со избра́нными твои́ми упоко́й.

Сла́ва, гла́с 6.

Прииди́те и ви́дите вси́ стра́нное и гро́зное виде́ние все́м познава́емое, о́браз ны́не ви́димый, и не ктому́ му́дрствуйте привре́менная. дне́сь душа́ от те́ла разлуча́ется, к ве́чному преставля́ема ми́ру: в пу́ть бо и́дет, и́мже никогда́же ше́ствова, и к судии́ нелицеприе́мному, иде́же предстоя́т а́нгелов чи́ни. стра́шно бо, бра́тие мои́, суди́ще о́но, иде́же вси́ предста́нем на́зи! о́вии у́бо венчава́еми, о́вии же посрамля́еми. те́мже возопии́м к безсме́ртному Царю́: егда́ и́маши испыта́ти сокрове́нная челове́ческая, пощади́ раба́ Твоего́, его́же прия́л еси́, Го́споди человеколю́бче.

И ны́не, богоро́дичен:

Моли́твами Христе́ ро́ждшия тя́, и предте́чи твоего́, апо́столов, проро́ков, иера́рхов, преподо́бных и пра́ведных, и все́х святы́х, усо́пшаго раба́ Твоего́ упоко́й.

Та́же: Бла́го е́сть испове́датися Го́сподеви: ве́сь. Трисвято́е. По О́тче на́ш:

Поко́й Спа́се на́ш с пра́ведными раба́ Твоего́, и сего́ всели́ во дворы́ твоя́, я́коже е́сть пи́сано, презира́я я́ко бла́г прегреше́ния его́, во́льная и нево́льная, и вся́ я́же в ве́дении и не в ве́дении, человеколю́бче.

В поко́ищи твое́м Го́споди, иде́же вси́ святи́и твои́ упокоева́ются, упоко́й и ду́шу раба́ Твоего́, я́ко еди́н еси́ человеколю́бец.

Ма́ти свята́я неизрече́ннаго све́та, а́нгельскими тя́ пе́сньми почита́юще, благоче́стно велича́ем.

Диа́кон глаго́лет:

Поми́луй на́с Бо́же, по вели́цей ми́лости Твое́й, мо́лим Ти ся, услы́ши и поми́луй.

По возгла́се моли́твенном быва́ет целова́ние, ли́ку пою́щу стихи́ры, гла́с 2:

Прииди́те, после́днее целова́ние:

И про́чая, я́коже преднаписа́шася в после́довании мирско́м.

Та́же: Сла́ва, гла́с 6: Зря́ще мя́ безгла́сна:

И ны́не, богоро́дичен:

Отходя́ще же ко гро́бу пою́т свяще́нницы ирмосы́ вели́каго кано́на, си́есть:

Помо́щник и покрови́тель: И про́чая. Трисвято́е. По О́тче на́ш:

В поко́ищи твое́м, Го́споди:

Еди́на Чи́стая и непоро́чная Де́во:

Та́же, Поми́луй на́с Бо́же: и про́чее, я́ко обы́чно. Бо́же духо́в:

И погреба́ются мо́щи.

И быва́ет соверше́нный отпу́ст.