Неділя третя після Пасхи

На Ма́лей вече́рни.

Стихи́ры воскре́сны, 3. Глас 2:

Пре́жде век от Отца́ ро́ждшемуся: Христо́с Спас наш, е́же на ны́. Со арха́нгелы воспои́м Христо́во Воскресе́ние: И восто́чен  1, глас то́йже: Тебе́ распе́ншагося, и погребе́ннаго: Сла́ва: Почто́ ми́ра со слеза́ми, о учени́цы: [Вся́ сия́ стихи́ры ищи́ на вели́цей вече́рни.]

И ны́не: догма́тик, глас 2:

О преве́лия та́инства! зря́ чудеса́, пропове́дую Божество́: Емману́ил бо естества́ у́бо врата́ отве́рзе я́ко Человеколю́бец: де́вства же заключе́ния не разруши́ я́ко Бог: но си́це от утро́бы про́йде, я́коже слу́хом вни́де: та́ко воплоти́ся, я́коже зача́тся. Безстра́стно вни́де, несказа́нно изы́де, по проро́ку глаго́лющему: сия́ врата́ заключе́на бу́дут, никто́же про́йдет и́ми, то́кмо еди́н Госпо́дь Бог Изра́илев, име́яй ве́лию ми́лость.

Све́те ти́хий: Проки́мен: Госпо́дь воцари́ся:

На стихо́вне стихи́ра воскре́сна,

и Богоро́дицы, глас 2. Подо́бен: Егда́ от Дре́ва:

Стих: Помяну́ и́мя Твое́ во вся́ком ро́де и ро́де.

Всех скорбя́щих ра́досте, и оби́димых предста́тельнице, и убо́гих пита́тельнице, стра́нных же утеше́ние, и же́зле слепы́х, немощны́х посеще́ние, тружда́ющихся покро́ве и засту́пнице, и си́рых помо́щнице, Ма́ти Бо́га Вы́шняго Ты́ еси́ Пречи́стая: потщи́ся, мо́лимся, спасти́ся рабо́м Твои́м.

Стих: Слы́ши дщи́ и ви́ждь, и приклони́ у́хо твое́.

Вся́кое беззако́ние неща́дно, вся́кий грех невозде́ржно окая́нный соде́лах, вся́каго осужде́ния досто́ин е́смь: вины́ покая́ния мне́ пода́ждь Де́во, я́ко да не осужде́н та́мо явлю́ся. Тя́ бо напису́ю моли́твенницу, Тя́ призыва́ю предста́тельницу, да мя́ не посрами́ши Богоневе́стная.

Стих: Лицу́ Твоему́ помо́лятся бога́тии лю́дстии.

Ина́го прибе́жища Чи́стая, к Творцу́ и Влады́це мы́ и́мамы, ра́зве Тебе́ Богоневе́сто, да не отри́неши нас те́плым Твои́м предста́тельством, ниже́ посрами́ши любо́вию притека́ющих под кров Твой, Ма́ти Бо́га на́шего: потщи́ся, и Твою́ по́мощь да́ждь, и ны́нешняго гне́ва нас спаси́.

Сла́ва, и ны́не: глас 2. Мироно́сицы ра́но бы́вшя: [Ищи́ на вели́цей вече́рни.] По трисвято́м тропа́рь: Благообра́зный Ио́сиф. И отпу́ст.

На вели́цей вече́рни.

Христо́с воскре́се: я́ко обы́чно. Та́же псало́м предначина́тельный: Благослови́ душе́ моя́ Го́спода: И кафи́сма 1. псалти́ра.

На Го́споди воззва́х: поста́вим стихо́в 10, и пое́м:

Стихи́ры воскре́сны, 3, глас 2.

Стих: Изведи́ из темни́цы ду́шу мою́, испове́датися и́мени Твоему́.

Пре́жде век от Отца́ ро́ждшемуся Бо́жию Сло́ву, вопло́щшемуся от Де́вы Мари́и, прииди́те поклони́мся: Кре́ст бо претерпе́в, погребе́нию предаде́ся, я́ко Сам восхоте́: и воскре́с из ме́ртвых, спасе́ мя заблужда́ющаго челове́ка.

Стих: Мене́ ждут пра́ведницы, до́ндеже возда́си мне́.

Христо́с Спас наш, е́же на ны́ рукописа́ние пригвозди́в на Кресте́ загла́ди, и сме́ртную держа́ву упраздни́: покланя́емся Его́ тридне́вному Воскресе́нию.

Стих: Из глубины́ воззва́х к Тебе́ Го́споди, Го́споди, услы́ши глас мой.

Со арха́нгелы воспои́м Христо́во Воскресе́ние: Той бо е́сть Изба́витель и Спас душ на́ших, и в сла́ве стра́шней и кре́пцей си́ле, па́ки гряде́т суди́ти ми́ру, его́же созда́.

И восто́чны  4. Глас то́йже.

Стих: Да бу́дут у́ши Твои́, вне́млюще гла́су моле́ния моего́.

Тебе́ распе́ншагося и погребе́ннаго, а́нгел пропове́да Влады́ку, и глаго́лаше жена́м: прииди́те ви́дите, иде́же лежа́ше Госпо́дь: воскре́се бо, я́коже рече́, я́ко всеси́лен. Те́мже Тебе́ покланя́емся еди́ному безсме́ртному: Жизнода́вче Христе́, поми́луй нас.

Стих: А́ще беззако́ния на́зриши Го́споди, Го́споди, кто́ постои́т? я́ко у Тебе́ очище́ние е́сть.

Кресто́м Твои́м упраздни́л еси́, ю́же от дре́ва кля́тву, погребе́нием Твои́м умертви́л еси́ сме́рти держа́ву: воста́нием же Твои́м просвети́л еси́ род челове́ческий. Сего́ ра́ди вопие́м Ти́: благоде́телю Христе́ Бо́же наш, сла́ва Тебе́.

Стих: И́мене ра́ди Твоего́, потерпе́х Тя́ Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Отверзо́шася Тебе́ Го́споди, стра́хом врата́ сме́ртная, вра́тницы же а́довы ви́девше Тя́, убоя́шася: врата́ бо ме́дная сокруши́л еси́, и вереи́ желе́зныя сте́рл еси́, и изве́л еси́ нас от тьмы́ и се́ни сме́ртныя, и у́зы на́шя растерза́л еси́.

Стих: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Спаси́тельную пе́снь пою́ще, от у́ст возсле́м: прииди́те вси́ в дому́ Госпо́днем припаде́м, глаго́люще: на Дре́ве распны́йся, и из ме́ртвых воскресы́й, и сый в не́дрех О́тчих, очи́сти грехи́ на́шя.

Та́же стихи́ры мироно́сицам самогла́сны 3, глас 2. Анато́лиа.

Стих: Я́ко у Го́спода ми́лость, и мно́гое у Него́ избавле́ние и Той изба́вит Изра́иля от всех беззако́ний его́.

Мироно́сицы жены́, у́тру глубоку́, арома́ты взе́мшя, Госпо́дня гро́ба достиго́ша, я́же не наде́яхуся обре́тшя помышля́ху благогове́юще ка́менному отвале́нию, и дру́га ко друзе́й глаго́лаху: где́ су́ть печа́ти гро́ба? где́ е́сть Пила́това кустоди́а, и опа́сное утверже́ние? бы́сть же возвести́тель не разумева́ющым жена́м, блиста́яйся а́нгел, и глаго́ляй к ним: что́ с рыда́нием и́щете жива́го и оживотвори́вшаго род челове́ческий? Воста́ Христо́с Бог наш из ме́ртвых я́ко всеси́лен, подая́й всем нам нетле́ние и жи́знь, просвеще́ние и ве́лию ми́лость.

Стих: Хвали́те Го́спода вси́ язы́цы, похвали́те Его́ вси́ лю́дие.

Почто́ ми́ра со слеза́ми, о учени́цы растворя́ете, ка́мень отвали́ся, гроб истощи́ся: ви́дите тлю́ живото́м попра́нную, печа́ти свиде́тельствующя я́вственно, спя́щыя лю́те стра́жники непокори́вых, сме́ртное спасе́ся пло́тию Бо́жиею, ад рыда́ет. Те́кшя ра́достию рцы́те апо́столом: умертви́вый сме́рть Христо́с, перворожде́н из ме́ртвых, вас предваря́ет в Галиле́и.

Стих: Я́ко утверди́ся ми́лость Его́ на нас: и и́стина Госпо́дня пребыва́ет во век.

Мироно́сицы ра́но бы́вшя, и гроб Твой со тща́нием дости́гшя, иска́ху Тебе́ Христе́, во е́же пома́зати пречи́стое те́ло Твое́. И а́нгеловыми глаго́лы огласи́вшеся, радостотво́рныя о́бразы апо́столом пропове́даху, я́ко воскре́се Нача́льник спасе́ния на́шего, плени́вый сме́рть, ми́рови же да́руяй живо́т ве́чный и ве́лию ми́лость.

Сла́ва: глас 6. Космы́ мона́ха:

Мироно́сицы жены́, гро́ба Твоего́ дости́гшя, и печа́ти гро́бныя ви́девшя, не обре́тшя же пречи́стаго те́ла Твоего́, рыда́ющя со тща́нием приидо́ша, глаго́лющя: кто́ укра́де на́ше упова́ние? кто́ взят ме́ртва на́га сми́рною пома́зана, Ма́тери еди́но утеше́ние? о ка́ко ме́ртвыя оживи́вый умертви́ся? ад плени́вый, ка́ко погребе́ся? Но воскресни́ Спа́се самовла́стно, я́коже ре́кл еси́, тридне́вен, спаса́яй ду́шы на́шя.

И ны́не: богоро́дичен, глас 2:

Пре́йде се́нь зако́нная, благода́ти прише́дши: я́коже бо купина́ не сгара́ше опаля́ема, та́ко Де́во родила́ еси́, и Де́ва пребыла́ еси́. Вме́сто столпа́ о́гненнаго, пра́ведное возсия́ Со́лнце: вме́сто Моисе́а, Христо́с, спасе́ние душ на́ших.

Вход: Све́те ти́хий: Проки́мен: Госпо́дь воцари́ся:

На лити́и стихи́ры самогла́сны, глас 1:

Мироно́сицы жены́, ко гро́бу что́ приидо́сте? что́ и́щете жива́го в ме́ртвых? Воскре́се Госпо́дь, дерза́йте, вопие́т а́нгел.

Со стра́хом приидо́ша жены́ на гроб, арома́ты те́ло Твое́ пома́зати тща́щыяся: и сие́ не обре́тше, недоумева́хуся друга́ ко друзе́й, не ве́дуще Воскресе́ния. Но предста́ им а́нгел, и рече́: воскре́се Христо́с, да́руяй нам ве́лию ми́лость.

Приидо́ша на гроб Магдали́на, и друга́я Мари́а и́щуще Го́спода, и а́нгела ви́деша я́ко мо́лнию седя́ща на ка́мени, и глаго́люща им: что́ и́щете жива́го с ме́ртвыми? воскре́се, я́коже рече́: в Галиле́и Его́ обря́щете. К Нему́ же возопии́м: воскресы́й из ме́ртвых, Го́споди сла́ва Тебе́.

Сла́ва: глас 6:

Проси́ Ио́сиф те́ло Иису́сово, и положи́ е́ в но́вом свое́м гро́бе: подоба́ше бо Ему́ из гро́ба, я́ко от черто́га проити́. Сокруши́вый держа́ву сме́рти, и отве́рзый врата́ ра́йская челове́ком, Го́споди сла́ва Тебе́.

И ны́не: Богоро́дичен. глас то́йже:

Творе́ц и Изба́витель мой Пречи́стая, Христо́с Госпо́дь из Твои́х ложе́сн проше́д, в мя́ оболки́йся, пе́рвыя кля́твы Ада́ма свободи́. Те́мже Ти́ Всечи́стая, я́ко Бо́жии Ма́тери же и Де́ве, вои́стинну вопие́м немо́лчно: ра́дуйся а́нгельски, ра́дуйся Влады́чице, предста́тельство и покро́ве, и спасе́ние душ на́ших.

На стихо́вне стихи́ра воскре́сна, глас 2:

Воскресе́ние Твое́ Христе́ Спа́се, всю́ просвети́ вселе́нную и призва́л еси́ Твое́ созда́ние: всеси́льне Го́споди сла́ва Тебе́.

Та́же стихи́ры па́схи с припе́вы их. [Ли́ст 7 на оборо́те.]

Сла́ва: глас 5:

Тебе́, оде́ющагося све́том я́ко ри́зою, снем Ио́сиф с Дре́ва с Никоди́мом, и ви́дев ме́ртва, на́га, непогребе́на, благосе́рдный пла́чь восприи́м, рыда́я глаго́лаше: увы́ мне́ сладча́йший Иису́се, Его́же вма́ле со́лнце на Кресте́ ви́сима узре́вшее мра́ком облага́шеся, и земля́ стра́хом колеба́шеся, и раздира́шеся церко́вная заве́са: но се́ ны́не ви́жу Тя́, мене́ ра́ди во́лею подъе́мша сме́рть. Ка́ко погребу́ Тя Бо́же мой, или́ како́ю плащани́цею обвию́? ко́има ли рука́ма прикосну́ся нетле́нному Твоему́ те́лу? или́ ки́я пе́сни воспою́ Твоему́ исхо́ду, Ще́дре, велича́ю стра́сти Твоя́, песносло́влю и погребе́ние Твое́ со Воскресе́нием, зовы́й: Го́споди сла́ва Тебе́.

И ны́не: Воскресе́ния де́нь: и Христо́с воскре́се: еди́ножды.

Та́же, Ны́не отпуща́еши: На благослове́нии хле́бов тропа́рь Богоро́дице де́во: три́жды. И обы́чное чте́ние дея́ний.

[зри́] А́ще ли случи́тся не бы́ти бде́нию: пою́тся на Го́споди воззва́х: стихи́ры воскре́сны, 4. и мироно́сиц с лити́йными, на 6. Вход. Проки́мен. На стихо́вне стихи́ры па́схи. Сла́ва, и ны́не: глас 5, Тебе́ оде́ющагося све́том: На полу́нощнице кано́н тро́ичен пое́тся по обы́чаю.

Ве́домо же бу́ди, я́ко от Неде́ли свята́го Фомы́, не быва́ет хлеболомле́ние по благослове́нии хле́бов, за кра́ткость но́щи.

на Бог Госпо́дь: тропа́рь, глас 2.

Егда́ снизше́л еси́ к сме́рти, животе́ безсме́ртный, тогда́ ад умертви́л еси́ блиста́нием Божества́. Егда́ же и уме́ршыя от преиспо́дних воскреси́л еси́, вся́ си́лы небе́сныя взыва́ху: Жизнода́вче Христе́ Бо́же наш, сла́ва Тебе́. [Два́жды.]

Сла́ва:

Благообра́зный Ио́сиф, с Дре́ва снем пречи́стое те́ло Твое́, плащани́цею чи́стою обви́в, и воня́ми во гро́бе но́ве покры́в положи́: но тридне́вен воскре́сл еси́ Го́споди, подая́й ми́рови ве́лию ми́лость.

И ны́не:

Мироно́сицам жена́м, при гро́бе предста́в а́нгел вопия́ше: ми́ра ме́ртвым су́ть прили́чна, Христо́с же истле́ния яви́ся чу́ждь. Но возопи́йте: воскре́се Госпо́дь, подая́й ми́рови ве́лию ми́лость.

По 1-м стихосло́вии седа́льны, глас 2:

Ка́мень гро́бный запеча́тати не возбрани́в, ка́мень ве́ры воскресы́й по́дал еси́ всем: Го́споди сла́ва Тебе́.

Стих: Воскресни́ Го́споди Бо́же мой, да вознесе́тся рука́ Твоя́:

Не́дро пречи́стое в вы́шних не истощи́вый, погребе́ние и Воскресе́ние о всех прия́л еси́: Го́споди сла́ва Тебе́.

Сла́ва, и ны́не: Богоро́дичен.

Вся́ па́че смы́сла, вся́ пресла́вная Твоя́, Богоро́дице, та́инства, чистоте́ запеча́танной, и де́вству храни́му, Ма́ти позна́лася еси́ нело́жна, Бо́га ро́ждши и́стиннаго: Того́ моли́, спасти́ся душа́м на́шым.

По 2-м стихосло́вии седа́льны, глас 2:

Мироно́сицы у́тро прише́дшыя, и гроб то́щь ви́девшыя, апо́столом глаго́лаху: тле́ние низложи́ держа́вный, и су́щыя во а́де исхити́ уз: пропове́дите дерзнове́нием, я́ко воскре́се Христо́с Бог, да́руяй ми́рови ве́лию ми́лость.

Стих: Испове́мся Тебе́ Го́споди, всем се́рдцем мои́м:

Ми́ры погребе́ния Твоего́ жены́ нося́щя, тай ко гро́бу приидо́ша ура́нше, иуде́йския боя́щеся де́рзости, и во́инов предзря́ще утвержде́ние. Но естество́ немощно́е му́жество победи́: я́ко наме́рение ми́лостивное Бо́гу угоди́. Прили́чно у́бо взыва́ху: воскресни́ Го́споди, помози́ нам, и изба́ви нас сла́вы ра́ди и́мене Твоего́.

Сла́ва, и ны́не: богоро́дичен:

Препросла́вленна еси́ Богоро́дице Де́во, пое́м Тя́: Кресто́м бо Сы́на Твоего́ низложи́ся ад и сме́рть умертви́ся: умерщвле́ннии воста́хом и живота́ сподо́бихомся, рай восприя́хом дре́внее наслажде́ние. Тем благодаря́ще славосло́вим, я́ко держа́внаго Христа́ Бо́га на́шего, и еди́наго Многоми́лостиваго.

И чте́ние во ева́нглии толково́м по чи́ну своему́.

По Непоро́чнах тропари́: А́нгельский собо́р:

И а́бие ипакои́. Глас 2:

По стра́сти ше́дше во гроб жены́, во е́же пома́зати те́ло Твое́, Христе́ Бо́же, ви́деша а́нгелы во гро́бе, ужасо́шася: глас бо слы́шаху от них: я́ко воскре́се Госпо́дь, да́руяй ми́рови ве́лию ми́лость.

И чте́ние. И а́бие степе́нны, глас 2, по два́жды.

Антифо́н 1:

На не́бо о́чи пуща́ю моего́ се́рдца, к Тебе́ Спа́се: спаси́ мя́ Твои́м осия́нием.

Поми́луй нас согреша́ющих Тебе́ мно́го на вся́кий час, о Христе́ мой, и да́ждь о́браз пре́жде конца́ пока́ятися Тебе́.

Сла́ва:

Свято́му Ду́ху, е́же ца́рствовати подоба́ет, освяща́ти, подвиза́ти тва́рь: Бог бо е́сть, единосу́щен Отцу́ и Сло́ву.

И ны́не: то́йже.

Антифо́н 2:

А́ще не Госпо́дь бы был в нас, кто́ дово́лен цел сохране́н бы́ти от врага́, ку́пно и человекоуби́йцы?

Зубо́м их не преда́ждь Спа́се, Твоего́ раба́: и́бо льво́вым о́бразом на мя́ подвиза́ются врази́ мои́.

Сла́ва:

Свято́му Ду́ху живонача́лие и че́сть: вся́ бо созда́нная, я́ко Бог сый, си́лою соблюда́ет во Отце́, сы́ном же.

И ны́не: то́йже.

Антифо́н 3:

Наде́ющиися на Го́спода, уподо́бишася горе́ святе́й: и́же ника́коже дви́жутся прило́ги вра́жиими.

В беззако́ния рук свои́х да не про́струт боже́ственне живу́щии: не оставля́ет бо Христо́с жезла́ на жре́бии Свое́м.

Сла́ва:

Святы́м Ду́хом то́чится вся́ка прему́дрость: отсю́ду благода́ть апо́столом, и страда́льчествы венча́ются му́ченицы, и проро́цы зрят.

И ны́не: то́йже.

Проки́мен, глас 2: Воста́ни Го́споди Бо́же мой повеле́нием, и́мже запове́дал еси́, и со́нм люде́й обы́дет Тя́. Стих: Го́споди Бо́же мой, на Тя́ упова́х, спаси́ мя. Вся́кое дыха́ние: Ева́нгелие у́треннее воскре́сное 3, от Ма́рка, зачало 71: Воскре́с Иису́с зау́тра в пе́рвую суббо́ту: та́же: Воскресе́ние Христо́во ви́девше, поклони́мся: три́жды. псало́м 50, и про́чее.

Кано́н Па́схи со ирмосо́м, и с Богоро́дичны его́, на 6. Та́же настоя́щия Неде́ли, Трио́ди кано́н на 8, глас 2: Творе́ние господи́на Андре́а Кри́тскаго. Катава́сиа: Воскресе́ния де́нь:

Кано́н Па́схи. Глас 1.

Пе́снь 1.

Ирмо́с: Воскресе́ния де́нь:

Очи́стим чу́вствия: Небеса́ у́бо досто́йно да веселя́тся:

И́ный кано́н Богоро́дичен, подо́бен. Его́же краестро́чие на пе́рвых тропаре́х: Феофа́нус. Глас то́йже.

Умерщвле́ния преде́л сломи́ла еси́, ве́чную жи́знь ро́ждшая Христа́, из гро́ба возсия́вшаго дне́сь, Де́во Всенепоро́чная, и мир просвети́вшаго.

Воскре́сшаго ви́девши Сы́на Твоего́ и Бо́га, ра́дуйся со апо́столы Богоблагода́тная Чи́стая: и е́же ра́дуйся пе́рвее, я́ко всех ра́дости вина́, восприя́ла еси́, Богома́ти Всенепоро́чная.

И́ный кано́н мироно́сиц, в не́мже поста́вим стихо́в 8.

Пе́снь 1. Глас 2.

Ирмо́с: Моисе́йскую пе́снь восприи́мши, возопи́й душе́: Помо́щник и Покрови́тель бы́сть мне́ во спасе́ние, Сей мой Бог, и просла́влю Его́.

Распя́лся еси́ пло́тию, безстра́стный естество́м О́тчим: прободе́н был еси́ в ре́бра, источи́вый ми́рови кро́вь и во́ду: Ты́ Бог наш, и прославля́ем Тя́.

Кре́ст Твой почита́ю, и погребе́ние сла́влю Бла́же, и пою́, и покланя́юся воста́нию Твоему́, и взыва́ю: Ты́ Бог наш, и прославля́ем Тя́.

А́ще и вкуси́л еси́ же́лчи, сла́досте церко́вная, но источи́л еси́ нам нетле́ние от ре́бр Твои́х: Ты́ Бог наш, и прославля́ем Тя́.

Вмени́лся еси́ Спа́се с ме́ртвыми, ме́ртвыя воздви́гнувый, вкуси́л еси́ тли́: истле́ния бо вся́ко не позна́л еси́: Ты́ Бог наш, и прославля́ем Тя́.

Да весели́тся Сио́н, да ра́дуется и не́бо, воскре́се Христо́с, ме́ртвыя воздви́гнувый, песносло́вящыя: ты́ Бог наш, и прославля́ем Тя́.

Плащани́цами обви́в Ио́сиф те́ло Твое́ Христе́, во гро́бе но́ве положи́ Тя спасе́ние: Ты́ же ме́ртвыя я́ко Бог воскреси́л еси́.

Предвари́вшыя у́тро жены́, ви́деша Христа́, и боже́ственным вопия́ху ученико́м: вои́стинну Христо́с воскре́се, прииди́те с на́ми воспо́йте Его́.

Сла́ва:

Всесвята́я Тро́ице, еди́но Божество́, безнача́льная Еди́нице, О́тче и Сы́не и Боже́ственный Ду́ше, спаса́й мир: Ты́ Бог наш, и прославля́ем Тя́.

И ны́не:

Дре́внюю кля́тву разреши́вши Чи́стая, во утро́бе Твое́й возрасти́ла еси́ нам благослове́ние, Младе́нца роди́вши: Сей бо Бог, а́ще и пло́ть но́сит.

Пе́снь 3.

Ирмо́с: Прииди́те пи́во пие́м но́вое:

Ны́не вся́ испо́лнишася све́та: Вчера́ спогребо́хся Тебе́ Христе́:

Богоро́дичен:

На нетле́нную жи́знь прихожду́ дне́сь бла́гостию Ро́ждшагося из Тебе́ Чи́стая, и всем конце́м свет облиста́вшаго.

Бо́га Его́же родила́ еси́ пло́тию, из ме́ртвых, я́коже рече́, воста́вша ви́девши Чи́стая, лику́й, и Сего́ я́ко Бо́га Пречи́стая возвелича́й.

Ин.

Ирмо́с: Непло́дствовавший мой ум, плодоно́сен Бо́же покажи́ ми́, де́лателю до́брых насади́телю благи́х, благоутро́бием Твои́м.

Дла́ни на Кресте́ просте́рл еси́ Иису́се, язы́ки вся́ от пре́лести собра́в, к позна́нию Твоему́ созва́л еси́ Спа́се.

Иуде́йстии лю́дие Пила́ту вопию́т: отпусти́ нам злоде́йственнаго разбо́йника, возми́, возми́ распни́ Безгре́шнаго.

Распе́ншуся Тебе́ Христе́, помрачи́ся свет, земля́ потрясе́ся, и из гробо́в ме́ртвии воста́ша мно́зи, стра́хом держа́вы Твоея́.

Предстоя́щи Кресту́ А́гница Твоя́ Иису́се, пла́чем вопия́ше: ка́мо и́деши Сы́не? ка́мо гряде́ши А́гнче, за всех закла́выйся?

Покланя́юся Твоему́ Кресту́, воспева́ю и погребе́ние, почита́ю стра́сти, и гво́здия руку́, и копие́ Иису́се, и Воскресе́ние Твое́.

Воскре́сл еси́ Иису́се, плене́н бы́сть враг, Ада́м изба́вися, и Е́ва с ним от уз и тли́, Воскресе́нием Твои́м.

Воскре́сшу Тебе́ Христе́, сокруши́шася вереи́ и врата́ а́дова, и сме́ртныя у́зы разруши́шася, а́бие стра́хом держа́вы Твоея́.

Богоприе́мче Ио́сифе гряди́, ста́ни с на́ми, воскре́се зовы́й, Иису́с Изба́витель, воздви́гнувый Ада́ма благоутро́бием Свои́м.

Да ра́дуется с на́ми ученико́в двоенадеся́тица, с мироно́сицами жена́ми и Ио́сифом, и со други́ми ученики́ и учени́цами Христо́выми.

Сла́ва:

Со Отце́м и Сы́ну и Ду́ху Пра́вому, еди́ному Естеству́ покланя́юся и воспева́ю, Ли́цы разделя́я, и Существо́м соединя́я.

И ны́не: Богоро́дичен:

Блаже́нна еси́ Чи́стая, из ко́рене Иессе́ова су́щая, из него́же же́зл и цвет Христа́, по пло́ти нас ра́ди возрасти́вшая.

Конда́к, глас 8. А́ще и во гроб снизше́л еси́: И и́кос.

И седа́лен глас 2. Подо́бен: Вы́шних ищя́:

Ми́ра те́пле гро́бу прино́сят жены́ Спа́се, а́нгела све́тлостию ду́шы веселя́ху, и Бо́га Тя́ всех пропове́даху, и ученико́м вопия́ху: вои́стинну воскре́се из гро́ба всех Жи́знь.

Сла́ва и ны́не: глас то́йже:

Ученико́в Твои́х лик с мироно́сицами жена́ми ра́дуется согла́сно: о́бщий бо пра́здник с ни́ми пра́зднуют, в сла́ву и че́сть Твоего́ воскресе́ния. И те́ми вопие́м Ти́ Человеколю́бче Го́споди: лю́дем Твои́м пода́ждь ве́лию ми́лость.

Пе́снь 4.

Ирмо́с: На боже́ственней стра́жи:

Му́жеский у́бо пол я́ко разве́рзый: Я́ко единоле́тный а́гнец: Богооте́ц у́бо Дави́д:

Богоро́дичен то́йже:

Созда́вый Ада́ма Твоего́ пра́отца Чи́стая, зи́ждется от Тебе́, и сме́ртное жили́ще разори́ Свое́ю сме́ртию дне́сь, и озари́ вся́ Боже́ственными блиста́ньми Воскресе́ния.

Его́же родила́ еси́ Христа́, прекра́сно из ме́ртвых возсия́вша Чи́стая зря́щи, до́брая и Непоро́чная в жена́х и кра́сная, дне́сь во спасе́ние всех, со апо́столы ра́дующися Того́ прославля́й.

Ин.

Ирмо́с: Е́же от Де́вы Твое́ рождество́ проро́к предзря́, воспропове́даше вопия́: слух Твой услы́шах, и убоя́хся, я́ко от ю́га и из горы́ святы́я приосене́нныя прише́л еси́ Христе́.

Кресто́м плени́л еси́ а́дово чре́во, и совоздви́гл еси́ ме́ртвыя, и сме́рти разруши́л еси́ мучи́тельство: те́мже и́же от Ада́ма покланя́ющиися, пое́м погребе́ние Твое́ и воста́ние Христе́.

Благоволи́вый Спа́се наш, за благоутро́бие ми́лости пригвозди́тися на Кресте́, и от пра́отчия изба́вити ны́ кля́твы, разреши́ у́зы мно́гих мои́х согреше́ний: мо́жеши бо, ели́ка хо́щеши твори́ти.

На Кресте́ пригвозди́вый мою́ дре́внюю кля́тву, и источи́вый мне́ Спа́се, благослове́ние кро́вию от ре́бр Твои́х, разреши́ у́зы мно́гих мои́х согреше́ний: мо́жеши бо, ели́ка хо́щеши, твори́ти.

Ад Спа́се, срет Тя́ в преиспо́дних, огорчи́ся помышля́я, я́ко я́же дре́вле пожре́ти возмоги́й, ны́не нево́лею отда́в, истязу́ется в до́льних, и пленя́емь и обнажа́емь быва́ет ме́ртвых.

А́ще и ка́мень запеча́тася с кустоди́ею, о беззако́ннии врази́, но воскре́се Госпо́дь, я́коже прорече́, разреша́я у́зы мно́гих мои́х согреше́ний: мо́жет бо, ели́ка хо́щет, твори́ти.

Воскресы́й из гро́ба, и плени́вый а́да, и оживи́вый ме́ртвыя, и нетле́ние источи́вший мне́ Твои́м воста́нием, разреши́ у́зы мно́гих мои́х согреше́ний: мо́жеши бо, ели́ка хо́щеши, твори́ти.

Вои́стинну постыди́теся беззако́ннии, Христо́с бо воскре́се, и совоздви́же ме́ртвыя, зовы́й: дерза́йте, аз победи́х мир. Ве́руйте у́бо Ему́, или́ умолчи́те лестцы́, отмета́ющиися Воскресе́ния Его́.

Мироно́сицам, е́же ра́дуйтеся, воскресы́й от гро́ба, возгласи́в Бла́же, и апо́столом пропове́дайте воста́ние Мое́, разреши́ у́зы мно́гих мои́х согреше́ний: мо́жеши бо, ели́ка хо́щеши, твори́ти.

Ио́сифа благообра́знаго, ревни́теля благоче́стия, сове́тника и ученика́, с мироно́сицами почти́м, и апо́столами, зову́ще с ни́ми, и ве́рно воспева́юще Спа́сово Воскресе́ние све́тло.

Сла́ва:

Пресу́щнаго Божества́ неразде́льную сла́ву, кто́ возмо́жет изрещи́? Еди́но бо Естество́м су́щи Тро́ица пое́тся безнача́льная, сра́сленная я́ко Еди́ница, в Тро́ице пева́емая Ипоста́сьми просты́ми.

И ны́не, Богоро́дичен:

Во чре́во Твое́ все́льшагося безму́жно ро́ждшая Ма́ти Де́во Чи́стая, непреста́нно моли́ я́ко Богоро́дица, разреши́ти у́зы мно́гих мои́х согреше́ний: мо́жеши бо, ели́ка хо́щеши помощи́.

Пе́снь 5.

Ирмо́с: у́тренюем у́треннюю глубоку́:

Безме́рное Твое́ благоутро́бие: Присту́пим свещено́снии:

Богоро́дичен:

Просвеща́ется Боже́ственными луча́ми и живоно́сными Воскресе́ния Сы́на Твоего́, Богома́ти Пречи́стая, и ра́дости исполня́ется благочести́вых собра́ние.

Не разве́рзл еси́ врата́ де́вства в воплоще́нии, гро́ба не разруши́л еси́ печа́тей Царю́ созда́ния: отону́дуже воскре́сшаго Тя́ зря́щи Ма́ти, ра́довашеся.

Ин.

Ирмо́с: Мглу́ души́ моея́ Спа́се мой разгна́в све́том за́поведей Твои́х озари́ мя, я́ко еди́н Ца́рь ми́ра.

Ты́ пе́рвую оде́жду мою́, ю́же ми́ истка́, увы́ мне́, се́ятель греха́, совле́кл еси́ Спа́се мой, обле́кся в мя́.

Ли́ствие смоко́вное сши́ мне́ грех мой, увы́ мне́, не сохра́ншему, Спа́се мой, пречи́стую за́поведь Твою́, змии́ным сове́том.

Уязви́вшуюся ду́шу мою́ разбо́йническими помышле́ньми мои́ми, предста́вый и́же от Мари́и, и еле́й возлия́в, исцели́ Христо́с.

У Креста́ предстоя́щи Пречи́стая Богоро́дица, ма́терски взыва́ше: оста́вил Мя́ еси́ еди́ну, о Сы́не Мой и Бо́же!

Ты́ злонача́льнаго зми́я ору́жием Креста́ Твоего́ низложи́в, Твои́м воста́нием, сокруши́л еси́ жа́ло сме́рти Иису́се.

Где́ твое́, сме́рте, жа́ло? где́ твоя́, а́де, побе́да? Ада́м да свопие́т: сокруши́лся еси́ оживле́нием воздви́гшаго ме́ртвыя.

Мироно́сицы жены́ гро́ба Твоего́ дости́гшыя, оживи́вшаго до́льных, глас слы́шаху глаго́лющий: воскре́се Христо́с.

Благочести́вых мироно́сиц па́мять соверша́юще, и всех учени́к Твои́х, в све́тлом Твое́м воста́нии, воспева́ем Тя́ Христе́.

Благообра́знаго вси́ почти́м досто́йно, и́же те́ло Госпо́дне от Дре́ва сня́, и погребе́ ве́рно.

Сла́ва:

Тебе́ Бо́гу и Отцу́, и Сы́ну, и Ду́ху покланя́юся, трем Ипоста́сем, и еди́но три́ ве́рую, Существо́м еди́нем.

И ны́не:

Тя́ безсе́менным Рождество́м роди́вшую па́че естества́ обнови́вшаго естество́, Христа́ еди́наго Влады́ку воспева́ем ве́рнии.

Пе́снь 6.

Ирмо́с: Снизше́л еси́ в преиспо́дняя земли́:

Сохрани́в це́ла зна́мения Христе́: Спа́се мой, живо́е же:

Богоро́дичен:

Возведе́ся дре́вле держи́мое сме́ртию и тле́нием, воплоти́вшимся от Твоего́ пречи́стаго чре́ва, к нетле́нней, и присносу́щней жи́зни, Богоро́дице Де́во.

Сни́де в преиспо́дняя земли́, в ложесна́ Твоя́ Чи́стая сше́дый, и всели́выйся и воплоти́выйся па́че ума́, и воздви́же с Собо́ю Ада́ма, воскре́с от гро́ба.

Ин.

Ирмо́с: Во глубине́ грехо́вней содержи́мь е́смь Спа́се, и в пучи́не жите́йстей обурева́емь: но я́коже Ио́ну от зве́ря, и мене́ от страсте́й возведи́, и спаси́ мя.

Ме́ртв е́сть ад, дерза́йте земноро́днии, Христо́с бо на Дре́ве ви́сяй, ве́рже ору́жие на́нь, и лежи́т ме́ртв: я́же бо имя́ше, плени́ся обнажи́вся.

Плени́ся ад, дерза́йте ме́ртвии, и гро́би отверзо́шася, воста́ните от а́да, вопие́т вам Христо́с, вся́ прише́дый изба́вити от сме́рти и тли́.

Ме́ртвыя я́коже возмо́г поже́рл еси́ иногда́, ны́не истязу́емь а́де, отда́ждь Ми́, вопие́т тебе́ Жизнода́вец и Бог, вся́ прише́дый изба́вити от несы́таго твоего́ чре́ва.

Жены́ мироно́сицы, что́ тщите́ся про́чее? что́ же живо́му ми́ра прино́сите, воскре́се Христо́с, я́коже предрече́. Да преста́нут ва́шя сле́зы, преше́дшыя на ра́дость.

Плащани́цею Тя́ Христе́ обви́в Ио́сиф благообра́зный, во гро́бе положи́: миропома́зав же разоре́нный Твоего́ телесе́ храм, привали́ ка́мень вели́кий ко гро́бу.

Госпо́дь воскре́се плени́вый врага́, и у́зники исто́ргнув, возведе́ вся́, и первозда́ннаго Ада́ма, того́ возставля́я, я́ко Благоутро́бен и Человеколю́бец Бог.

Сла́ва:

Тро́ицу во Еди́нстве воспои́м ве́рнии, с Сы́ном Отца́ сла́вяще, и Ду́ха единосу́щна Сы́ну, и су́ща во Отце́ собезнача́льнаго и присносу́щнаго Бо́га.

И ны́не: Богоро́дичен:

Во чре́ве невозде́ланно зачала́ еси́ Чи́стая, нетле́ния гро́зд, я́ко лоза́: из нея́же безсме́ртия то́ки, я́коже вино́ нам источа́ют ве́чную жи́знь.

Конда́к, глас 2:

Ра́доватися мироно́сицам повеле́л еси́, пла́чь прама́тере Е́вы утоли́л еси́ Воскресе́нием Твои́м Христе́ Бо́же, апо́столом же Твои́м пропове́дати повеле́л еси́: Спас воскре́се от гро́ба.

И́кос:

На гроб Твой Спа́се мироно́сицы иду́щыя, к себе́ недоумева́хуся умо́м, и веща́ху: кто́ нам ка́мень отвали́т гро́бный? И воззре́вшя ви́дят, я́ко ка́мень отвале́н бе́, зра́ку же а́нгелову со одея́нием дивля́хуся: содержи́ми же бя́ху тре́петом, и бежа́ти помышля́ху. и к ним ю́ноша возопи́: не бо́йтеся вы́, Его́же и́щете воста́, прииди́те, ви́дите ме́сто, иде́же лежа́ше те́ло Иису́сово, и ско́ро ше́дшыя возвести́те ученико́м: Спас воскре́се от гро́ба.

Синакса́рь мине́и. Та́же настоя́щий.

Стихи́: Христу́ но́сят учени́цы ми́ра:

Аз же сим пе́снь, я́ко ми́ра ношу́.

В сий де́нь Неде́лю тре́тию по Па́сце, святы́х жен мироно́сиц пра́здник пра́зднуем. Еще́ же и па́мять твори́м и́же от Аримафе́а Ио́сифу, и́же бе́ учени́к сокрове́н от седми́десятих еди́н сый. К сим же и нощна́го ученика́ Никоди́ма, и́же от князе́й ко Христу́ приступи́. Зане́ жены́ у́бо ты́я су́ть, свиде́телие нело́жныя и пе́рвыя Воскресе́ния, Ио́сиф же и Никоди́м погребе́ния: я́же у́бо и и́стиннейшая су́ть и содержительне́йшая, е́же по нам догма́та. А́бие бо Никоди́м у́бо от со́нмища изгна́н бы́сть, не изволя́я иуде́ем сму́дрствовати. Ио́сиф же по е́же погребсти́ Госпо́дне те́ло, в ров от иуде́и вмета́емь быва́ет, и Боже́ственною си́лою отону́ду восхища́ется и во Аримафе́й во свое́ оте́чество отхо́дит. И воскре́с Христо́с, ему́ явля́ется, у́зами содержи́му, и уверя́ет ему́ вя́щше Воскресе́ния та́инство. Мно́га же и от иуде́й стражда́, молча́нию та́инственная дая́ти не стерпе́, но со дерзнове́нием вся́ бы́вшым уча́ше. Глаго́лется у́бо, я́ко и Никоди́м сей пото́нку я́же о стра́сти Христо́ве, и о Воскресе́нии сочине́нием уясни́ пе́рвый всех, я́ко со́нмища сый, и изве́стнее и сове́ты иуде́й и словеса́ и про́ста вся́ ве́дый. И сея́ ра́ди вины́, я́коже реко́хом, я́ко нело́жнии погребе́ния свиде́телие, с ви́девшими жена́ми Воскресе́ние учини́шася. И по пе́рвем Фомине́ увере́нии о́ному предъучине́но бы́сть, я́ко по днех осми́х, глаго́лет, прии́де благове́стие. Жены́ у́бо сия́, пе́рвыя Воскресе́ние ви́деша, и ученико́м сие́ благовести́ша. Подоба́ше бо пе́рвее па́дшему пле́мени под грех, и кля́тву насле́дствовавшему, тому́ пе́рвее и Воскресе́ние ви́дети, и ра́дость внуши́ти, пе́рвее слы́шавшему: в печа́лех роди́ши ча́да. Мироно́сицы же наречены́ бы́ша: зане́ Па́схи настоя́щей пятка́  ра́ди, я́ко вели́к де́нь бя́ше суббо́ты о́ныя, елма́ тща́хуся и погребсти́ те́ло Госпо́дне Ио́сиф и Никоди́м, и́же по иуде́йскому обы́чаю ми́ры Сего́ пома́заша, но не я́коже досто́яше: ало́й бо, и сми́рну вя́щше вложи́вше, и плащани́цею обви́вше, гро́бу преда́ша. Сего́ ра́ди сия́ любо́вь те́пле ко Христу́ иму́щыя, я́ко учени́цы, ми́ра многоце́нныя купи́вшыя, но́щию приидо́ша. Ку́пно у́бо и иуде́йскаго ра́ди стра́ха, ку́пно же я́ко и обы́чай бе́ ра́нее опла́кати и пома́зати то́, и оску́дное за ско́рость вре́мене тогда́ наверши́ти, егда́ прише́дшыя разли́чная явле́ния ви́деша, блиста́ющася же два́ а́нгела вну́трь гро́ба, и на ка́мени седя́ща друга́го: по сих же Христа́ ви́дят, и покланя́ются. Магдали́на же и я́ко огра́дника мня́щи, Того́ о Само́м вопроша́ше. Мно́ги у́бо бы́ша мироно́сицы, по евангели́сти о наро́читых то́чию сотво́рше помина́ние, други́я оста́виша. Бя́ху же сия́: пе́рвая всех Магдали́на Мари́а, из нея́же и де́монов се́дмь Христо́с изгна́, я́же и по Христо́ве вознесе́нии в Рим прише́дши, я́ко сло́вом но́вым, сме́рти Пила́та и архиере́а предае́т, я́же о Спа́се Христе́ Тиве́рию ке́сарю возвести́вши. Последи́ же во Ефе́се умира́ет, и от Богосло́ва Иоа́нна погреба́ется: от Прему́драго же Льва́ в Константи́нь град прино́сится. Втора́я же Сало́ми, я́же е́сть Обру́чника Ио́сифа дщи́, си́це бо и обои́х именова́ху, я́же дщи́ его́, Зеведе́а имя́ше му́жа, от нея́же евангели́ст Иоа́нн и Иа́ков роди́стася. Четы́ри бо сы́ны му́жеска по́лу роди́ Ио́сиф: Иа́кова, глаго́лемаго Ма́лаго, и Иоси́ю, Си́мона, и Иу́ду, и дще́ри три́: Есфи́рь, Фа́марь и Сало́ми Зеведе́ову. Я́коже егда́ слы́шиши во Ева́нглии, Мари́ю Иа́кова Ма́лаго, и Иоси́еву Ма́терь, Богоро́дицу непщу́й бы́ти, я́ко Ма́терь Ио́сифовых чад Богоро́дица вменя́шеся: я́коже приключи́тися отсю́ду, сестри́чищу бы́ти Христо́ву евангели́сту Иоа́нну, я́ко бра́тню сы́ну. Тре́тия же мироно́сиц е́сть Иоа́нна жена́ Хуза́ня, и́же бя́ше назира́тель и строи́тель до́му царя́ И́рода. Четве́ртая же, и пя́тая, Мари́а и Ма́рфа, сестре́ Ла́зареве. Шеста́я Мари́а Клео́пина. Седма́я Соса́нна, и ины́я множа́йшыя бя́ху, я́коже Лука́ боже́ственный повеству́ет: я́же бя́ху, глаго́лет, служа́щыя Христу́, и ученико́м Его́, от име́ний свои́х. Я́ко у́бо ты́я Воскресе́ние пропове́даша, и мно́гия по нам догма́ты сказа́ша, во увере́ние и извеще́ние и́стинное Воскресе́ния Христо́ва. По Фоме́ и сим прия́т пра́здновати Христо́ва Це́рковь, я́ко ви́девшым пе́рвым Христа́ от ме́ртвых воскре́сша, и всем извести́вшым спаси́тельное пропове́дание, и е́же по Христе́ жи́тельство проше́дшым изря́дно, и я́коже досто́яше жена́м науче́нным от Христа́. Святы́х мироно́сиц моли́твами, Бо́же поми́луй нас.

Пе́снь 7.

Ирмо́с: О́троки от пе́щи:

Жены́ с ми́ры: Сме́рти пра́зднуем: Я́ко вои́стинну свяще́нная:

Богоро́дичен:

Умертви́в Сын Твой сме́рть, Всенепоро́чная дне́сь, всем сме́ртным пребыва́ющий живо́т во ве́ки веко́в дарова́, еди́н благослове́нный отце́в Бог и препросла́вленный.

Всем ца́рствуяй созда́нием, быв Челове́к, всели́ся во Твою́ Богоблагода́тная утро́бу, и распя́тие претерпе́в и сме́рть, воскре́се Боголе́пно, совозста́вив нас я́ко всеси́лен.

Ин.

Ирмо́с: Херуви́мы подража́юще о́троцы в пещи́ ликовствова́ху, вопию́ще: благослове́н еси́ Бо́же, я́ко и́стиною и судо́м наве́л еси́ сия́ вся́, грех ра́ди на́ших: препе́тый и препросла́вленный во вся́ ве́ки.

Ты́ я́ко Человеколю́бец, хотя́й вся́ спасти́ от пре́лести, я́же созда́л еси́, претерпе́л еси́ пригвозди́тися на Кресте́: да погребе́нный о́браз страстьми́, сей пло́тию Твое́ю обнови́ши Спа́се, и ад низложи́в, воскреси́л еси́ и уме́ршыя с Собо́ю.

На Кресте́ возвыша́емь, вся́ призва́л еси́ к Себе́ Ще́дре, я́коже обеща́л еси́ Бла́же: я́ко вои́стинну вся́ сия́ грехо́в ра́ди на́ших пострада́ти благоволи́л еси́. Те́мже и разбо́йнику ра́йская врата́ отве́рзл еси́ Спа́се.

Ты́ храм теле́сный воздви́гл еси́ разоре́нный, тридне́вно из гро́ба, я́коже обеща́л еси́ Бла́же: да вои́стинну ска́жеши сла́ву Твою́, ю́же нам источа́еши ве́рою, у́зы разреши́в, и́хже держа́ше дре́вле ад свя́занных.

О иуде́йское безу́мие! о неи́стовство беззако́нных! что́ неве́рное ви́девше, не ве́ровасте Христу́? я́ко немощны́я, не сло́вом ли воздви́же? или́ я́ко ве́сь мир Той не спасе́ ли, да уверя́ют вас поне́ во́ини, или́ воскре́сшие из ме́ртвых.

Омертве́вшии стра́жие ны́не да глаго́лют, ка́ко укра́ден бы́сть, Его́же не ви́деша неразу́мнии всегда́? А́ще бо воскре́сша не ви́деша, ни ощути́ша, ка́ко укра́дена Сего́ разуме́ти можа́ху когда́? Да уве́рит вы́ поне́ ка́мень сей, и погреба́льная Христо́ва.

Что́ я́ко ме́ртва блюде́те? что́ печа́ти на ка́мени положи́сте евре́е, стра́хом боя́щеся краде́ния? Се́ вои́стинну гроб запечатле́ся: ка́ко у́бо воскре́се, а́ще не бы Бог был Христо́с? да уверя́ют вы́ воскре́сшии, и ви́дени бы́вшии мно́гими.

Сла́ва:

Со Отце́м сла́вим Сы́на, и Ду́ха Свята́го, вопию́ще непреста́нным гла́сом: Тро́ице еди́нственное Существо́, поми́луй, спаси́ вся́, в трие́х Ли́цех Еди́нице уще́дри ны́, препросла́вленный Бо́же во ве́ки.

И ны́не, Богоро́дичен:

Во чре́ве Твое́м Пречи́стая, ка́ко вмести́ла еси́ Младе́нца, Его́же трепе́щут си́лы а́нгельския я́ко Бо́га? Ра́зве я́коже восхоте́, я́коже ве́сть всели́ся, вся́ спасти́ хотя́й от Ада́ма земноро́дныя, разреши́вый ада́ма кля́твы о́ныя, сне́дию го́рькою.

Пе́снь 8.

Ирмо́с: Сей нарече́нный:

Прииди́те но́ваго: Возведи́ о́крест о́чи твои́: О́тче вседержи́телю:

Богоро́дичен:

Прии́де Тобо́ю в мир Госпо́дь Де́во Богоро́дице, и чре́во а́дово расто́рг, сме́ртным нам воскресе́ние дарова́: те́мже благослови́м Его́ во ве́ки.

Всю́ низложи́в сме́рти держа́ву Сын Твой Де́во, Свои́м Воскресе́нием, я́ко Бог кре́пкий совознесе́ нас и обожи́: те́мже воспева́ем Его́ во ве́ки.

Ин.

Ирмо́с: В купине́ Моисе́ю Де́вы чу́до, на Сина́йстей горе́, прообрази́вшаго иногда́ по́йте, благослови́те и превозноси́те во вся́ ве́ки.

Со́лнечныя зари́ спря́тахуся стра́хом Христо́вых страда́ний, и востая́ху ме́ртвии, и го́ры прекланя́хуся, и колеба́шеся земля́, и ад обнажа́шеся.

В пещи́ су́щии иногда́ треблаже́ннии о́троцы возвыша́юще ру́ки, прообража́ху Бла́же пречестны́й Кре́ст Твой, и́мже низложи́л еси́ Христе́ вра́жию си́лу.

О иуде́е слепи́и преле́стницы и престу́пницы, Христо́ву Воскресе́нию неве́рующии, я́ко ло́жному: что́ неве́рное ви́дите, я́ко воскре́се Христо́с, ме́ртвыя воздви́гий?

О иуде́е врази́, а́ще и нам не ве́руете, ва́шя во́ины вы́ вопроси́те, что́ пострада́ша они́? кто́ отвали́вый рука́ми ка́мень от гро́ба?

Кто́ изсуши́вый смоко́вницу? кто́ же суху́ю исцели́вый ру́ку? кто́ насы́тивый иногда́ мно́жества в пусты́ни, а́ще не Христо́с Бог, ме́ртвыя воздви́гнувый?

Кто́ просвети́вый слепцы́, и прокаже́нныя очи́стивый, и хромы́я испра́вивый, и пешеше́ствовавый мо́ре немо́кренно я́ко су́шу, а́ще не Христо́с Бог, ме́ртвыя воздви́гнувый?

Кто́ воздви́гнувый ме́ртва четверодне́вна из гро́ба, вдови́ча сы́на? кто́ стягну́вый я́ко Бог разсла́блена на одре́, а́ще не Христо́с Бог, ме́ртвыя воздви́гнувый?

Зове́т ка́мень са́мый, печа́ти вопию́т, я́же вы́ положи́вше, поста́висте стра́жу храня́щую гроб: вои́стинну воскре́се Христо́с, и живе́т во ве́ки.

Вои́стинну воскре́се Христо́с, плене́н бы́сть ад, умертви́ся змий, изба́вися Ада́м, потрясо́шася до́льнии: что́ не ве́руете про́чее, врази́ и престу́пницы?

Благослови́м Отца́, и Сы́на, и Свята́го Ду́ха Го́спода.

Со Отце́м Сы́на, и Ду́ха Свята́го Святу́ю Тро́ицу в Божестве́ еди́ном прославля́ем, вопию́ще: Свят, Cвят, Cвят еси́ во ве́ки.

И ны́не: Богоро́дичен:

Во чре́ве Твое́м Чи́стая, присноживо́тный хлеб, смеше́ный несме́сно, смеше́нием на́шим, родила́ еси́ непрело́жно еди́наго Христа́ Бо́га во двою́ существу́.

Хва́лим, благослови́м, покланя́емся Го́сподеви:

Катава́сиа: Сей нарече́нный и святы́й де́нь:

Честне́йшую: не пое́м до отда́ния Па́схи во вся́ Неде́ли.

Пе́снь 9.

Ирмо́с: Свети́ся, свети́ся но́вый иерусали́ме:

О боже́ственнаго, о любе́знаго! О па́сха ве́лия и свяще́ннейшая!

Богоро́дичен:

Согла́сно Де́во, Тебе́ блажи́м ве́рнии: ра́дуйся две́ре Госпо́дня: ра́дуйся гра́де одушевле́нный: ра́дуйся, Ея́же ра́ди нам ны́не возсия́ свет, из Тебе́ Рожде́ннаго из ме́ртвых Воскресе́ния.

Весели́ся и ра́дуйся боже́ственная две́ре Све́та: заше́дый бо Иису́с во гроб возсия́, просия́в со́лнца светле́е, и ве́рныя вся́ озари́в, Богора́дованная Влады́чице.

Ин.

Ирмо́с: Преесте́ственно пло́тию заче́ншую во чре́ве, от Отца́ безле́тно предвозсия́вшее Сло́во, в пе́снех немо́лчных велича́ем ве́рнии.

И́же на Кресте́ разбо́йника позна́вша Тя́ Бо́га, насле́дника соде́лал еси́ мы́сленному раю́, е́же помяни́ мя вопию́ща, Всеси́льне Спа́се.

Зауше́н нас ра́ди, и оплева́н был еси́ Иису́се от беззако́нников, скрижа́ли зако́на начерта́вый в Сина́и, уго́днику Моисе́ю.

О́цта и же́лчи Спа́се, напое́н был еси́ нас ра́ди, да́вый нам те́ло и честну́ю кро́вь, в сне́дь же и питие́ ве́чныя Твоея́ жи́зни.

В животво́рная ре́бра копие́м прободе́н быв Христе́, пречи́стую Твою́ кро́вь, и честну́ю во́ду источи́л еси́ ми́рови, я́ко присноживо́тный исто́чник.

Вмени́лся еси́ в ме́ртвых, оживле́й ме́ртвыя: во гро́бе положе́н еси́, истощи́вый гро́бы: плени́л еси́ ад, воскреси́в Ада́ма.

Воскре́сл еси́ Иису́се, свя́зан бы́сть враг, плени́ся ад, испраздни́шася гро́би, воста́ша до́льнии, покланя́ющеся Тебе́ Христе́.

Кто́ украды́й ме́ртваго, па́че же и на́га? что́ льстите́ся евре́е? Христо́с воскре́се, и разруша́ются а́довы у́зы и вереи́.

Сла́ва Тебе́ Христе́ Спа́се, источи́вый жи́знь, и свет возсия́вый су́щым во тме́ неве́дения, и всю́ зе́млю просвети́вый воста́нием Твои́м.

Благообра́зный сове́тник Ио́сиф, да пое́тся с мироно́сицами, и боже́ственными ученики́, я́ко пропове́дник сый и сей, воста́ния Христо́ва.

Ио́сифа чу́днаго да восхва́лим ве́рнии, ку́пно с Никоди́мом, и мироно́сицами ве́рными, вопию́щыя: Госпо́дь воскре́се вои́стинну.

Сла́ва:

Безнача́лен еси́ О́тче, несозда́нен еси́ Cы́не, сопресто́лен и Ду́ше Святы́й, еди́но [сия́ три́] Естество́м, и три́ Ли́цы, еди́не Бо́же и́стинный.

И ны́не: Богоро́дичен:

Да весели́тся Иессе́й, да ликовству́ет и Дави́д: се́ бо Де́ва Богора́сленный же́зл прозябе́, цвет присноживо́тный Христа́.

Вме́сто Досто́йно: ирмо́с, катава́сиа: Свети́ся, свети́ся:

Та́же, Свят Госпо́дь Бог наш. На глас 2. Ексапостила́рий Па́сце, Пло́тию усну́в: еди́ножды, ищи́ ли́ст 7.

Сла́ва: мироно́сицам:

Жены́ услы́шите глас ра́дования: мучи́теля а́да попра́вый, от тли́ мир воздви́же, тецы́те, друго́м рцы́те Мои́м благове́стия: хощу́ бо созда́ние Свое́ ра́достию озари́ти, отону́дуже прии́де печа́ль.

И ны́не: то́йже.

На хвали́тех, Вся́кое дыха́ние: поста́вим стихо́в 8. И пое́м стихи́ры воскре́сны 4, глас 2.

Стих: Сотвори́ти в них суд напи́сан: сла́ва сия́ бу́дет всем преподо́бным Его́.

Вся́кое дыха́ние и вся́ тва́рь, Тя́ сла́вит Го́споди, я́ко Кресто́м сме́рть упраздни́л еси́, да пока́жеши лю́дем, е́же из ме́ртвых Твое́ Воскресе́ние, я́ко еди́н Человеколю́бец.

Стих: Хвали́те Бо́га во святы́х Его́, хвали́те Его́ во утверже́нии си́лы Его́.

Да реку́т иуде́е, ка́ко во́ини погуби́ша стрегу́щии Царя́? почто́ бо Ка́мень не сохрани́ ка́мене жи́зни? или́ погребе́ннаго да дадя́т, или́ Воскре́сшему да покло́нятся, глаго́люще с на́ми: сла́ва мно́жеству щедро́т Твои́х, Спа́се наш, сла́ва Тебе́.

Стих: Хвали́те Его́ на си́лах Его́, хвали́те его́ по мно́жеству вели́чествия Его́.

Ра́дуйтеся лю́дие и весели́теся, а́нгел седя́й на ка́мени гро́бнем, той нам благовести́, рек: Христо́с воскре́се из ме́ртвых, спас ми́ра, и испо́лни вся́ческая благоуха́ния: ра́дуйтеся лю́дие и весели́теся.

Стих: Хвали́те Его́ во гла́се тру́бнем: хвали́те Его́ во псалти́ри и гу́слех.

А́нгел у́бо е́же ра́дуйся, пре́жде Твоего́ зача́тия Го́споди, Благода́тней принесе́: а́нгел же ка́мень сла́внаго Твоего́ гро́ба в Твое́ Воскресе́ние отвали́: ов у́бо в печа́ли ме́сто, весе́лия о́бразы возвеща́я: сей же в сме́рти ме́сто, Влады́ку Жизнода́вца пропове́дуя нам, те́мже вопие́м Ти́: Благоде́телю всех, Го́споди сла́ва Тебе́.

Стих: Хвали́те Его́ в тимпа́не и ли́це, хвали́те Его́ во стру́нах и орга́не.

И восто́чны 4:

Возлия́ша ми́ра со слеза́ми на гроб Твой жены́, и испо́лнишася ра́дости уста́ их, внегда́ глаго́лати: воскре́се Госпо́дь.

Стих: Хвали́те его́ в кимва́лех доброгла́сных:

Да похва́лят язы́цы и лю́дие Христа́ Бо́га на́шего, во́лею нас ра́ди Кре́ст претерпе́вшаго, и во а́де тридне́вновавшаго, и да покло́нятся Его́ из ме́ртвых Воскресе́нию, и́мже просвети́шася всего́ ми́ра концы́.

Стих: Воскресни́ Го́споди Бо́же мой, да вознесе́тся рука́ Твоя́:

Ра́спят и погребе́н был еси́ Христе́, я́коже изво́лил еси́, испрове́ргл еси́ сме́рть, и воскре́сл еси́ во сла́ве, я́ко Бог и Влады́ка, да́руя ми́рови жи́знь ве́чную, и ве́лию ми́лость.

Стих: Испове́мся Тебе́ Го́споди всем се́рдцем мои́м:

[Сия́ же запе́вы по вся́ воскресе́ния.]

О вои́стинну беззако́ннии печа́тавшии ка́мень, бо́льших нас чуде́с сподо́бисте! И́мут ра́зум стра́жие, дне́сь про́йде из гро́ба, и глаго́лаху: рцы́те, я́ко нам спя́щым, приидо́ша ученицы́, и украдо́ша Его́. И кто́ кра́дет мертвеца́, па́че же и на́га? Сам воскре́се самовла́стно я́ко Бог, оста́вль во гро́бе и погреба́тельная Своя́. Прииди́те ви́дите иуде́е, ка́ко не расто́рже печа́ти сме́рть попра́вый, и ро́ду челове́ческому безконе́чную жи́знь да́руяй, и ве́лию ми́лость.

Сла́ва: глас 2. Стихи́ра ева́нгльская:

С ми́ры прише́дшым я́же с Мари́ею жена́м, и недоумева́ющымся, ка́ко бу́дет им улучи́ти жела́ние, яви́ся ка́мень взя́тый, и боже́ственный ю́ноша утоля́яй мяте́ж душ их: воста́ бо, глаго́лет, Иису́с Госпо́дь. Те́мже пропове́дите пропове́дником Его́ ученико́м, в Галиле́ю тещи́, и ви́дети Его́ воскре́сша из ме́ртвых, я́ко Жизнода́вца и Го́спода.

И ны́не: Преблагослове́нна еси́ Богоро́дице Де́во: Славосло́вие вели́кое. Тропа́рь воскре́сен. Ектении́, и отпу́ст. И обы́чное исхожде́ние в притво́р. И поуче́ние студи́тово. И час 1-й. И соверше́нный отпу́ст. На часе́х тропа́рь воскре́сен. Сла́ва: Благообра́зный Ио́сиф: И ны́не: богоро́дичен часо́в. По трисвято́м конда́к: Ра́доватися мироно́сицам: Та́кожде быва́ет и на про́чих часе́х.

На литурги́и блаже́нна гла́са, на 4, глас 2:

Помяни́ Благоутро́бне и нас, я́коже помяну́л еси́ разбо́йника во Ца́рствии Небе́снем.

Дре́во изгна́ Ада́ма, Кре́ст введе́ разбо́йника в Ца́рство Небе́сное.

Гроб подъя́т Тя́ Спа́се, гро́бы истощи́вшаго, и ме́ртвым живо́т дарова́вшаго, я́ко Бо́га.

Апо́столи сла́внии Христо́вы, Того́ моли́те приле́жно, да от бед спасе́т ны́.

И от кано́на дне́, пе́снь 6, на 4.

По вхо́де тропа́рь: Егда́ снизше́л еси́ к сме́рти: и Благообра́зный Ио́сиф: Сла́ва: конда́к трио́ди: И ны́не: Па́схи: А́ще и во гроб: Проки́мен, глас 6: Спаси́ Го́споди лю́ди Твоя́, и благослови́ достоя́ние Твое́. Стих: К тебе́ Го́споди воззову́, Бо́же мой, да не премолчи́ши от мене́. Апо́стол дея́ний, зача́ло 16: Умно́жившымся ученико́м: Аллилу́иа, глас 8: Благоволи́л еси́ Го́споди зе́млю Твою́, возврати́л еси́ плен Иа́ковль. Стих: Ми́лость и и́стина срето́стеся, пра́вда и мир облобыза́стася. Ева́нглие от Ма́рка, зача́ло 69: Прии́де Ио́сиф. Прича́стный: Те́ло Христо́во приими́те: Други́й: Хвали́те Го́спода с небе́с:

[зри́] А́ще храм святы́х жен мироно́сиц, на Ма́лей и Вели́цей вече́рни, и на У́трени, и на Литурги́и, пое́м во всем подо́бне, я́коже великому́ченику Гео́ргию. То́чию на Вече́рни паремии́ чтем, пи́саны в Неде́лю всех святы́х.

На У́трени по полиеле́и велича́ние пое́м си́це:

Велича́ем вас святы́я мироно́сицы, и чтем святу́ю па́мять ва́шу: вы́ бо моли́те о нас Христа́ Бо́га на́шего.

Псало́м: Блаже́н муж боя́йся Го́спода: и про́чая.