В середу п’ятої седмиці

На У́трени Тро́ичны: Та́же кафи́смы 20, 1, 2. По 1-м стихосло́вии седа́льны кре́стныя Осмогла́сника два́, с Крестобогоро́дичным.

По 2-м же стихосло́вии, настоя́щий седа́лен, господи́на Ио́сифа, гла́с 8.

Подо́бен: Повеле́нное та́йно:

Дре́ва вкуси́в Ада́м не в ле́поту, невоздержа́ния го́рце плоды́ объя́т: возне́с же Ся на Дре́во, сего́ изба́вил еси́ Ще́дре осужде́ния лю́таго. Те́мже Ти́ вопие́м: да́ждь на́м воздержа́тися Влады́ко, от плода́ тлетво́рнаго, и твори́ти во́лю Твою́, я́ко да обря́щем ми́лость. [Два́жды.]

Крестобогоро́дичен: От крове́й Твои́х чи́стых воплоще́нна, и па́че смы́сла от Тебе́ Чи́стая рожде́нна, на Дре́ве ви́сима посреде́ злоде́ю ви́дящи, утро́бами боле́зновала еси́, и ма́терски рыда́ющи вопия́ла еси́: увы́ Мне́ Ча́до Мое́! ко́е Боже́ственное и неизрече́нное смотре́ние Твое́, и́мже оживи́л еси́ созда́ние Твое́? Воспева́ю благоутро́бие Твое́.

По 3-м стихосло́вии седа́лен, господи́на Фео́дора, гла́с 2.

Подо́бен: Пречи́стому Твоему́ о́бразу:

Дре́во всесвято́е, кре́стное воспева́юще, кра́йней бла́гости Твое́й покланя́емся при́сно Христе́ Бо́же: на се́м бо упраздни́л еси́ си́лы вра́жия, и да́л еси́ зна́мение ве́рующым в Тя́: те́мже благода́рно вопие́м Ти́: все́х сподо́би благоду́шно ми́рно живу́щих, испо́лнити по́стное вре́мя. [Два́жды.]

Крестобогоро́дичен: Непоро́чнаго Па́стыря Тя́ зря́щи А́гнца на Дре́во воздви́жена, рыда́ющи ма́терски вопия́ше: Сы́не, на сме́рть Тя́ осуди́ша неблагода́рнии лю́дие, за е́же о́блак просте́рл еси́ в прехожде́ние и́х: увы́ Мне́, безча́дствуюся безму́жная! но воста́ни, и возсия́й Со́лнце, и просла́влюся в сыне́х земноро́дных.

Кано́н мине́и, и настоя́щий трипе́снец господи́на Ио́сифа.

И стихосло́вится пе́снь, гла́с 8.

Пе́снь 3.

Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Осуди́в вражду́, на Кресте́ просте́рл еси́ Твои́ правосу́де дла́ни: ны́не же осужде́нна мя́ су́ща прегреше́ньми, спаси́ блу́днаго Спа́се, огорчи́вшаго Тя́ долготерпели́ваго.

Ско́тское возжеле́х страстотво́рное житие́, Твои́х за́поведей удали́хся Спа́се Преблаги́й, стра́нными порабоще́н и нечи́стыми гра́жданы, ны́не же обраща́ющася приими́, и спаси́ мя.

Гугни́ваго я́коже дре́вле слу́ха отве́рзл еси́, отве́рзи души́ моея́ ушеса́ нра́вом оглуше́нна, и внуши́ти Твое́ спаси́тельное сло́во, Иису́се сподо́би мя́ еди́не Человеколю́бче.

Богоро́дичен: Спаси́тельная врата́, к Бо́гу мо́сте, христиа́н предста́тельнице, Пречи́стая Влады́чице, обстои́ма мя́ напа́стьми жития́ и обурева́ема, Отрокови́це окорми́.

И́ный господи́на Фео́дора. Гла́с 2.

Ирмо́с: Непло́дствовавший мо́й у́м, плодоно́сен Бо́же покажи́ ми, де́лателю до́брых, насади́телю благи́х, благоутро́бием Твои́м.

За милосе́рдие щедро́т возшед на Кре́ст, извле́кл еси́ мя из ро́ва страсте́й, и возне́сл еси́ Христе́, в небе́сная.

Просте́р на Кресте́ дла́ни Твои́ Христе́ язы́ки вся́ удале́нныя от Тебе́ объя́л еси́, бли́з ста́ти держа́вы Твоея́.

Тро́ичен: Триипоста́сная Еди́нице, пресу́щная Тро́ице, Божество́ еди́но, О́тче и Сы́не, и Ду́ше пра́вый, спаси́ чту́щыя Тя́.

Богоро́дичен: Кто́ хвали́ти Тя́ от земны́х, по достоя́нию возмо́жет Ма́ти де́во? Ты́ бо в жена́х еди́на яви́лася еси́ избра́нная, и всеблаже́нная.

Сла́ва Тебе́ Бо́же на́ш, сла́ва Тебе́.

Возне́слся еси́ на Кресте́, прободе́н бы́л еси́ в ре́бра, же́лчи вкуси́л еси́ мене́ ра́ди, Иису́се, от преступле́ния огорчи́вшаго Тя́.

Ирмо́с: Непло́дствовавший мо́й у́м, плодоно́сен Бо́же покажи́ ми, де́лателю до́брых, насади́телю благи́х, благоутро́бием Твои́м.

Пе́снь 8.

Ирмо́с: Седмери́цею пе́щь, халде́йский мучи́тель, богочестивым неи́стовно разжже, си́лою же лу́чшею, спасе́ны сия видев, Творцу и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся ве́ки.

Неусы́пным о́ком воззре́в на мя́, уще́дри, уны́ния дрема́нием одержи́ма, и сну́ рабо́тающа, сла́стным на одре́ страсте́м, на Кресте́ главу́ Твою́ преклони́вый, и во́лею усну́вый, и тьму́ разори́вый, Христе́, греха́, све́т сы́й пра́вды.

Богатотво́рными дарова́нии украси́вся от креще́ния, па́че нищету́ злы́х возлюби́х, и чу́ждь бы́х доброде́телей окая́нный а́з, в страну́ дале́че отше́д зло́бы. те́мже обрати́в приими́ мя Спа́се, Твои́м Кресто́м огражда́я во вся́ ве́ки.

Пия́нство страсте́й отри́ни, и сле́з взыщи́, чисти́тельное поще́нием душе́, вино́ се́рдце веселя́щее, и сла́сти увяда́ющее, и плотски́я пе́щи испепеля́ющее: и потщи́ся, пригвозди́вшемуся тебе́ ра́ди на Дре́ве Христу́ сраспя́тися, и жи́ти во ве́ки.

Богоро́дичен: Богороди́тельнице Всечи́стая, души́ моея́ я́звы, и грехо́вная гное́ния очи́сти, исто́чники омыва́ющи от ре́бр Рождества́ Твоего́, и от ни́х очища́ющи струя́ми: к Тебе́ бо взыва́ю, и к Тебе́ прибега́ю, и Тя́ призыва́ю Благода́тную.

И́ный.

Ирмо́с: Гла́сы а́нгельскими на небесе́х сла́вимаго Бо́га, восхва́лим глаго́люще, земноро́днии, во вся́ ве́ки.

Распе́ншагося пло́тски, и Божество́м не пострада́вша Иису́са, пою́т А́нгели, и мы́ земноро́днии во вся́ ве́ки.

В распя́тии Твое́м Христе́, поно́сную сме́рть прие́м прокля́тую, спа́сл ны́ еси́ от тли́ изба́вивый.

Благослови́м Отца́, и Сы́на, и Свята́го Ду́ха, Го́спода.

Херуви́мски Тя́ о Тро́ице Свя́т, Свя́т Свя́т, пою́ еди́но Божество́, безнача́льное, про́стое и все́ми непости́жное.

Богоро́дичен: Похвала́ми Тя́ Чи́стая, све́тло почита́ют вси́ роди́: Зижди́теля бо родила́ еси́. О чу́до стра́шное, и де́ло всеблаже́нное!

Сла́ва Тебе́ Бо́же на́ш, сла́ва Тебе́.

Вся́ претерпе́л еси́ пострада́ти о еди́ном, е́же спасти́ся мне́ Христе́: пою́ Твое́ распя́тие, гво́здия, и заколе́ние во вся́ ве́ки.

Хва́лим, благослови́м, покланя́емся Го́сподеви:

Ирмо́с: Гла́сы а́нгельскими на небесе́х сла́вимаго Бо́га, восхва́лим глаго́люще, земноро́днии, во вся́ ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с: те́м Тя́ Богоро́дицу, ангелов и челове́к чинонача́лия велича́ют.

Зря́ Тя просте́рта на Кресте́, зари́ сокрыва́ше со́лнце, вся́ же земля́ тре́петом колеба́шеся Всецарю́, во́лею ви́дящи стра́ждуща, естество́м тя́ безстра́стна. Те́мже Тя́ молю́, стра́сти души́ моея́, я́ко вра́чь Христе́ исцели́.

Пути́ спаси́тельныя оста́вив, во а́д веду́щыя ше́ствовах, тьму́ глубо́кую име́я о́крест сла́сти, и страсте́й поползнове́ния, и бу́рю искуше́ний. те́мже Тя́ молю́: Твои́м Кресто́м спаси́ мя Христе́, я́ко еди́н многоми́лостив.

Зимо́ю содержи́мь искуше́ний, и страсте́й треволне́нии потопля́емь, и сласте́й бу́рею обурева́емь лю́те, поще́ния пучи́ну достиго́х кро́ткую и ти́хую, в не́йже мя́ окорми́в Твои́м Кресто́м Ще́дре, ко спасе́нию устреми́.

Богоро́дичен: Зачала́ еси́ Де́во без се́мене, вся́ческая соде́лавшаго Сло́ва Бо́жия, без хоте́ний плотски́х: без истле́ния же родила́ еси́, без боле́зней ма́терских: те́мже Тя́ Богоро́дицу и язы́ком и се́рдцем испове́дающе, велича́ем.

И́ный.

Ирмо́с: Де́вство Твое́ Богоро́дице Нескве́рная, е́же не опали́ о́гнь Боже́ственный, велича́ем.

Во́лею претерпе́л еси́ распя́тися Спа́се на́ш, да пода́си все́м жи́знь, от сме́рти избавля́я.

Дре́вом умертви́хся, и кре́стным Дре́вом ожи́х: на не́мже Христо́с мо́й пригвозди́вся, врага́ моего́ умертви́.

Тро́ичен: Я́ко су́щу Сы́ну с Роди́телем, и Ду́ху Свято́му ссу́щу, единому́дренно поклони́мся.

Богоро́дичен: Чу́до пресла́вное, и ужа́сное слы́шание, ка́ко и я́ко Ма́ти ражда́еши Чи́стая, и не позна́ла еси́ я́ко Де́ва тле́ния?

Сла́ва Тебе́ Бо́же на́ш, сла́ва Тебе́.

Пою́ копие́ Твое́, воспева́ю и гво́зди Твоя́, гу́бу, тро́сть, Кре́ст, и́миже спа́сл мя́ еси́ Иису́се Бо́же.

Ирмо́с: Де́вство Твое́ Богоро́дице Нескве́рная, е́же не опали́ о́гнь Боже́ственный, велича́ем.

Свети́лен гла́са.

На стихо́вне самогла́сен, гла́с 3:

Высоту́ доброде́телей оста́вивши душе́ моя́, во глубину́ грехо́вную снизшла́ еси́: в лука́вныя разбо́йники впа́дши: стру́пов же смердя́щих полна́ су́щи, лежи́ши пове́ржена недоуме́нна. Те́мже возопи́й Христу́ Бо́гу, за тя́ распе́ншемуся, и ра́ны во́лею прие́мшему, попецы́ся о мне́ Го́споди, и спаси́ мя.

И́ный. Гла́с 8: Разбо́йническими помышле́ньми уязви́вся окая́нный, и е́ле жи́в бы́х Го́споди, проро́ческий же ли́к презре́ е́ле жи́ва ви́дев су́ща, и хитростьми́ челове́ческими неисце́льна. Те́мже лю́те боля́, во смире́нии се́рдца зову́ Ти Христе́ Бо́же: изле́й я́ко благоутро́бен на мя́ вели́кую Твою́ ми́лость.

Му́ченичен: Му́ченицы Христо́вы непобеди́мии, победи́вше пре́лесть си́лою Кре́стною, восприя́сте благода́ть ве́чныя жи́зни, мучи́телей преще́ния не убоя́стеся, му́ками ураня́еми веселите́ся. И ны́не кро́ви ва́шя бы́ша исцеле́ния ду́ш на́ших, моли́те спасти́ся душа́м на́шым.

Сла́ва, и ны́не, Крестобогоро́дичен: Всечи́стая, я́ко ви́де Тя́ пло́тию ви́сима на Дре́ве, се́рдцем уязвля́шеся, и восклица́ше слезя́щи, Сло́ве: где́ заше́л еси́ вселюбе́знейший Иису́се Мо́й, Сы́не Мо́й, и Го́споди? не оста́ви Мя́ еди́ну Христе́ ро́ждшую Тя́.

На 1-м часе́ кафи́сма 3-я, на 3-м часе́ 4-я, на 6-м часе́ 5-я.

На 6-м часе́ тропа́рь проро́чества, гла́с 1:

Боле́зньми святы́х, и́миже о Тебе́ пострада́ша, умоле́н бу́ди Го́споди, и вся́ на́шя боле́зни исцели́ Человеколю́бче, мо́лимся.

Проки́мен, псало́м 91, гла́с 4. Бла́го е́сть испове́датися Го́сподеви, и пе́ти и́мени Твоему́ Вы́шний.

Сти́х: Возвеща́ти зау́тра ми́лость Твою́, и и́стину Твою́ на вся́ку но́щь.

Проро́чества Иса́иина чте́ние. [Іс. 41:4-14]

Та́ко глаго́лет Госпо́дь: а́з Бог пе́рвый, и в гряду́щая Аз е́смь. Ви́деша язы́цы и убоя́шася, концы́ земни́и прибли́жишася, и приидо́ша вку́пе. Судя́й ки́йждо бли́жнему, и бра́ту помощи́, и рече́т: Превозмо́же му́ж древоде́латель, и кова́чь бия́й мла́том, вку́пе прокова́яй: овогда́ у́бо рече́т, спая́ние добро́ е́сть, утверди́ша я́ гвоздьми́, положа́т я́, и не подви́гнутся. Ты́ же Изра́илю, ра́бе Мо́й Иа́кове, его́же избра́х, се́мя Авраа́мле, его́же возлюби́х. Его́же поя́х от коне́ц земли́, и от стра́жб ея́ призва́х тя́, и реко́х ти́: ра́б Мо́й еси́, избра́х тя́, и не оста́вих тебе́. Не бо́йся, с тобо́ю бо е́смь, не прельща́ю: Аз бо е́смь Бог тво́й, укрепи́вый тя́, и помого́х ти́, и утверди́х тя́ десни́цею Мое́ю пра́ведною. Се́ постыдя́тся и посра́мятся вси́ сопротивля́ющиися тебе́, бу́дут бо я́ко не су́щии, и поги́бнут вси́ сопе́рницы твои́. Взы́щеши и́х, и не обря́щеши челове́ков, и́же поруга́ются тебе́: бу́дут бо а́ки не бы́вшии, и не бу́дут ра́тующии тебе́. Я́ко Аз Бог тво́й держа́й десни́цу твою́, глаго́ляй тебе́: Не бо́йся Иа́кове, ма́лый Изра́илю, Аз помого́х ти́, глаго́лет Бог тво́й, избавля́яй тя́ Святы́й Изра́илев.

Проки́мен, псало́м 92, гла́с 6: Госпо́дь воцари́ся, в ле́поту облече́ся.

Стих: Облече́ся Госпо́дь в си́лу, и препоя́сася.

На 9-м часе́ кафи́сма 6.

Стихосло́вим вме́сто: Ко Го́споду внегда́ скорбе́ти ми́: кафи́сму 7. На Го́споди воззва́х, стихи́ра самогла́сна, ю́же глаго́лем два́жды.

Начина́ем же стихи́, от Впаду́т во мре́жу свою́:

Гла́с 8: Мои́ми помышле́нии в разбо́йники впа́д, плене́н бы́х окая́нный умо́м, и лю́те уязви́хся, всю́ мою́ ду́шу ура́них, и отню́д лежу́ на́г доброде́телей на жите́йстем пути́. Свяще́нник же ви́дев мя́ ра́нами боля́ща безъисце́льна, презре́в не воззре́ на мя́: леви́тянин же па́ки не терпя́ душетле́нныя боле́зни, и то́й ви́дев мя́ ми́мо и́де. Ты́ же благоволи́вый, не от Самари́и, но от Мари́и воплоти́тися Христе́ Бо́же, человеколю́бием Твои́м пода́ждь ми́ исцеле́ние, излива́я на мя́ вели́кую Твою́ ми́лость.

Сти́х: Гла́сом мои́м ко Го́споду воззва́х, гла́сом мои́м ко Го́споду помоли́хся.

Па́ки ту́южде:

Сти́х: Пролию́ пред ни́м моле́ние мое́, печа́ль мою́ пред Ни́м возвещу́.

Му́ченичен: А́ще ка́я доброде́тель, и а́ще ка́я похвала́ подоба́ет святы́м? Мече́м бо преклони́ша вы́и, Тебе́ ра́ди прекло́ншаго небеса́ и соше́дшаго: излия́ша кро́вь свою́ Тебе́ ра́ди истощи́вшаго Себе́, и зра́к ра́бий прии́мша: смири́шася до сме́рти, нищету́ Твою́ подража́юще. И́хже моли́твами по мно́жеству щедро́т Твои́х, Бо́же поми́луй на́с.

Сти́х: Внегда́ исчеза́ти от Мене́ ду́ху моему́ и Ты́ позна́л еси́ стези́ моя́.

И́ны стихи́ры господи́на Ио́сифа, гла́с 8.

Подо́бен: Го́споди, а́ще и на суди́щи:

Го́споди, Ты́ свяще́нныя ученики́ Твоя́, слове́сная небеса́ показа́л еси́. Си́х свяще́нными хода́тайствы, земны́х мя́ зо́л изба́ви, воздержа́нием вознося́ ра́зума всегда́, к страсте́м помышле́ние мое́, я́ко Ще́др и Человеколю́бец.

Сти́х: На пути́ се́м, по нему́же хожда́х, скры́ша се́ть мне́.

Подо́бен:

Иму́ще вси́ вре́мя поще́ния, я́ко соде́йственника Боже́ственным дея́нием, пла́чим от всего́ се́рдца, и Спа́су возопии́м: Твои́ми ученики́ Го́споди Многоми́лостиве, спаси́ любо́вию Тя́ пою́щыя, я́ко Ще́др и Человеколю́бец.

И́на стихи́ра господи́на Фео́дора, гла́с то́йже.

Подо́бен: Сла́вную и пречи́стую:

Сти́х: Смотря́х одесну́ю и возгля́дах, и не бе́ зна́яй мене́.

Апо́столи прехва́льнии, ми́ра моли́твенницы, немощны́х вра́чеве, здра́вия храни́телие, во обое́м на́с соблюди́те, поще́ния вре́мя проходя́щыя: во обои́х боже́ственно ми́рствующыя, у́м несмуще́н страсте́й храня́ще, да пое́м вси́ пе́снь Христу́ воскре́сшему, я́ко Победи́телю.

И́ны стихи́ры по алфави́ту, 24, Вели́каго кано́на. Творе́ние Господи́на Андре́а Кри́тскаго. Гла́с 4.

Подо́бен: Хоте́х слеза́ми:

Сти́х: Поги́бе бе́гство от Мене́, и не́сть взыска́яй ду́шу мою́.

 Все́ житие́ мое́ со блудни́цами и мытаря́ми изжи́ся: у́бо возмогу́ ли поне́ в ста́рости пока́ятися, о ни́хже согреши́х, Соде́телю все́х и врачу́ неду́гующих? Го́споди, пре́жде да́же до конца́ не поги́бну, спаси́ мя.

И твори́м на ки́йждо сти́х по 3 покло́ны.

Сти́х: Воззва́х к Тебе́ Го́споди, ре́х: Ты́ еси́ упова́ние мое́, ча́ст моя́ еси́ на земли́ живы́х.

 Тя́жестию небреже́ния содержи́мь е́смь, в ти́не валя́юся, стрело́ю устреле́н велиа́ра, и оскверня́ю мое́ е́же по о́бразу: обрати́телю небрегу́щих, и Изба́вителю прегреши́вших: Го́споди пре́жде да́же до конца́ не поги́бну, спаси́ мя.

Сти́х: Вонми́ моле́нию моему́, я́ко смири́хся зело́.

Бы́х преткнове́ние челове́ком, возде́лав я́ко земны́й земна́я, бра́ку сопряго́хся Твои́м повеле́нием, и преступи́х оскверни́в ло́же мое́: от земли́ созда́вый не пре́зри созда́ния Твоего́: Го́споди, пре́жде да́же до конца́ не поги́бну, спаси́ мя.

Сти́х: Изба́ви мя́ от гоня́щих мя́, я́ко укрепи́шася па́че мене́.

 Ря́дник бы́х души́ мое́й, о пло́ти мое́й промышле́ние творя́, де́монов поруга́ние поста́влен бы́х, сласте́м рабо́тая и безме́стием: благоутро́бием Твои́м пощади́, прогони́телю де́монов: Го́споди, пре́жде да́же до конца́ не поги́бну, спаси́ мя.

Сти́х: Изведи́ из темни́цы ду́шу мою́, испове́датися и́мени Твоему́.

Во́лею согреши́х па́че все́х, сего́ ра́ди оста́влен е́смь, и́мам проти́вника души́ мое́й, пло́ти мудрова́ние, и помрача́ет мя́. Просвеще́ние су́щих во тьме́, и наста́вниче заблужда́емых: Го́споди, пре́жде да́же до конца́ не поги́бну, спаси́ мя.

Сти́х: Мене́ жду́т пра́ведницы, до́ндеже возда́си мне́.

 Живе́т, глаго́ла проро́к, душа́ моя́ Го́споди, и восхва́лит Тя́, взыщи́ овча́ заблу́ждшее мя́, и сопричти́ мя ста́ду Твоему́: да́ждь ми́ вре́мя покая́ния, да стеня́ вопию́ Ти: Го́споди, пре́жде да́же до конца́ не поги́бну, спаси́ мя.

Сти́х: Из глубины́ воззва́х к Тебе́ Го́споди, Го́споди, услы́ши гла́с мо́й.

 Согреши́х, согреши́х, преступи́в повеле́ния Твоя́ Христе́ Бо́же, ми́лостив бу́ди ми́ Благоде́телю, да прозрю́ вну́треннима очи́ма, и убе́гну тьмы́, и со стра́хом возопию́: Го́споди, пре́жде да́же до конца́ не поги́бну, спаси́ мя.

Сти́х: Да бу́дут у́ши Твои́ вне́млюще гла́су моле́ния моего́.

Зве́рие мя́ ди́вии обдержа́ша, но от ни́х мя́ исхити́ Влады́ко: хо́щеши бо е́же спасти́ся, и в позна́ние и́стины приити́ все́м челове́ком, я́ко Созда́тель, и со все́ми и мене́ спаси́: Го́споди, пре́жде да́же до конца́ не поги́бну, спаси́ мя.

Сти́х: А́ще беззако́ния на́зриши Го́споди Го́споди, кто́ постои́т? Я́ко у тебе́ очище́ние е́сть.

 Цельба́ бу́ди ми́ Благоде́телю, Изба́вителю Спа́се мо́й, и не отри́ни мене́, ви́ждь мя́ лежа́ща беззако́ньми, и возста́ви мя́ я́ко Всеси́льный, да и а́з возвещу́ дея́ния моя́, и вопию́ Ти: Го́споди, пре́жде да́же до конца́ не поги́бну, спаси́ мя.

Сти́х: И́мене ра́ди Твоего́ потерпе́х Тя́ Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Сокры́в тала́нт да́нный ми́, я́ко несмы́сленный ра́б в зе́млю закопа́х: и́бо я́коже непотре́бный осуди́хся, и не дерза́ю про́чее проси́ти Тя́, я́ко незло́бивый уще́дри мя́, да и а́з воззову́: Го́споди, пре́жде да́же до конца́ не поги́бну, спаси́ мя.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Е́зеро изсуши́вый страсте́й, кровоточи́выя прикоснове́нием оме́т Твои́х, да́ждь ми́ оставле́ние согреше́ний, несумне́нною ве́рою Тебе́ притека́ющему, и приими́ мя я́коже о́ную, и исцели́ мою́ боле́знь: Го́споди, пре́жде да́же до конца́ не поги́бну, спаси́ мя.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

 И́маши седе́ти на престо́ле, сотвори́вый сло́вом не́бо и зе́млю: и́мамы вси́ предста́ти. пове́дающе Тебе́ грехи́ на́шя: пре́жде дне́ о́наго, в покая́нии мя́ приими́: Го́споди, пре́жде да́же до конца́ не поги́бну, спаси́ мя.

Сти́х: Хвали́те Го́спода вси́ язы́цы, похвали́те Его́ вси́ лю́дие.

 При́зри о́ком благоутро́бным, и бу́ди ми́ ми́лостив еди́не Спа́се, то́ки да́руй исцеле́ний бе́дной мое́й и окая́нной души́, измы́й от ка́ла де́л мои́х, да воспою́: Го́споди, пре́жде да́же до конца́ не поги́бну, спаси́ мя.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

 Мечи́ угото́ва велиа́р, улови́ти потща́вся смире́нную мою́ ду́шу, стра́нна сотвори́ мя Ще́дре просвеще́ния, ра́зума лица́ Твоего́: держа́вный в кре́пости, сосу́дов сего́ исхити́ мя: Го́споди, пре́жде да́же до конца́ не поги́бну, спаси́ мя.

Сти́х: К тебе́ возведо́х о́чи мои́ живу́щему на небеси́: се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

 Все́м страсте́м порабо́тихся, оста́вив зако́н и Боже́ственная писа́ния, всего́ мя исцели́ Благоде́телю, мене́ ра́ди по мне́ бы́в Бла́же, обрати́ мя Ще́дрый, страсте́й потреби́телю: Го́споди, пре́жде да́же до конца́ не поги́бну, спаси́ мя.

Сти́х: Поми́луй на́с Го́споди, поми́луй на́с: я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

 Блудни́ца слеза́ми омоча́ет пречи́стеи же и честне́и но́зе Твои́, вся́ увещава́ющи е́же притека́ти, и приима́ти разреше́ние согреше́ний свои́х. Тоя́ ве́ру пода́ждь и мне́ Спа́се, е́же вопи́ти Ти́: Го́споди, пре́жде да́же до конца́ не поги́бну, спаси́ мя.

Припева́ем к про́чым: Сла́ва Тебе́ Бо́же на́ш, сла́ва Тебе́.

 Скве́рну очи́сти души́ моея́, мене́ ра́ди обнища́вый, и младе́нствовавый пло́тию, ка́плю ми́лости Твоея́ низпосла́в, немощно́му и окая́нному Христе́: омы́й от скве́рны, уврачу́й неду́гующа: Го́споди, пре́жде да́же до конца́ не поги́бну, спаси́ мя.

Сти́х: Сла́ва Тебе́ Бо́же на́ш, сла́ва Тебе́.

 Утверди́ Влады́ко ду́шу мою́, к Тебе́ притека́ти, и Тебе́ рабо́тати при́сно: покро́в бо мо́й еси́ и храни́тель, и заступле́ние и по́мощь, сподо́би Бо́жий Сло́ве, вопи́ти мне́ в дерзнове́нии: Го́споди, пре́жде да́же до конца́ не поги́бну, спаси́ мя.

Сти́х: Сла́ва Тебе́ Бо́же на́ш, сла́ва Тебе́.

 Стена́ неруши́мая бу́ди на́м Иису́се Спа́се, и ми́лостивый Бо́же, нра́вы бо и де́лы прельще́ни спадо́хом: но возста́ви я́ко Благоде́тель созда́ние, и примири́ся я́ко Ще́др. Го́споди, пре́жде да́же до конца́ не поги́бну, спаси́ мя.

Сти́х: Сла́ва Тебе́ Бо́же на́ш, сла́ва Тебе́.

 Сы́н блу́дный бы́х, расточи́вый бога́тство, гла́дом ны́не истаява́ю. Под кро́в Тво́й прибега́ю, я́коже о́наго приими́ мя О́тче благи́й, и прича́стника трапе́зы сподо́би, е́же вопи́ти Тебе́: Го́споди, пре́жде да́же до конца́ не поги́бну, спаси́ мя.

Сти́х: Сла́ва Тебе́ Бо́же на́ш, сла́ва Тебе́.

 За́вистию низложи́ рая́, первозда́ннаго злонача́льник: реки́й, е́же помяни́, на дре́ве разбо́йник, прия́т ра́й. Аз же ве́рою и стра́хом, е́же помяни́ мя, вопию́ Ти: Го́споди, пре́жде да́же до конца́ не поги́бну, спаси́ мя.

Сти́х: Сла́ва Тебе́ Бо́же на́ш, сла́ва Тебе́.

 Ру́ку ми́ простри́ я́ко Петро́ви, и возведи́ из глубины́ Бо́же, благода́ть и ми́лость ми́ пода́ждь, моли́твами Всенепоро́чныя Ма́тере, Тебе́ ро́ждшия безсе́менно, и святы́х Твои́х все́х: Го́споди, пре́жде да́же до конца́ не поги́бну, спаси́ мя.

Сти́х: Сла́ва Тебе́ Бо́же на́ш, сла́ва Тебе́.

 Пою́ща приими́ мя, на вся́к де́нь А́гнче взе́мляй гре́х мо́й, ду́шу и те́ло всеце́льно в ру́це Твои́ предлага́ю, и в нощи́ и во дни́ до́лжно вопию́ Ти: Го́споди, пре́жде да́же до конца́ не поги́бну, спаси́ мя.

Сла́ва Отцу́, и Сы́ну, и Свято́му Ду́ху.

 О неизрече́ннаго Твоего́ благоутро́бия, преблаги́й, не зло́бивый Го́споди! о безгре́шный и ще́дрый! не отри́ни мене́ от лица́ Твоего́, я́ко да и а́з благода́рственно, ра́дуяся и поя́ вопию́ Ти: Го́споди, пре́жде да́же до конца́ не поги́бну, спаси́ мя.

И ны́не, богоро́дичен: О неизрече́ннаго снисхожде́ния! о стра́ннаго рождества́ пречу́днаго! о ка́ко де́ва младе́нца тя́ но́сит во объя́тиих свои́х творца́ и Бо́га! из нея́ воплоти́тися изво́ливый, благоде́телю Го́споди, пре́жде да́же до конца́ не поги́бну, спаси́ мя.

Вхо́д. Све́те ти́хий:

Проки́мен, псало́м 93. Гла́с 4: Бог отмще́ний Госпо́дь, Бог отмще́ний, не обину́лся е́сть.

Сти́х: Вознеси́ся судя́й земли́, возда́ждь воздая́ние го́рдым.

Бытия́ чте́ние. [Бут. 17:1-9.]

Бы́сть Авра́му ле́т де́вятьдесят де́вять: и яви́ся Госпо́дь Авра́му, и рече́ ему́: Аз е́смь Бог тво́й, благоугожда́й предо Мно́ю, и бу́ди непоро́чен. И положу́ заве́т Мо́й между́ Мно́ю, и между́ тобо́ю, и умно́жу тя́ зело́. И паде́ Авра́м на лицы́ свое́м: и рече́ ему́ Бог глаго́ля: И Аз се́ заве́т Мо́й с тобо́ю, и бу́деши оте́ц мно́жества язы́ков. И не нарече́тся ктому́ и́мя твое́ Авра́м, но бу́дет и́мя твое́ Авраа́м: я́ко отца́ мно́гих язы́ков положи́х тя́. И возращу́ тя зело́ зело́, и положу́ тя в наро́ды, и ца́рие из тебе́ изы́дут: И поста́влю заве́т Мо́й между́ Мно́ю и между́ тобо́ю, и между́ се́менем твои́м по тебе́ в ро́ды и́х в заве́т ве́чен, да бу́ду тебе́ Бо́г, и се́мени твоему́ по тебе́: И да́м тебе́ и се́мени твоему́ по тебе́ зе́млю, в не́йже обита́еши, всю́ зе́млю Ханаа́ню во одержа́ние ве́чное, и бу́ду и́м Бо́г. И рече́ Бог ко Авраа́му: ты́ же заве́т Мо́й соблюде́ши, ты́ и се́мя твое́ по тебе́ в ро́ды и́х.

Проки́мен, псало́м 94. Гла́с 4: Воспо́йте Го́сподеви пе́снь но́ву.

Сти́х: Воспо́йте Го́сподеви, благослови́те и́мя Его́.

При́тчей чте́ние. [Притч. 5:20-33,16:1-9.]

Сы́н прему́др весели́т отца́: сы́н же безу́мен раздража́ет ма́терь свою́. Несмы́сленнаго стези́ ску́дны ума́: му́ж же разу́мен исправля́я хо́дит. Отлага́ют помышле́ния не чту́щии со́нмищ: в сердца́х же сове́тных пребыва́ет сове́т: Не послу́шает злы́й его́, ниже́ рече́т поле́зно что́ и добро́ о́бщему. Путие́ живота́ помышле́ния разу́мнаго, да уклони́вся от а́да спасе́тся. До́мы досади́телей разоря́ет Госпо́дь: утверди́ же преде́л вдови́цы. Ме́рзость Го́сподеви по́мысл непра́ведный: чи́стых же глаго́лы че́стны. Губи́т себе́ мздои́мец: ненави́дяй же даро́в прия́тия спасе́тся. ми́лостынями и ве́рами очища́ются греси́: стра́хом же Госпо́дним уклоня́ется вся́к от зла́. Сердца́ пра́ведных поуча́ются ве́ре: уста́ же нечести́вых отвеща́ют зла́я. Прия́тни пред Го́сподем путие́ муже́й пра́ведных, и́миже и врази́ дру́зи быва́ют. Дале́че отстои́т Бог от нечести́вых: моли́твы же пра́ведных послу́шает. лу́чше ма́лое прия́тие с пра́вдою, не́жели мно́гая жи́та с непра́вдою. се́рдце му́жа да мы́слит пра́ведная, да от Бо́га испра́вятся стопы́ его́. Ви́дящее о́ко до́брая, весели́т се́рдце: сла́ва же блага́я утучня́ет ко́сти. Слу́шаяй обличе́ний живота́, посреде́ прему́дрых водвори́тся. И́же отмета́ет наказа́ние, ненави́дит себе́: соблюда́яй же обличе́ния, лю́бит свою́ ду́шу. Стра́х Госпо́день наказа́ние, и прему́дрость: и нача́ло сла́вы отвеща́ет е́й: [преды́дет же смире́нным сла́ва.] Челове́ку предложе́ние се́рдца: и от Го́спода отве́т язы́ка. Вся́ дела́ смире́ннаго явле́нна пред Бо́гом: и укрепля́яй ду́хи Госпо́дь. Прибли́жи ко Го́споду дела́ твоя́, и утвердя́тся помышле́ния твоя́. Вся́ соде́ла Госпо́дь Себе́ ра́ди: нечести́вии же в де́нь зо́л поги́бнут. Нечи́ст пред Бо́гом вся́к высокосе́рдый, в ру́ку же ру́це влага́яй непра́ведно, не обезвини́тся. Нача́ло пути́ бла́га, е́же твори́ти пра́ведная, прия́тна же пред Бо́гом па́че, не́жели жре́ти же́ртвы. Ища́й Го́спода, обря́щет ра́зум с пра́вдою: Пра́ве же и́щущии его́, обря́щут ми́р. Вся́ дела́ Госпо́дня с пра́вдою: храни́тся же нечести́вый на де́нь зо́л.

Та́же, Да испра́вится моли́тва моя́: И про́чее после́дование преждеосвяще́нных.

А́ще ли не бу́дет преждеосвяще́нныя: На Го́споди воззва́х, пое́м Трио́ди подо́бны три́: и стихи́ры 24, Вели́каго кано́на. На стихо́вне самогла́сен дне́, два́жды, и му́ченичен. Сла́ва, и ны́не, Богоро́дичен: и про́чее. Проки́мен. И чте́ния.

На трапе́зе разреша́ем на еле́й, и вина́ причаща́емся труда́ ра́ди бде́ннаго, хотя́щаго бы́ти. Внима́ющии же спасти́ся, воздержа́нию прилежа́т: мно́жайшии же посту́ нелицеме́рну. Повече́рие же глаго́лем Ма́лое в ке́ллиах без покло́нов.

По трисвято́м конда́к Андре́ева кано́на. Та́кожде и Полу́нощницу.