В неде́лю ве́чера по 9-м часе́: Свяще́нник: Благослове́н Бог наш всегда́, ны́не и при́сно, и во ве́ки веко́в.

Чтец: Ами́нь.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому Христу́, Царе́ви и Бо́гу на́шему.

И посе́м чтет обы́чный вече́рний псало́м 103-й , ти́хо и кро́тким гла́сом:

Благослови́, душе́ моя́, Го́спода: Го́споди, Бо́же мой, возвели́чился еси́ зело́, во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́й вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й а́нгелы Своя́ ду́хи, и слуги́ Своя́ – пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за одея́ние ея́, на гора́х ста́нут во́ды. От запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры, и низхо́дят поля́ в ме́сто, е́же основа́л еси́ им. Преде́л положи́л еси́, его́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На тых пти́цы небе́сныя привита́ют; от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри лива́нстии, и́хже еси́ насади́л. Та́мо пти́цы вогнездя́тся: ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тьму, и бысть нощь, в не́йже про́йдут вси зве́рие дубра́внии: ски́мни рыка́ющии восхи́тити и взыска́ти от Бо́га пи́щу себе́. Возсия́ со́лнце, и собра́шася и в ло́жах свои́х ля́гут. Изы́дет челове́к на де́ло свое́, и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́: испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, их же несть числа́, живо́тная ма́лая с вели́кими. Та́мо корабли́ препла́вают, змий сей, его́же созда́л еси́ руга́тися ему́. Вся к Тебе́ чают, да́ти пи́щу им во бла́го вре́мя. Да́вшу Тебе́ им, соберу́т: отве́рзшу Тебе́ ру́ку, вся́ческая испо́лнятся бла́гости. Отвра́щшу же Тебе́ лице́, возмяту́тся: оты́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х. Призира́яй на зе́млю и творя́й ю́ трясти́ся: прикаса́яйся гора́м, и дымя́тся. Воспою́ Го́сподеви в животе́ мое́м: пою́ Бо́гу моему́, до́ндеже есмь. Да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́ и беззако́нницы, я́коже не бы́ти им: Благослови́, душе́ моя́, Го́спода.

Со́лнце позна́ за́пад свой: положи́л еси́ тьму, и бысть нощь. Я́ко возвели́чишася дела́ Твоя́, Го́споди, вся прему́дро́стию сотвори́л еси́.

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Аллилу́иа, Аллилу́иа, Аллилу́иа, сла́ва Тебе́, Бо́же. (Три́жды).

Посе́м ектениа́ вели́кая : Ми́ром Го́споду помо́лимся.

Лик: Го́споди, поми́луй.

О свы́шнем ми́ре и спасе́нии душ на́ших, Го́споду помо́лимся.

Лик: Го́споди, поми́луй.

О ми́ре всего́ ми́ра, благостоя́нии святы́х Бо́жиих церкве́й и соедине́нии всех, Го́споду помо́лимся.

Лик: Го́споди, поми́луй.

О святе́м хра́ме сем, и с ве́рою, благогове́нием и стра́хом Бо́жим входя́щих в онь, Го́споду помо́лимся.

Лик: Го́споди, поми́луй.

О Господи́не и отце́ на́шем Блаже́ннейшем Митрополи́те Ону́фрии и о Господи́не на́шем Преосвяще́ннейшем митрополи́те (и́ли архиепи́скопе, и́ли епи́скопе, и́мярек, егоже есть о́бласть), честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.

Лик: Го́споди, поми́луй.

О Богохрани́мей стране́ на́шей, власте́х и во́инстве ея́, Го́споду помо́лимся.

Лик: Го́споди, поми́луй.

О гра́де сем (и́ли: О ве́си сей, и́ли: О святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.

Лик: Господи, поми́луй.

О благорастворе́нии возду́хов, о изоби́лии плодо́в земны́х и вре́менех ми́рных. Го́споду помо́лимся.

Лик: Го́споди, поми́луй.

О пла́вающих, путеше́ствующих, неду́гующих, стра́ждущих, плене́нных и о спасе́нии их. Го́споду помо́лимся.

Лик: Го́споди, поми́луй.

О изба́витися нам от вся́кия ско́рби, гне́ва и ну́жды. Го́споду помо́лимся.

Лик: Господи, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Господи, поми́луй.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живот наш Христу́ Бо́гу предади́м.

Лик: Тебе́, Го́споди.

Возгла́с: Я́ко подоба́ет Тебе́ вся́кая сла́ва, честь и поклоне́ние. Отцу́, и Сы́ну, и Свято́му Ду́ху ны́не, и при́сно, и во ве́ки веко́в.

Лик: Ами́нь.

Та́же: Го́споди, воззва́х: пое́м на глас 8.

Пе́рвый лик: Го́споди, воззва́х к Тебе́, услы́ши мя, услы́ши мя, Го́споди. Го́споди, воззва́х к Тебе́, услы́ши мя, вонми́ гла́су моле́ния моего́, внегда́ воззва́ти ми к Тебе́. Услы́ши мя, Го́споди.

Вторы́й лик: Да испра́вится моли́тва моя́, я́ко кади́ло, пред Тобо́ю: воздея́ние руку́ мое́ю же́ртва вече́рняя. Услы́ши мя, Го́споди.

И да́лее по чи́ну : Положи́, Го́споди, хране́ние усто́м мои́м и дверь огражде́ния о устна́х мои́х. Не уклони́ се́рдце мое́ в словеса́ лука́вствия, непщева́ти вины́ о гресе́х. С челове́ки, де́лающими беззако́ние, и не сочту́ся со избра́нными их. Нака́жет мя пра́ведник ми́лостию и обличи́т мя, еле́й же гре́шнаго да не нама́стит главы́ моея́. Я́ко еще́ и моли́тва моя́ во благоволе́ниих их, поже́рты бы́ша при ка́мени судии́ их. Услы́шатся глаго́ли мои́, я́ко возмого́ша: я́ко то́лща земли́ просе́деся на земли́, расточи́шася ко́сти их при аде. Я́ко к Тебе́, Го́споди, Го́споди, о́чи мои́, на Тя упова́х, не отыми́ ду́шу мою́. Сохрани́ мя от се́ти, ю́же соста́виша ми, и от собла́зн, де́лающих беззако́ние. Паду́т во мре́жу свою́ гре́шницы: еди́н есмь аз, до́ндеже прейду́.

Гла́сом мои́м ко Го́споду воззва́х, гла́сом мои́м ко Го́споду помоли́хся. Пролию́ пред Ним моле́ние мое́, печа́ль мою́ пред Ним возвещу́. Внегда́ исчеза́ти от Мене́ ду́ху моему́, и Ты позна́л еси́ стези́ моя́. На пути́ сем, по нему́же хожда́х, скры́ша сеть мне. Смотря́х одесну́ю и возгля́дах, и не бе зна́яй мене́. Поги́бе бе́гство от Мене́, и несть взыска́яй ду́шу мою́. Воззва́х к Тебе́, Го́споди, рех: Ты еси́ Упова́ние мое́, часть моя́ еси́ на земли́ живы́х. Вонми́ моле́нию моему́, я́ко смири́хся зело́. Изба́ви мя от гоня́щих мя, я́ко укрепи́шася па́че мене́. Изведи́ из темни́цы ду́шу мою́, испове́датися И́мени Твоему́. Мене́ ждут пра́ведницы, до́ндеже возда́си мне. Из глубины́ воззва́х к Тебе́, Го́споди, Го́споди, услы́ши глас мой. Да бу́дут у́ши Твои́, вне́млюще гла́су моле́ния моего́.

Зде пое́м стихи́ры, ставим стихо́в 6: и пое́м самогла́сны три, повторя́юще я на 8-й глас:

Стих: А́ще беззако́ния на́зриши, Го́споди, Го́споди, кто́ постои́т? Я́ко у Тебе́ очище́ние есть.

Ра́дуйся и весели́ся, гра́де Сио́не, красу́йся и ра́дуйся, Це́ркве Бо́жия. Се бо Царь твой прииде в пра́вде, на жребя́ти седя́, от дете́й воспева́емый: оса́нна в вы́шних, благослове́н еси́, Име́яй мно́жество щедро́т, поми́луй нас.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Ра́дуйся и весели́ся, гра́де Сио́не:

Стих: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Прии́де Спас днесь во град Иерусали́м, испо́лнити Писа́ние, и вси прия́ша в ру́ки ва́иа: ри́зы же подстила́ху Ему́, ве́дуще я́ко Той есть Бог наш, Ему́же Херуви́ми вопию́т непреста́нно: оса́нна в вы́шних, благослове́н еси́, Име́яй мно́жество щедро́т, поми́луй нас.

Стих: Я́ко у Го́спода ми́лость, и мно́гое у Него́ избавле́ние: и Той изба́вит Изра́иля от всех беззако́ний его́.

Прии́де Спас днесь во град Иерусали́м:

Стих: Хвали́те Го́спода вси язы́цы, похвали́те Его́ вси лю́дие.

На Херуви́мех носи́мый и пева́емый от Серафи́м, возсе́л еси́ на жребя́ дави́дски, Бла́же, и де́ти Тя воспева́ху благоле́пно, иуде́е же хуля́ху беззако́нно: стро́потное язы́ков седа́лище жребца́ прообразова́ше, из неве́рия в ве́ру претворя́емое: сла́ва Тебе́, Христе́, Еди́не Ми́лостиве и Человеколю́бче.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

На Херуви́мех носи́мый и пева́емый от Серафи́м:

Сла́ва: Ра́дуйся и весели́ся, гра́де Сио́не:

И ны́не: На Херуви́мех носи́мый и пева́емый от Серафи́м:

И а́бие быва́ет вход, отверза́емым святы́м две́рем.

Диа́кон: Прему́дрость, про́сти.

Лик: Свете Ти́хий святы́я сла́вы, Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й: те́мже мир Тя сла́вит.

Диа́кон: Во́нмем.

Свяще́нник: Мир всем.

Диа́кон: Прему́дрость. Во́нмем. Проки́мен, глас осмы́й: Се, ны́не благослови́те Го́спода, вси раби́ Госпо́дни.

Лик: Се, ны́не благослови́те Го́спода, вси раби́ Госпо́дни.

Стих: Стоя́щий во хра́ме Госпо́дни, во дво́рех до́му Бо́га на́шего.

Лик: Се, ны́не благослови́те Го́спода, вси раби́ Госпо́дни.

Диа́кон: Се, ны́не благослови́те Го́спода.

Лик: Вси раби́ Госпо́дни.

Посе́м: Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь. Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми. Го́споди, ми́лость Твоя́ во век, дел руку́ Твое́ю не пре́зри: Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́, и Сы́ну, и Свято́му Ду́ху ны́не, и при́сно, и во ве́ки веко́в. Ами́нь. (И покло́ны три).

И ектениа́: Испо́лним вече́рнюю моли́тву на́шу Го́сподеви.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Ве́чера всего́ совершенна, свя́та, ми́рна и безгре́шна у Го́спода про́сим.

Лик: Пода́й, Го́споди.

А́нгела ми́рна, верна наставника, храни́теля ду́ш и телес на́ших у Го́спода про́сим.

Лик: Пода́й, Го́споди.

Проще́ния и оставле́ния грехо́в и прегреше́ний на́ших у Го́спода про́сим.

Лик: Пода́й, Го́споди.

До́брых и поле́зных душа́м на́шим и ми́ра ми́рови у Го́спода про́сим.

Лик: Пода́й, Го́споди.

Про́чее вре́мя живота́ на́шего в ми́ре и покая́нии сконча́ти у Го́спода про́сим.

Лик: Пода́й, Го́споди.

Христиа́нския кончи́ны живота́ на́шего безболе́знены, непосты́дны, ми́рны, и до́браго отве́та на Стра́шнем Суди́щи Христо́ве про́сим.

Лик: Пода́й, Го́споди.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Возгла́с: Яко Благ и Человеколю́бец Бог еси́ и Тебе́ сла́ву возсыла́ем Отцу́, и Сы́ну, и Свято́му Ду́ху ны́не, и при́сно, и во ве́ки веко́в.

Лик: Ами́нь.

Свяще́нник: Мир всем.

Лик: И ду́хови твоему́.

Диа́кон: Главы́ на́ша Го́сподеви прикло́ним.

Лик: Тебе́, Го́споди.

Та́же возглаша́ет свяще́нник: Бу́ди держа́ва Ца́рствия Твоего́ благослове́на и препросла́влена. Отца́, и Сы́на, и Свята́го Ду́ха ны́не, и при́сно, и во ве́ки веко́в.

Лик: Ами́нь.

По оконча́нии ектении́ пое́м стихо́вны стихи́ры самогла́сны три:

Глас 2: От ве́твий и ваий, я́ко от Боже́ственна пра́здника в Боже́ственный преше́дше пра́здник, к честно́му Христо́вых Страсте́й, ве́рнии, стеце́мся та́инству спаси́тельному, и Сего́ ви́дим, за нас страсть терпя́ща во́льную. Тому́ же пе́ние подо́бное, благодаря́ще, воспои́м, уми́льно зову́ще: благоутро́бия Исто́чниче и спасе́ния Приста́нище, Го́споди, сла́ва Тебе́.

Стих: Воспо́йте Го́сподеви песнь но́ву.

Глас 3: Стра́шно е́же впа́сти в ру́це Бо́га Жи́ва: Сей Судия́ есть помышле́ний и мы́слей серде́чных, никто́же да вни́дет искуша́яй ве́ру непоро́чную: но в кро́тости и стра́се Христу́ присту́пим, да прии́мем ми́лость и благода́ть обря́щем, во благовре́менную по́мощь.

Стих: Ви́деша вси концы́ земли́ спасе́ние Бо́га на́шего.

Глас 7: Со́нмице лука́вая и прелюбоде́йная, своему́ му́жу не сохра́ншая ве́ру, что́ держи́ши заве́т, его́же не была́ еси́ насле́дница? Что́ хва́лишися о Отце́, Сы́на отве́ргшаяся? Проро́ки не прия́ла еси́, Сы́на возвести́вшыя: поне́ свои́х чад усрами́ся, си́це вопию́щих: оса́нна Сы́ну Дави́дову, благослове́н Гряды́й во И́мя Госпо́дне.

Сла́ва, глас 2: От ве́твий и ва́ий:

И ны́не, глас 3: Стра́шно е́же впа́сти:

Посе́м: Ны́не отпуща́еши раба́ Твоего́, Влады́ко, по глаго́лу Твоему́ с ми́ром: я́ко ви́деста о́чи мои́ спасе́ние Твое́, е́же еси́ угото́вал пред лице́м всех люде́й, свет во открове́ние язы́ков, и сла́ву люде́й Твои́х Изра́иля.

Чтец: Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, И́мене Твоего́ ра́ди.

Го́споди, поми́луй. (Три́жды).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

О́тче наш. И́же еси́ на Небесе́х. Да святи́тся И́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный даждь нам днесь: и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Свяще́нник: Я́ко Твое́ есть Ца́рство и си́ла, и сла́ва, Отца́, и Сы́на, и Свята́го Ду́ха ны́не, и при́сно, и во ве́ки веко́в.

Лик: Ами́нь.

И а́бие со сладкопе́нием пое́м, во глас 4:

Богоро́дице Де́во, ра́дуйся, Благода́тная Мари́е, Госпо́дь с Тобо́ю: благослове́на Ты в жена́х и благослове́н Плод чре́ва Твоего́, я́ко Спаса родила́ еси́ душ на́ших. (Покло́н).

Сла́ва: Крести́телю Христо́в, всех нас помяни́, да изба́вимся от беззако́ний на́ших: тебе́ бо даде́ся благода́ть моли́тися за ны. (Покло́н).

И ны́не: Моли́те за ны, святи́и апо́столи, святи́и вси, да изба́вимся от бед и скорбе́й. Вас бо те́плыя предста́тели ко Спа́су стяжа́хом. (Покло́н).

Под Твое́ благоуро́бие прибега́ем, Богоро́дице, моле́ния на́ша не пре́зри во обстоя́нии; но от бед изба́ви ны, Еди́на Чи́стая, Еди́на Благослове́нная. (Без покло́на).

Чтец: Го́споди, поми́луй (40). Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Честне́йшую Херуви́м, и сла́внейшую без сравне́ния Серафи́м, без истле́ния Бо́га Слова ро́ждшую, су́щую Богоро́дицу Тя велича́ем.

И́менем Госпо́дним Благослови́, О́тче.

Свяще́нник: Сый благослове́н Христо́с Бог наш всегда́, ны́не и при́сно, и во ве́ки веко́в.

Лик: Ами́нь.

И моли́тву: Небе́сный Царю́, ве́ру утверди́, язы́ки укроти́, мир умири́, святы́й храм сей (святу́ю оби́тель си́ю) до́бре сохрани́: пре́жде отше́дшыя отцы́ и бра́тию на́шу в селе́ниих пра́ведных учини́: и нас в покая́нии и испове́дании приими́, я́ко Благи́й и Человеколю́бец.

Посе́м свяще́нник глаго́лет : Го́споди и Влады́ко живота́ моего́, дух пра́здности, уны́ния, любонача́лия и праздносло́вия не даждь ми. (Покло́н).

Ду́х же целому́дрия, смиреному́дрия, терпе́ния и любве́ да́руй ми, рабу Твоему́. (Покло́н).

Ей, Го́споди Царю́, да́руй ми зре́ти моя́ прегреше́ния и не осужда́ти бра́та моего́, я́ко благослове́н еси́ во ве́ки веко́в. Ами́нь. (Покло́н).

Та́же возглаша́ет: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй (Три́жды). Благослови́.

Свяще́нник глаго́лет отпу́ст: Гряды́й Госпо́дь на во́льную страсть на́шего ра́ди спасе́ния, Христо́с, И́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных апо́стол, святы́х и пра́ведных Богооте́ц Иоаки́ма и А́нны и всех святы́х, поми́лует и спасе́т нас, я́ко Благ и Человеколю́бец.

Посе́м лик многоле́тие: Спаси́, Го́споди, и поми́луй Господи́на и Отца́ на́шего Ону́фрия, блаже́ннейшего Митрополи́та Ки́евскаго и всея́ Украи́ны, и Господи́на на́шегопреосвяще́ннейшаго (и́мярек) митрополи́та (и́ли: архиепи́скопа, и́ли: епи́скопа) (епархиа́льный ти́тул его́), бра́тию Свята́го храма сего́ и вся правосла́вныя христиа́ны, Го́споди, сохрани́ их на мно́гая ле́та.

Свяще́нник: Благослове́н Бог наш всегда́, ны́не, и при́сно, и во ве́ки веко́в.

Чтец: Ами́нь.

И соверша́ем после́дование ма́лаго повече́рия по Часосло́ву со сле́дующими осо́бенностями.

По́сле Ве́рую: пое́м трипе́снец господи́на Андрея́ Кри́тскаго, глас 8:

Песнь 1

Ирмо́с: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу: я́ко просла́вися. (Два́жды).

Припе́в: Сла́ва Тебе́, Бо́же наш, сла́ва Тебе́.

Ио́сифово целому́дрие подража́им, ве́рнии, разуме́им Поче́тшаго челове́ческое слове́сное существо, всяцем хране́нием пожи́вше доброде́телию действи́тельною.

Сла́ва Тебе́, Бо́же наш, сла́ва Тебе́.

До́брых неде́лание уподо́бися смоковнице: сего́ у́бо уклони́мся, да не и́зсхнем я́коже она тогда́, собо́рище, ли́ствием покрыва́ющееся, преднапису́ющая.

Сла́ва Тебе́, Бо́же наш, сла́ва Тебе́.

О́браз Влады́чень подпису́я Ио́сиф, в ров вве́ржен быва́ет, продае́тся от сро́дник, вся терпи́т приснопа́мятный, во о́браз вои́стину Христо́в.

Сла́ва Тебе́, Бо́же наш, сла́ва Тебе́.

Смоко́вницы безпло́дствия убежа́вше, бра́тие, разуме́им о́браз, да не и́зсхнем, я́коже она́ тогда́, егда́, возвраща́яся, Человеколю́бец Прии́де к ней а́лчя.

Сла́ва Тебе́, Бо́же наш, сла́ва Тебе́.

Иису́с за мир тща́ся пострада́ти во́лею, и́дет со ученики́ Свои́ми во град Иерусали́м к во́льней стра́сти, юже прии́де пострадати.

Сла́ва Тебе́, Бо́же наш, сла́ва Тебе́.

Прилепи́вшеся Го́сподеви, вся тща́щемуся пострада́ти, гото́ви бу́дем на оплева́ние, на поруга́ния и на уничиже́ния: я́ко да пречи́стыми Его́ страстьми́ спросла́вимся, ве́рнии.

Сла́ва Тебе́, Бо́же наш, сла́ва Тебе́.

Страстьми́ стра́сти исцеля́ет Пострада́вый о нас: хотя́ бо произво́дит на на́ше существо́ челове́ческое, животво́рная Своя́ страда́ния, да мы спасе́мся.

Сла́ва: Три Безнача́льна просла́вля́ю, Три Свя́та пою, Три Соприсносу́щна во Еди́ном Существе́ пропове́дую: Еди́н бо во Отце́, Сы́не и Ду́се славосло́вится Бог.

И ны́не: Жезл у́бо Моисе́ов, и жезл Ааро́нов, стра́нное претворе́ние, и па́че ума́ смотре́ние име́ша: Твое́ же чре́во, Богороди́тельнице, рождество́ обновля́ет но́вое.

И па́ки ирмо́с о́ба ли́ка вку́пе: Сокруши́вшему бра́ни мы́шцею Свое́ю:

Та́же: Го́споди, поми́луй. (Три́жды). Сла́ва, и ны́не:

Седа́лен, глас 4:

Подо́бен: Яви́лся еси́:

Смоко́вницы осужде́ние да не предвари́т тя, но благи́я плоды́ потщи́ся се́рдца брозда́ми, душе́, Творцу́ твоему́ Христу́ возвести́ в покая́нии Ему́ принося́щи.

Песнь 8

Ирмо́с: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся ве́ки. (Два́жды).

Сла́ва Тебе́, Бо́же наш, сла́ва Тебе́.

Целому́дрием украси́вше житие́ и му́дростию сохрани́вше ве́ру, пра́вды нра́вы взы́щем, да, в му́жестве спосле́дующе, Христо́ви сраспне́мся.

Сла́ва Тебе́, Бо́же наш, сла́ва Тебе́.

Другу́ю Е́ву обре́т еги́птяныню, не победи́ся к неподо́бному дея́нию Патриа́рх Ио́сиф, но ста, я́коже не́кий адама́нт, от страсте́й не ят грехо́вных.

Сла́ва Тебе́, Бо́же наш, сла́ва Тебе́.

Преходя́ жите́йская ше́ствия, Спа́се мой, взалка́л еси́ во́лею, спасе́ния всех жела́я: сего́ бо взалка́л еси́ – обраще́ния от Тебе́ удале́нных.

Сла́ва Тебе́, Бо́же наш, сла́ва Тебе́.

Праоте́ц вкуш от дре́ва, я́ко позна́ся наг и посрамле́н, ли́ствие смоко́вное взем препоя́сася: собо́рище бо обнаже́нное Христа́ прообража́шеся.

Сла́ва Тебе́, Бо́же наш, сла́ва Тебе́.

Гото́вися, душе́, пре́жде исхо́да, устро́й себе́ ко о́ному житию́ и Христу́, тебе́ ра́ди пострада́ти тща́щемуся, да тя просла́вит, потщи́ся спострада́ти, и сраспя́тися, и умре́ти.

Сла́ва Тебе́, Бо́же наш, сла́ва Тебе́.

Ка́ко не ужасне́тся смерть, Спа́се мой, ка́ко не убои́тся ад, среты́й Тя, по благоизволе́нию к стра́сти тща́щагося, и от непра́ведных Пра́ведна Тя зря пострада́ти прише́дша?

Сла́ва Тебе́, Бо́же наш, сла́ва Тебе́.

Ла́зарево воста́ние ви́девше иуде́и, свяще́нницы и леви́ти, кля́твенное согла́сие за́вистию угото́вльше, ле́стию преда́тельства Христа́ преда́ша на смерть Пила́ту.

Сла́ва Тебе́, Бо́же наш, сла́ва Тебе́.

А́гница Твоя́, и Раба́, и Де́ва, к стра́сти Тя устремля́ющася ви́дящи и ду́шу о нас полага́юща, До́брагопа́стыря, утро́бою Ма́тернею по Тебе́ рыда́ше.

Благослови́м Отца́, и Сы́на, и Свята́го Ду́ха, Го́спода.

Тро́ичен: Я́ко Еди́ницу существо́м пою́ Тя, я́ко Тро́ицу Ли́цы Тя чту, О́тче, и Сы́не, и Ду́ше Пресвяты́й: безнача́льную держа́ву Твоего́ Ца́рствия сла́влю во ве́ки.

И ны́не, и при́сно, и во ве́ки веко́в. Ами́нь.

Мо́лит Тя, Христе́, Богоро́дица, мо́лит учени́к Тво́их собо́р: Твой мир да́руй ми́рови Твоему́, и щедро́ты Твоя́ пода́ждь нам бога́тно во ве́ки.

Хвали́м, Благослови́м, покланя́емся Го́сподеви, пою́ще и превознося́ще во вся ве́ки.

Па́ки ирмо́с, о́ба ли́ка вку́пе: На горе́ святе́й просла́вльшася:

Песнь 9

Ирмо́с: Чу́жде ма́терем де́вство и стра́нно де́вам деторожде́ние: на Тебе́, Богоро́дице, обоя́ устро́ишася. Тем Тя вся племена́ земна́я непреста́нно велича́ем. (Два́жды).

Сла́ва Тебе́, Бо́же наш, сла́ва Тебе́.

Чу́жде есть нечести́вым целому́дрие, и стра́нно праведником законопреступле́ние: Ио́сиф же вели́кий уклони́ся греха́, и целому́дрия бысть о́браз и подо́бие, вои́стину Христо́во.

Сла́ва Тебе́, Бо́же наш, сла́ва Тебе́.

Чу́жде есть беззако́нником благозако́ние, и стра́нно неве́рным богоразу́мие, иуде́е же сия́ отри́нуша за беззако́ние. Те́мже и еди́ни са́ми насле́доваша, я́коже смоко́вница, кля́тву.

Сла́ва Тебе́, Бо́же наш, сла́ва Тебе́.

Взалка́ челове́ческаго спасе́ния, хлеб сый жи́зни, Христо́с и Бог мой. Те́мже смоко́вницу предвари́в, безпло́дное собо́рище, ли́ствием обра́стшую зако́нно, я́ко ви́де, прокля́т.

Сла́ва Тебе́, Бо́же наш, сла́ва Тебе́.

Зако́нное непло́дие прокля́л еси́, я́ко ли́ствие, процвета́ющее письменосе́нный ра́зум, плодо́в же дел не иму́щее за беззако́ние: нас же всех благода́ти сыно́в, Спа́се, Благослови́.

Сла́ва Тебе́, Бо́же наш, сла́ва Тебе́,

Жезл у́бо Моисе́ев дре́вле в змию, Ааро́нов же жезл в зе́лено преложи́ся и процвете́ ли́ствие: непло́дное же изсо́хшее собо́рище законопресту́пное в непло́дную преложи́ся смоко́вницу.

Сла́ва Тебе́, Бо́же наш, сла́ва Тебе́.

Готови́, Иуде́е, свяще́нники Твоя́ и устро́й ру́це к богоуби́йству: се бо прии́де Кро́ткий и Молчали́вый на страсть, А́гнец сый и Па́стырь наш, Христо́с, Царь Изра́илев.

Сла́ва Тебе́, Бо́же наш, сла́ва Тебе́.

Приими́, Иуде́е, Царя: се бо на страсть прихо́дит во́лею, да постра́ждет и спасе́т зову́щыя непреста́нно: благослове́н Гряды́й спасти́ Кресто́м вся́ческая.

Сла́ва Тебе́, Бо́же наш, сла́ва Тебе́.

Обрати́л есть, Иуде́е, праздники Твоя́ в плачь Влады́ка, по проро́честву: богоуби́йца бо показа́лся еси́ Обра́щшаго дре́вле ка́мень и несеко́мый во исто́чники водны́я и езе́ра, я́коже пое́т Дави́д.

Сла́ва: Чужде есть беззако́нным е́же Тя сла́вити Безнача́льное Существо́, Отца́, и Сы́на, и Свята́го Ду́ха, Несозда́нное Вседержи́тельство, И́мже весь мир соде́лася, ма́нием Боже́ственныя держа́вы Твоея́.

И ны́не: Приво́дим в моли́тву Богоро́дицу: Той моли́твами и апо́стол Твои́х о́бщники ны сотвори́, Влады́ко, благи́х Твои́х и све́тлости сподо́би, Спа́се, Воскресе́ния Твоего́.

И па́ки ирмо́с о́ба ли́ка вку́пе: Чу́жде ма́терем де́вство:

Чтец: Трисвято́е, по О́тче наш.

Свяще́нник Возгла́с: Я́ко Твое́ есть Ца́рство:

Чтец: Ами́нь.

И конда́к, глас 8:

Иа́ков рыда́ше Ио́сифова лише́ния и до́блий седи́ше на колесни́це, я́ко царь почита́ем: еги́птяныни бо тогда́ сласте́м не порабо́тав, возпросла́вля́шеся от Ве́дущаго челове́ческая сердца́ и Посыла́ющаго вене́ц нетле́нный.

Та́же: Го́споди, поми́луй. (40).

И́же на вся́кое вре́мя и на вся́кий час, на Небеси́ и на земли́ покланя́емый и сла́вимый Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й и гре́шныя ми́луяй, И́же вся зовы́й ко спасе́нию обеща́ния ра́ди бу́дущих благ. Сам, Го́споди, приими́ и на́ша в час сей моли́твы, и испра́ви живо́т наш к за́поведем Твои́м: ду́шы на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней: огради́ нас святы́ми Твои́ми А́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы; я́ко благослове́н еси́ во ве́ки веко́в. Ами́нь.

Го́споди, поми́луй. (Три́жды). Сла́ва, и ны́не: Честне́йшую Херуви́м: И́менем Госпо́дним Благослови́, О́тче.

Свяще́нник: Бо́же, уще́дри ны, и Благослови́ ны, просвети́ лице́ Твое́ на ны, и поми́луй ны.

И моли́тву Свята́го Ефре́ма с покло́ны 3 вели́кими. Та́кже ма́лых 12 покло́нов, глаго́люще на ки́йждо: Бо́же, очи́сти мя гре́шнаго. И па́ки всю моли́тву Свята́го Ефре́ма и покло́н вели́кий еди́н.

Та́же Чтец: Трисвято́е, по О́тче наш: Го́споди, поми́луй (12). Нескве́рная, Небла́зная.

И да́лее оконча́ние ма́лого повече́рия, я́коже в Часосло́ве.

Свяще́нник: Благослове́н Бог наш всегда́, ны́не и при́сно, и во ве́ки веко́в.

Чтец: Ами́нь. Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, И́мене Твоего́ ра́ди.

Го́споди, поми́луй. (Три́жды).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

О́тче наш, И́же еси́ на Небесе́х. Да святи́тся И́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хлеб наш насу́щный даждь нам днесь и оста́ви нам до́лги на́ша, я́коже и мы оставля́ем должнико́м на́шим, и не введи́ нас во искуше́ние, но изба́ви нас от лука́ваго.

Свяще́нник: Яко́ Твое́ есть Ца́рство, и си́ла и сла́ва, Отца́, и Сы́на, и Свята́го Ду́ха ны́не, и при́сно, и во ве́ки веко́в.

Чтец: Ами́нь. Го́споди, поми́луй. (12). Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому Христу́, Царе́ви и Бо́гу на́шему.

И посе́м чтет обы́чная у́тренния псалмы́ ти́хо и ко́сно, за е́же кади́ти свяще́ннику вся лю́ди.

Услы́шит тя Госпо́дь в день печа́ли, защи́тит тя И́мя Бо́га Иа́ковля. По́слет ти по́мощь от Свята́го, и от Сио́на засту́пит тя. Помяне́т вся́ку же́ртву твою́, и всесожже́ние твое́ ту́чно бу́ди. Даст ти Госпо́дь по се́рдцу твоему́, и весь сове́т твой испо́лнит. Возра́дуемся о спасе́нии твое́м, и во И́мя Го́спода Бо́га на́шего возвели́чимся: испо́лнит Госпо́дь вся проше́ния Твоя́. Ны́не позна́х, я́ко спа́се Госпо́дь Христа́ Своего. Услы́шит Его́ с Небесе́ Свята́го Своего́, в си́лах спасе́ние десни́цы Его́. Си́и на колесни́цах, и си́и на ко́нех: мы же во И́мя Го́спода Бо́га на́шего призове́м. Ти́и спя́ти бы́ша и падо́ша, мы же воста́хом и испра́вихомся. Го́споди, спаси́ царя и услы́ши ны, во́ньже а́ще день призове́м Тя.

Го́споди, си́лою Твое́ю возвесели́тся царь и о спасе́нии Твое́м возрадуется зело. Жела́ние се́рдца его́ дал еси́ ему́ и хоте́ния устну́ его́ не́си лиши́л его́. Я́ко предвари́л еси́ его́ благослове́нием благосты́нным, положи́л еси́ на главе́ его́ вене́ц от ка́мене че́стна. Живота́ проси́л есть у Тебе́, и дал еси́ ему́ долготу́ дний, во век ве́ка. Ве́лия сла́ва его́ спа́сением Твои́м, сла́ву и велеле́пие возложи́ши на него́. Я́ко да́си ему́ благослове́ние во век ве́ка, возвесели́ши его́ ра́достию с лице́м Твои́м. Я́ко царь упова́ет на Го́спода, и ми́лостию Вы́шняго не подви́жится. Да обря́щется рука́ Твоя́ всем враго́м Твои́м, десни́ца Твоя́ да обря́щет вся ненави́дящыя Тебе́. Я́ко положи́ши их, я́ко пещь о́гненную, во вре́мя лица́ Твоего́: Госпо́дь гне́вом Свои́м смяте́т я, и снесть их огнь. Плод их от земли́ погуби́ши, и се́мя их от сыно́в челове́ческих. Я́ко уклони́ша на Тя зла́я, помы́слиша сове́ты, и́хже не возмо́гут соста́вити. Я́ко положи́ши я хребе́т во избытцех Твои́х, угото́виши лице́ их. Вознеси́ся, Го́споди, си́лою Твое́ю, воспое́м и пое́м си́лы Твоя́.

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, И́мене Твоего́ ра́ди.

Го́споди, поми́луй. (Три́жды).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

О́тче наш, И́же еси́ на Небесе́х. Да святи́тся И́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный даждь нам днесь и оста́ви нам до́лги на́ша, я́коже и мы оставля́ем должнико́м на́шим, и не введи́ нас во искуше́ние, но изба́ви нас от лука́ваго.

Свяще́нник: Я́ко Твое́ есть Ца́рство, и си́ла, и сла́ва. Отца́, и Сы́на, и Свята́го Ду́ха ны́не, и при́сно, и во ве́ки веко́в.

Чтец: Ами́нь.

И тропари́ сия́:

Спаси́, Го́споди, лю́ди Твоя́ и Благослови́ достоя́ние Твое́: побе́ды на сопроти́вныя да́руя и Твое́ сохраня́я Кресто́м Твои́м жи́тельство.

Сла́ва: Вознесы́йся на Крест во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же: возвесели́ нас си́лою Твое́ю, побе́ды дая́ нам на супоста́ты, посо́бие иму́щым Твое́ ору́жие ми́ра – непобеди́мую побе́ду.

И́ ны́не: Предста́тельство стра́шное и непосты́дное, не пре́зри, Блага́я, моли́тв на́ших, Всепе́тая Богоро́дице, утверди́ правосла́вных жи́тельство: спаси́ ве́рныя лю́ди Твоя́ и пода́ждь им с Небесе́ побе́ду, зане́ родила́ еси́ Бо́га, Еди́на Благослове́нная.

Свяще́нник глаго́лет ектению́: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй. (Три́жды).

Еще́ мо́лимся о Господи́не и Отце́ на́шем блаже́ннейшем Митрополи́те Ону́фрии, и о Господи́не на́шем Преосвященне́йшем митрополи́те (и́ли: архиепи́скопе, и́ли: епи́скопе) (и́мярек), и всей во Христе́ бра́тии на́шей.

Лик: Го́споди, поми́луй. (Три́жды).

Еще́ мо́лимся о Богохрани́мей стране́ на́шей, власте́х и во́инстве е́я, да ти́хое и безмо́лвное житие́ поживе́м во вся́ком благоче́стии и чистоте́.

Лик: Го́споди, поми́луй. (Три́жды).

Еще́ мо́лимся за всю бра́тию и за вся христиа́ны.

Лик: Го́споди, поми́луй. (Три́жды).

Возгла́с: Я́ко Ми́лостив и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху ны́не, и при́сно, и во ве́ки веко́в.

Лик: Ами́нь.

Та́же глаго́лем шестопса́лмие со вся́ким внима́нием и стра́хом Бо́жиим, я́ко Самому́ собесе́дующе Христу́ Бо́гу на́шему неви́димо и моля́ще о гресе́х на́ших.

Учине́нный чтец со благогове́нием и стра́хом Бо́жним глаго́лет си́це:

Сла́ва в вы́шних Бо́гу и на земли́ мир, в челове́цех благоволе́ние. (Три́жды).

Го́споди, устне́ мой отве́рзеши, и уста́ моя́ возвестя́т хвалу́ Твою́. (Два́жды).

Го́споди, что́ ся умно́жиша стужа́ющии ми? Мно́зи востаю́т на мя. Мно́зи глаго́лют души́ моея́: несть спасе́ния ему́ в Бо́зе его́. Ты же, Го́споди, засту́пник мой еси́, сла́ва моя́, и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ Святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой. Яко́ Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́. Аз усну́х, и спах, воста́х, я́ко Госпо́дь засту́пит мя.

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й, от лица́ гне́ва Твоего́; несть ми́ра в косте́х мои́х, от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Постра́дах и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых, и смири́хся до зела, рыка́х от воздыха́ния се́рдца моего́. Го́споди, пред Тобо́ю все жела́ние мое́, и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Друзи мои́ и и́скреннии мои́, пря́мо мне прибли́жишася и ста́ша. И бли́жнии мои́ отдале́че мене́ ста́ша, и нужда́хуся и́щущии ду́шу мою́, и и́щущии зла́я мне глаго́лаху су́етная, и льсти́вным весь день поуча́хуся. Аз же я́ко глух не слы́шах: и я́ко нем не отверза́яй уст свои́х. И бых я́ко челове́к не слы́шай и не и́мый во усте́х свои́х обличе́ния. Я́ко на Тя, Го́споди, упова́х. Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́, и внегда́ подви́жатися нога́м мои́м, на мя велере́чеваша. Я́ко аз на ра́ны гото́в, и боле́знь моя́ пре́до мно́ю есть вы́ну. Я́ко беззако́ние мое́ аз возвещу́, и попеку́ся о гресе́ мое́м. Врази́ же мои́ живу́т, и укрепи́шася па́че мене́, и умно́жишася ненави́дящии мя без пра́вды. Воздаю́щий ми зла́я воз блага́я, оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́, па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о И́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́. Предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная. На у́тренних поуча́хся в Тя, я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва, и ны́не: Аллилу́иа, Аллилу́иа, Аллилу́иа, сла́ва Тебе́, Боже́. (Три́жды, без покло́нов).

Го́споди, поми́луй. (Три́жды).

Сла́ва, и ны́не:

По прочте́нии трех псалмо́в исхо́дит свяще́нник от олтаря́, и глаго́лет моли́твы у́тренния, та́йно, пред святы́ми две́рьми.

Го́споди Бо́же спасе́ния моего́, во дни воззва́х и в нощи́ пред Тобо́ю. Да вни́дет пред Тя моли́тва моя́, приклони́ ухо Твое́ к моле́нию Моему́. Я́ко испо́лнися зол душа́ моя́, и живо́т мой а́ду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь. Я́ко я́звеннии спя́щий во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́, пре́дан бых, и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́ и пра́вда Твоя́ в земли́ забве́нней? И аз к Тебе́, Го́споди, воззва́х, и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности мое́й, возне́с же ся, смири́хся и изнемого́х. На мне приидо́ша гне́ви Твои́, устраше́ния Твоя́ возмути́ша мя. Обыдо́ша мя, я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й. Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́, приклони́ ухо Твое́ к моле́нию моему́.

Благослови́, душе́ моя́, Го́спода, и вся вну́тренняя моя́, И́мя Свято́е Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́, обнови́тся я́ко о́рля ю́ность твоя́. Творяй ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́. Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ в век вражду́ет. Не по беззако́нием на́шим сотвори́л есть нам, ниже́ по грехо́м на́шим возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е его́, я́ко цвет се́льный, та́ко отцвете́т. Яко́ дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щий сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела Его́. На вся́ком ме́сте влады́чествия Его́, Благослови́, душе́ моя́, Го́спода. На вся́ком ме́сте влады́чествия Его́, Благослови́, душе́ моя́, Го́спода.

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й. И не вни́ди в суд с рабо́м Твои́м, я́ко не оправди́тся пред Тобо́ю всяк живый. Я́ко погна враг ду́шу мою́, смирил есть в зе́млю живо́т мой. Посади́л мя есть в те́мных, я́ко ме́ртвыя ве́ка, и уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Скоро услы́ши мя, Го́споди, исчезе́ дух мой. Не отврати́ лица Твоего́ от Мене́, и уподо́блюся низходя́щым в ров. Слыша́ну сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь, во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́, И ми́лостию Твое́ю потреби́ши враги́ моя́, и погуби́ши вся стужа́ющыя души́ моея́, я́ко аз раб Твой есмь. Услы́ши мя, Го́споди, в пра́вде Твое́й, и не вни́ди в суд с рабо́м Твои́м. Услы́ши мя, Го́споди, в пра́вде Твое́й, и не вни́ди в суд с рабо́м Твои́м. Дух Твой благи́й наставит мя на зе́млю пра́ву.

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Аллилу́иа, Аллилу́иа, Аллилу́иа, сла́ва Тебе́, Бо́же. (Три́жды).

Посе́м ектениа́ вели́кая

Возглаша́ет иере́й и́ли диа́кон: Аллилу́иа, на глас 8, и певцы́, велегла́сно и со сладкопе́нием, пою́т Аллилу́иа на о́ба ли́ка.

Стихи́ же глаго́лются сия́:

Стих 1: От но́щи у́тренюет дух мой к Тебе́, Бо́же, зане́ свет повеле́ния Твоя́ на земли́.

Стих 2: Пра́вде научи́теся жи́вущии на земли́.

Стих 3: За́висть прии́мет лю́ди ненака́занныя.

Стих 4: Приложи́ им зла, Го́споди, приложи́ зла сла́вным земли́.

И по ко́емждо стисе́ пою́т: Аллилу́иа. (Три́жды).

Посе́м тропа́рь, глас то́йже:

Се, Жени́х гряде́т в полу́нощи, и блаже́н раб, его́же обря́щет бдя́ща: недосто́ин же па́ки, его́же обря́щет уныва́юща. Блюди́ у́бо, душе́ моя́, не сно́м отяготи́ся, да не сме́рти предана́ бу́деши и Ца́рствия вне затвори́шися, но воспряни́ зову́щи: Свят, Свят, Свят еси́, Бо́же, Богоро́дицею поми́луй нас.

Сла́ва: Се, Жени́х гряде́т в полу́нощи:

И ны́не: Се, Жени́х гряде́т в полу́нощи:

И чте́тся кафи́сма 4 (псалмы́ 24–31).

Седа́лен, глас 1:

Подо́бен: Гроб Твой:

Страда́ния честна́я настоя́щий день, я́коже свети́ла соверше́нна, возсиява́ют ми́ру: Христо́с бо гряде́т страда́ти бла́гостию, вся содержа́й дла́нию, изво́ляет простре́тися на Дре́ве, е́же спасти́ челове́ка.

Сла́ва, и ны́не: Страда́ния честна́я настоя́щий день:

И чте́тся кафи́сма 5 (псалмы́ 32–36).

Седа́лен, глас 1:

Подобен:

Неви́димый Судие́, в пло́ти ка́ко ви́ден был еси́, и и́деши от муже́й беззако́нных убие́н бы́ти, на́ше осужде́ние осужда́яй стра́стию Твое́ю? Те́мже хвалу́, вели́чие и сла́ву возсыла́юще вла́сти Твое́й, Слове, согла́сно прино́сим.

Сла́ва, и ны́не: Неви́димый Судие́, в пло́ти:

И чте́тся кафи́сма 6 (псалмы́ 37–45).

Седа́лен, глас 8:

Подо́бен: Прему́дрости:

Страсте́й Госпо́дних нача́тки, настоя́щий день светлоно́сит. Прииди́те у́бо, празднолю́бцы, усря́щим пе́сньми: Созда́тель бо гряде́т Крест прия́ти, испыта́ния и ра́ны, Пила́том суди́м. Те́мже и от раба́ уда́рен быв по главе́, вся терпи́т, да спасе́т челове́ка. Сего́ ра́ди возопии́м Ему́: Человеколю́бче, Христе́ Бо́же, прегреше́ний да́руй оставле́ние покланя́ющимся ве́рою пречи́стым страсте́м Твои́м.

Сла́ва, и ны́не: Страсте́й Госпо́дних начатки:

Посе́м диа́кон возглаша́ет: И о сподо́битися нам слы́шанию Свята́го Ева́нгелия Го́спода Бо́га мо́лим.

Лик: Го́споди, поми́луй. (Три́жды).

Диа́кон: Прему́дрость, про́сти, услы́шим Свята́го Ева́нгелия.

Свяще́нник: Мир всем.

Лик: И ду́хови твоему́.

Свяще́нник возглаша́ет: От Матфе́я Свята́го Ева́нгелия чте́ние.

Лик: Сла́ва Тебе́, Го́споди, сла́ва Тебе́.

Диа́кон: Во́нмем.

И чтет свяще́нник Ева́нгелие:

Во вре́мя о́но, возвра́щься Иису́с во град, взалка́. И узре́в смоко́вницу еди́ну при пути́, прии́де к ней и ничто́же обре́те на ней, то́кмо ли́ствие еди́но, и глаго́ла ей: да николи́же от Тебе́ плода́ бу́дет во ве́ки, и а́бие и́зсше смоко́вница. И ви́девше ученицы́ диви́шася, глаго́люще: ка́ко а́бие и́зсше смоко́вница? Отвеща́в же Иису́с, рече́ им: ами́нь, глаго́лю вам, а́ще и́мате ве́ру и не усумните́ся, не то́кмо смоко́вничное сотворите́: но а́ще и горе́ сей рече́те: дви́гнися и ве́рзися в мо́ре, бу́дет. И вся ели́ка а́ще воспро́сите в моли́тве, ве́рующе, прии́мете. И прише́дшу Ему́ в це́рковь, приступи́ша к Нему́ уча́щу архиере́е и ста́рцы людсти́и, глаго́люще: ко́ею вла́стию сия́ твори́ши? И кто Ти даде́ власть сию́? Отвеща́в же Иису́с, рече́ им: вопрошу́ вы и Аз сло́во еди́но, е́же а́ще рече́те Мне, и Аз вам реку, ко́ею вла́стию Сия́ творю́. Креще́ние Иоа́нново отку́ду бе, с Небесе́ ли или́ от челове́к? Они́ же помышля́ху в себе́, глаго́люще: а́ще рече́м, с Небесе́, рече́т нам: почто́ у́бо не ве́ровасте ему́? А́ще ли рече́м, от челове́к, бои́мся наро́да; вси бо и́мут Иоа́нна, я́ко проро́ка. И отвеща́вше Иису́сови, ре́ша: не ве́мы. Рече́ им и Той: ни Аз вам глаго́лю, ко́ею вла́стию сия́ творю́. Что́же ся вам мнит? Челове́к не́кий имя́ше два сы́на и, прише́д к пе́рвому, рече́: чадо, иди́ днесь де́лай в виногра́де мое́м. Он же отвеща́в, рече́: не хощу́. Последи́ же, раска́явся, и́де. И присту́пль к друго́му, рече́ та́кожде. Он же отвеща́в, рече́: аз, Го́споди, иду́. И не и́де. Ки́й от обою́ сотвори́ во́лю о́тчую? Глаго́лаша ему́: пе́рвый. Глаго́ла им Иису́с: ами́нь глаго́лю вам, я́ко мытари́ и любоде́йцы варя́ют вы в Ца́рствии Бо́жии. Прии́де бо к вам Иоа́нн Крести́тель путе́м пра́ведным и не ве́ровасте ему́: мытари́ же и любоде́йцы ве́ровавша ему́: вы же ви́девше не раска́ястеся последи́ ве́ровати ему́. И́ну при́тчу слы́шите: челове́к не́кий бе домови́т, и́же насади́ виноград, и опло́том огради́ его́, и ископа́ в нем точи́ло, и созда столп, и вдаст и́ де́лателем: и отыде. Егда́ же прибли́жися вре́мя плодо́в, посла́ рабы́ Своя́ к де́лателем, прия́ти плоды его́. И е́мше де́лателе рабы его́, о́ваго у́бо би́ша, о́ваго же уби́ша, о́ваго же ка́мением поби́ша. Па́ки посла́ и́ны рабы́ мно́жайша пе́рвых: и сотвори́ша им та́коже. Последи́ же посла́ к ним сы́на своего́, глаго́ля: усрамя́тся сы́на моего́. Де́лателе же, ви́девше сы́на, ре́ша в себе́: сей есть насле́дник, Прииди́те, убие́м его́ и удержи́м достоя́ние его́. И е́мше его́, изведо́ша вон из виногра́да и уби́ша. Егда́ у́бо прии́дет Го́сподин виногра́да, что́ сотвори́т де́лателем тем? Глаго́лаша Ему́: злых зле погуби́т их: и виногра́д переда́ст ины́м де́лателем, и́же воздадя́т ему́ плоды во времена́ Своя́. Глаго́ла им Иису́с: не́сте ли чли николи́же в писа́ниих: ка́мень, его́же не в ряду́ сотвори́ша зи́ждущии, сей бысть во главу́ угла́: от Го́спода бысть сей, и есть ди́вна во о́чию на́шею? Сего́ ра́ди глаго́лю вам: я́ко оты́мется от вас Ца́рствие Бо́жие и да́стся язы́ку, творя́щему́ плоды его́.

Лик: Сла́ва Тебе́, Го́споди, сла́ва Тебе́.

Та́же псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю, и грех мой пре́до мно́ю есть вы́ну. Тебе́ еди́ному согреши́х и лука́вое пред Тобо́ю сотвори́х; я́ко да оправди́шися во словесе́х Твои́х, и победи́ши внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мой отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.

Посе́м диа́кон: Спаси́, Бо́же, лю́ди Твоя́ и Благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя: моли́твами Всепречи́стыя Влады́чицы на́шея Богоро́дицы и Присноде́вы Мари́и; си́лою Честна́го и Животворя́щаго Креста; предста́тельствы Честны́х Небе́сных Сил Безпло́тных; честна́го сла́внаго проро́ка, Предте́чи и Крести́теля Иоа́нна; святы́х сла́вных и всехва́льных Апо́стол; и́же во святы́х оте́ц на́ших и вселе́нских вели́ких учи́телей и святи́телей Васи́лия Вели́каго, Григо́рия Богосло́ва и Иоа́нна Златоу́стаго; и́же во святы́х Отца́ на́шего Никола́я, архиепи́скопа Мир Лики́йских, Чудотво́рца; и́же во святы́х оте́ц на́ших Мефо́дия и Кири́лла, учи́телей слове́нских; Свята́го равноапо́стольнаго вели́каго кни́зя Влади́мира и Святы́я равноапо́стольныя вели́кия княги́ни О́льги; и́же во святы́х оте́ц на́ших и всей Руси́и чудотво́рцев Михаи́ла, Петра́, Алекси́я, Ио́ны, Фили́ппа и Ермоге́на; святы́х сла́вных и добропобе́дных му́чеников; преподо́бных и богоно́сных оте́ц на́ших, святы́х и пра́ведных Богооте́ц Иоаки́ма и А́нны (и свята́го, имяре́к, его́же есть храм) и всех святы́х, мо́лим Тя, Многоми́лостиве Го́споди, услы́ши нас, гре́шных, моля́щихся Тебе́, и поми́луй нас.

Лик: Го́споди, поми́луй. (12).

Свяще́нник: Ми́лостию и щедро́тами, и человеколю́бием Единоро́днаго Твоего́ Сы́на, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в.

И пое́м трипе́снец, творе́ние господи́на Космы, глас 2-й, его́же краестро́чие: ти девте́ра, си есть, во Вторы́й день, е́же есть понеде́льник. Ирмо́с по два́жды, тропари́ же на 12.

Песнь 1

Ирмо́с: Непроходи́мое волня́щееся мо́ре Бо́жиим Свои́м веле́нием изсуши́вшему и пешеше́ствовати сквозе́ е́ Изра́ильтеския лю́ди наста́вльшему, Го́сподеви пои́м, сла́вно бо просла́вися. (Два́жды).

Припев: Сла́ва Тебе́, Бо́же наш, сла́ва Тебе́.

Неизрече́нное Сло́ва Бо́жия схожде́ние, еже Христо́с, То́йжде есть Бог и Челове́к, е́же Бог не восхище́нием бы́ти непщева́в, внегда́ вообража́тися рабо́м, показу́ет ученико́м, сла́вно бо просла́вися. (6 раз).

Сла́ва Тебе́, Бо́же наш, сла́ва Тебе́.

Послужи́ти Сам приидо́х, его́же зра́ком Создатель во́лею обложе́н есмь, обнища́вшему Ада́му, бога́тствуяй Бо́жество́м, положи́ти хотя́й мою́ ду́шу избавле́ние зань, И́же безстра́стный Бо́жество́м (4 раза).

Сла́ва: Послужи́ти Сам приидо́х:

И ны́не: Послужи́ти Сам приидо́х:

Та́же о́ба ли́ка вку́пе пою́т ирмо́с: Непроходи́мое волня́щееся мо́ре:

Посе́м ектениа́ ма́лая: Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Возгла́с: Ты бо еси́ Царь ми́ра и Спас душ на́ших, и Тебе́ сла́ву возсыла́ем. Отцу́ и Сы́ну, и Свято́му Ду́ху ны́не, и при́сно, и во ве́ки веко́в.

Лик: Ами́нь.

Та́же конда́к, глас 8:

Подо́бен: Я́ко нача́тки:

Иа́ков рыда́ше Ио́сифова лише́ния и до́блий седя́ше на колесни́це, я́ко царь почита́ем: еги́птяныни бо тогда́ сласте́м не порабо́тав, возпрославля́шеся от Ве́дущаго челове́ческая се́рдца и Посыла́ющаго вене́ц нетле́нный.

И́кос: На рыда́ние ны́не приложи́м рыда́ние и излие́м сле́зы со Иа́ковом, пла́чущеся Ио́сифа, приснопа́мятнаго и целому́дреннаго, порабоще́ннаго у́бо те́лом, ду́шу же непорабоще́ну соблю́дшаго и Еги́птом всем Ца́рствовавшаго. Бог бо подае́т рабо́м Свои́м вене́ц нетле́нный.

Песнь 8

Ирмо́с: Устраши́ся отроко́в благочести́вых сообра́знаго души́ нескве́рнаго те́ла и устрани́ся воспи́танный в безме́рном веществе́ неутружде́н огнь: присноживу́щу же изувя́дшу пла́меню, ве́чнующая песнь воспева́шеся: Го́спода, вся дела, по́йте и превозноси́те во вся ве́ки. (Два́жды).

Сла́ва Тебе́, Бо́же наш, сла́ва Тебе́.

Вас тогда́ Мои́х ученико́в позна́ют вси, а́ще Моя́ за́поведи соблюдете́, глаго́лет Спас друго́м, ко стра́сти иды́й: мир име́йте в себе́ и во всех, и смире́нная му́дрствующе возвы́ситеся: и Го́спода зна́юще Мя по́йте и превозноси́те во вся ве́ки. (6 раз).

Сла́ва Тебе́, Бо́же наш, сла́ва Тебе́.

Чи́на сопроти́вна вам язы́ческа, да есть держа́ва купноро́дных: не жре́бий бо Мой, мучи́тельство же, ра́зум самоизбра́нный. И́же у́бо предызя́щный в вас бы́ти хотя́й други́х, да есть всех после́днейший: и, Го́спода зна́юще Мя по́йте, и превозноси́те во вся ве́ки. (4 раза).

Благослови́м Отца́, и Сы́на, и Свята́го Ду́ха Го́спода.

Чи́на сопроти́вна вам язы́ческа:

И ны́не: Чи́на сопроти́вна вам языческа:

Последи́ же о́ба ли́ка вку́пе пою́т: Хва́лим, Благослови́м, покланя́емся Го́сподеви, пою́ще и превознося́ще во вся ве́ки.

И ирмо́с: Устраши́ся отроко́в благочести́вых: Честне́йшую: не пое́м.

Песнь 9

Ирмо́с: Возвели́чил еси́, Христе́, ро́ждшую Тя Богоро́дицу, от Нея́же, Созда́телю наш, в подобостра́стное нам обле́клся еси́ те́ло, на́ших прегреше́ний реши́тельное: Сию́ ублажа́юще вси ро́ди, Тебе́ велича́ем. (Два́жды).

Сла́ва Тебе́, Бо́же наш, сла́ва Тебе́.

Скве́рну всю страстную отри́нувше, досто́йный Боже́ственнаго Ца́рствия ра́зум восприи́мем благому́дрственный, Твои́м апо́столом предре́кл еси́, всех Прему́дросте, в не́мже просла́витеся, светя́щеся со́лнца светозарнее. (6 раз).

Сла́ва Тебе́, Бо́же наш, сла́ва Тебе́.

Взира́юще на Мя, рекл еси́, Го́споди, Твои́м ученико́м, не му́дрствуйте высо́кая, но соотведи́теся смире́нными: Мою́, юже пию́, пи́йте чашу, я́ко да во Ца́рствии Отца́ со Мно́ю просла́витеся. (4 раза).

Сла́ва: Взира́юще на Мя, рекл еси́, Го́споди:

И ны́не: Взира́юще на Мя, рекл еси́, Го́споди:

И па́ки о́ба ли́ка вку́пе пою́т ирмо́с: Возвели́чил еси́, Христе́, ро́ждшую Тя Богоро́дицу:

Та́же ектениа́ ма́лая: Па́ки и па́ки:

Возгла́с: Я́ко Тя хва́лят вся Си́лы Небе́сныя, и Тебе́ сла́ву возсыла́ем, Отцу́, и Сы́ну, и Свято́му Ду́ху ны́не, и при́сно, и во ве́ки веко́в.

Лик: Ами́нь.

Посе́м канона́рх, сто́я посреде́ це́ркве, пое́т ексапостила́рий:

Черто́г Твой ви́жду, Спа́се мой, украше́нный, и оде́жды не и́мам, да вни́ду в онь: просвети́ одея́ние души́ моея́, Светода́вче, и спаси́ мя.

Сла́ва: Черто́г Твой ви́жду, Спа́се мой:

И ны́не: Черто́г Твой ви́жду, Спа́се мой:

Чтец обы́чная псалмы́:

Хвали́те Го́спода с небе́с; Тебе́ подоба́ет песнь Бо́гу. Хвали́те Го́спода с небе́с, хвали́те Его́ в вы́шних, Тебе́ подоба́ет песнь Бо́гу. Хвали́те Его́, вси А́нгели Его́, хвали́те Его́, вся Си́лы Его́; Тебе́ подоба́ет песнь Бо́гу. Хвали́те Его́, со́лнце и луна́, хвали́те Его́, вся зве́зды и свет. Хвали́те Его́, небеса́ небе́с и вода́, и́же превы́ше небе́с, да восхва́лят И́мя Госпо́дне. Я́ко Той рече́, и бы́ша: Той повеле́, и созда́шася. Поста́ви я в век и в век ве́ка: повеле́ние положи́, и не ми́мо и́дет. Хвали́те Го́спода от земли́, зми́еве и вся бе́здны. Огнь, град, снег, го́лоть, дух бу́рен, творя́щая сло́во Его́. Го́ры и вси хо́лми, древа́ плодоно́сна и вси ке́дри. Зве́рие и вси́ ско́ти, гади и пти́цы перна́ты. Ца́рие зе́мстии и вси лю́дие, кня́зи и вси судии́ зе́мстии. Ю́ношы и де́вы, ста́рцы с ю́нотами, да восхва́лят И́мя Госпо́дне, я́ко вознесе́ся И́мя Того́ Еди́наго. Испове́дание Его́ на земли́ и на небеси́. И вознесе́т рог люде́й Свои́х, песнь всем преподо́бным Его́, сыновом Изра́илевым, лю́дем, приближа́ющымся Ему́.

Воспо́йте Го́сподеви песнь но́ву, хвале́ние Его́ в це́ркви преподо́бных. Да возвесели́тся Изра́иль о сотво́ршем его́, и сы́нове Сио́ни возрадуются о Царе́ свое́м. Да восхвалят И́мя Его́ в ли́це, в тимпа́не и псалти́ри да пою́т Ему́. Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние. Восхва́лятся преподо́бнии во сла́ве и возра́дуются на ло́жах сво́их. Возноше́ния Бо́жия в горта́ни их, и мечи́ обою́ду остры́ в рука́х их: сотвори́ти отмще́ние во язы́цех, обличе́ния в лю́дех связа́ти цари́ их пу́ты, и сла́вныя их ручны́ми око́вы желе́зными.

Сотвори́ти в них суд напи́сан. Сла́ва сия́ бу́дет всем преподо́бным Его́.

Хвали́те Бога во святы́х Его́, хвали́те Его́ во утверже́нии си́лы Его́.

И пое́м стихи́ры самогла́сны на 4, глас 1:

Стих: Хвали́те Его́ на си́лах Его́, хвали́те Его́ по мно́жеству вели́чествия Его́.

Гряды́й Госпо́дь к во́льной стра́сти, апо́столом глаго́лаше на пути́: се восхо́дим во Иерусали́м, и преда́стся Сын Челове́ческий, я́коже есть пи́сано о Нем. Прииди́те у́бо и мы, очище́нными смы́слы, сше́ствуим Ему́, и сраспне́мся, и умертви́мся Его́ ра́ди жите́йским сласте́м, да и оживе́м с Ним, и услы́шим вопию́ща Его́: не ктому́ в земны́й Иерусали́м за е́же страда́ти, но восхожду́ ко Отцу́ Моему́ и Отцу́ ва́шему, и Бо́гу Моему́ и Бо́гу ва́шему: и совозвы́шу вас в Го́рний Иерусали́м, в Ца́рство Не́бесное.

Стих: Хвали́те Его́ во гла́се тру́бнем, хвали́те Его́ во псалти́ри и гу́слех.

Гряды́й Госпо́дь к во́льной стра́сти:

Глас 5. Стих: Хвали́те Его́ в тимпа́не и ли́це, хвали́те Его́ во стру́нах и орга́не.

Дости́гше, ве́рнии, спаси́тельную страсть Христа́ Бо́га, неизрече́нное Его́ долготерпе́ние просла́вим: я́ко да благоутро́бием Свои́м совоздви́гнет и нас, умерщвле́нных грехо́м, я́ко Благ и Человеколю́бец.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.

Дости́гше, ве́рнии, спаси́тельную страсть:

Сла́ва, и ны́не: Го́споди, гряды́й к страда́нию, Твоя́ утвержда́я ученики́, глаго́лал еси́ осо́бь прие́мь их; ка́ко глаго́л Мои́х не по́мните, я́же пре́жде реко́х вам? Я́ко вся́кому проро́ку несть пи́сано, то́кмо во Иерусали́ме убие́ну бы́ти. Ны́не у́бо вре́мя настои́т, е́же реко́х вам; се́ бо предаю́ся рука́ма гре́шных пору́ган бы́ти, и́же и Кресту́ Мя пригвозди́вше и погребе́нию преда́вше, оме́рзена вменя́т я́ко ме́ртва. Оба́че дерза́йте: тридне́вен бо воста́ну в ра́дость ве́рных и жизнь ве́чную.

Чтец: Сла́ва Тебе́, показа́вшему нам свет.

Сла́ва в вы́шних Бо́гу и на земли́ мир, в челове́цех благоволе́ние. Хва́лим Тя, Благослови́м Тя, кла́няем Ти ся, славосло́вим Тя, благодари́м Тя вели́кия ра́ди сла́вы Твоея́ Го́споди, Царю́ Небе́сный, Бо́же, О́тче Вседержи́телю. Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ Еди́н Свят, Ты еси́ Еди́н Госпо́дь, Иису́с Христо́с, во сла́ву Бо́га Отца́. Ами́нь.

На вся́ку нощь благословлю́ Тя и восхвалю́ И́мя Твое́ во ве́ки, и в век ве́ка.

Го́споди, Прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Тво́ю, я́ко Ты еси́ Бог мой, я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущым Тя.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху ны́не, и при́сно, и во ве́ки веко́в. Ами́нь.

Ектениа́: Испо́лним у́треннюю моли́тву на́шу Го́сподеви.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Дне всего́ соверше́нна, свя́та, ми́рна и безгре́шна у Го́спода про́сим.

Лик: Пода́й, Го́споди.

А́нгела ми́рна, ве́рна наста́вника, храни́теля ду́ши теле́с на́ших у Го́спода про́сим.

Лик: Пода́й, Го́споди.

Проще́ния и оставле́ния грехо́в и прегреше́ний на́ших у Го́спода про́сим.

Лик: Пода́й, Го́споди.

До́брых и поле́зных душа́м на́шим и ми́ра ми́рови у Го́спода про́сим.

Лик: Пода́й, Го́споди.

Про́чее вре́мя живота́ на́шего в ми́ре и покая́нии сконча́ти у Го́спода про́сим.

Лик: Пода́й, Го́споди.

Христиа́нския кончи́ны живота́ на́шего безболе́знены, непосты́дны, ми́рны и до́браго отве́та на Стра́шнем Суди́щи Христо́ве про́сим.

Лик: Пода́й, Го́споди.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Возгла́с: Я́ко Бог ми́лости, и щедро́т, и человеколю́бия еси́, и Тебе́ сла́ву возсыла́ем: Отцу́, и Сы́ну, и Свято́му Ду́ху ны́не, и при́сно и во ве́ки веко́в.

Лик: Ами́нь.

Свяще́нник: Мир всем.

Лик: И ду́хови твоему́.

Свяще́нник: Главы на́ша Го́сподеви прикло́ним.

Лик: Тебе́, Го́споди.

Та́же возгла́с: Твое́ бо есть е́же ми́ловати и спаса́ти ны, Бо́же наш, и Тебе́ сла́ву возсыла́ем: Отцу́, и Сы́ну, и Свято́му Ду́ху ны́не, и при́сно, и во ве́ки веко́в.

Лик: Ами́нь.

И пою́т о́ба ли́ка стихи́ры самогла́сны, на стихо́вне, глас 5:

Го́споди, к та́инству неизглаго́ланному Твоего́ смотре́ния, не довле́ющи сыно́в Зеведе́овых ма́ти, проша́ше Тя, вре́меннаго Ца́рства по́чести дароватися ча́дом ея́: но вме́сто тоя́, ча́шу сме́рти обеща́л еси́ пи́ти друго́м Твои́м, ю́же ча́шу пре́жде сих пи́ти Сам глаго́лал еси́, грехо́в очище́ние. Те́мже Тебе́ вопие́м: Спасе́ние душ на́ших, сла́ва Тебе́.

Стих: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела Твоя́, и наста́ви сы́ны их.

Го́споди, соверше́ннейшая му́дрствовати Твоя́ наказу́я ученики́, не уподо́битися язы́ком глаго́лал еси́, во е́же облада́ти ме́ньшими: не Та́ко бо бу́дет вам Мои́м ученико́м, я́ко ни́щий хотя есмь. Пе́рвый у́бо вас, да бу́дет всем слуга: нача́льствуяй же, я́ко нача́льствуемый, предызя́щный же, я́ко после́днейший. Ибо приидо́х Сам обнища́вшему Ада́му послужи́ти, и избавле́ние да́ти за мно́гих ду́шу Мою́, вопию́щих Ми: сла́ва Тебе́.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, и де́ло рук на́ших испра́ви.

Глас 8: Изсо́хшия смоко́вницы за непло́дие, преще́ния убоя́вшеся, бра́тие, плоды́ досто́йны покая́ния принесе́м Христу́, подаю́щему нам ве́лию ми́лость.

Сла́ва, и ны́не: Глас то́йже:

Втору́ю Е́ву еги́птяныню обре́т змий глаго́лы, тща́шеся ласка́ньми запя́ти Ио́сифа. Но той, оста́вив ри́зу, бежа́ греха́ и наг не стыдя́шеся, я́коже первозда́нный пре́жде преслуша́ния. Того́ моли́твами, Христе́, поми́луй нас.

Та́же чтец: Бла́го есть испове́датися Го́сподеви и́ пе́ти И́мени Твоему́, Вы́шний, возвеща́ти зау́тра ми́лость Твою́ и и́стину Твою́ на вся́ку нощь. (Два́жды).

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти Грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, И́мене Твоего́ ра́ди.

Го́споди, поми́луй. (Три́жды).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

О́тче наш, И́же еси́ на Небесе́х. Да святи́тся И́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́, и на земли́. Хле́б наш насу́щный даждь нам днесь и оста́ви нам до́лги на́ша, я́коже и мы оставля́ем должнико́м на́шим, и не введи́ нас во искуше́ние, но изба́ви нас от лука́ваго.

Свяще́нник возгла́с: Я́ко Твое́ есть Ца́рство, и си́ла, и сла́ва. Отца́, и Сы́на, и Свята́го Ду́ха ны́не, и при́сно, и во ве́ки веко́в.

Чтец: Ами́нь.

И тропа́рь: В хра́ме стоя́ще сла́вы Твоея́, на Небеси́ стоя́ти мним, Богоро́дице, Дверь Небе́сная, отве́рзи нам две́ри ми́лости Твоея́.

Та́же: Го́споди, поми́луй. (40).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем. И́менем Госпо́дним Благослови́, О́тче.

Свяще́нник: Сый благослове́н, Христо́с Бог наш, всегда́, ны́не и при́сно, и во ве́ки веко́в.

Чтец глаго́лет: Ами́нь. Небе́сный Царю́, ве́ру утверди́, язы́ки укроти́, мир умири́, Святы́й храм сей (святу́ю оби́тель сию́) до́бре сохрани́: пре́жде отше́дшыя отцы́ и бра́тию на́шу в селе́ниих пра́ведных учини́ и нас в покая́нии и испове́дании приими́, я́ко Благи́й и Человеколю́бец.

Свяще́нник глаго́лет моли́тву Свята́го Ефре́ма: Го́споди и Влады́ко живота́ моего́: и покло́ны вели́кия три. Та́же ма́лых 12, глаго́люще в себе́ на ки́йждо покло́н: Бо́же, очи́сти мя гре́шнаго.

И па́ки: Го́споди и Влады́ко живота́ моего́: И покло́н еди́н вели́кий.

Чтец глаго́лет:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́ Царе́ви на́шему Бо́гу.

Прииди́те, поклони́мся и припаде́м Самому Христу́, Царе́ви и Бо́гу на́шему.

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра Услы́ши глас мой, зау́тра предстану Ти, и у́зриши мя. Я́ко Бог не хотя́й беззако́ния, Ты еси́: не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма. Возненави́дел еси́ вся де́лающия беззако́ние. Погуби́ши вся глаго́лющия лжу: му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́ вни́ду в дом Твой, поклоню́ся ко хра́му Свято́му Твоему́, в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их, язы́ки свои́ми льща́ху. Суди́ им, Бо́же, да отпаду́т от мы́слей свои́х: по мно́жеству нече́стия их изри́ни я, я́ко преогорчи́ша Тя, Го́споди: И да возвеселя́тся вси упова́ющии на Тя, во век возра́дуются, и всели́шися в них: и похва́лятся о Тебе́ лю́бящии И́мя Твое́. Я́ко Ты Благослови́ши пра́ведника, Го́споди, я́ко ору́жием благоволе́ния венча́л еси́ нас.

Го́споди, прибе́жище был еси́ нам в род и род. Пре́жде да́же гора́м не бы́ти, и созда́тися земли́, и вселе́нней, и от ве́ка и до ве́ка Ты еси́. Не отврати́ челове́ка во смире́ние: и рекл еси́: обрати́теся сы́нове челове́честии. Я́ко ты́сяща лет пред очи́ма Твои́ма, Го́споди, я́ко день вчера́шний, и́же ми́мо и́де, и стража нощна́я. Уничиже́ния их ле́та бу́дут, у́тро я́ко трава́ мимои́дет. У́тро процвете́т и пре́йдет, на ве́чер отпаде́т, ожесте́ет и и́зсхнет. Я́ко исчезо́хом гне́вом Твои́м, и я́ростию Твое́ю смути́хомся. Положи́л еси́ беззако́ния на́ша пред Тобо́ю, век наш в просвеще́ние лица́ Твоего́. Я́ко вси дни́е на́ши оскуде́ша, и гне́вом Твои́м исчезо́хом. Ле́та на́ша я́ко паучи́на поуча́хуся, дни́е лет на́ших, в ни́хже се́дмьдесят лет, а́ще же в си́лах, о́смьдесят лет, и мно́жае их труд и боле́знь: я́ко прии́де кро́тость на ны, и нака́жемся. Кто весть держа́ву гне́ва Твоего́, и от стра́ха Твоего́ я́рость Твою́ исчести́? Десни́цу Твою́ Та́ко скажи́ ми, и окова́нныя се́рдцем в му́дрости. Обрати́ся, Го́споди, доко́ле; и умоле́н бу́ди на рабы́ Твоя́. Испо́лнихомся зау́тра ми́лости Твоея́, Го́споди, и возра́довахомся, и возвесели́хомся. Во вся дни на́ша возвесели́хомся; за дни в ня́же смири́л ны еси́, ле́та в ня́же ви́дехом злая. И при́зри на рабы Твоя́, и на дела Твоя́, и наста́ви сы́ны их. И бу́ди све́тлость Го́спода Бо́га на́шего на нас, и дела́ рук на́ших испра́ви на нас, и де́ло рук на́ших испра́ви.

Ми́лость и суд воспою́ Тебе́, Го́споди: пою́ и разуме́ю в пути́ непоро́чне, когда́ прии́деши ко мне; прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма вещь законопресту́пную, творя́щия преступле́ние возненави́дех. Не прильпе́ мне се́рдце стропти́во, уклоня́ющагося от Мене́ лука́ваго не познах. Оклевета́ющаго тай и́скренняго своего́, сего́ изгонях: го́рдым о́ком, и несытым се́рдцем, с сим не ядях. Очи мои́ на ве́рныя земли́, посаждати я́ со мно́ю; ходя́й по пути́ непоро́чну, сей ми служа́ше. Не живя́ше посреде́ до́му моего́ творя́й горды́ню, глаго́ляй непра́ведная, не испра́вляше пред очи́ма мои́ма. Во у́трия избива́х вся гре́шныя земли́, е́же потреби́ти от града Госпо́дня вся де́лающия беззако́ние.

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Аллилу́иа, Аллилу́иа, Аллилу́иа, сла́ва Тебе́, Бо́же. (Три́жды). Го́споди, поми́луй. (Три́жды).

Посе́м свяще́нник чтет тропа́рь на глас 6:

Зау́тра услы́ши глас мой, Царю́ мой и Бо́же мой.

Лик: Зау́тра услы́ши глас мой, Царю́ мой и Бо́же мой.

Свяще́нник, Стих: Глаго́лы моя́ внуши́, Го́споди, разуме́й звание мое́.

Лик: Зау́тра Услы́ши глас мой, Царю́ мой и Бо́же мой.

Свяще́нник, стих: Я́ко к Тебе́ помолю́ся, Го́споди.

Лик: Зау́тра услы́ши глас мой, Царю́ мой и Бо́же мой.

Пева́емым же сим стихом, твори́м коленопреклоне́ние на зе́млю.

Свяще́нник: Сла́ва Отцу́, и Сы́ну, и Свято́му Ду́ху.

Чтец: И ны́не, и при́сно, и во ве́ки веко́в. Ами́нь.

Что Тя нарече́м, о Благода́тная? Не́бо, я́ко возсия́ла еси́ Со́лнце Пра́вды. Рай, я́ко прозя́бла еси́ Цвет нетле́ния, Де́ву, я́ко пребыла́ еси́ нетле́нна. Чи́стую Матерь, я́ко име́ла еси́ на святы́х Твои́х объя́тиях Сы́на, всех Бо́га; Того́ моли́ спасти́ся душа́м на́шим.

Лик: Стопы́ моя́ направи по словеси́ Твоему́, и да не облада́ет мно́ю вся́кое беззако́ние. (Два́жды).

Изба́ви мя от клеветы челове́ческия, и сохраню́ за́поведи Твоя́. (Два́жды).

Лице́ Твое́ просвети́ на раба́ Твоего́, и научи́ мя оправда́нием Твои́м. (Два́жды).

Да испо́лнятся уста́ моя́ хвале́ния Твоего́, Го́споди, я́ко да воспою́ сла́ву Твою́, весь день великоле́пие Твое́. (Три́жды).

Посе́м: Трисвято́е, по О́тче наш.

Свяще́нник возгла́с: Я́ко Твое́ есть Ца́рство:

Чтец: Ами́нь.

Та́же конда́к Вели́каго понеде́льника, глас 8:

Иа́ков рыда́ше Ио́сифова лише́ния, и до́блий седя́ше на колесни́це, я́ко царь почита́ем: еги́птяныни бо тогда́ сласте́м не порабо́тав, возпрославля́шеся от Ве́дущаго челове́ческая се́рдца, и Посыла́ющаго вене́ц нетле́нный.

Во вто́рник: конда́к, глас 2:

Час, душе́, конца́ помы́сливши и посече́ния смоко́вницы убоя́вшися, да́нный тебе́ тала́нт трудолю́бно де́лай, окая́нная, бо́дрствующи и зову́щи: да не пребу́дем вне черто́га Христо́ва.

В сре́ду: конда́к, глас 4:

Па́че блудни́цы, Бла́же, беззако́нновав, слез ту́чи ника́коже Тебе́ принесо́х: но молча́нием моля́ся припа́даю Ти, любо́вию облобыза́л пречи́стеи Твои́ но́зе: я́ко да оставле́ние мне, я́ко Влады́ка, пода́си долго́в, зову́щу Ти, Спа́се: от скве́рных дел мои́х изба́ви мя.

Та́же: Го́споди, поми́луй. (40).

И́же на вся́кое вре́мя и на вся́кий час, на Небеси́ и на земли́ покланя́емый и сла́вимый Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й, и гре́шныя ми́луяй, И́же вся зовы́й ко спасе́нию, обеща́ния ра́ди будущи́х благ: Сам, Го́споди, приими́ и на́ша в час сей моли́твы, и испра́ви живо́т наш к за́поведем Твои́м; ду́шы на́ша освяти́, телеса́ очи́сти, помышле́ния испра́ви, мы́сли очи́сти и изба́ви нас от вся́кия ско́рби, зол и боле́зней, огради́ нас святы́ми Твои́ми а́нгелы, да ополче́нием их соблюда́еми и наставля́еми, дости́гнем в соедине́ние ве́ры и в ра́зум непристу́пныя Твоея́ сла́вы: я́ко благослове́н еси́ во ве́ки веко́в. Ами́нь.

Го́споди, поми́луй. (Три́жды).

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Честне́йшую Херуви́м:

И́менем Госпо́дним Благослови́, О́тче.

Свяще́нник: Бо́же, уще́дри ны и Благослови́ ны, просвети́ лице́ Твое на ны, и поми́луй ны.

Чтец: Ами́нь.

Посе́м свяще́нник глаго́лет моли́тву Свята́го Ефре́ма: Го́споди и Влады́ко живота́ моего́:

И покло́ны вели́кия три. Та́же ма́лых 12, глаго́люще на ки́йждо покло́н:

Бо́же, очи́сти мя гре́шнаго.

И па́ки моли́тву всю: Го́споди и Влады́ко живота́ моего́: И коне́чный покло́н.

Посе́м чтец глаго́лет: Трисвято́е, по О́тче наш.

Свяще́нник: Я́ко Твое́ есть Ца́рство:

Чтец: Ами́нь. Го́споди, поми́луй. (12).

Та́же свяще́нник моли́тву:

Христе́, Свете и́стинный, просвеща́яй и освяща́яй вся́каго челове́ка гряду́щаго в мир, да знамена́ется на нас свет лица́ Твоего́, да в нем у́зрим Свет Непристу́пный: и испра́ви стопы на́ша к де́ланию за́поведей Твои́х, моли́твами Пречи́стыя Твоея́ Матере и всех Твои́х святы́х. Ами́нь.

Лик: Взбра́нной Воево́де победи́тельная, я́ко избавльшеся от злых, благода́рственная воспису́ем Ти раби́ Твои́, Богоро́дице, но я́ко иму́щая держа́ву непобеди́мую, от вся́ких нас бед свободи́, да зове́м Ти: ра́дуйся, Неве́сто Неневе́стная.

Посе́м свяще́нник возглаша́ет:

Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй. (Три́жды). Благослови́.

Свяще́нник глаго́лет отпуст:

Гряды́й Госпо́дь на во́льную страсть на́шего ра́ди спасе́ния, Христо́с, И́стинный Бог наш, моли́твами Пречи́стыя Своея́ Матере, святы́х сла́вных и всехва́льных апо́стол, святы́х и пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

Лик: Вели́каго Господи́на:

Час тре́тий

Час шесты́й

Литурги́я Преждеосвяще́нных Даро́в во Святы́й и Вели́кий понеде́льник.

Диа́кон, став на амво́не, возглаша́ет: Благослови́, Влады́ко.

Свяще́нник же, стоя́ пред свято́ю трапе́зою во олтаре́, глаго́лет Возгла́сно:

Благослове́но Ца́рство Отца́, и Сы́на, и Свята́го Ду́ха ны́не, и при́сно, и во ве́ки веко́в.

Лик: Ами́нь.

Чтец: Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́ Царе́ви на́шему Бо́гу.

Прииди́те, поклони́мся и припаде́м Самому Христу́, Царе́ви и Бо́гу на́шему.

И предначина́тельный псало́м, 103.

Благослови́, душе́ моя́, Го́спода, Го́споди Бо́же мой, возвели́чился еси́ зело́: во испове́дание и в велеле́поту обле́клся еси́. Одея́йся све́том я́ко ри́зою, простира́яй не́бо я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й а́нгелы Своя́ духи, и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за одея́ние ея́: на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры, и низхо́дят поля́ в ме́сто, е́же основа́л еси́ им. Преде́л положи́л еси́, его́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя: ждут она́гри в жа́жду свою́. На тых пти́цы небе́сныя привита́ют, от среды́ ка́мения дадя́т гла́с. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тьму, и бысть нощь: в не́йже про́йдут вси зве́рие дубра́внии: ски́мни рыка́ющии восхи́тити, и взыска́ти от Бо́га пи́щу себе́. Возсия́ со́лнце, и собра́шася, и в ло́жах свои́х ля́гут. Изы́дет челове́к на де́ло свое́, и на де́лание свое́ до ве́чера. Я́ко возвели́чишася дела Твоя́, Го́споди, вся прему́дростию сотвори́л еси́: испо́лнися земля́ твари Твоея́. Сие́ мо́ре вели́кое и простра́нное, та́мо га́ди, и́хже несть числа́, живо́тная ма́лая с вели́кими. Та́мо корабли́ препла́вают, змий сей, его́же созда́л еси́ руга́тися ему́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им, соберу́т: отве́рзшу Тебе́ руку́, вся́ческая испо́лнятся бла́гости. Отвра́щшу же Тебе́ лице́, возмяту́тся: оты́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки: возвесели́тся Госпо́дь о де́лех Свои́х. Призира́яй на зе́млю, и Творя́й ю трясти́ся: прикаса́яйся гора́м, и дымя́тся. Воспо́ю Го́сподеви в животе́ мое́м, пою́ Бо́гу моему́ до́ндеже есмь. Да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им: благослови, душе́ моя́, Го́спода. Со́лнце позна́ за́пад свой, положи́л еси́ тьму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва Отцу́, и Сы́ну, и Свято́му Ду́ху и ны́не, и при́сно, и во ве́ки веко́в. Ами́нь.

Аллилу́иа, Аллилу́иа, Аллилу́иа, сла́ва Тебе́, Бо́же. (Три́жды).

Посе́м диа́кон глаго́лет ектению́ вели́кую: Ми́ром Го́споду помо́лимся: 

Возгла́с свяще́нника: Я́ко подоба́ет:

Чтец: Ами́нь.

И чтет пе́рвую «Сла́ву» 18-й кафи́смы (псалмы́ 119–123). Та́же: Сла́ва, и ны́не: Аллилу́иа, Аллилу́иа, Аллилу́иа, сла́ва Тебе́, Бо́же. (Три́жды).

И ектениа́ ма́лая: Па́ки и па́ки: Возгла́с свяще́нника: Я́ко Твоя́ держа́ва и Твое́ есть Ца́рство, и си́ла, и сла́ва. Отца́, и Сы́на, и Свята́го Ду́ха ны́не, и при́сно, и во ве́ки веко́в.

Лик: Ами́нь.

И чте́тся вторая часть кафи́смы (псалмы́ 124–128).

Та́же ектениа́ ма́лая. Возгла́с: Я́ко Благ и Человеколю́бец Бог еси́, и Тебе́ сла́ву возсыла́ем Отцу́, и Сы́ну, и Свято́му Ду́ху ны́не, и при́сно, и во ве́ки веко́в.

Лик: Ами́нь.

И чте́тся тре́тия часть кафи́смы (псалмы́ 129–133).

И па́ки ектениа́ ма́лая с возгла́сом: Я́ко Ты еси́ Бог наш, и Тебе́ сла́ву возсыла́ем: Отцу́, и Сы́ну, и Свято́му Ду́ху ны́не, и при́сно, и во ве́ки веко́в.

Лик: Ами́нь.

Та́же певцы́ пою́т на о́ба ли́ка, во глас 1:

Го́споди, воззва́х к Тебе́, услы́ши мя, услы́ши мя, Го́споди. Го́споди, воззва́х к Тебе́, услы́ши мя, вонми́ гла́су моле́ния Моего́, внегда́ воззвати ми к Тебе́. Услы́ши мя, Го́споди.

Да испра́вится моли́тва моя́, я́ко кади́ло, пред Тобо́ю: воздея́ние руку́ мое́ю же́ртва вече́рняя. Услы́ши мя, Го́споди.

И по чи́ну стихи́: Положи́, Го́споди, хране́ние усто́м мои́м:

Та́же пое́м стихи́ры самогла́сны Вели́каго понеде́льника, во глас 1, на 10:

Стих: Изведи́ из темни́цы ду́шу мою́, испове́датися И́мени Твоему́.

Гряды́й Госпо́дь к во́льней стра́сти, апо́столом глаго́лаше на пути́: се восхо́дим во Иерусали́м и преда́стся Сын Челове́ческий, я́коже есть пи́сано о Не́м. Прииди́те у́бо и мы очище́нными смы́слы сше́ствуим Ему́, и сраспне́мся, и умертви́мся Его́ ра́ди жите́йским сласте́м, да и оживе́м с Ни́м и услы́шим вопию́ща Его́: не ктому́ в земны́й Иерусали́м, за е́же страда́ти, но восхожду́ ко Отцу́ Моему́, и Отцу́ ва́шему, и Бо́гу Моему́, и Бо́гу ва́шему: и совозвы́шу вас в Го́рний Иерусали́м, в Ца́рство Небе́сное.

Стих: Мене́ ждут пра́ведницы, до́ндеже возда́си мне.

Гряды́й Госпо́дь к во́льней стра́сти:

Стих: Глас 5: Из глубины́ воззва́х к Тебе́, Го́споди, Го́споди, услы́ши глас мой.

Дости́гше, ве́рнии, спаси́тельную страсть Христа́ Бога, неизрече́нное Его́ долготерпе́ние просла́вим: я́ко да благоутро́бием Свои́м совоздви́гнет и нас умерщвле́нных грехо́м, я́ко Благ и Человеколю́бец.

Стих: Да бу́дут у́ши Твои́, вне́млюще гла́су моле́ния моего́.

Дости́гше, ве́рнии, спаси́тельную страсть:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Го́споди, гряды́й к страданию, Твоя́ утвержда́я ученики́, глаго́лал еси́ осо́бь прие́мь их: ка́ко глаго́л Мои́х не по́мните, я́же пре́жде реко́х вам? я́ко вся́кому проро́ку несть пи́сано, то́кмо во Иерусали́ме убие́ну бы́ти. Ны́не у́бо вре́мя настои́т, е́же реко́х вам: се бо предаю́ся рука́ма гре́шных пору́ган бы́ти, и́же и кресту́ Мя пригвозди́вше и погребе́нию преда́вше, оме́рзена вменя́т я́ко ме́ртва. Оба́че дерза́йте: тридне́вен бо воста́ну в ра́дость ве́рных и жизнь ве́чную.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Го́споди, гряды́й к страда́нию:

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Го́споди, к та́инству неизглаго́ланному Твоего́ смотре́ния, не довле́ющи сыно́в Зеведе́овых ма́ти, проша́ше Тя, вре́меннаго Ца́рства по́чести дарова́тися ча́дом ея́: но вме́сто тоя́, ча́шу сме́рти обеща́л еси́ пи́ти друго́м Твои́м: ю́же ча́шу пре́жде сих пи́ти Сам глаго́лал еси́, грехо́в очище́ние. Те́мже Тебе́ вопие́м: Спасе́ние душ на́ших, сла́ва Тебе́.

Стих: Я́ко у Го́спода ми́лость и мно́гое у Него́ избавле́ние, и Той изба́вит Изра́иля от всех беззако́ний его́.

Го́споди, к та́инству неизглаго́ланному:

Стих: Хвали́те Го́спода вси язы́цы, похвали́те Его́ вси лю́дие.

Го́споди, соверше́ннейшая му́дрствовати Твоя́ наказу́я ученики́, не уподо́битися язы́ком, глаго́лал еси́, во е́же облада́ти ме́ньшими: не Та́ко бо бу́дет вам Мои́м ученико́м, я́ко Ни́щий хотя есмь. Пе́рвый у́бо вас, да бу́дет всем слуга́: нача́льствуяй же, я́ко нача́льствуемый: предызя́щный же, я́ко после́днейший. И́бо приидо́х Сам обнища́вшему Ада́му послужи́ти и избавле́ние да́ти за мно́гих ду́шу Мою́, вопию́щих Ми: сла́ва Тебе́.

Стих: Глас 8: Я́ко утверди́ся ми́лость Его́ на нас, и и́стина Госпо́дня пребыва́ет во век.

Изсо́хшия смоко́вницы за непло́дие, преще́ния убоя́вшеся бра́тие, плоды досто́йны покая́ния принесе́м Христу́, подаю́щему нам ве́лию ми́лость.

Сла́ва, и ны́не: глас то́йже.

Втору́ю Е́ву еги́птяныню обре́т змий глаго́лы, тща́шеся ласка́нми запя́ти Ио́сифа: но той оста́вив ри́зу, бежа́ греха́, и наг не стыдя́шеся, я́коже первозда́нный пре́жде преслуша́ния. Того́ моли́твами, Христе́, поми́луй нас.

И а́бие быва́ет вход со Ева́нгелием. Та́же свяще́нник благословля́ет вход, диа́кон же возглаша́ет: Прему́дрость, про́сти.

Лик: Све́те Ти́хий Святы́я сла́вы Безсме́ртнаго Отца́ Небе́снаго, Свята́го Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т даяй: те́мже мир Тя сла́вит.

Диа́кон: Во́нмем.

Свяще́нник: Мир всем:

Диа́кон: Прему́дрость, во́нмем.

Чтец: Проки́мен, глас шесты́й: Благослови́т тя Госпо́дь от Сио́на, и у́зриши блага́я Иерусали́ма.

Лик: Благослови́т тя Госпо́дь от Сио́на, и у́зриши блага́я Иерусали́ма.

Чтец, стих: Блаже́ни вси боя́щиися Го́спода, ходя́щии в путе́х Его́.

Лик: Благослови́т тя Госпо́дь от Сио́на, и у́зриши блага́я Иерусали́ма.

Чтец: Благослови́т тя Госпо́дь от Сио́на.

Лик: И у́зриши блага́я Иерусали́ма.

Диа́кон: Прему́дрость.

Чтец: Исхо́да чте́ние.

Диа́кон: Во́нмем.

Чтец: Сия́ имена сыно́в Изра́илевых, входя́щих во Еги́пет вку́пе со Иа́ковом, отце́м их, ки́йждо со всем домом Свои́м внидо́ша: Руви́м, Симео́н, Леви́й, Иу́да, Иссаха́р, Завуло́н и Вениами́н, Дан и Неффали́м, Гад и Аси́р: Ио́сиф же бя́ше во Еги́пте. Бя́ше же всех душ, изше́дших из Иа́кова, се́дмьдесят пять. У́мре же Ио́сиф и вся братия его́, и весь род о́ный. Сы́нове же Изра́илевы возрасто́ша и умно́жишася, и мно́зи бы́ша и укрепи́шася зело́, зело́: умно́жи же их земля́. Воста́ же царь ин во Еги́пте, и́же не зна́ше Ио́сифа. Рече́ же языку своему́: се род сыно́в Изра́илевых вели́кое мно́жество и укрепля́ется па́че нас. Прииди́те у́бо прехи́трим их, да не когда́ умно́жатся: и егда́ а́ще приключи́тся нам брань, приложа́тся и си́и к супоста́том и одоле́вше нам, изы́дут из земли́ (нашея́). И приста́ви над ни́ми приста́вники дел, да озло́бят их в де́лех: и созда́ша гра́ды тве́рды фарао́ну, Пифо́ и Рамесси́, и он, и́же есть Илиопо́ль. Поели́ку же их смиря́ху, толи́ко множа́йшии быва́ху и укрепля́хуся зело́, зело́, и гнуша́хуся еги́птяне сынми́ Изра́илевыми. И наси́лие творя́ху еги́птяне Сы́ном Изра́илевым ну́ждею, и боле́зненну тем жизнь творя́ху в де́лех жесто́ких, бре́нием, и плинфоде́ланием, и все́ми де́лы, я́же в поля́х, во всех де́лех, и́миже порабоща́ху их с ну́ждею. И рече́ царь еги́петский ба́бам евре́йским: еди́ной их и́мя – Сепфо́ра и и́мя второй – Фу́а. И рече́ им: егда́ ба́бите евре́аныням, и суть к рожде́нию, а́ще у́бо му́жеский пол бу́дет, убива́йте Его́: а́ще же же́нский, снабдева́йте Его́. Убоя́шася же бабы Бо́га и не сотвори́ша, я́коже повеле́ им царь еги́петский: и живля́ху му́жеский пол. Призва́ же царь еги́петский ба́бы и рече́ им: что́ я́ко сотвори́сте вещь сию́ и оживля́ете му́жеский пол? Реко́ша же ба́бы фарао́ну: не я́ко же́ны еги́птяныни, та́ко и же́ны евре́аныни – ражда́ют бо, пре́жде не́же вни́ти к ним ба́бам, и ражда́ху. Бла́го же творя́ше Бог ба́бам: и мно́жахуся лю́дие и укрепля́хуся зело́.

Диа́кон: Во́нмем.

Чтец: Проки́мен, глас шесты́й: Благослови́хом вы во И́мя Госпо́дне.

Лик: Благослови́хом вы во И́мя Госпо́дне.

Чтец, стих: Мно́жицею брашася со мно́ю от ю́ности моея́.

Лик: Благослови́хом вы во И́мя Госпо́дне.

Чтец: Благослови́хом вы.

Лик: Во И́мя Госпо́дне.

Посе́м возглаша́ет диа́кон: Повели́те.

Свяще́нник же, взем обе́ма рука́ма кади́льницу и све́щник со свеще́ю, стои́т пред свято́ю трапе́зою, зря к восто́ком, и, назна́менуя крест, глаго́лет: Прему́дрость, про́сти.

Та́же, обратя́ся на за́пад, к наро́ду, глаго́лет: Свет Христо́в просвеща́ет всех.

Чтец: И́ова чте́ние.

Диа́кон: Во́нмем.

Чтец: Челове́к не́кий бя́ше во стране́ Авситиди́йстей, ему́же и́мя И́ов: и бе челове́к он и́стинен, непоро́чен, пра́веден, благочести́в, удаля́яйся от вся́кия лука́выя ве́щи. Бы́ша же ему́ сы́нове седмь и дще́ри три. И бяху ско́ти его́ ове́ц седмь ты́сящ, вельблю́дов три ты́сящи, супру́г воло́в пять сот, и осли́ц пасо́мых пять сот, и слуг мно́го зело́, и дела́ ве́лия бяху ему́ на земли́: и бе челове́к о́ный благоро́днейший су́щих от восто́к со́лнца. Сходя́щеся же сы́нове его́ друг ко дру́гу, творя́ху пир на ки́йждо день спое́млюще вку́пе и три сестры́ своя́ ясти и пи́ти с ни́ми. И егда́ скончава́шася дни́е пи́ра, посыла́ше И́ов и очища́ше их востая́ зау́тра: и приноша́ше о них же́ртвы по числу́ их, и тельца́ еди́наго о гресе́, о душа́х их. Глаго́лаше бо И́ов: не́гли когда́ сы́нове мои́ согреши́ша и в мы́сли свое́й зла́я помы́слиша проти́ву Бога. Та́ко у́бо творя́ше И́ов вся дни. И бысть я́ко день сей, и се приидо́ша а́нгели Бо́жии предста́ти пред Го́сподем, и диа́вол прии́де с ни́ми. И рече́ Госпо́дь диа́волу: отку́ду прише́л еси́? И отвеща́в диа́вол Го́сподеви рече́: обше́д зе́млю и проше́д поднебе́сную, се есмь, И рече́ ему́ Госпо́дь: внял ли еси́ мы́слию твое́ю на раба́ Моего́ И́ова? Зане́ несть, я́ко он, на земли́ челове́к непоро́чен, и́стинен, благочести́в, удаля́яйся от вся́кия лука́выя ве́щи. Отвеща́ же диа́вол и рече́ пред Го́сподем: Еда́ туне И́ов чтит Го́спода? не Ты ли огради́л еси́ вне́шняя его́, и вну́тренняя до́му его́, и я́же вне всех су́щих его́ о́крест? Дела́ же руку́ его́ благослови́л еси́ и скоты́ его́ мно́ги сотвори́л еси́ на земли́. Но посли́ руку́ Твою́ и косни́ся всех, я́же и́мать: а́ще не в лице́ Тя благослови́т. Тогда́ рече́ Госпо́дь диа́волу: се вся ели́ка суть ему́, даю́ в руку́ твою́, но самаго́ да не ко́снешися. И изыде диа́вол от Го́спода.

Свяще́нник: Мир ти.

Диа́кон: Прему́дрость.

Чтец пое́т: Да испра́вится моли́тва моя́, я́ко кади́ло, пред Тобо́ю, воздея́ние руку́ мое́ю же́ртва вече́рняя.

Тогда́ пра́ваго и ле́ваго кли́росов и предстоя́щий народ, обе́ страны́ во всей це́ркви, стоя́т на коле́нах, моля́щеся.

И по пе́нии чтеца́ пе́рвый лик пое́т: Да испра́вится моли́тва моя́:

Чтец, и друга́я страна ли́ка, и предстоя́щий наро́д стоят на коле́нах, до́ндеже пропою́т.

Та́же чтец пое́т пе́рвый Стих: Го́споди, воззва́х к Тебе́, услы́ши мя, вонми́ гла́су моле́ния моего́, внегда́ воззва́ти ми к Тебе́.

И по пропе́тии стиха пое́т вторы́й лик: Да испра́вится моли́тва моя́, я́ко кади́ло, пред Тобо́ю, воздея́ние руку́ мое́ю же́ртва вече́рняя.

Тогда́ чтец, и пе́рвый лик, и тоя страны́ предстоя́щий наро́д припа́дают на коле́на.

Та́же чтец пое́т вторы́й стих: Положи́, Го́споди, хране́ние усто́м мои́м и дверь огражде́ния о устна́х мои́х.

И пе́рвый лик па́ки пое́т: Да испра́вится моли́тва моя́:

И чтец, и вторы́й лик, и предстоя́щий наро́д па́ки приклоня́ют коле́на.

И па́ки чтец пое́т тре́тий стих: Не уклони́ се́рдце мое́ в словеса́ лука́вствия, непщева́ти вины́ о гресе́х.

И вторы́й лик пое́т: Да испра́вится моли́тва моя́:

И приклоня́ет коле́на чтец, и пе́рвый лик, и наро́д.

И па́ки чтец пое́т: Да испра́вится моли́тва моя́, я́ко кади́ло, пред Тобо́ю.

И тогда́ о́ба ли́ка, и в це́ркви предстоя́щий весь наро́д припа́дают на коле́на и стоя́т, до́ндеже чтец пое́т.

И воста́вше допева́ют на кли́росе: Воздея́ние руку́ мое́ю же́ртва вече́рняя.

И по исполне́нии пе́ния твори́м покло́ны три с моли́твой Свята́го Ефрема: Го́споди и Влады́ко живота́ моего́:

Та́же, прие́м диа́кон от руку́ свяще́нника Свято́е Ева́нгелие, исхо́дит ца́рскими враты́ на амво́н, предходя́щым ему́ свеща́м, и полага́ет е на анало́гии.

Свяще́нник же, стоя́ пред свято́ю трапе́зою и зря к за́паду, возглаша́ет:

Прему́дрость, про́сти, услы́шим Свята́го Ева́нгелия. Мир всем.

Лик: И ду́хови твоему́.

Диа́кон: От Матфе́я Свята́го Ева́нгелия чте́ние.

Лик: Сла́ва Тебе́, Го́споди, сла́ва Тебе́.

Свяще́нник: Во́нмем.

Диа́кон: Во вре́мя о́но, седя́щу Иису́су на горе́ Елео́нстей, приступи́ша к Нему́ ученицы́ на едине́, глаго́люще: рцы нам, когда́ сия́ бу́дут? и что́ есть зна́мение Твоего́ прише́ствия и кончи́на ве́ка? И отвеща́в Иису́с рече́ им: блюди́те, да никто́же вас прельсти́т. Мно́зи бо прии́дут во и́мя Мое́, глаго́люще: аз есмь Христо́с и мно́ги прельстя́т. Услы́шати же и́мате бра́ни и слы́шания бра́нем: зри́те, не ужаса́йтеся, подоба́ет бо всем сим бы́ти, но не тогда́ есть кончи́на. Воста́нет бо язы́к на язы́ки, ца́рство на ца́рство: и бу́дут гла́ди, и па́губы, и тру́си по ме́стом. Вся же сия́ – нача́ло боле́знем. Тогда́ предадя́т вы в ско́рби и убию́т вы: и бу́дете ненави́дими все́ми язы́ки И́мене Моего́ ра́ди. И тогда́ соблазня́тся мно́зи: и друг дру́га предадят, и возненави́дят друг дру́га. И мно́зи лжепроро́цы востанут и прельстят мно́гия. И за умноже́ние беззако́ния изся́кнет лю́бы мно́гих. Претерпе́вый же до конца́, той спасе́тся. И пропове́стся сие́ Ева́нгелие Ца́рствия по всей вселе́нней, во свиде́тельство всем язы́ком: и тогда́ прии́дет кончи́на. Егда́ у́бо у́зрите ме́рзость запу́стения, рече́нную Дании́лом проро́ком, стоя́щу на ме́сте свя́те: и́же чтет да разуме́ет. Тогда́ су́щии во Иуде́и да бежа́т на го́ры, и и́же на кро́вле, да не схо́дит взя́ти я́же в дому́ его́. И и́же на селе́, да не возврати́тся вспять, взя́ти риз свои́х. Го́ре же непра́здным и доя́щым в ты́я дни. Моли́теся же, да не бу́дет бе́гство ва́ше зиме́, ни в субо́ту. Бу́дет бо тогда́ скорбь ве́лия, якова́ же несть была́ от нача́ла ми́ра досе́ле, ниже́ и́мать бы́ти. И а́ще не бы́ша прекрати́лися дни́е о́ны, не бы у́бо спасла́ся вся́ка плоть: избра́нных же ра́ди прекратя́тся дни́е о́ны. Тогда́ а́ще кто рече́т вам: се зде Христо́с или́ о́нде: не ими́те ве́ры. Воста́нут бо лжехри́сти и лжепроро́цы, и дадя́т зна́мения ве́лия и чудеса́: я́коже прельсти́ти, а́ще возмо́жно и избра́нныя. Се пре́жде Рех вам. А́ще у́бо реку́т вам: се в пусты́ни есть: не изыди́те. Се в сокро́вищах, не ими́те ве́ры. Я́коже бо мо́лния исхо́дит от восто́к и явля́ется до за́пад: та́ко бу́дет прише́ствие Сы́на Челове́ческаго. Иде́же бо а́ще бу́дет труп, та́мо соберу́тся орли́. А́бие же по ско́рби дний тех со́лнце поме́ркнет, и луна́ не даст све́та своего́, и зве́зды спа́днут с небесе́, и Си́лы Небе́сныя подви́гнутся. И тогда́ яви́тся зна́мение Сы́на Челове́ческаго на небеси́: и тогда́ воспла́чутся вся коле́на земна́я и у́зрят Сы́на Челове́ческаго, грядуща на о́блацех небе́сных, с си́лою и сла́вою мно́гою. И по́слет А́нгелы Своя́ с тру́бным гла́сом ве́лиим, и соберу́т избра́нныя Его́ от четы́рех ветр, от коне́ц небе́с до коне́ц их. От смоко́вницы же научи́теся при́тчи: егда́ уже́ ва́ия ея́ бу́дут млада, и ли́ствие прозя́бнет, ве́дите, я́ко близ есть жа́тва. Та́ко и вы, егда́ ви́дите сия́ вся, ве́дите, я́ко близ есть при две́рех. Ами́нь глаго́лю вам: не мимои́дет род сей, до́ндеже вся сия́ бу́дут. Не́бо и земля́ мимои́дет: словеса́ же Моя́ не мимои́дут.

Лик: Сла́ва Тебе́, Го́споди, сла́ва Тебе́.

И про́чее после́дование Литургии Преждеосвяще́нных Даро́в.

Начина́ет свяще́нник: Благослове́н Бог наш, всегда́, ны́не и при́сно, и во ве́ки веко́в.

Чтец: Ами́нь. Сла́ва Тебе́, Бо́же наш, сла́ва Тебе́. Царю́ Небе́сный: Трисвято́е, по О́тче наш.

Свяще́нник: Я́ко Твое́ есть Ца́рство:

Чтец: Ами́нь. Го́споди, поми́луй. (12). Сла́ва, и ны́не: Прииди́те, поклони́мся: (Три́жды).

Внегда́ призва́ти ми, услы́ша мя Бог пра́вды моея́, в ско́рби распространи́л мя еси́. Уще́дри мя, и услы́ши моли́тву мою́. Сы́нове челове́честии, доко́ле тяжкосе́рдии? Вску́ю лю́бите суету́ и и́щете лжи? И уве́дите, я́ко удиви́ Госпо́дь преподо́бнаго Своего́, Госпо́дь услы́шит мя, внегда́ воззва́ти ми к Нему́. Гне́вайтеся и не согреша́йте, я́же глаго́лете в сердца́х ва́ших, на ло́жах ва́ших умили́теся. Пожри́те же́ртву пра́вды и упова́йте на Го́спода. Мно́зи глаго́лют: кто́ яви́т нам благая, зна́менася на нас свет лица́ Твоего́, Го́споди. Дал еси́ весе́лие в се́рдце мое́м, от плода́ пшени́цы, вина́ и еле́а своего́ умно́жишася. В ми́ре вку́пе усну́ и почи́ю: я́ко Ты, Го́споди, еди́наго на упова́нии всели́л мя еси́.

Го́споди, да не я́ростию Твоею́ обличи́ши мене́, ниже́ гне́вом Твои́м нака́жеши мене́. Поми́луй мя, Го́споди, я́ко не́мощен есмь: исцели́ мя, Го́споди, я́ко смято́шася ко́сти моя́. И душа́ моя́ смяте́ся зело́, и Ты, Го́споди, доко́ле? Обрати́ся, Го́споди, изба́ви ду́шу мою́: спаси́ мя ра́ди ми́лости Твоея́. Я́ко несть в сме́рти помина́яй Тебе́, во аде же кто́ испове́стся Тебе́? Утруди́хся воздыха́нием мои́м, измы́ю на вся́ку нощь ло́же мое́, слеза́ми мои́ми посте́лю мою́ омочу. Смяте́ся от я́рости о́ко мое́, обетша́х во всех вразе́х мои́х. Отступи́те от Мене́ вси де́лающии беззако́ние, я́ко услы́ша Госпо́дь глас пла́ча моего́. Услы́ша Госпо́дь моле́ние мое́, Госпо́дь моли́тву мою́ прия́т. Да постыдя́тся и смяту́тся вси врази́ мои, да возвратя́тся и устыдя́тся зело́ вско́ре.

Доко́ле, Го́споди, забу́деши мя до конца́? Доко́ле отвраща́еши лице́ Твое́ от Мене́? Доко́ле положу́ сове́ты в души́ моея́, боле́зни в се́рдце мое́м день и нощь? Доко́ле вознесе́тся враг мой на мя? При́зри, услы́ши мя, Го́споди Бо́же мой, просвети́ о́чи мои́, да не когда́ усну́ в смерть. да не когда́ рече́т враг мой: укрепи́хся на него́. Стужа́ющии ми возрадуются, а́ще подви́жуся. Аз же на ми́лости Твою́ упова́х, возра́дуется се́рдце мое́ о спасе́нии Твое́м: воспою́ Го́сподеви, благоде́явшему мне, и пою́ И́мени Го́спода Вы́шняго. При́зри, услы́ши мя, Го́споди Бо́же мой, просвети́ о́чи мои́, да не когда́ усну́ в смерть, да не когда́ рече́т враг мой: укрепи́хся на него́.

Сла́ва, и ны́не: Аллилу́иа, Аллилу́иа, Аллилу́иа, сла́ва Тебе́, Боже́. (Три́жды). И покло́ны три. Го́споди, поми́луй. (Три́жды). Сла́ва, и ны́не:

К Тебе́, Го́споди, воздвиго́х ду́шу мою́, Бо́же мой, на Тя упова́х, да не постыжу́ся во век, ниже́ да посмею́т ми ся врази́ мои́. И́бо вси, терпя́щии Тя, не постыдя́тся: да постыдя́тся беззако́ннующии вотще́. Пути́ Твоя́, Го́споди, скажи́ ми, и стезям Твои́м научи́ мя. Наста́ви мя на и́стину Твою́, и научи́ мя, я́ко Ты еси́ Бог Спас мой, и Тебе́ терпе́х весь день. Помяни́ щедро́ты Твоя́, Го́споди, и ми́лости Твоя́, я́ко от ве́ка суть. Грех ю́ности моея́, и неве́дения моего́ не помяни́: по ми́лости Твое́й помяни́ мя Ты, ра́ди бла́гости Твоея́, Го́споди. Благ и прав Госпо́дь, сего́ ра́ди законоположи́т согреша́ющим на пути́. Наста́вит кро́ткия на суд, научи́т кро́ткия путе́м Свои́м. Вси путие́ Госпо́дни, ми́лость и и́стина взыска́ющим заве́та Его́, и свиде́ния Его́. Ра́ди И́мене Твоего́, Го́споди, и очи́сти грех мой, мног бо есть. Кто́ есть челове́к боя́йся Го́спода? Законоположи́т ему́ на пути́, его́же изво́ли. Душа́ его́ во благи́х водвори́тся, и се́мя его́ насле́дит зе́млю. Держа́ва Госпо́дь боя́щихся Его́, и заве́т Его́ яви́т им. О́чи мои́ вы́ну ко Го́споду, я́ко Той исто́ргнет от се́ти но́зе мои́. При́зри на мя и поми́луй мя, я́ко единоро́д и нищ есмь аз. Ско́рби се́рдца моего́ умно́жишася, от нужд мои́х изведи́ мя. Виждь смире́ние мое́, и труд мой, и оста́ви вся грехи́ моя́. Виждь враги́ моя́, я́ко умно́жишася, и ненавиде́нием непра́ведным возненави́деша мя. Сохрани́ ду́шу мою́, и изба́ви мя, да не постыжу́ся, я́ко упова́х на Тя. Незло́бивии и пра́вии прилепля́хуся мне, я́ко потерпе́х Тя, Го́споди. Изба́ви, Бо́же, Изра́иля от всех скорбе́й его́.

На Тя, Го́споди, упова́х, да не постыжу́ся во век, пра́вдою Твое́ю изба́ви мя, и изми́ мя. Приклони́ ко мне ухо Твое́, ускори́ изъя́ти мя: бу́ди ми в Бо́га Защи́тителя и в дом прибе́жища, е́же спасти́ мя. Я́ко держа́ва моя́, и прибе́жище мое́ еси́ Ты, и И́мене Твоего́ ра́ди наста́виши мя, и препита́еши мя. Изведе́ши мя от се́ти сей, ю́же скры́ша ми, я́ко Ты еси́ Защи́титель мой, Го́споди. В ру́це Твои́ предложу́ дух мой, изба́вил мя еси́, Го́споди, Бо́же и́стины. Возненави́дел еси́ храня́щия суеты вотще́: аз же на Го́спода упова́х. Возра́дуюся и возвеселю́ся о ми́лости Твое́й, я́ко призре́л е́си на смире́ние мое́, спасл е́си от нужд ду́шу мою́. И не́си мене́ затвори́л в рука́х вра́жиих, поста́вил еси́ на простра́нне но́зе мои́. Поми́луй мя, Го́споди, я́ко скорблю, смяте́ся яростию о́ко мое́, душа́ моя́ и утроба моя́. Я́ко исчезе́ в боле́зни живо́т мой, и ле́та моя́ в воздыха́ниях, изнемо́же нището́ю кре́пость моя́, и ко́сти моя́ смято́шася. От всех враг мои́х бых поноше́ние, и сосе́дом мои́м зело́, и страх знаемым мои́м, ви́дящии мя вон бежа́ша от Мене́: забве́н бых я́ко мертв от се́рдца: бых я́ко сосу́д погубле́н. Я́ко слы́шах гажде́ние мно́гих живу́щих о́крест, внегда́ собра́тися им вку́пе на мя, прия́ти ду́шу мою́ совеща́ша. Аз же на Тя, Го́споди, упова́х, рех: Ты еси́ Бог мой, в руку́ Твое́ю жре́бии мой, изба́ви мя из руки́ враг мои́х, и от гоня́щих мя. Просвети́ лице́ Твое́ на раба́ Твоего́, спаси́ мя ми́лостию Твое́ю. Го́споди, да не постыжу́ся, я́ко призва́х Тя, Да постыдя́тся нечести́вии, и сни́дут во ад. Не́мы да бу́дут устны́ льсти́выя, глаго́лющия на пра́веднаго беззако́ние горды́нею и уничиже́нием. Коль мно́гое мно́жество бла́гости Твоея́, Го́споди, ю́же скрыл еси́ боя́щимся Тебе́, соде́лал еси́ уповающим на Тя, пред сы́ны челове́ческими. Скры́еши их в тайне лица́ Твоего́ от мяте́жа челове́ческа: покры́еши их в кро́ве от пререка́ния язык. Благослове́н Госпо́дь, я́ко удиви́ ми́лость Свою́ во гра́де огражде́ния. Аз же Рех во изступле́нии мое́м: отве́ржен есмь от лица́ о́чию Твое́ю, сего́ ра́ди услы́шал еси́ глас моли́твы мое́й, внегда́ воззва́х к Тебе́. Возлюби́те Го́спода вси преподо́бнии Его́, я́ко и́стины взыска́ет Госпо́дь, и воздае́т изли́ше творя́щим гордыню: мужа́йтеся, и да крепи́тся се́рдце ва́ше, вси упова́ющии на Го́спода.

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́, и Прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна. Плещма́ Свои́ма осе́нит тя, и под криле́ Его́ наде́ешися. Ору́жием обы́дет тя и́стина Его́, не убои́шися от стра́ха нощна́го, от стрелы́ летя́щия во дни́; от ве́щи во тьме преходя́щия, от сря́ща и бе́са полу́деннаго. Паде́т от страны́ Твоея́ ты́сяща, и тьма одесну́ю тебе́, к тебе́ же не прибли́жится. Оба́че очи́ма Твои́ма смо́триши, и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище Твое́. Не прии́дет к тебе́ зло, и ра́на не прибли́жится телеси́ твоему́. Я́ко а́нгелом Свои́м запове́сть о тебе́, сохрани́ти тя во всех путе́х твои́х: на рука́х во́змут тя, да не когда́ преткне́ши о ка́мень но́гу твою́. На а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и, покры́ю и, я́ко позна́ и́мя Мое́. Воззове́т ко Мне, и услы́шу его́: с ним есмь в ско́рби: изму́ его́, и просла́влю его́. Долгото́ю дний испо́лню его́, и явлю́ ему́ спасе́ние Мое́.

Сла́ва, и ны́не: Аллилу́иа, Аллилу́иа, Аллилу́иа, сла́ва Тебе́, Бо́же. (Три́жды). Го́споди, поми́луй. (Три́жды). Сла́ва, и ны́не:

И начина́ем глаго́лати стихи́ со сладкопе́нием, не ско́ро, и вели́ким гла́сом.

Пе́рвый лик пое́т: С на́ми Бог, разуме́йте, язы́цы, и покаря́йтеся.

Я́ко с на́ми Бог.

Вторы́й лик пое́т то́йже стих: С на́ми Бог, разуме́йте, язы́цы, и покаря́йтеся.

Я́ко с на́ми Бог.

Та́же по чи́ну ки́йждо лик свой стих.

Пе́рвый лик: Услы́шите до после́дних земли́.

Я́ко с на́ми Бог.

Вторы́й лик: Могу́щий, покаря́йтеся.

Я́ко с на́ми Бог.

А́ще бо па́ки возмо́жете, и па́ки побежде́ни бу́дете.

Я́ко с на́ми Бог.

И и́же а́ще сове́т совещава́ете, разори́т Госпо́дь.

Я́ко с на́ми Бог.

И сло́во, е́же а́ще возглаго́лете, не пребу́дет в вас.

Я́ко с на́ми Бог.

Стра́ха же ва́шего не убои́мся, ниже́ смути́мся.

Я́ко с на́ми Бог.

Го́спода же Бо́га на́шего, Того́ освяти́м, и Той бу́дет нам в страх.

Я́ко с на́ми Бог.

И а́ще на Него́ наде́яся буду, бу́дет мне во освяще́ние.

Я́ко с на́ми Бог.

И упова́я бу́ду на Него́, и спасу́ся Им.

Я́ко с на́ми Бог.

Се аз и де́ти, я́же ми даде́ Бог.

Я́ко с на́ми Бог.

Лю́дие, ходя́щии во тьме, ви́деша свет ве́лий.

Я́ко с на́ми Бог.

Живу́щии во стране́ и се́ни сме́ртней, свет возсия́ет на вы.

Я́ко с на́ми Бог.

Я́ко Отроча́ роди́ся нам, Сын, и даде́ся нам.

Я́ко с на́ми Бог.

Его́же нача́льство бысть на ра́ме Его́.

Я́ко с на́ми Бог.

И ми́ра Его́ несть преде́ла.

Я́ко с на́ми Бог.

И нарица́ется И́мя Его́ – Вели́ка Сове́та А́нгел.

Я́ко с на́ми Бог.

Чу́ден Сове́тник:

Я́ко с на́ми Бог.

Бог кре́пок, Власти́тель, Нача́льник ми́ра.

Я́ко с на́ми Бог.

Оте́ц бу́дущаго ве́ка.

Я́ко с на́ми Бог.

Испо́лнившымся же стихо́м, я́ко предрече́ся, пое́тся: С на́ми Бог, разуме́йте, язы́цы, и покаря́йтеся. Я́ко с на́ми Бог.

И па́ки то́жде от обо́ю ли́ку: С на́ми Бог, разуме́йте, язы́цы, и покаря́йтеся. Я́ко с на́ми Бог.

Сла́ва: пе́рвый лик: С на́ми Бог.

И ны́не: Вторы́й лик, то́жде: С на́ми Бог.

Та́же два ли́ка вку́пе: Я́ко с на́ми Бог.

И а́бие настоя́щыя тропари́:

Пе́рвый лик: День преше́д, благодарю Тя, Го́споди, ве́чер прошу́ с но́щию без греха́ пода́ждь ми, Спа́се, и спаси́ мя.

Вторы́й лик: Сла́ва: День преше́д, славосло́влю Тя, Влады́ко, ве́чер прошу́ с но́щию, безсобла́знство пода́ждь ми, Спа́се, и спаси́ мя.

Та́же о́ба ли́ка: И ны́не: День преше́д, песносло́влю Тя, Святы́й, ве́чер прошу с но́щию ненаве́тен пода́ждь ми, Спа́се, и спаси́ мя.

Вку́пе два ли́ка: Безпло́тное естество Херуви́мское немо́лчными пе́сньми Тя славосло́вят. Шестокри́льная живо́тная Серафи́ми непреста́нными гласы Тя превозно́сят. А́нгелов же вся во́инства Трисвяты́ми пе́сньми Тя восхваля́ют. Пре́жде бо всех еси́ сый Оте́ц, и Собезнача́льна и́маши Твоего́ Сы́на, и равноче́стна носяй Ду́ха жи́зни, Тро́ицы явля́еши Неразде́льное.

Пресвята́я Де́во, Ма́ти Бо́жия, и и́же Сло́ва самови́дцы и слуги́, проро́к же и му́ченик вси ли́цы, я́ко безсме́ртну иму́ще жизнь, о всех моли́теся приле́жно, я́ко вси есмы в бедах. Да пре́лести изба́вльшеся лука́ваго, а́нгельскую вопие́м песнь: Святы́й, Святы́й, Святы́й, Трисвяты́й Го́споди, поми́луй и спаси́ нас. Ами́нь.

Сие́ глаго́лют во Святе́й Горе́ Афо́нстей и в прочих монастырех по стиху́, ки́йждо лик свой стих.

И а́бие ни́зким гла́сом: Ве́рую во Еди́наго Бо́га Отца́, Вседержи́теля, Творца́ Не́бу и земли́, ви́димым же всем и неви́димым. И во Еди́наго Го́спода Иису́са Христа́, Сы́на Бо́жия, Единоро́днаго, и́же от Отца́ рожде́ннаго пре́жде всех век. Све́та от Све́та, Бо́га И́стинна от Бо́га И́стинна, рожде́нна, несотворе́нна, Единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с, и воплоти́вшагося от Ду́ха Свя́та и Мари́и Де́вы, и вочелове́чшася. Распя́таго же за ны при Понти́йстем Пила́те, и страда́вша, и погребе́на. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со славо́ю суди́ти живы́м и ме́ртвым, Его́же Ца́рствию не бу́дет конца́, И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. Во Еди́ну, Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых и жи́зни бу́дущаго ве́ка. Ами́нь.

И а́бие: Пресвята́я Владычице Богоро́дице, моли́ о нас, гре́шных. (Три́жды).

Вся Небе́сныя Си́лы святы́х А́нгел и Арха́нгел, моли́те о нас, гре́шных. (Два́жды).

Святы́й Иоа́нне, проро́че и Предте́че и Крести́телю Го́спода на́шего Иису́са Христа́, моли́ о нас, гре́шных. (Два́жды).

Святи́и сла́внии апо́стол и, проро́цы и му́ченицы и вси святи́и, моли́те о нас, гре́шных. (Два́жды).

Преподо́бнии и богоно́снии отцы на́ши, па́стырие и учи́телие вселе́нныя, моли́те о нас, гре́шных. (Два́жды).

Зде же глаго́лется и Святы́й хра́ма.

Непобеди́мая, и Непостижи́мая, и Боже́ственная Си́ло Честна́го и Животворя́щаго Креста́, не оста́ви нас, гре́шных. (Два́жды).

Бо́же, очи́сти нас, гре́шных. (Два́жды).

Бо́же, очи́сти нас, гре́шных, и поми́луй нас. (Еди́ножды).

Та́же Чтец: Трисвято́е, по О́тче наш.

Свяще́нник: Я́ко Твое́ есть Ца́рство:

Чтец: Ами́нь.

И посе́м в понеде́льник тропари́ сия́, во глас 2:

Просвети́ о́чи мой, Христе́ Бо́же, да не когда́ усну́ в смерть, да не когда́ рече́т враг мой: укрепи́хся на него́.

Сла́ва: Засту́пник души́ моея́ бу́ди, Бо́же, я́ко посреде́ хожду́ сете́й мно́гих, изба́ви мя от них, и спаси́ мя, Бла́же, я́ко Человеколю́бец.

И ны́не: Я́ко не и́мамы дерзнове́ния, за премно́гия грехи́ на́ша. Ты и́же от Тебе́ ро́ждшагося моли́, Богоро́дице Де́во: мно́го бо мо́жет моле́ние Ма́тернее ко Бла́госе́рдию Влады́ки, не пре́зри гре́шных мольбы́, Всечи́стая, я́ко ми́лостив есть, и спасти́ моги́й И́же и страдати о нас изво́ливый.

Во вто́рник тропари́ сия́, во глас 8:

Неви́димых враг мои́х неусыпа́ние ве́си, Го́споди, и окая́нныя пло́ти моея́ неможе́ние ве́си созда́вый мя. Те́мже в ру́це Твои́ предаю́ дух мой, покры́й мя крило́ма Твоея́ бла́гости, да не когда́ усну́ в смерть. И у́мныя мои́ о́чи просвети́, в наслажде́ние боже́ственных слове́с Твои́х, и воздви́гни мя во вре́мя благопотре́бно к Твоему́ славосло́вию, я́ко еди́н Благ и Человеколю́бец.

Стих: При́зри и услы́ши мя, Го́споди, Бо́же мой.

Я́ко стра́шен суд Твой, Го́споди, а́нгелом предстоя́щым, челове́ком вводи́мым, кни́гам разгиба́емым, дело́м испыту́емым, помысло́м истязу́емым: кий суд бу́дет мне, зача́тому во гресе́х? Кто ми пла́мень угаси́т? Кто ми тьму просвети́т? А́ще не Ты, Го́споди, поми́луеши мя, я́ко Человеколю́бец.

Сла́ва: Сле́зы ми даждь, Бо́же, я́коже иногда́ жене́ гре́шнице: и сподо́би мя омочи́ти но́зе Твой, я́же мя от пути́ пре́лести свободи́вшыя, и ми́ро благоуха́ния Тебе́ приноси́ти, житие́ чи́сто, покая́нием ми созда́нное: да услы́шу и аз жела́емый Твой глас: ве́ра Твоя́ спасе́ тя, иди́ в ми́ре.

И ны́не: Непосты́дную, Богоро́дице, наде́жду Твою́ име́я спасу́ся, предста́тельство Твое́ стяжа́в, Пречи́стая, не убою́ся, пожену́ враги́ моя́, и побежду́ я́, во един оболки́йся, я́ко в броня́ кров Твой, и всемогу́щую Твою́ по́мощь, моля́ся вопию́ Ти: Владычице, спаси́ мя моли́твами Твои́ми, и возста́ви мя от мра́чнаго сна к Твоему́ славосло́вию, си́лою из Тебе́ воплоти́вшагося Сы́на Бо́жия.

Та́же: Го́споди, поми́луй. (40). Сла́ва, и ны́не: Честне́йшую Херуви́м:

И́менем Госпо́дним Благослови́, о́тче.

Свяще́нник: Моли́твами святы́х оте́ц на́ших, Го́споди Иису́се Христе́ Бо́же наш, поми́луй нас.

Чтец: Ами́нь. И моли́тву сию́ Вели́каго Васи́лиа:

Го́споди, Го́споди, избавле́й нас от вся́кия стрелы́ летя́щия во дни, изба́ви нас и от вся́кия ве́щи во тьме преходя́щия. Приими́ же́ртву вече́рнюю, рук на́ших воздея́ние. Сподо́би же нас и нощно́е по́прище без поро́ка преити́, неискуше́ны от злых. И изба́ви нас от вся́каго смуще́ния и боя́зни, я́же от диа́вола нам прибыва́ющия. Да́руй душа́м на́шим умиле́ние, и помысло́м на́шим попече́ние, е́же на Стра́шнем и пра́веднем Твое́м суде́ испыта́ния. Пригвозди́ стра́ху Твоему́ пло́ти на́ша, и умертви́ у́ды на́ша су́щия на земли́: да и со́нным безмо́лвием просвети́мся зре́нием суде́б Твои́х, отыми́ же от нас вся́кое мечта́ние неподо́бное, и по́хоть вре́дну, возста́ви же нас во вре́мя моли́твы, утвержде́ны в ве́ре, и преспева́ющия в за́поведех Твои́х, благоволе́нием и бла́гостию Единоро́днаго Сы́на Твоего́: с Ни́мже благослове́н еси́, с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

И а́бие: Прииди́те, поклони́мся: (Три́жды).

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х, очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю, и грех мой пре́до мно́ю есть вы́ну. Тебе́ еди́ному согреши́х, и лука́вое пред Тобо́ю сотвори́х. Я́ко да оправди́шися во словесе́х Твои́х, и победи́ши внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся: омы́еши мя, и па́че сне́га убелюся. Слуху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица Твоего́, и Ду́ха Твоего́ Свята́го не отыми́ от Мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язык мой пра́вде Твое́й. Го́споди, устне́ мой отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая, тогда́ возложа́т на олта́рь Твой тельцы́.

Го́споди, услы́ши моли́тву мою́, и вопль мой к Тебе́ да прии́дет. Не отврати́ лица Твоего́ от Мене́, во́ньже а́ще день скорблю́, приклони́ ко мне у́хо Твое́: во́ньже а́ще день призову́ Тя, ско́ро услы́ши мя. Я́ко исчезо́ша я́ко дым дни́е мои́, и ко́сти моя́ я́ко суши́ло сосхо́шася.

Уя́звен бых я́ко трава, и и́зсше се́рдце мое́, я́ко забы́х сне́сти хлеб мой. От гла́са воздыха́ния моего́ прильпе́ кость моя́ пло́ти мое́й. Уподо́бихся нея́сыти пусты́нней, бых я́ко нощны́й вран на ны́рищи. Бдех, и бых я́ко пти́ца осо́бящаяся на зде. Ве́сь день поноша́ху ми врази́ мои́, и хваля́щии мя мно́ю кленя́хуся. Зане́ пе́пел я́ко хлеб ядя́х, и питие́ мое́ с пла́чем растворя́х. От лица́ гне́ва Твоего́ и я́рости Твоея́, я́ко возне́с низве́ргл мя еси́. Дни́е мои́ я́ко сень уклони́шася, и аз я́ко се́но изсхо́х. Ты же, Го́споди, во век пребывае́ши, и память Твоя́ в род и род. Ты воскре́с уще́дриши Сио́на: я́ко вре́мя уще́дрити его́, я́ко прии́де вре́мя. Я́ко благоволи́ша раби́ Твои́ каме́ние его́, и персть Его́ уще́дрят. И убоя́тся язы́цы И́мене Госпо́дня, и вси ца́рие зе́мстии сла́вы Твоея́. Я́ко сози́ждет Госпо́дь Сио́на, и яви́тся во сла́ве Свое́й. Призре́ на моли́тву смире́нных, и не уничижи́ моле́ния их. Да напи́шется сие́ в род ин, и лю́дие зи́ждемии восхва́лят Го́спода. Я́ко прини́че с высоты́ Святы́я Своея́, Госпо́дь с Небесе́ на зе́млю призре́, услы́шати воздыха́ние окова́нных, разреши́ти сы́ны умерщвле́нных: возвести́ти в Сио́не и́мя Госпо́дне, и хвалу́ Его́ во Иерусали́ме. Внегда́ собра́тися лю́дем вку́пе, и царе́м е́же рабо́тати Го́сподеви. Отвеща ему́ на пути́ кре́пости его́: умале́ние дней мои́х возвести́ ми. Не возведи́ мене́ во преполове́ние дней мои́х, в ро́де родо́в ле́та Твоя́. В нача́лех Ты, Го́споди, зе́млю основа́л еси́, и дела́ руку́ Твое́ю суть Небеса́. Та поги́бнут, Ты же пребыва́еши, и вся я́ко ри́за обетша́ют, и я́ко оде́жду свие́ши я, и изме́нятся. Ты же то́йжде еси́ и ле́та Твоя́ не оскуде́ют. Сы́нове раб Твои́х всели́тся, и се́мя их во век испра́вится.

Моли́тва Манасси́и, царя́ Иуде́йска:

Го́споди Вседержи́телю, Бо́же оте́ц на́ших, Авраа́мов, и Исаа́ков, и Иа́ковль, и се́мене их пра́веднаго, сотвори́вый Не́бо и зе́млю со все́ю ле́потою их, связа́вый мо́ре сло́вом повеле́ния Твоего́, заключи́вый бе́здну, и запеча́тствовавый ю́ Стра́шным и славным И́менем Твои́м, Его́же вся бои́тся, и трепе́щут от лица́ си́лы Твоея́: я́ко непостоя́нно великоле́пие сла́вы Твоея́, и нестерпи́мь гнев еже на гре́шники преще́ния Твоего́, безме́рна же, и неизсле́дованна ми́лость обеща́ния Твоего́: Ты бо еси́ Госпо́дь Вы́шний благоутро́бен, долготерпели́в, и многоми́лостив, и кая́йся о зло́бах челове́ческих. Ты, Го́споди, по мно́жеству бла́гости Твоея́, обеща́л еси́ покая́ние, и оставле́ние согреши́вшим Тебе́: и мно́жеством щедро́т Твои́х, определи́л еси́ покая́ние гре́шником во спасе́ние. Ты у́бо, Го́споди Бо́же Сил, не положи́л еси́ покая́ние пра́ведным, Авраа́му, и Исаа́ку, и Иа́кову, не согреши́вшим Тебе́: но положи́л еси́ покая́ние на мне гре́шнем, зане́ согреши́х па́че числа́ песка́ морска́го. Умно́жишася беззако́ния моя́, Го́споди, умно́жишася беззако́ния моя́, и несмь досто́ин воззре́ти, и ви́дети высоту́ Небе́сную, от мно́жества непра́вд мои́х, сля́чен есмь мно́гими у́зами желе́зными, во е́же не возвести́ главы́ моея́, и несть ми ослабле́ния: зане́ прогне́вах я́рость Твою́, и лука́вое пред Тобо́ю сотвори́х, не сотвори́вый во́ли Твоея́, и не сохрани́вый повеле́ний Твои́х, и ны́не приклоня́ю коле́на се́рдца, тре́буя от Тебе́ благости. Согреши́х, Го́споди, согреши́х, и беззако́ния моя́ аз вем: но прошу́ моля́ся, осла́би ми, Го́споди, Осла́би ми, и не погуби́ мене́ со беззако́нми мои́ми, ниже́ в век враждова́в соблюде́ши зол мои́х, ниже́ осуди́ши мя в преиспо́дних земли́. Зане́ Ты еси́, Бо́же, Бог ка́ющихся, и на мне яви́ши всю бла́гость Твою́, я́ко недосто́йна су́ща спасе́ши мя, по мно́зей ми́лости Твое́й, и восхвалю Тя вы́ну во днех живота́ моего́, я́ко Тя пое́т вся Си́ла Небе́сная, и Твоя́ есть сла́ва во ве́ки веко́в. Ами́нь.

Трисвятое, по О́тче наш.

Свяще́нник: Я́ко Твое́ есть Ца́рство, и си́ла, и сла́ва. Отца́, и Сы́на, и Свята́го Ду́ха ны́не и при́сно, и во ве́ки веко́в.

Чтец: Ами́нь.

И тропари́ сия́, во глас 6:

Поми́луй нас, Го́споди, поми́луй нас: вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим, поми́луй нас.

Сла́ва: Го́споди, поми́луй нас: на Тя бо упова́хом, не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко Благоутро́бен, и изба́ви ны от враг на́ших; Ты бо еси́ Бог наш, и мы лю́дие Твои́, вси дела́ руку́ Твое́ю, и И́мя Твое́ призыва́ем.

И ны́не: Милосе́рдия две́ри отве́рзи нам, Благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да христиа́нскаго.

Посе́м: Го́споди, поми́луй. (40). Сла́ва, и ны́не: Честне́йшую Херуви́м:

И́менем Госпо́дним Благослови́, О́тче.

Свяще́нник: Моли́твами святы́х Оте́ц на́ших, Го́споди Иису́се Христе́ Бо́же наш, поми́луй нас.

Чтец: Ами́нь. И моли́тву сию́:

Влады́ко Бо́же О́тче Вседержи́телю, Го́споди Сы́не Единоро́дный, Иису́се Христе́, и Святы́й Ду́ше, Еди́но Бо́жество́, еди́на Си́ла, поми́луй мя гре́шнаго: и и́миже ве́си судьба́ми, спаси́ мя недосто́йнаго раба́ Твоего́, я́ко благослове́н еси́ во ве́ки веко́в. Ами́нь.

Та́же: Прииди́те, поклони́мся: (Три́жды).

Бо́же, в по́мощь мою́ вонми́, Го́споди, помощи́ ми потщи́ся. Да постыдя́тся и посра́мятся и́щущии ду́шу мою́: да возвратя́тся вспять, и постыдя́тся хотя́щии ми злая. Да возвратя́тся а́бие стыдя́щеся, глаго́лющии ми: благо́же, благо́же. Да возра́дуются и возвеселя́тся о Тебе́ вси и́щущии Тебе́, Бо́же: и да глаго́лют вы́ну, да возвели́чится Госпо́дь, лю́бящий спасе́ние Твое́. Аз же нищ есмь и убо́г, Бо́же, помози́ ми: Помо́щник мой, и Изба́витель мой еси́ Ты, Го́споди, не закосни́.

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й: и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой. Посади́л мя есть в те́мных, я́ко ме́ртвыя ве́ка: и уны́ во мне дух мой, во мне смяте́ся, се́рдце мое́. Помяну́х дни дре́вния: поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́ я́ко земля́ безво́дная Тебе́. Ско́ро услы́ши мя, Го́споди, исчезе́ дух мой. Не отврати́ лица Твоего́ от Мене́, и уподо́блюся низходя́щим в ров.

Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь, во́ньже по́йду, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́: и погуби́ши вся стужа́ющия души́ моея́, я́ко аз раб Твой есмь.

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́.

Го́споди Царю́ Небе́сный, Бо́же О́тче Вседержи́телю. Го́споди Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу. Седя́й одесну́ю Отца́, поми́луй нас. Я́ко Ты еси́ Еди́н Свят, Ты еси́ Еди́н Госпо́дь, Иису́с Христо́с, в сла́ву Бо́га Отца́. Ами́нь.

На вся́к день благословлю́ Тя, и восхвалю́ И́мя Твое́ во ве́ки, и в век ве́ка. Го́споди, прибе́жище был еси́ нам в род и род, аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет, проба́ви ми́лость Твою́ ве́дущим Тя.

Сподо́би, Го́споди, в нощь сию́ без греха́ сохрани́тися нам. Благослове́н еси́, Го́споди Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми. Го́споди, ми́лость Твоя́ во век, дел руку́ Твое́ю не пре́зри, Тебе́ подоба́ет хвала, Тебе́ подоба́ет пе́ние, Тебе́ сла́ва подоба́ет, Отцу́, и Сы́ну, и Свято́му Ду́ху ны́не, и при́сно, и во ве́ки веко́в. Ами́нь.

В понеде́льник пое́м трипе́снец господи́на Андре́я Кри́тскаго.

Песнь 2. Глас 8:

Ирмо́с: Вонми́, Не́бо, и возглаго́лю и воспою́ Христа́, от Де́вы ро́ждшагося во спасе́ние на́ше. (Два́жды).

Сла́ва Тебе́, Бо́же наш, сла́ва Тебе́.

По́йдем со Христо́м к горе́ Елео́нстей, тайно со апо́столы соводвори́мся Ему́.

Сла́ва Тебе́, Бо́же наш, сла́ва Тебе́.

Разуме́й смире́нное мое́ се́рдце, что́ есть жерно́вная при́тча, о не́йже пре́жде рече́ Христо́с, и истре́зви́ся про́чее.

Сла́ва Тебе́, Бо́же наш, сла́ва Тебе́.

Гото́ви сама себе́, о душе́ моя́, ко исхо́ду: прише́ствие приближа́ется неумоли́маго Судии́.

Пресвята́я Богоро́дице, спаси́ нас.

Пречи́стая Богоро́дице Де́во, Еди́на Всепе́тая, Сы́на Твоего́ моли́ о рабе́х Твои́х.

Ин ирмо́с, глас то́йже: Ви́дите, ви́дите, я́ко Аз есмь Бог, дре́вле Изра́иля сквозе́ Чермно́е мо́ре прове́дый, и пита́вый, и спасы́й, и от го́рькия рабо́ты свободи́вый фарао́новы.

Сла́ва Тебе́, Бо́же наш, сла́ва Тебе́.

Ви́дите, ви́дите, я́ко Аз есмь Бог, И́же пре́жде бы́тия всех и пре́жде сотворе́ния земли́ и Не́ба, вем вся: и весь Сый во Отце́, и всего́ ношу в Себе́.

Сла́ва Тебе́, Бо́же наш, сла́ва Тебе́.

Сло́вом соста́вих небо вку́пе и зе́млю: со Отце́м бо бех и сло́вом ношу вся, я́ко Сло́во, Му́дрость и Си́ла, и О́браз, и Содействи́телен, и Равноде́телен.

Сла́ва Тебе́, Бо́же наш, сла́ва Тебе́.

Кто́ времена положи́? Кто́ ве́ки соблюда́яй? Кто́ вся определя́й и совоздвиза́яй? Ра́зве Безнача́льный, при́сно сый со Отце́м, я́коже заря́ во све́те.

Сла́ва Тебе́, Бо́же наш, сла́ва Тебе́.

О безме́рнаго Твоего́ Человеколю́бия, Иису́се! сказа́л бо еси́ нам сконча́ния свы́ше вре́мя, скрыв час, уясни́в же све́тло образы его́.

Сла́ва Тебе́, Бо́же наш, сла́ва Тебе́.

Вся ве́си, вся зна́еши, Иису́се, я́ко име́яй все в Себе́ Оте́ческое достоя́ние, Боже́ственне, и всего́ Ду́ха всажде́на нося́й в Себе́, Соприсносу́щнаго Отцу́.

Сла́ва Тебе́, Бо́же наш, сла́ва Тебе́.

Влады́ко Го́споди, веко́в Тво́рче, сподо́би и нас свяще́нный о́ный тогда́ глас услы́шати, зовущий избранный Отца́ в Ца́рство Небе́сное.

Сла́ва: Безнача́льная, Несозда́нная Тро́ице, Неразде́льная Еди́нице, Тро́е Су́щая и Еди́но, О́тче, Сы́не и Ду́ше, Еди́ный Бо́же, приими́ пе́ние от бре́нных язы́к, я́коже от уст пла́менных.

И ны́не: Селе́ние Свято́е яви́лася еси́ Де́во Бо́жие: в Тя бо Небе́сный Царь, всели́вся пло́тию, про́йде красный, челове́ка в Себе́ вообрази́в Боже́ственне.

Та́же о́ба ли́ка вку́пе пою́т ирмо́с: Ви́дите, ви́дите, я́ко Аз есмь Бог:

Посе́м: Го́споди, поми́луй. (Три́жды).

Сла́ва, и ны́не:

Седа́лен, глас 2:

Подо́бен: Милосе́рдия су́щи:

Милосе́рдием дви́жим, Христе́, во́лею преды́деши страда́ти, Благоде́телю, хотя́й страсте́й нас изба́вити и е́же во а́де осужде́ния, те́мже честна́я Твоя́ воспевае́м страда́ния и сла́вим, Спа́се, кра́йнее Твое́ вси схожде́ние.

Песнь 8

Ирмо́с: А́нгели и Небеса́, на престо́ле сла́вы Седя́щаго и я́ко Бо́га непреста́нно Сла́вимаго Благослови́те, по́йте и превозноси́те Его́ во ве́ки. (Два́жды).

Сла́ва Тебе́, Бо́же наш, сла́ва Тебе́.

Вся́ко слы́шала еси́, душе́, ка́ко Христо́с Боже́ственным ученико́м Свои́м провозглаша́ше, глаго́ля сконча́ние: разуме́вши же твой коне́ц, угото́вися про́чее, вре́мя исхо́да прии́де.

Сла́ва Тебе́, Бо́же наш, сла́ва Тебе́.

Позна́ла еси́, непло́дная душе́, лука́ваго раба́ при́тчу, бо́йся и не небрези́ о дарова́нии, его́же прия́ла еси́, да не сокры́еши в зе́млю, но да ку́плю де́еши.

Сла́ва Тебе́, Бо́же наш, сла́ва Тебе́.

Да уясни́тся свеща́, да преизлие́тся сея́ и еле́й, я́коже де́вам тогда́ сострада́ние, да обря́щеши, душе́ моя́, черто́г Христо́в тогда́ отве́рстый.

Сла́ва Тебе́, Бо́же наш, сла́ва Тебе́.

В суббо́ту бе́гство и в зиме́, глаго́ля учи́тель, седма́го бу́рю предгада́тельствует настоя́щаго ве́ка, в не́мже на́йдет, я́ко зима́, кончи́на.

Сла́ва Тебе́, Бо́же наш, сла́ва Тебе́.

Я́ко ско́рость мо́лнии преходя́щая, та́ко тогда́ бу́дет Стра́шное о́ное Влады́ки твоего́ прише́ствие, душе́ моя́: слышала еси́, гото́ва про́чее бы́ти потщи́ся.

Сла́ва Тебе́, Бо́же наш, сла́ва Тебе́.

Егда́ прии́дет Судия с ты́сящами и тма́ми а́нгельских чино́в и сил: тогда́ кий страх, душе́ моя́, кий тре́пет, увы мне, наги́м стоя́щым всем?

Благослови́м Отца́, и Сы́на, и Свята́го Ду́ха, Го́спода.

Еди́н Бог у́бо Тро́ица, ни Отцу́ изступи́вшу в сыновство́, ниже́ Сы́ну премени́вшуся во исхожде́ние, но сво́йственная, и Обое́ Свет, Бо́га, Три сла́влю во ве́ки.

И ны́не, и при́сно, и во ве́ки веко́в. Ами́нь.

Моли́твами, Бо́же, Богоро́дицы, приими́ моли́тву на́шу, вознизпосли́ же ми́лости Твоя́ на вся бога́тно и мир Твой пода́ждь лю́дем Твои́м.

И а́бие: Хвалим, благослови́м, покланя́емся Го́сподеви, пою́ще и превознося́ще во вся ве́ки.

Та́же о́ба ли́ка вку́пе пою́т ирмо́с: А́нгели и Небеса́:

Песнь 9

Ирмо́с: Проявле́нное на горе́ законополо́жнику во огни́ и купине́ рождество́ Присноде́вы, в на́ше ве́рных спасе́ние, пе́сньми немо́лчными велича́ем. (Два́жды).

Сла́ва Тебе́, Бо́же наш, сла́ва Тебе́.

Слышала еси́, душе́ моя́, Судии предвозглаша́ющу и уча́щу тя вре́мени кончи́ны: гото́ви я́же на исхо́д де́ла, да не я́ко неиску́сна Бо́га отве́ржена бу́деши.

Сла́ва Тебе́, Бо́же наш, сла́ва Тебе́.

От смоко́вницы, о душе́ моя́, научи́ся кончи́ны: егда́ мла́до бу́дет ли́ствие и прозя́бнет ве́твие, жа́твы час про́чее: и ты егда́ сия́ уви́диши, разуме́й, я́ко при две́рех есть.

Сла́ва Тебе́, Бо́же наш, сла́ва Тебе́.

Кто́ ра́зве Тебе́ ины́й Твоего́ знает Отца́? Или́ кто кроме́ Тебе́ весть час или́ день? у Тебе́ бо сокро́вища прему́дрости вся внутрь суть, Христе́ Бо́же.

Сла́ва Тебе́, Бо́же наш, сла́ва Тебе́.

Книги у́бо разгну́тся тогда́, престо́лом поставле́нным, дея́ния же облича́тся, наги́м стоя́щым всем, ни свиде́телем, ни клеветнико́м прису́тствующым: обнаже́на бо вся Бо́гу.

Сла́ва Тебе́, Бо́же наш, сла́ва Тебе́.

Гряде́т всех Судия́, изведе́н бы́ти на суд, на престо́ле херуви́мсте Седя́й, я́ко пови́нный предста́ти Пила́ту и вся пострада́ти, да спасе́тся Адам.

Сла́ва Тебе́, Бо́же наш, сла́ва Тебе́.

Прибли́жися Па́сха нам Вели́кая и Боже́ственная: по дво́ю бо дни́ю, преднауча́ет Христо́с, страда́ния пропису́я день, во́ньже Отцу́ Же́ртва приведе́тся.

Сла́ва Тебе́, Бо́же наш, сла́ва Тебе́.

При Кресте́ Твое́м, Спа́се, предстоя́щи Ма́ти и Твое́ непра́ведное зря́щи заколе́ние, вопия́ше: увы́ Мне, чадо Мое́! увы Мне, Незаходи́мый Све́те! Просия́й всем, Со́лнце сла́вы, Свет.

Сла́ва: О Еди́нице Свята́я, Тро́ице, Еди́но Бо́жество́ и Тро́ица Еди́нице Бо́же, Триипоста́сное Естество́, Единоче́стная и Неразде́льная Сла́ва, изба́ви от бед ду́шы на́ша.

И ны́не: Приими́ Матерь Твою́, Христе́, в моли́тву, да моли́твами Ея́ умири́ши мир и це́ркви Твоя́ совокупи́ши во еди́но.

Та́же о́ба ли́ка вку́пе пою́т ирмо́с: Проявле́нное на горе́ законополо́жнику: вме́сто Досто́йно: И покло́н до земли́.

Во вто́рник же трипе́снец.

Чтец: Трисвято́е, по О́тче наш.

Свяще́нник: Я́ко Твое́ есть Ца́рство:

Чтец: Ами́нь.

Конда́к, глас 2:

Подобен: Вы́шних ища́:

Час, душе́, конца́ помы́сливши и посече́ния смоко́вницы убоя́вшися, да́нный тебе́ тала́нт трудолю́бно де́лай, окая́нная, бо́дрствующи и зову́щи: да не пребу́дем вне черто́га Христо́ва.

И пое́м тропа́рь велегла́сно и ко́сно, на глас 6:

Го́споди Сил, с на́ми бу́ди, ино́го бо ра́зве Тебе́ Помо́щника в ско́рбех не и́мамы: Го́споди Сил, поми́луй нас. (Два́жды).

Хвали́те Бо́га во святы́х Его́, хвали́те Его́ во утверже́нии си́лы Его́.

Го́споди Сил, с на́ми бу́ди:

Хвали́те Его́ на си́лах Его́, хвали́те Его́ по мно́жеству вели́чествия Его́.

Го́споди Сил, с на́ми бу́ди:

Хвали́те Его́ во гласе трубнем, хвали́те Его́ во псалти́ри и гуслех.

Го́споди Сил, с на́ми бу́ди:

Хвали́те Его́ в тимпа́не и ли́це, хвали́те Его́ во стру́нах и орга́не.

Го́споди Сил, с на́ми бу́ди:

Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хвали́т Го́спода.

Го́споди Сил, с на́ми бу́ди:

Та́же о́ба ли́ка, соше́дшеся вку́пе, пою́т:

Хвали́те Бо́га во святы́х Его́, хвали́те Его́ во утверже́нии си́лы Его́.

Го́споди Сил, с на́ми бу́ди, ино́го бо разве Тебе́ Помо́щника в ско́рбех не и́мамы: Го́споди Сил, поми́луй нас.

Сла́ва: Го́споди, а́ще не быхом Святы́я Твоя́ име́ли моли́твенники и благосты́ню Твою́, ми́лующую нас, ка́ко сме́ли бы́хом, Спа́се, пе́ти Тя, Его́же славосло́вят непреста́нно а́нгели? Сердцеве́дче, пощади́ ду́шы на́ша.

И ны́не: Мно́гая мно́жества мои́х, Богоро́дице, прегреше́ний, к Тебе́ прибего́х, Чи́стая, спасе́ния тре́буя, посети́ немощству́ющую мо́ю ду́шу и моли́ Сы́на Твоего́ и Бога на́шего, да́ти ми оставле́ние, я́же соде́ях лютых, Еди́на Благослове́нная.

Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя, но Сама́ заступи́ и поми́луй мя.

Все́ упова́ние мое́ на Тя возлага́ю, Ма́ти Бо́жия, сохрани́ мя под кро́вом Твои́м.

Чтец: Го́споди, поми́луй. (40).

И́же на вся́кое вре́мя, и на вся́кий час, на Небеси́ и на земли́ покланя́емый и сла́вимый, Христе́ Бо́же, Долготерпели́ве, Многоми́лостиве, Многоблагоутро́бне, И́же пра́ведныя любя́й, и гре́шныя ми́луяй, И́же вся зовы́й ко спасе́нию, обеща́ния ра́ди бу́дущих благ. Сам, Го́споди, приими́ и на́ша в час сей моли́твы, и испра́ви живо́т наш к за́поведем Твои́м: ду́шы на́ша освяти́, телеса́ очи́сти, помышле́ния испра́ви, мы́сли очи́сти, и изба́ви нас от вся́кия ско́рби, зол и боле́зней. Огради́ нас святы́ми Твои́ми а́нгелы, да ополче́нием их соблюда́еми и наставля́еми, дости́гнем в соедине́ние ве́ры, и в ра́зум непристу́пныя Твоея́ сла́вы: я́ко благослове́н еси́ во ве́ки веко́в. Ами́нь.

Го́споди, поми́луй. (Три́жды). Сла́ва, и ны́не: Честне́йшую Херуви́м:

И́менем Госпо́дним Благослови́, О́тче.

Свяще́нник: Бо́же, уще́дри ны, и благослови́ ны, просвети́ лице́ Твое́ на ны, и поми́луй ны.

И моли́тву Свята́го Ефре́ма: Го́споди и Влады́ко живота́ моего́: И покло́ны три. Та́же ма́лых 12, глаго́люще на ки́йждо покло́н: Бо́же, очи́сти мя гре́шнаго. И па́ки моли́тву всю: Го́споди и Влады́ко живота́ моего́: И покло́н един.

Трисвято́е, по О́тче наш.

Свяще́нник: Я́ко Твое́ есть Ца́рство:

Чтец: Ами́нь. Го́споди, поми́луй. (12).

Нескве́рная, Небла́зная, Нетле́нная, Пречи́стая, Чи́стая Де́во, Богоневе́сто Влады́чице, Я́же Бо́га Сло́ва челове́ком, пресла́вным Твои́м рождество́м соедини́вшая, и отри́нувшееся естество́ ро́да на́шего Небе́сным совоку́пльшая, Я́же ненаде́жных Еди́на наде́жда, и бори́мых по́моще: гото́вое заступле́ние к Тебе́ притека́ющих, и всех христиа́н прибе́жище, не гнуша́йся мене́ гре́шнаго, скве́рнаго, скве́рными помыслы, и словесы, и дея́нми, всего́ себе́ непотре́бна сотво́рша, и ра́зумом ле́ности сласте́й жития́ раба́ бы́вша: но я́ко Человеколю́би́ваго Бога Мати, человеколю́бие умилосе́рдися о мне гре́шнем и блу́днем, и приими́ мое́ е́же от скве́рных усте́н приноси́мое Тебе́ моле́ние, и Твоего́ Сы́на, и на́шего Влады́ку и Го́спода Ма́тернее Твое́ дерзнове́ние употребля́ющи моли́, да отве́рзет и мне человеколю́бныя утро́бы Своея́ бла́гости, и презре́в моя́ безчи́сленная прегреше́ния, обрати́т мя к покая́нию, и Свои́х за́поведей де́лателя иску́сна яви́т мя. И предста́ни мне при́сно я́ко Ми́лостивая, и Милосе́рдая, и Благолюби́вая, в настоя́щем у́бо житии́, те́плая Предста́тельнице и Помо́щнице, сопроти́вных наше́ствия отгоня́ющи, и ко спасе́нию наставля́ющи мя, и во вре́мя исхо́да моего́, окая́нную мою́ ду́шу соблюда́юши, и те́мныя зра́ки лука́вых бе́сов дале́че от не́я отгоня́ющи: в Стра́шный же день суда, ве́чныя мя избавляю́щи му́ки, и неизрече́нныя сла́вы Твоего́ Сы́на, и Бо́га на́шего, насле́дника мя показу́ющи, ю́же и да улучу, Владычице моя́ Пресвята́я Богоро́дице, Твои́м ходатайством и заступле́нием, благода́тию и человеколю́бием Единоро́днаго Сы́на Твоего́, Го́спода и Бо́га и Спаса на́шего Иису́са Христа́: Емуже подоба́ет вся́кая сла́ва, честь и поклоне́ние, со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом ны́не, и при́сно, и во ве́ки веко́в. Ами́нь.

И даждь нам, Влады́ко, на сон гряду́щим поко́й те́ла и души́: и сохрани́ нас от мра́чнаго сна грехо́внаго, и от вся́каго те́мнаго и нощна́го сладостра́стия, укроти́ стремле́ния страсте́й, угаси́ разжже́нныя стре́лы лука́ваго, я́же на ны льсти́вно дви́жимыя, пло́ти нашея́ воста́ния утоли́, и вся́кое земно́е и веще́ственное на́ше му́дрование успи́, и да́руй нам, Бо́же, бодр ум, целому́др по́мысл, се́рдце трезвя́щееся, сон лего́к, и вся́каго сатанина́ мечта́ния измене́н, возста́ви же нас во вре́мя моли́твы утвержде́ны в за́поведех Твои́х, и па́мять суде́б Твои́х к себе́ тве́рду иму́ща: всено́щное славосло́вие нам да́руй, во е́же пе́ти и благослови́ти и сла́вити пречестно́е и великоле́пое И́мя Твое́, Отца́, и Сы́на, и Свята́го Ду́ха ны́не, и при́сно, и во ве́ки веко́в. Ами́нь.

Пресла́вная Присноде́во, Ма́ти Христа́ Бо́га, принеси́ на́шу моли́тву Сы́ну Твоему́ и Бо́гу на́шему, да спасе́т Тобо́ю ду́ши на́ша.

Упова́ние мое́ Оте́ц, Прибе́жище мое́ Сын, Покро́в мой Дух Святы́й: Тро́ице Святая, сла́ва Тебе́.

Свяще́нник глаго́лет: Сла́ва Тебе́, Христе́ Бо́же, упова́ние на́ше, сла́ва Тебе́.

Лик: Сла́ва, и ны́не: Го́споди, поми́луй. (Три́жды). Благослови́.

И нам, на зе́млю прикло́ншымся, свяще́нник глаго́лет моли́тву:

Влады́ко Многоми́лостиве, Го́споди Иису́се Христе́, Бо́же наш, моли́твами Всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́: предста́тельствы Честных Небе́сных Си́л безпло́тных: честнаго славнаго проро́ка, Предте́чи и Крести́теля Иоа́нна; святы́х сла́вных и всехва́льных апо́стол; святы́х сла́вных и добропобе́дных му́чеников; преподо́бных и богоно́сных оте́ц на́ших; святы́х и пра́ведных Богооте́ц Иоаки́ма и А́нны и всех Твои́х святы́х, благоприя́тну сотвори́ моли́тву на́шу, да́руй нам оставле́ние прегреше́ний на́ших, покры́й нас кро́вом крилу́ Твое́ю, отжени́ от нас вся́каго врага́ и супоста́та: умири́ на́шу жизнь, Го́споди, поми́луй нас и мир Твой и спаси́ ду́шы на́ша, я́ко Благ и Человеколю́бец.

По моли́тве же, нам воста́вшым, глаго́лет свяще́нник: Благослови́те, отцы́ святи́и, прости́те ми, гре́шному, ели́ка согреши́х сло́вом, де́лом, помышле́нием и все́ми мои́ми чувствы.

И отвеща́ют лю́дие: Бог прости́т ти, О́тче Святы́й.

Свяще́нник же глаго́лет ектению́:

Помо́лимся о Господи́не и Отце́ наше́м Блаже́ннейшем Митрополи́те Ону́фрии и о Господи́не на́шем Преосвяще́ннейшем митрополи́те (и́ли архиепи́скопе, и́ли епи́скопе) (и́мярек).

Лик: Го́споди, по́милуй (на ко́еждо проше́ние).

О Богохрани́мей стране́ на́шей, власте́х и во́инстве ея́.

О ненави́дящих и лю́бящих нас.

О ми́лующих и служа́щих нам.

О запове́давших нам, недосто́йным, моли́тися о них.

О избавле́нии плене́нных.

О отше́дших отце́х и бра́тиях на́ших.

О в мо́ри пла́вающих.

О в не́мощи лежа́щих.

Помо́лимся и о изоби́лии плодо́в земны́х.

И о вся́кой души́ христиа́н правосла́вных.

Ублажи́м правосла́вныя архиере́и и кти́торы Свята́го храма сего́ (святы́я оби́тели сея́).

Роди́тели на́ша и вся пре́жде отше́дшыя отцы и бра́тию на́шу, зде лежа́щыя и повсю́ду, правосла́вныя.

Предстоя́тель: Рцем и о них (ини́и глаго́лют: о себе́ саме́х).

Лик: Го́споди, поми́луй. (Три́жды).

Свяще́нник: Моли́твами святы́х Оте́ц на́ших, Го́споди Иису́се Христе́, Бо́же наш, поми́луй нас.

Лик: Ами́нь.

Коне́ц вели́каго повече́рия.