После́дование свята́го еле́а пева́емое от седми́ свяще́нников, собра́вшихся в це́ркви или́ в дому́. Поставля́ется столе́ц, на не́мже блю́до со пшени́цею, и верху́ пшени́цы канди́ло пра́здное. о́крест же пшени́цы водружа́ют во пшени́цу се́дмь струче́ц обви́тых бума́гою к пома́занию, и свято́е Ева́нгелие: и даю́тся свяще́нником все́м свещы́. Ста́вше же о́крест стола́, облече́ни вси́ в фело́ни: взе́млет пе́рвый свяще́нников кади́льницу с фимиа́мом, и кади́т о́крест стола́ еле́й на не́м су́щий, и всю́ це́рковь, или́ до́м, и лю́ди: и ста́в пред столо́м, зря́ к восто́ком, начина́ет:

Благослове́н Бо́г на́ш: И трисвято́е. Пресвята́я Тро́ице: О́тче на́ш: Я́ко Твое́ е́сть Ца́рство: Го́споди поми́луй, 12.

Прииди́те поклони́мся: три́жды.

И псало́м 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя́ в пра́вде Твое́й. И не вни́ди в су́д с рабо́м Твои́м, я́ко не оправди́тся пред Тобо́ю вся́к живы́й. Я́ко погна́ вра́г ду́шу мою́, смири́л е́сть в зе́млю живо́т мо́й: посади́л мя́ е́сть в те́мных, я́ко ме́ртвыя ве́ка. И уны́ во мне́ ду́х мо́й, во мне́ смяте́ся се́рдце мое́. Помяну́х дни́ дре́вния: поучи́хся во все́х де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́ я́ко земля́ безво́дная Тебе́. Ско́ро услы́ши мя́ Го́споди, исчезе́ ду́х мо́й: не отврати́ лица́ Твоего́ от Мене́, и уподо́блюся низходя́щым в ро́в. Слы́шану сотвори́ мне́ зау́тра ми́лость Твою́, я́ко на Тя́ упова́х: скажи́ мне́ Го́споди пу́ть, во́ньже пойду́, я́ко к Тебе́ взя́х ду́шу мою́. Изми́ мя от вра́г мои́х Го́споди, к Тебе́ прибего́х. Научи́ мя твори́ти во́лю Твою́, я́ко Ты́ еси́ Бо́г мо́й: ду́х Тво́й благи́й наста́вит мя́ на зе́млю пра́ву. И́мене Твоего́ ра́ди, Го́споди, живи́ши мя́: пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́, и погуби́ши вся́ стужа́ющыя души́ мое́й: я́ко а́з ра́б Тво́й е́смь.

Сла́ва, и ны́не: Аллилу́иа, три́жды.

Диа́кон же ектению́:

Па́ки и па́ки ми́ром Го́споду помо́лимся.

Заступи́, спаси́, поми́луй:

Пресвяту́ю, Пречи́стую, Преблагослове́нную:

Свяще́нник: Я́ко подоба́ет Тебе́:

Ли́к: Ами́нь.

А́бие же пою́т, Аллилу́иа, на гла́с 6.

Сти́х 1: Го́споди, да не я́ростию Твое́ю обличи́ши мене́, ниже́ гне́вом твои́м нака́жеши мене́.

Сти́х 2: Поми́луй мя́ Го́споди, я́ко не́мощен е́смь.

Та́же тропари́:

Поми́луй на́с Го́споди, поми́луй на́с, вся́каго бо отве́та недоуме́юще, сию́ ти моли́тву я́ко Влады́це гре́шнии прино́сим: поми́луй на́с.

Сла́ва: Го́споди поми́луй на́с, на Тя́ бо упова́хом, не прогне́вайся на ны́ зело́, ниже́ помяни́ беззако́ний на́ших: но при́зри и ны́не я́ко благоутро́бен, и изба́ви ны́ от враго́в на́ших. Ты́ бо еси́ Бо́г на́ш, и мы́ лю́дие Твои́, вси́ дела́ руку́ Твое́ю, и и́мя Твое́ призыва́ем.

И ны́не: Милосе́рдия две́ри отве́рзи на́м благослове́нная Богоро́дице, наде́ющиися на Тя́ да не поги́бнем, но да изба́вимся Тобо́ю от бе́д: Ты́ бо еси́ спасе́ние ро́да Христиа́нскаго.

Посе́м Псало́м 50: Поми́луй мя́ Бо́же:

И кано́н, его́же краестро́чие: Моли́тва еле́а, пе́ние Арсе́ниево. Гла́с 4:

Пе́снь 1.

Ирмо́с: Мо́ря чермну́ю пучи́ну, невла́жными стопа́ми, дре́вний пешеше́ствовав изра́иль, крестообра́зныма моисе́овыма рука́ма, амали́кову си́лу в пусты́ни победи́л е́сть.

Еле́ем благоутро́бия Влады́ко, утеша́яй при́сно ду́шы, ку́пно и телеса́ челове́ческая, и храня́й еле́ем ве́рныя: Са́м и ны́не уще́дри еле́ем приступа́ющыя к Тебе́.

Твоея́ ми́лости Влады́ко, полна́ е́сть вся́ земля́: те́мже еле́ем Боже́ственным Твои́м честны́м помазу́еми дне́сь, е́же па́че ума́ Твое́й ми́лости, ве́рно про́сим Тя́, пода́тися на́м.

Сла́ва: Пома́зание свяще́нное Твое́ человеколю́бче, апо́столом Твои́м на немощству́ющыя рабы́ Твоя́ соверша́ти ми́лостивно запове́давый: те́х мольба́ми вся́ печа́тию Твое́ю поми́луй.

И ны́не: Еди́на ми́ра пучи́ну Чи́стая ро́ждшая, я́же к Бо́гу моли́твами Твои́ми при́сно, неду́гов и скорбе́й Твоего́ раба́ изба́ви, я́ко да непреста́нно возвели́чит Тя́.

Пе́снь 3.

Ирмо́с: Весели́тся о тебе́ це́рковь Твоя́ Христе́, зову́щи: Ты́ моя́ кре́пость Го́споди, и прибе́жище и утвержде́ние.

Ты́ еди́н сы́й ди́вный в челове́цех ве́рных, ми́лостивый, боля́щему лю́те, да́ждь Христе́ благода́ть Твою́ свы́ше.

Еле́йный суче́ц иногда́, ко умале́нию пото́па, Боже́ственным Твои́м показа́вый манове́нием Го́споди, спаси́ ми́лостию стра́ждущаго.

Сла́ва: Свеще́ю Боже́ственнаго све́та, в ми́лости Твое́й Христе́ просвети́ пома́занием, и ны́не ве́рою к ми́лости Твое́й тща́щагося.

И ны́не: При́зри благоприя́тно Ма́ти все́х Творца́ свы́ше, и го́рькое озлобле́ние разреши́ неду́гующаго, моли́твами Твои́ми.

Седа́лен, гла́с 8.

Подо́бен: Па́стырская свире́ль:

Я́ко Боже́ственная река́ ми́лости сы́й, я́ко бе́здна мно́гаго милосе́рдия Ще́дре, покажи́ Твоея́ ми́лости Боже́ственныя струи́, и все́х исцели́: источи́ чуде́с исто́чники незави́стно, и омы́й все́х: к Тебе́ бо при́сно притека́юще, те́пле благода́ть испроша́ем.

Други́й, гла́с 4. Подо́бен: Вознесы́йся:

Врачу́ и Помо́щниче су́щих в боле́знех, Изба́вителю же и Спа́се су́щих в неду́зех: са́м все́х Влады́ко и Го́споди, да́руй исцеле́ние неду́гующему рабу́ Твоему́, уще́дри, поми́луй многопрегреши́вшаго, и прегреше́ний изба́ви Христе́, я́ко да сла́вит Боже́ственную си́лу Твою́.

Пе́снь 4.

Ирмо́с: Вознесе́на Тя́ ви́девши це́рковь на кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й Го́споди.

Я́ко нетле́нное ми́ро Спа́се сы́й, истощи́вшееся Твое́ю благода́тию, и ми́р очища́ющее, уще́дри и поми́луй Боже́ственне, ве́рою стру́пы теле́сныя помазу́ющаго.

Ти́хостию печа́ти Твоея́ ми́лости, ны́не чу́вствия Влады́ко зна́менав Твои́х рабо́в, непреходи́мь, непристу́пен вхо́д сотвори́ все́м сопроти́вным си́лам.

Сла́ва: Призыва́ти повелева́яй немощству́ющым священнодействи́тели Боже́ственныя Твоя́, и си́х моли́твою и пома́занием еле́а Твоего́ человеколю́бче спаса́тися, спаси́ Твое́ю ми́лостию стра́ждущаго.

И ны́не: Богоро́дице Присноде́во пресвята́я, покро́ве кре́пкий и храни́тельнице, приста́нище же и стено́, ле́ствице и предгра́дие, поми́луй, уще́дри боля́щаго, к Тебе́ бо и еди́ной прибеже́.

Пе́снь 5.

Ирмо́с: Ты́, Го́споди мо́й, све́т в ми́р прише́л еси́, све́т святы́й, обраща́яй из мра́чна неве́дения, ве́рою воспева́ющыя Тя́.

Сы́й Бла́же, ми́лости бе́здна, поми́луй ми́лостиве Твое́ю Боже́ственною ми́лостию стра́ждущаго, я́ко благоутро́бен.

Ду́шы на́шя Христе́ и телеса́, свы́ше печа́ти Твоея́ Боже́ственным воображе́нием освяти́в несказа́нно, руко́ю Твое́ю все́х исцели́.

Сла́ва: Неизрече́нною Твое́ю любо́вию преблаги́й Го́споди, прии́мый блудни́цею су́щее от ми́ра пома́зание, уще́дри раба́ Твоего́.

И ны́не: Всепе́тая, Чи́стая, преБлага́я Влады́чице, поми́луй Боже́ственным помазу́ющихся еле́ем, и спаси́ раба́ Твоего́.

Пе́снь 6.

Ирмо́с: Пожру́ ти́ со гла́сом хвале́ния Го́споди, це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Словесы́ Твои́ми, еле́ем показа́вый человеколю́бче, в царе́х пома́зание, и архиере́и сие́ соверши́вый: печа́тию Твое́ю и стра́ждущаго спаси́, я́ко благоутро́бен.

Приобще́ние да не от го́рьких бесо́в прико́снется, пома́занием Боже́ственным зна́менаному Спа́се чу́вствы: но покро́вом обстени́ сего́ сла́вы Твоея́.

Сла́ва: Пода́ждь ру́ку Твою́ с высоты́ человеколю́бче, и Тво́й еле́й Спа́се освяти́в, пода́ждь рабу́ Твоему́ на здра́вие, и неду́гов все́х на избавле́ние.

И ны́не: Яви́лася еси́ в Боже́ственном Твое́м хра́ме плодови́тая, Ма́ти Творца́, ма́слина, е́юже испо́лнен яви́ся ми́р ми́лости: те́мже спаса́й моли́твами осяза́ния Твоего́ стра́ждущаго.

Конда́к, гла́с 2.

Подо́бен: Вы́шних ищя́.

Ми́лости исто́чник сы́й преблаги́й, ве́рою те́плою к ми́лости неизрече́нной Твое́й припа́дающыя благоутро́бне, от вся́каго изба́ви озлобле́ния, и те́х неду́ги взе́м, пода́ждь Боже́ственную благода́ть свы́ше.

Пе́снь 7.

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́ Го́споди.

Ты́ в ми́лости и щедро́тах Твои́х Спа́се, еди́не Бо́же, все́х исцеля́яй, стра́сти же душе́вныя, и теле́сная сокруше́ния, и сего́ в неду́зех стра́ждущаго, Са́м исцеля́я уврачу́й.

Внегда́ пома́затися еле́ем пома́зания все́х глава́м, пода́ждь сему́ весе́лия ра́дость, ми́лость и́щущему Твоего́ избавле́ния Христе́, бога́тою Твое́ю ми́лостию да́руй Го́споди.

Сла́ва: Ме́чь е́сть над де́моны, Спа́се, Твоя́ печа́ть: о́гнь же попаля́яй стра́сти душе́вныя, свяще́нников мольбы́. те́мже ве́рно пое́м Тя́ прие́млющии исцеле́ние.

И ны́не: Ты́ держа́щаго го́рстию вся́, Ма́ти Бо́жия, вну́трь во чре́ве прии́мши, боголе́пно, и неизрече́нно воплоти́вши, о стра́ждущем уми́лостивити Сего́ про́сим.

Пе́снь 8.

Ирмо́с: Ру́це распросте́р дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся́ дела́ Госпо́дня Го́спода.

Вся́ поми́луй Спа́се, по вели́цей Твое́й и Боже́ственней ми́лости: сего́ ра́ди собра́хомся вси́, та́йно вообразу́юще щедро́т Твои́х приклоне́ние, пома́зание принося́ще еле́ем, ве́рою Твоему́ рабу́, его́же и посети́.

Струя́ми ми́лости Твоея́ Христе́ и пома́зании свяще́нников Твои́х, омы́й я́ко благоутро́бен Го́споди, боле́зни и озлобле́ние, и боле́зней наше́ствия, в ну́ждах страсте́й му́чимаго, я́ко да сла́вит Тя́ спа́сся благода́рственно.

Сла́ва: Зна́мение е́же свы́ше приклоне́ния и ти́хости, ми́лость Боже́ственную на́м припису́ющым Влады́ко, не удали́ Твоея́ ми́лости, ниже́ пре́зри ве́рою при́сно зову́щаго: благослови́те вся́ дела́ Госпо́дня Го́спода.

И ны́не: Пресла́вное я́ко вене́ц Чи́стая, естество́ прия́т, Боже́ственное Твое́ рождество́, враго́в сокруша́ющее ополче́ния, и побежда́ющее держа́вно те́х: сего́ ра́ди благода́тей Твои́х ра́достными венча́еми светлостьми́, Тебе́ воспева́ем препе́тая Влады́чице.

Пе́снь 9.

Ирмо́с: Ка́мень нерукосе́чный от несеко́мыя горы́ Тебе́ Де́во, краеуго́льный отсече́ся, Христо́с, совокупи́вый разстоя́щаяся естества́. те́м веселя́щеся, Тя́ Богоро́дице велича́ем.

При́зри с небесе́ Ще́дре, покажи́ Твою́ ми́лость все́м, да́ждь ны́не заступле́ние Твое́, и кре́пость Твою́ приступа́ющему к Тебе́, Боже́ственным пома́занием свяще́нников Твои́х, человеколю́бче.

Ви́дехом преблаги́й Спа́се, ра́дующеся Боже́ственный еле́й приклоне́нием Твои́м Боже́ственным па́че прича́стников, его́же прия́л еси́, и изъобрази́тельно препо́дал еси́, ба́ни Боже́ственныя причаща́ющымся.

Сла́ва: Уще́дри, поми́луй Спа́се, изба́ви от лю́тых, и боле́зней: изба́ви от стре́л лука́ваго Твои́х рабо́в ду́шы и телеса́, я́ко ми́лостивый Госпо́дь, пома́занием Боже́ственным исцелева́яй.

И ны́не: Пе́ния и мольбы́ Де́во прие́млющи Твои́х рабо́в, изба́ви лю́тых страсте́й и боле́зней, моли́твами Твои́ми, на́ми Пречи́стая Боже́ственному Твоему́ кро́ву притека́ющаго.

Досто́йно е́сть:

Ексапостила́рий.

Подо́бен: Посети́л ны́ е́сть:

В ми́лости Бла́же, при́зри Твои́м о́ком на моле́ние на́с, сше́дшихся в хра́м Тво́й святы́й дне́сь, пома́зати Боже́ственным еле́ем неду́гующаго раба́ Твоего́.

Та́же стихи́ры, гла́с 4.

Подо́бен: Да́л еси́ зна́мение:

Да́л еси́ благода́ть Твою́, Твои́ми благопремени́телю апо́столы человеколю́бче, еле́ем святы́м Твои́м цели́ти все́х я́звы же и неду́ги: те́мже к еле́ю Твоему́ ве́рно приступа́ющаго, и ны́не я́ко благоутро́бен освяти́, поми́луй, от вся́каго неду́га очи́сти, и пи́щи нетле́нныя Твоея́ сподо́би, Го́споди.

При́зри непостижи́ме с небесе́, я́ко благоутро́бен, руко́ю неви́димою Твое́ю зна́менав человеколю́бче на́ша чу́вства, еле́ем Твои́м Боже́ственным, притека́ющему к Тебе́ ве́рно, и прося́щему прегреше́ний оставле́ние да́руй, и исцеле́ние души́ и те́лу, да любо́вию просла́вит Тя́, велича́я держа́ву Твою́.

Пома́занием еле́а Твоего́, и свяще́нников человеколю́бче осяза́нием, раба́ Твоего́ освяти́ свы́ше, неду́гов свободи́, душе́вныя же скве́рны очи́сти, омы́й Спа́се, и многоплете́нных собла́знов изба́ви: боле́зни утиши́, обстоя́ние отжени́ и ско́рби потреби́, я́ко ще́др и благоутро́бен.

Сла́ва, и ны́не, богоро́дичен: Тебе́ чисте́йшую Царе́ву пала́ту молю́ многопе́тая, у́м мо́й очи́сти оскверне́нный вся́кими греха́ми, и жили́ще кра́сное Пребоже́ственныя Тро́ицы сотвори́, я́ко да си́лу Твою́ и безме́рную ми́лость велича́ю спаса́емый, непотре́бный ра́б Тво́й.

Та́же, Трисвято́е. Пресвята́я Тро́ице: По О́тче на́ш: Я́ко Твое́ е́сть Ца́рство:

Та́же тропа́рь, гла́с 4: Ско́рый в заступле́нии еди́н сы́й Христе́, ско́рое свы́ше покажи́ посеще́ние стра́ждущему рабу́ Твоему́, изба́ви неду́гов, и го́рьких боле́зней: воздви́гни во е́же пе́ти Тя́ и сла́вити непреста́нно, моли́твами Богоро́дицы, еди́не человеколю́бче.

По си́х же диа́кон, или́ пе́рвый от свяще́нников, ектению́ сию́:

Ми́ром Го́споду помо́лимся:

О свы́шнем ми́ре:

О ми́ре всего́ ми́ра:

О святе́м хра́ме се́м, и с ве́рою:

О е́же благослови́тися еле́ю сему́ си́лою и де́йством и наи́тием Свята́го Ду́ха, Го́споду помо́лимся.

О рабе́ Бо́жии, и́мярек, и о е́же в Бо́зе посеще́нии его́, и е́же приити́ на него́ благода́ти Свята́го Ду́ха, Го́споду помо́лимся.

О е́же изба́витися ему́ и на́м от вся́кия ско́рби, гне́ва и ну́жды:

Заступи́, спаси́, поми́луй, и сохрани́ его́ и на́с Бо́же:

Пресвяту́ю, Пречи́стую:

[зри́] Та́же глаго́лет пе́рвый от свяще́нников моли́тву еле́а над канди́лом. Ве́домо бу́ди, я́ко в вели́цей це́ркви, вме́сто воды́, вино́ в канди́ло молитвома́слия влага́ют.

Го́споду помо́лимся. Го́споди поми́луй.

Го́споди, ми́лостию и щедро́тами Твои́ми исцеля́яй сокруше́ния ду́ш и теле́с на́ших: Са́м Влады́ко, освяти́ еле́й се́й, я́коже бы́ти помазу́ющымся от него́ во исцеле́ние: и в премене́ние вся́кия стра́сти, скве́рны пло́ти и ду́ха, и вся́каго зла́: да и в се́м просла́вится Твое́ Пресвято́е И́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Свяще́нницы же про́чии ти́хо ку́пно с ни́м чту́т моли́тву ту́южде.

Во ели́ко же глаго́лется моли́тва от свяще́нников, пою́тся тропари́ сия́.

Гла́с 4: Ско́рый в заступле́нии еди́н сы́й Христе́, ско́рое свы́ше покажи́ посеще́ние стра́ждущему рабу́ Твоему́: изба́ви неду́гов, и го́рьких боле́зней: воздви́гни во е́же пе́ти Тя́ и сла́вити непреста́нно, моли́твами Богоро́дицы, еди́не человеколю́бче.

Душе́вныма очи́ма ослепле́н, к Тебе́ Христе́ прихожду́, я́коже слепы́й от рожде́ния, в покая́нии зову́ тебе́: ми́лостив на́м бу́ди, еди́не благопремени́телю.

Гла́с 3: Ду́шу мою́ Го́споди во гресе́х вся́ческих, и безме́стными дея́ньми лю́те разсла́бленную, воздви́гни Боже́ственным Твои́м предста́тельством, я́коже и разсла́бленнаго воздви́гл еси́ дре́вле, да зову́ Ти спаса́емь: ще́дрый, да́ждь ми́ Христе́ исцеле́ние.

Гла́с 2: Я́ко Госпо́день ученик восприя́л еси́ пра́ведне Ева́нгелие: я́ко му́ченик и́маши е́же неопи́санное: дерзнове́ние, я́ко бра́т Бо́жий: е́же моли́тися, я́ко иера́рх. моли́ Христа́ Бо́га, спасти́ся душа́м на́шым.

Гла́с 4: О́тчее единоро́дное Бо́г Сло́во, прише́дшее к на́м в после́дния дни́, Иа́кове Боже́ственне, пе́рваго тя́ показа́ иерусали́мляном па́стыря и учи́теля, и ве́рнаго строи́теля та́инств духо́вных: те́мже тя́ вси́ чти́м, апо́столе.

Гла́с 3: В ми́рех свя́те, священноде́йствитель показа́лся еси́: Христо́во бо преподо́бне ева́нгелие испо́лнив, положи́л еси́ ду́шу твою́ о лю́дех твои́х, и спа́сл еси́ непови́нныя от сме́рти: сего́ ра́ди освяти́лся еси́, я́ко вели́кий таи́нник Бо́жия благода́ти.

Гла́с то́йже: Вели́ка обре́те в беда́х тя́ побо́рника вселе́нная, страстоте́рпче, язы́ки побежда́юща: я́коже у́бо ли́еву низложи́л еси́ горды́ню, и на по́двиг дерзнове́нна сотвори́в не́стора: та́ко свя́те дими́трие, Христу́ Бо́гу моли́ся, дарова́ти на́м ве́лию ми́лость.

Гла́с то́йже: Страстоте́рпче святы́й, и целе́бниче пантелеи́моне. моли́ ми́лостиваго Бо́га, да прегреше́ний оставле́ние пода́ст душа́м на́шым.

Гла́с 8: Святи́и безсре́бренницы и чудотво́рцы, посети́те не́мощи на́шя: ту́не прия́сте, ту́не дади́те на́м.

Гла́с 2: Вели́чия твоя́ де́вственниче, кто́ пове́сть? то́чиши бо чудеса́, и излива́еши исцеле́ния, и мо́лишися о душа́х на́ших, я́ко богосло́в и дру́г Христо́в.

Богоро́дичен: Моле́ние те́плое и стена́ необори́мая, ми́лости исто́чниче, ми́рови прибе́жище, приле́жно вопие́м Ти́: Богоро́дице Влады́чице предвари́, и от бе́д изба́ви ны́, еди́на вско́ре предста́тельствующая.

Диа́кон: Во́нмем.

Свяще́нник пе́рвый: Ми́р все́м.

Ли́к: И ду́хови твоему́.

Диа́кон: Прему́дрость, во́нмем.

Чте́ц, проки́мен, гла́с 1: Бу́ди Госпо́дь ми́лость Твоя́ на на́с, я́коже упова́хом на Тя́.

Сти́х: Ра́дуйтеся пра́веднии о Го́споде, пра́вым подоба́ет похвала́.

Апо́стол: Собо́рнаго посла́ния Иа́ковля чте́ние.

Ве́домо же бу́ди, я́ко апо́стол от диа́кона чте́тся, зача́ло 57:

Бра́тие о́браз приими́те злострада́ния и долготерпе́ния, проро́ки, и́же глаго́лаша и́менем Госпо́дним. Се́ блажи́м терпя́щыя: терпе́ние и́овле слы́шасте, и кончи́ну Госпо́дню ви́десте, я́ко многоми́лостив е́сть Госпо́дь, и ще́др. Пре́жде же все́х, бра́тие моя́, не клени́теся ни не́бом, ни земле́ю, ни ино́ю ко́ею кля́твою: бу́ди же ва́м, е́же е́й, е́й, и е́же ни́, ни́: да не в лицеме́рие впаде́те. Злостра́ждет ли кто́ в ва́с? да моли́тву де́ет. благоду́шствует ли кто́? да пое́т. Боли́т ли кто́ в ва́с? да призове́т пресви́теры церко́вныя, и да моли́тву сотворя́т над ни́м, пома́завше его́ еле́ем во и́мя Госпо́дне. И моли́тва ве́ры спасе́т боля́щаго, и воздви́гнет его́ Госпо́дь: и а́ще грехи́ бу́дет сотвори́л, отпу́стятся ему́. Испове́дайте у́бо дру́г дру́гу согреше́ния, и моли́теся дру́г за дру́га, я́ко да исцеле́ете: мно́го бо мо́жет моли́тва пра́веднаго поспешеству́ема.

Свяще́нник пе́рвый: Ми́р ти́.

Аллилу́иа. Гла́с 8.

Сти́х: Ми́лость и су́д воспою́ тебе́ Го́споди.

Ева́нгелие от луки́, зача́ло 53:

Во вре́мя о́но, зако́нник не́кий приступи́ ко Иису́су, искуша́я Его́, и глаго́ля: учи́телю, что́ сотвори́в живо́т ве́чный насле́дую? О́н же рече́ к нему́: в зако́не что́ пи́сано е́сть? ка́ко чте́ши? О́н же отвеща́в рече́: возлю́биши Го́спода Бо́га твоего́ от всего́ се́рдца твоего́, и от всея́ души́ твоея́, и все́ю кре́постию твое́ю, и все́м помышле́нием твои́м: и бли́жняго своего́ я́ко са́м себе́. Рече́ же ему́: пра́во отвеща́, сие́ сотвори́ и жи́в бу́деши. О́н же хотя́ оправди́тися са́м, рече́ ко Иису́су: и кто́ е́сть бли́жний мо́й? Отвеща́в же Иису́с рече́: челове́к не́кий схожда́ше от иерусали́ма во иерихо́н, и в разбо́йники впаде́, и́же совле́кше его́, и я́звы возло́жше отидо́ша, оста́вльше е́ле жи́ва су́ща. По слу́чаю же свяще́нник не́кий схожда́ше путе́м те́м: и ви́дев его́, мимои́де. та́кожде же и леви́т, бы́в на то́м ме́сте, прише́д и ви́дев мимои́де. Самаряни́н же не́кто гряды́й прии́де над него́, и ви́дев его́ милосе́рдова. И присту́пль обвяза́ стру́пы его́, возлива́я ма́сло и вино́: всади́в же его́ на сво́й ско́т, приведе́ его́ в гости́нницу, и прилежа́ ему́. И нау́трия изше́д, изъе́м два́ сре́бреника, даде́ гости́ннику, и рече́ ему́: прилежи́ ему́, и е́же а́ще прииждиве́ши, а́з, егда́ возвращу́ся, возда́м ти́. Кто́ у́бо от те́х трие́х бли́жний мни́т ти ся бы́ти впа́дшему в разбо́йники? О́н же рече́: сотвори́вый ми́лость с ни́м. рече́ же ему́ Иису́с: иди́ и ты́ твори́ та́кожде.

Та́же: Поми́луй на́с Бо́же, по вели́цей ми́лости Твое́й, мо́лим Ти ся, услы́ши и поми́луй.

Го́споди поми́луй, три́жды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии и оставле́нии грехо́в раба́ Бо́жия, и́мярек.

Го́споди поми́луй, три́жды.

О е́же прости́тися ему́ вся́кому согреше́нию, во́льному и нево́льному, Го́споду помо́лимся.

Го́споди поми́луй, три́жды.

И возгла́с: Я́ко ми́лостив и человеколю́бец Бо́г еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Диа́кон: Го́споду помо́лимся:

Ли́к: Го́споди поми́луй.

Свяще́нник моли́тву:

Безнача́льне, ве́чне, свя́те святы́х, Единоро́днаго Твоего́ Сы́на низпосла́вый, исцеля́ющаго вся́кий неду́г, и вся́ку я́зю ду́ш и теле́с на́ших, низпосли́ Свята́го Твоего́ Ду́ха, и освяти́ еле́й се́й, и сотвори́ и́ помазу́ющемуся Твоему́ рабу́ и́мярек, в соверше́нное избавле́ние грехо́в его́ в насле́дие Ца́рствия Небе́снаго.

Ве́домо бу́ди, я́ко не́цыи моли́тву у́бо сию́ да́же до зде́ то́кмо глаго́лют, с возглаше́нием:

Твое́ бо е́сть е́же ми́ловати:

Не́цыи же да́же до конца́ глаго́лют:

Ты́ бо еси́ Бо́г ве́лий и ди́вен, храня́й заве́т Тво́й и ми́лость Твою́ лю́бящым Тя́, дая́й избавле́ние грехо́в, святы́м Твои́м о́троком Иису́сом Христо́м: па́ки рожде́й на́с от греха́: просвеща́яй слепы́я, исправля́яй низве́рженныя, любя́й пра́ведныя и гре́шныя ми́луяй: па́ки изведы́й на́с от тьмы́ и се́ни сме́ртныя, глаго́ляй су́щым во у́зах: изыди́те, и су́щым во тьме́, откры́йтеся. возсия́ бо в сердца́х на́ших све́т ве́дения лица́ Его́, отне́леже на́с ра́ди на земли́ яви́лся е́сть, и с челове́ки поживе́: прие́мшым Тя́ да́л е́сть вла́сть ча́дом Бо́жиим бы́ти: ба́нею па́ки бытия́ сыноположе́ние на́м дарова́л е́сть, и неприча́стны на́с сотвори́л е́сть от наси́льства диа́воля. поне́же не благоволи́л еси́ кро́вию очи́ститися, но еле́ем святы́м да́л еси́ о́браз креста́ Его́, во е́же бы́ти на́м Христо́ву ста́ду, Ца́рскому свяще́нию, язы́ку свято́му, и очи́стивый ны́ водо́ю, и освяти́вый Ду́хом Твои́м Святы́м. Са́м Влады́ко Го́споди, да́ждь благода́ть на́м в служе́ние Твое́ сие́, я́коже да́л еси́ моисе́ю уго́днику Твоему́, и саму́илу возлю́бленному Твоему́, и иоа́нну избра́нному Твоему́, и все́м во вся́ком ро́де и ро́де благоугоди́вшым Тебе́: си́це сотвори́ и на́с бы́ти служи́телей но́ваго Твоего́ заве́та над еле́ем си́м, его́же усво́ил еси́ честно́ю кро́вию Христа́ Твоего́ да совле́кшеся мирски́х похоте́й у́мрем греху́, и поживе́м пра́вде, обле́кшеся в него́ пома́занием освяще́ния, хотя́щаго еле́а навести́ся. Бу́ди Го́споди, еле́й се́й, еле́й ра́дования, еле́й освяще́ния, оде́жда Ца́рская, броня́ си́лы, вся́каго диа́вольскаго де́йства отгна́ние, печа́ть ненаве́тная, ра́дование се́рдца, весе́лие ве́чное. да и си́м помазу́емии па́ки рожде́ния, стра́шни бу́дут сопроти́вным, и возсия́ют во све́тлостех святы́х Твои́х, не иму́ще скве́рны или́ вра́ски: и да прии́мутся в ве́чныя Твоя́ упокое́ния, и восприи́мут по́честь го́рняго зва́ния.

Твое́ бо е́сть, е́же ми́ловати и спаса́ти ны́ Бо́же на́ш: и Тебе́ сла́ву возсыла́ем, со Единоро́дным Твои́м Сы́ном, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

И по моли́тве взе́млет иере́й струче́ц, и омочи́в и во святы́й еле́й, и помазу́ет боля́щаго крестообра́зно, на челе́, на ноздря́х, на лани́тех, на усте́х, на пе́рсех, на рука́х на о́бе стране́, глаго́ля моли́тву сию́:

О́тче святы́й, Врачу́ ду́ш и теле́с, посла́вый Единоро́днаго Твоего́ Сы́на, Го́спода на́шего Иису́са Христа́, вся́кий неду́г исцеля́ющаго, и от сме́рти избавля́ющаго, исцели́ и раба́ Твоего́, и́мярек, от обдержа́щия его́ теле́сныя и душе́вныя не́мощи, и оживотвори́ его́ благода́тию Христа́ Твоего́: моли́твами пресвяты́я Влады́чицы на́шея Богоро́дицы, и Присноде́вы Мари́и: предста́тельствы честны́х небе́сных си́л безпло́тных: си́лою Честна́го и Животворя́щаго Креста́: честна́го сла́внаго Проро́ка, Предте́чи и Крести́теля Иоа́нна: святы́х сла́вных и всехва́льных апо́столов: святы́х сла́вных, и добропобе́дных му́чеников: преподо́бных и богоно́сных оте́ц на́ших: святы́х и исцели́телей безсре́бренников Космы́ и Дамиа́на, ки́ра и Иоа́нна, пантелеи́мона и ермола́а, сампсо́на и диоми́да, фо́тиа и Ники́ты: святы́х и пра́ведных богооте́ц, иоаки́ма и а́нны, и все́х святы́х.

Я́ко Ты́ еси́ исто́чник исцеле́ний, Бо́же на́ш, и Тебе́ сла́ву возсыла́ем, со Единоро́дным Твои́м Сы́ном, и Единосу́щным Твои́м Ду́хом, ны́не и при́сно, и во ве́ки веко́в, ами́нь.

Сия́ моли́тва глаго́лется от еди́наго коего́ждо свяще́нника по е́же рещи́ Ева́нгелие и моли́тву, помазу́ющаго вку́пе еле́ем неду́гующаго.

Диа́кон: Во́нмем.

Свяще́нник вторы́й: Ми́р все́м.

Проки́мен, гла́с 2:

Кре́пость моя́ и пе́ние мое́ Госпо́дь, и бы́сть мне́ во спасе́ние.

Сти́х: Наказу́я наказа́ мя Госпо́дь, сме́рти же не предаде́ мя́.

Апо́стол, к ри́мляном, зача́ло 116.

Бра́тие, до́лжни есмы́ мы́ си́льнии не́мощи немощны́х носи́ти, и не себе́ угожда́ти. Ки́йждо же ва́с бли́жнему да угожда́ет во благо́е к созда́нию. И́бо и Христо́с не Себе́ угоди́, но я́коже е́сть пи́сано: поноше́ния понося́щих Тебе́ нападо́ша на Мя́. Ели́ка бо преднапи́сана бы́ша, в на́ше наказа́ние преднаписа́шася: да терпе́нием и утеше́нием писа́ний упова́ние и́мамы. Бо́г же терпе́ния и утеше́ния, да да́ст ва́м то́жде му́дрствовати дру́г ко дру́гу о Христе́ Иису́се: Да единоду́шно еди́ными усты́ сла́вите Бо́га и Отца́ Го́спода на́шего Иису́са Христа́. Те́мже прие́млите дру́г дру́га, я́коже и Христо́с прия́т ва́с во сла́ву Бо́жию.

Свяще́нник вторы́й: Ми́р ти́.

Аллилу́иа, гла́с 5.

Сти́х: Ми́лости твоя́ Го́споди во ве́к воспою́.

Свяще́нник вторы́й:

Ева́нгелие от луки́, зача́ло 94:

Во вре́мя о́но, прии́де Иису́с во иерихо́н. И се́ му́ж нарица́емый закхе́й, и се́й бе́ ста́рей мытаре́м, и то́й бе́ бога́т: И иска́ше ви́дети Иису́са, Кто́ есть, и не можа́ше от наро́да, я́ко во́зрастом ма́л бе́. И предите́к возле́зе на я́годичину, да ви́дит, я́ко туде́ хотя́ше мину́ти. И я́ко прии́де на ме́сто, воззре́в Иису́с, ви́дев его́, и рече́ к нему́: закхе́е, потща́вся сле́зи, дне́сь бо в дому́ твое́м подоба́ет Ми́ бы́ти. И потща́вся сле́зе, и прия́т Его́ ра́дуяся. И ви́девше вси́ ропта́ху, глаго́люще: я́ко ко гре́шну му́жу вни́де вита́ти. Ста́в же закхе́й, рече́ ко Го́споду: се́ по́л име́ния моего́, Го́споди, да́м ни́щым, и а́ще кого́ чи́м оби́дех, возвращу́, четвери́цею. Рече́ же к нему́ Иису́с: я́ко дне́сь спасе́ние до́му сему́ бы́сть, зане́ и се́й Сы́н Авраа́мль е́сть. Прии́де бо Сы́н челове́чь взыска́ти и спасти́ поги́бшаго.

Диа́кон же:

Поми́луй на́с Бо́же:

Еще́ мо́лимся о ми́лости, жи́зни:

О е́же прости́тися ему́:

Я́ко ми́лостив, и человеколю́бец Бо́г:

Свяще́нник моли́тву:

Бо́же вели́кий, и вы́шний от всея́ тва́ри покланя́емый, прему́дрости исто́чниче, бла́гости вои́стинну неизсле́димая бе́здно, и благоутро́бия неопределя́емая пучи́но: Са́м человеколю́бче Влады́ко, преве́чных и ди́вных Бо́же, Его́же никто́же от челове́к помышля́яй мо́жет пости́гнути? при́зри, услы́ши на́с недосто́йных рабо́в Твои́х, и иде́же о вели́цем и́мени Твое́м еле́й се́й прино́сим, низпосли́ Твоего́ да́ра исцеле́ния, и оставле́ние грехо́в, и исцели́ его́ во мно́жестве ми́лости Твоея́. Е́й, Го́споди благопремени́телю, еди́не ми́лостиве и человеколю́бче, ка́яйся о зло́бах на́ших: ве́дый, я́ко належи́т по́мысл челове́ка на лука́вая от ю́ности его́: не хотя́й сме́рти гре́шника, но я́ко обрати́тися и жи́ву бы́ти ему́: гре́шных ра́ди спасе́ния вочелове́чивыйся Бо́г сы́й, и созда́выйся за созда́ние Твое́. Ты́ еси́ реки́й: не приидо́х призва́ти пра́ведныя, но гре́шныя в покая́ние: Ты́ еси́, овча́ взыска́вый заблу́ждшее: Ты́ еси́, поги́бшую дра́хму приле́жно взыска́вый, и обреты́й: Ты́ еси́ реки́й, я́ко гряду́щаго ко мне́ не изжену́ во́н: Ты́ еси́, и́же блудни́цы честне́и Твои́ но́зе слеза́ми омочи́вшия не возгнуша́выйся: Ты́ еси́ реки́й: ели́жды а́ще паде́ши, воста́ни, и спасе́шися: Ты́ еси́ реки́й, я́ко ра́дость быва́ет на небеси́ о еди́ном гре́шнице ка́ющемся. Са́м при́зри, благоутро́бный Влады́ко, с высоты́ святы́я Твоея́, соосени́в на́с гре́шных и недосто́йных рабо́в Твои́х благода́тию Свята́го Ду́ха в ча́с се́й, и всели́ в раба́ Твоего́, и́мярек, позна́вшаго своя́ согреше́ния, и присту́пльшаго к Тебе́ ве́рою: и прии́м Свои́м Ти́ человеколю́бием, а́ще что́ согреши́л е́сть сло́вом, или́ де́лом, или́ помышле́нием, прости́в очи́сти его́, и чи́ста сотвори́ от вся́каго греха́, и при́сно спребыва́я ему́, сохрани́ про́чее ле́то живота́ его́, ходя́ща во оправда́ниих твои́х во е́же не ктому́ бы́ти ему́ посмея́ние диа́волу: я́ко да и в не́м просла́вится пресвято́е и́мя Твое́.

Возгла́с: Твое́ бо е́сть е́же ми́ловати, и спаса́ти ны́, Христе́ Бо́же, и Тебе́ сла́ву возсыла́ем со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

По моли́тве же а́бие вторы́й иере́й взе́млет струче́ц вторы́й, и омочи́в и во святы́й еле́й помазу́ет боля́щаго, глаго́ля моли́тву:

О́тче святы́й, врачу́ ду́ш и теле́с:

Диа́кон же: Во́нмем:

Свяще́нник тре́тий: Ми́р все́м.

Проки́мен, гла́с 3:

Госпо́дь просвеще́ние мое́ и спаси́тель мо́й, кого́ убою́ся?

Сти́х: Госпо́дь защи́титель живота́ моего́, от кого́ устрашу́ся?

Апо́стол к кори́нфяном, зача́ло 153.

Бра́тие, вы́ есте́ те́ло Христо́во, и у́ди от ча́сти. И о́вы у́бо положи́ Бо́г в це́ркви, пе́рвее апо́столы, второ́е проро́ки, тре́тие учи́тели, пото́м же си́лы, та́же дарова́ния исцеле́ний, заступле́ния, правле́ния, ро́ди язы́ков. Еда́ вси́ апо́столи? еда́ вси́ проро́цы? еда́ вси́ учи́тели? еда́ вси́ си́лы? Еда́ вси́ дарова́ния и́мут исцеле́ний? Еда́ вси́ язы́ки глаго́лют? еда́ вси́ сказу́ют? Ревну́йте же дарова́ний бо́льших: и еще́ по превосхожде́нию пу́ть ва́м показу́ю. А́ще язы́ки челове́ческими глаго́лю и а́нгельскими, любве́ же не и́мам, бы́х (я́ко) ме́дь звеня́щи, или́ кимва́л звяца́яй. И а́ще и́мам проро́чество и ве́м та́йны вся́, и ве́сь ра́зум: и а́ще и́мам всю́ ве́ру, я́ко и го́ры преставля́ти, любве́ же не и́мам, ничто́же е́смь. И а́ще разда́м вся́ име́ния моя́, и а́ще преда́м те́ло мое́, во е́же сожещи́ е́: любве́ же не и́мам, ника́я по́льза ми́ е́сть. Любы́ долготерпи́т, милосе́рдствует: любы́ не зави́дит: любы́ не превозно́сится, не горди́тся: Ни безчи́нствует, не и́щет своя́ си́, не раздража́ется, не мы́слит зла́: не ра́дуется о непра́вде, ра́дуется же о и́стине: Вся́ лю́бит, всему́ ве́ру е́млет, вся́ упова́ет, вся́ те́рпит. Любы́ николи́же отпа́дает.

Свяще́нник тре́тий: Ми́р ти́.

Диа́кон: Прему́дрость:

Аллилу́иа, гла́с 2.

Сти́х: На тя́ Го́споди упова́х, да не постыжу́ся в ве́к.

Свяще́нник тре́тий чте́т:

Ева́нгелие от Матфе́а, зача́ло 34 от полу́.

Во вре́мя о́но, призва́в Иису́с обана́десять ученики́ Своя́, даде́ и́м вла́сть на дусе́х нечи́стых, я́ко да изго́нят и́х, и цели́ти вся́к неду́г, и вся́ку боле́знь. Сия́ обана́десять посла́ Иису́с, запове́да и́м, глаго́ля: на пу́ть язы́к не иди́те, и во гра́д самаря́нский не вни́дите. Иди́те же па́че ко овца́м поги́бшым до́му изра́илева. Ходя́ще же пропове́дуйте, глаго́люще: я́ко прибли́жися Ца́рствие небе́сное. Боля́щыя исцеля́йте, прокаже́нныя очища́йте, ме́ртвыя воскреша́йте, бе́сы изгоня́йте: ту́не прия́сте, ту́не дади́те.

Диа́кон же а́бие глаго́лет ектению́ сию́:

Поми́луй на́с Бо́же:

Еще́ мо́лимся о ми́лости, жи́зни:

О е́же прости́тися ему́:

И возгла́с: Я́ко ми́лостив:

Диа́кон: Го́споду помо́лимся.

Свяще́нник глаго́лет моли́тву:

Влады́ко Вседержи́телю, святы́й Царю́, наказу́яй, и не умерщвля́яй, утвержда́яй низпа́дающыя, и возводя́й низве́рженныя, теле́сныя ско́рби исправля́яй челове́ков: мо́лимся Тебе́ Бо́же на́ш, я́ко да наведе́ши ми́лость Твою́ на еле́й се́й, и на помазу́ющыяся от него́ во и́мя Твое́: да бу́дет и́м во исцеле́ние души́ же и те́ла, и во очище́ние и измене́ние вся́кия стра́сти, и вся́каго неду́га, и я́зи, и вся́кия скве́рны пло́ти и ду́ха. Ей, Го́споди, враче́бную Твою́ си́лу с небесе́ низпосли́, прикосни́ся телеси́, угаси́ огне́вицу, укроти́ стра́сть, и вся́кую не́мощь тая́щуюся. Бу́ди вра́чь раба́ Твоего́, и́мярек, воздви́гни его́ от одра́ боле́зненнаго, и от ло́жа озлобле́ния це́ла и всесоверше́нна, да́руй его́ це́ркви Твое́й благоугожда́юща и творя́ща во́лю Твою́.

Возгла́с: Твое́ бо е́сть, е́же ми́ловати и спаса́ти ны́ Бо́же на́ш: и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

По моли́тве же тре́тий иере́й взе́млет струче́ц тре́тий, и омочи́в и во святы́й еле́й, и помазу́ет боля́щаго, глаго́ля моли́тву:

О́тче святы́й, врачу́ ду́ш и теле́с:

Диа́кон: Во́нмем.

Свяще́нник четве́ртый: Ми́р все́м.

Проки́мен, гла́с 4:

Во́ньже а́ще де́нь призову́ Тя, ско́ро услы́ши мя́.

Сти́х: Го́споди, услы́ши моли́тву мою́, и во́пль мо́й.

Апо́стол к кори́нфяном, зача́ло 182.

Бра́тие, вы́ есте́ це́ркви Бо́га жи́ва, я́коже рече́ Бо́г: я́ко вселю́ся в ни́х и похожду́, и бу́ду и́м Бо́г, и ти́и бу́дут мне́ лю́дие. Те́мже изыди́те от среды́ и́х, и отлучи́теся, глаго́лет Госпо́дь, и нечистоте́ не прикаса́йтеся, и а́з прииму́ вы́. И бу́ду ва́м во отца́, и вы́ бу́дете мне́ в сы́ны и дще́ри, глаго́лет Госпо́дь вседержи́тель. Сицева́ у́бо иму́ще обетова́ния, о возлю́бленнии, очи́стим себе́ от вся́кия скве́рны пло́ти и ду́ха, творя́ще святы́ню в стра́се Бо́жии.

Свяще́нник: Ми́р ти́.

Аллилу́иа, гла́с 2.

Сти́х: Терпя́ потерпе́х Го́спода, и вня́т ми́.

Свяще́нник четве́ртый:

Ева́нгелие от Матфе́а, зача́ло 26.

Во вре́мя о́но, прише́д Иису́с в до́м петро́в, ви́де те́щу его́ лежа́щу, и огне́м жего́му. И прикосну́ся руце́ ея́, и оста́ви ю́ о́гнь: и воста́, и служа́ше Ему́. По́зде же бы́вшу, приведо́ша к Нему́ бе́сны мно́ги, и изгна́ ду́хи сло́вом, и вся́ боля́щыя исцели́. Да сбу́дется рече́нное иса́ием проро́ком глаго́лющим: то́й неду́ги на́шя прия́т, и боле́зни понесе́. Ви́дев же Иису́с мно́ги наро́ды о́крест себе́, повеле́ ити́ на о́н по́л. И присту́пль еди́н кни́жник, рече́ Ему́: учи́телю, иду́ по Тебе́, а́може а́ще и́деши. Глаго́ла ему́ Иису́с: ли́си я́звины и́мут, и пти́цы небе́сныя гне́зда: Сы́н же челове́ческий не и́мать где́ главы́ подклони́ти. Други́й же от учени́к его́ рече́ Ему́: Го́споди, повели́ ми пре́жде ити́, и погребсти́ отца́ моего́. Иису́с же рече́ ему́: гряди́ по Мне́, и оста́ви ме́ртвых погребсти́ своя́ мертвецы́. И вле́зшу Ему́ в кора́бль, по Не́м идо́ша ученицы́ Его́.

Диа́кон же:

Поми́луй на́с Бо́же:

Еще́ мо́лимся о ми́лости, жи́зни:

О е́же прости́тися ему́:

И возгла́с: Я́ко ми́лостив:

Диа́кон: Го́споду помо́лимся.

Свяще́нник моли́тву:

Бла́же и человеколю́бче, благоутро́бне и многоми́лостиве Го́споди, мно́гий в ми́лости, и бога́тый в благосты́ни, О́тче щедро́т, и Бо́же вся́каго утеше́ния, укрепи́вый ны́ святы́ми Твои́ми Апо́столами, еле́ем с моли́твою не́мощи люде́й цели́ти: Са́м и еле́й се́й вчини́ в цельбу́ от него́ помазу́ющымся, в премене́ние вся́каго неду́га, и вся́кия я́зи, во избавле́ние зо́л, ча́ющым е́же от Тебе́ спасе́ния. е́й, Влады́ко, Го́споди Бо́же на́ш, мо́лим Ти ся всеси́льне, е́же спасти́ вся́ ны́, еди́не ду́ш же и теле́с Врачу́, освяти́ вся́ ны́: вся́к неду́г исцеля́яй, исцели́ и раба́ Твоего́, и́мярек, воздви́гни его́ от одра́ боле́зненнаго ми́лостию Твоея́ бла́гости, посети́ его́ ми́лостию и щедро́тами Твои́ми: отжени́ от него́ вся́кую боле́знь и не́мощь, я́ко да воста́в руко́ю Твое́ю кре́пкою, порабо́тает Тебе́ со вся́ким благодаре́нием: я́ко да и ны́не причаща́ющеся Твоего́ неизглаго́ланнаго человеколю́бия, пое́м и сла́вим Тя́, творя́щаго вели́кая и чу́дная, сла́вная же и изря́дная.

Твое́ бо е́сть, е́же ми́ловати, и спаса́ти ны́ Бо́же на́ш:

По моли́тве же а́бие четве́ртый иере́й взе́млет струче́ц четве́ртый, и омочи́в и́ во святы́й еле́й, и помазу́ет боля́щаго, глаго́ля моли́тву:

О́тче святы́й, Врачу́ ду́ш и теле́с:

Диа́кон: Во́нмем:

Иере́й пя́тый: Ми́р все́м.

Проки́мен, гла́с 5:

Ты́ Го́споди сохрани́ши ны́, и соблюде́ши ны́ от ро́да сего́, и во ве́к.

Сти́х: Спаси́ мя Го́споди, я́ко оскуде́ преподо́бный.

Диа́кон: Прему́дрость.

Апо́стол к кори́нфяном, зача́ло 168.

Бра́тие, не хощу́ ва́с не ве́дети о ско́рби на́шей, бы́вшей на́м во аси́и, я́ко по премно́гу и па́че си́лы отяготи́хомся, я́ко не наде́ятися на́м и жи́ти. Но са́ми в себе́ осужде́ние сме́рти име́хом: да не наде́ющеся бу́дем на ся́, но на Бо́га возставля́ющаго ме́ртвыя: И́же от толи́кия сме́рти изба́вил ны́ е́сть, и избавля́ет: на́ньже и упова́хом, я́ко и еще́ изба́вит: Поспеша́ющым и ва́м по на́с моли́твою: да от мно́г ли́ц е́же в на́с дарова́ние, мно́гими благодари́тся о ва́с.

Свяще́нник: Ми́р ти́.

Аллилу́иа, гла́с 5.

Сти́х: Ми́лости твоя́ Го́споди, во ве́к воспою́.

Ева́нгелие от Матфе́а, зача́ло 104.

Рече́ Госпо́дь при́тчу сию́: уподо́бися Ца́рствие небе́сное десяти́м де́вам, я́же прия́ша свети́льники своя́, и изыдо́ша в сре́тение жениху́. Пя́ть же бе́ от ни́х мудры́, и пя́ть юро́дивы. Юро́дивыя же, прие́мше свети́льники своя́, не взя́ша с собо́ю еле́а. Му́дрыя же прия́ша еле́й в сосу́дех, со свети́льники свои́ми. Косня́щу же жениху́, воздрема́шася вся́, и спа́ху. Полу́нощи же во́пль бы́сть: се́ жени́х гряде́т, исходи́те в сре́тение его́. Тогда́ воста́вше вся́ де́вы ты́я, и украси́ша свети́льники своя́. Юро́дивыя же му́дрым ре́ша: дади́те на́м от еле́а ва́шего, я́ко свети́льницы на́ши угаса́ют. Отвеща́ша же му́дрыя, глаго́люще: еда́ ка́ко не доста́нет на́м и ва́м? иди́те же па́че к продаю́щым, и купи́те себе́. Иду́щым же и́м купи́ти, прии́де жени́х, и гото́выя внидо́ша с ни́м на бра́ки: и затворе́ны бы́ша две́ри. Последи́ же приидо́ша и про́чыя де́вы, глаго́люще: Го́споди, Го́споди, отве́рзи на́м. О́н же отвеща́в рече́ и́м: ами́нь глаго́лю ва́м, не ве́м ва́с. Бди́те у́бо, я́ко не ве́сте дне́, ни часа́, во́ньже Сы́н челове́ческий прии́дет.

Диа́кон же:

Поми́луй на́с Бо́же:

Еще́ мо́лимся о ми́лости, жи́зни:

О е́же прости́тися ему́:

И возгла́с: Я́ко ми́лостив:

Диа́кон: Го́споду помо́лимся.

Свяще́нник моли́тву сию́:

Го́споди Бо́же на́ш, наказу́яй и па́ки исцеля́яй, воздвиза́яй от земли́ ни́ща, и от гно́ища возвыша́яй убо́гаго: сиро́т О́тче, и обурева́емых Приста́нище, и неду́гующих Врачу́, не́мощи на́шя неболе́зненно нося́й, и неду́ги на́шя прие́мляй: в ти́хости ми́луяй, превосходя́й беззако́ния, и изъима́яй непра́вды: ско́рый в по́мощь, и ко́сный во гне́в, ду́нувый на своя́ ученики́, и реки́й: приими́те Ду́ха Свята́го, и́мже а́ще оста́вите грехи́, оста́вятся и́м: прие́мляй гре́шных покая́ние, и вла́сть име́яй проща́ти грехи́ мно́гия и лю́тыя: и исцеле́ние подава́я все́м, в не́мощи и долгонеду́жии пребыва́ющым: и́же мене́ смире́ннаго и гре́шнаго, и недосто́йнаго раба́ Твоего́ во мно́зех гресе́х сплете́ннаго, и страстьми́ сласте́й валя́ющагося, призва́вый во святы́й и превелича́йший степе́нь свяще́нства, и вни́ти во вну́треннее заве́сы, во свята́я святы́х, иде́же прини́кнути святи́и а́нгели жела́ют, и слы́шати ева́нгльский гла́с Го́спода Бо́га, и зре́ти самозра́чне лице́ свята́го возноше́ния, и наслажда́тися Боже́ственныя и свяще́нныя литурги́и. сподо́бивый мя́ священноде́йствовати пренебе́сныя Твоя́ та́йны, и приноси́ти Тебе́ да́ры же и же́ртвы о на́ших гресе́х, и людски́х неве́жествиих, и хода́тайствовати о слове́сных Твои́х овца́х, да мно́гим и неизрече́нным Твои́м человеколю́бием прегреше́ния и́х очи́стиши. Са́м преблаги́й Царю́, внуши́ моли́тву мою́ в се́й ча́с же и святы́й де́нь, и на вся́кое вре́мя и ме́сто: и вонми́ гла́су моле́ния моего́, и рабу́ Твоему́, и́мярек, в не́мощи душе́вной и теле́сной су́щему, исцеле́ние да́руй: подая́ ему́ оставле́ние грехо́в, и проще́ние согреше́ний, во́льных же и нево́льных: уврачу́й его́ я́звы неисце́льныя, вся́кий же неду́г, и вся́кую я́зю, да́руй ему́ душе́вное исцеле́ние. прикосну́выйся те́щи петро́ве, и оста́ви ю́ огне́вица, и воста́ и служа́ше Тебе́: Са́м Влады́ко, и рабу́ Твоему́, и́мярек, пода́ждь врачева́ние, и премене́ние вся́кия тлетво́рныя боле́зни, и помяни́ бога́тыя Твоя́ щедро́ты, и ми́лость Твою́. помяни́, я́ко приле́жно належи́т помышле́ние челове́ка на лука́вая от ю́ности его́, и ни еди́н обрета́ется безгре́шен на земли́: Ты́ бо Еди́н кроме́ греха́ еси́, прише́дый и спасы́й челове́ческий ро́д, и свободи́вый на́с от рабо́ты вра́жия. а́ще бо в су́д вни́деши с рабы́ Твои́ми, никто́же обря́щется чи́ст от скве́рны: но вся́кая уста́ заградя́тся, не иму́щая что́ отвеща́ти, зане́ я́коже ру́б пове́рженный, вся́кая пра́вда на́ша пред Тобо́ю. сего́ ра́ди грехи́ ю́ности на́шея не помяни́ Го́споди: Ты́ бо еси́ наде́жда ненаде́ющихся, и упокое́ние тружда́ющихся, и обремене́нных в беззако́ниих, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

По моли́тве же а́бие пя́тый свяще́нник взе́млет струче́ц пя́тый, и омочи́в и́ во святы́й еле́й, помазу́ет боля́щаго, глаго́ля моли́тву:

О́тче святы́й, Врачу́ ду́ш и теле́с:

Диа́кон: Во́нмем.

Свяще́нник же шесты́й: Ми́р все́м.

Проки́мен, гла́с 6:

Поми́луй мя́ Бо́же по вели́цей ми́лости Твое́й.

Сти́х: Се́рдце чи́сто сози́жди во мне́ Бо́же, и ду́х пра́в обнови́ во утро́бе мое́й.

Апо́стол к гала́том, зача́ло 213.

Бра́тие, пло́д духо́вный е́сть: любы́, ра́дость, ми́р, долготерпе́ние, бла́гость, милосе́рдие, ве́ра, кро́тость, воздержа́ние: на таковы́х не́сть зако́на. А и́же Христо́вы су́ть, пло́ть распя́ша со страстьми́ и похотьми́. А́ще живе́м ду́хом, ду́хом и да хо́дим. Не быва́им тщесла́вни, дру́г дру́га раздража́юще, дру́г дру́гу зави́дяще. Бра́тие, а́ще и впаде́т челове́к в не́кое прегреше́ние, вы́ духо́внии исправля́йте такова́го ду́хом кро́тости: блюды́й себе́: да не и ты́ искуше́н бу́деши. Дру́г дру́га тяготы́ носи́те, и та́ко испо́лните зако́н Христо́в.

Свяще́нник шесты́й: Ми́р ти́.

Диа́кон: Прему́дрость, во́нмем.

Аллилу́иа, гла́с 6.

Сти́х: Блаже́н му́ж боя́йся Го́спода, в за́поведех его́ восхо́щет зело́.

Диа́кон: Прему́дрость, про́сти услы́шим свята́го Ева́нглиа.

Ева́нгелие от Матфе́а, зача́ло 62.

Во вре́мя о́но, вни́де Иису́с во страны́ ти́рския и сидо́нския. И се́ жена́ ханане́йска от преде́л те́х изше́дши, возопи́ к Нему́, глаго́лющи: поми́луй мя́ Го́споди, Сы́не Дави́дов: дщи́ моя́ зле́ бесну́ется. О́н же не отвеща́ е́й словесе́. и присту́пльше ученицы́ Его́, моля́ху Его́, глаго́люще: отпусти́ ю́, я́ко вопие́т в сле́д на́с. О́н же отвеща́в рече́: не́смь по́слан, то́кмо ко овца́м поги́бшым до́му изра́илева. Она́ же прише́дши поклони́ся Ему́, глаго́лющи: Го́споди, помози́ ми. О́н же отвеща́в рече́: не́сть добро́ отя́ти хле́ба ча́дом, и поврещи́ псо́м. Она́ же рече́: е́й, Го́споди, и́бо и пси́ ядя́т от крупи́ц па́дающих от трапе́зы господе́й свои́х. Тогда́ отвеща́в Иису́с, рече́ е́й: о же́но, ве́лия ве́ра твоя́, бу́ди тебе́, я́коже хо́щеши. и исцеле́ дщи́ ея́ от того́ часа́.

Диа́кон же: Поми́луй на́с Бо́же:

Еще́ мо́лимся о ми́лости, жи́зни:

О е́же прости́тися ему́:

Возгла́с: Я́ко ми́лостив.

Диа́кон: Го́споду помо́лимся:

Свяще́нник моли́тву сию́:

Благодари́м Тя́ Го́споди Бо́же на́ш, благи́й человеколю́бче, и Врачу́ ду́ш и теле́с на́ших, неду́ги на́шя неболе́зненно нося́й, его́же я́звою вси́ исцеле́хом: Па́стырю до́брый, на взыска́ние прише́дый заблу́ждшаго овча́те, малоду́шным дая́й утеше́ние, и живо́т сокруше́ным: исто́чник кровоточи́выя дванадесятоле́тен бы́вший исцели́вый: дще́рь ханане́ину от лю́таго де́мона свободи́вый: до́лг дарова́вый двема́ должнико́ма, и гре́шной жене́ оставле́ние да́вый: исцеле́ние разсла́бленному дарова́вый, со оставле́нием грехо́в его́: мытаря́ сло́вом оправда́вый, и разбо́йника в после́днем его́ испове́дании прие́мый: грехи́ ми́ра взе́мый, и на кресте́ пригвозди́вый: Тебе́ мо́лимся и Тебе́ про́сим, в бла́гости Твое́й, Са́м осла́би, оста́ви, прости́ Бо́же беззако́ния, и грехи́ раба́ Твоего́, и́мярек, согреше́ния его́ во́льная и нево́льная, я́же в ве́дении и не в ве́дении, я́же в преступле́нии, и в преслуша́нии, я́же в нощи́ и во дни́: или́ в кля́тве свяще́нничестей, или́ о́тчи, или́ ма́терни бы́сть: или́ очи́ма воззре́нием, или́ ве́ждома помава́нием: или́ прилежа́нием любоде́йства, или́ вкуше́нием блуда́: или́ в ко́ем лю́бо движе́нии пло́ти и ду́ха, отчужди́ся хоте́ния Твоего́, и Твоея́ святы́ни. А́ще же согреши́ то́йже и мы́, я́ко бла́г и непамятозло́бивый Бо́г и человеколю́бец прости́, не оставля́я его́ и на́с в скве́рное житие́ впа́сти, ниже́ в па́губныя пути́ тещи́. Е́й, Влады́ко Го́споди, услы́ши мя́ гре́шнаго в ча́с се́й за раба́ Твоего́, и́мярек, и пре́зри я́ко непамятозло́бивый Бо́г согреше́ния его́ вся́: свободи́ его́ от ве́чныя му́ки: уста́ его́ Твоего́ хвале́ния испо́лни: устне́ его́ отве́рзи к славосло́вию и́мене Твоего́: ру́це его́ простри́ к де́ланию за́поведей Твои́х: но́зе его́ к тече́нию благовествова́ния Твоего́ испра́ви: вся́ его́ у́ды и мы́сль Твое́ю укрепля́я благода́тию. Ты́ бо еси́ Бо́г на́ш, святы́ми Твои́ми апо́столы запове́давый на́м, глаго́ля: ели́ка а́ще свя́жете на земли́, бу́дут свя́зана на небесе́х: и ели́ка а́ще разрешите́ на земли́, бу́дут разреше́на на небесе́х. и па́ки: и́хже а́ще оста́вите грехи́, оста́вятся и́м, и́же а́ще держите́, удержа́тся. и я́коже услы́шал еси́ езеки́ю в ско́рби души́ его́, в ча́с сме́рти его́, и не презре́л еси́ моле́ния его́: та́кожде и мене́ смире́ннаго и гре́шнаго и недосто́йнаго раба́ Твоего́ услы́ши в ча́с се́й. Ты́ бо еси́ Го́споди Иису́се Христе́, се́дмьдесят кра́т седмери́цею оставля́ти па́дающым в грехи́ повеле́вый, Твое́ю бла́гостию и человеколю́бием: и ка́яйся о зло́бах на́ших, и ра́дуяйся о обраще́нии заблужде́нных: зане́ я́ко вели́чество Твое́, та́ко и ми́лость Твоя́: и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом: ны́не и при́сно, и во ве́ки веко́в, ами́нь.

По моли́тве же а́бие шесты́й свяще́нник взе́млет струче́ц шесты́й, и омочи́в и́ во святы́й еле́й, помазу́ет боля́щаго, глаго́ля моли́тву:

О́тче святы́й, Врачу́ ду́ш и теле́с:

Диа́кон: Во́нмем.

Свяще́нник же седмы́й: Ми́р все́м.

Проки́мен, гла́с 7:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Сти́х: Поми́луй мя́ Го́споди, я́ко не́мощен е́смь.

Апо́стол к солу́няном, зача́ло 273.

Бра́тие, мо́лим вы́, вразумля́йте безчи́нныя, утеша́йте малоду́шныя, заступа́йте немощны́я, долготерпи́те ко все́м. Блюди́те, да никто́же зла́ за зло́ кому́ возда́ст: но всегда́ до́брое гони́те, и дру́г ко дру́гу, и ко все́м. Всегда́ ра́дуйтеся: Непреста́нно моли́теся. О все́м благодари́те: сия́ бо е́сть во́ля Бо́жия о Христе́ Иису́се в ва́с. Ду́ха не угаша́йте: Проро́чествия не уничижа́йте. Вся́ же искуша́юще, до́брая держи́те: От вся́кия ве́щи злы́я отгреба́йтеся. Са́м же Бо́г ми́ра да освяти́т вы́ всесоверше́ны о все́м, и всесоверше́н ва́ш ду́х, и душа́, и те́ло непоро́чно, в прише́ствие Го́спода на́шего Иису́са Христа́ да сохрани́тся.

Свяще́нник же седмы́й: Ми́р ти́.

Диа́кон: Прему́дрость.

Аллилу́иа, гла́с 7.

Сти́х: Услы́шит тя́ Госпо́дь в де́нь печа́ли, защи́тит тя́ и́мя Бо́га Иа́ковля.

Ева́нгелие от Матфе́а, зача́ло 30.

Во вре́мя о́но, преходя́ Иису́с, ви́де челове́ка седя́ща на мы́тнице, матфе́а глаго́лема, и глаго́ла ему́: по Мне́ гряди́. и воста́в по Не́м и́де: И бы́сть Ему́ возлежа́щу в дому́, и се́ мно́зи мытари́ и гре́шницы прише́дше возлежа́ху со Иису́сом, и со ученики́ Его́: И ви́девше фарисе́е, глаго́лаху ученико́м Его́: почто́ с мытари́ и гре́шники учи́тель ва́ш я́ст и пие́т: Иису́с же слы́шав рече́ и́м: не тре́буют здра́вии врача́, но боля́щии. Ше́дше же научи́теся, что́ е́сть: ми́лости хощу́, а не же́ртвы? не приидо́х бо призва́ти пра́ведники, но гре́шники на покая́ние.

Диа́кон же: Поми́луй на́с Бо́же:

Еще́ мо́лимся о ми́лости, жи́зни:

О е́же прости́тися ему́:

И возгла́с: Я́ко ми́лостив:

Диа́кону ре́кшу: Го́споду помо́лимся.

Свяще́нник моли́тву сию́:

Влады́ко Го́споди Бо́же на́ш, Врачу́ ду́ш и теле́с, вре́менныя стра́сти уврачева́вый, исцеля́яй вся́к неду́г и вся́кую я́зю в лю́дех, хотя́й все́м челове́ком спасти́ся, и в позна́ние и́стины приити́, не хотя́й сме́рти гре́шника, но я́ко обрати́тися, и жи́ву бы́ти ему́. Ты́ бо Го́споди, в ве́тхом заве́те положи́л еси́ покая́ние гре́шным, Дави́ду, и ниневи́тяном, и пре́жде те́х бы́вшым: но и во прише́ствии плотска́го Твоего́ смотре́ния, не призва́л еси́ пра́ведныя, но гре́шныя в покая́ние: я́коже мытаря́, я́коже блудни́цу, разбо́йника, и ху́льнаго гони́теля, вели́каго Па́вла  покая́нием прие́мый. Петра́ верхо́внаго и Апо́стола Твоего́, отве́ргшагося Тебе́ три́жды, покая́нием прия́л еси́, и обеща́л еси́ ему́, глаго́ля: Ты́ еси́ пе́тр, и на се́м ка́мени сози́жду це́рковь Мою́, и врата́ а́дова не одоле́ют е́й, и да́м тебе́ ключи́ Ца́рствия Небе́снаго. сего́ ра́ди и мы́, Бла́же и человеколю́бче, по нело́жным Твои́м обеща́нием дерза́юще, мо́лимся Тебе́, и про́сим в ча́с се́й: услы́ши моле́ние на́ше, и приими́ е́, я́коже кади́ло приноси́мое Тебе́, и посети́ раба́ Твоего́, и́мярек, и а́ще что́ согреши́ сло́вом, или́ де́лом, или́ помышле́нием, или́ в нощи́, или́ во дни́: или́ под кля́тву свяще́нническую, или́ своему́ прокля́тию подпаде́: или́ кля́твою огорчи́ся, и прокля́т себе́: Тебе́ про́сим, и Тебе́ мо́лимся, осла́би, оста́ви, прости́ ему́ Бо́же, презира́я беззако́ния его́ и грехи́, и я́же в ве́дении и не в ве́дении бы́вшая от него́. и а́ще что́ от за́поведей Твои́х преступи́, или́ согреши́, я́ко пло́ть нося́й, и в ми́ре живя́й, или́ от де́йства диа́вольскаго: Са́м я́ко Бла́г и Человеколю́бец Бо́г прости́: я́ко не́сть челове́ка, и́же поживе́т, и не согреши́т. Ты́ бо Еди́н еси́ безгре́шен: пра́вда Твоя́ пра́вда в ве́к и сло́во Твое́ и́стина. не бо́ созда́л еси́ челове́ка в поги́бель, но в снабде́ние за́поведей Твои́х, и живота́ нетле́ннаго насле́дие: и Тебе́ сла́ву возсыла́ем, со Отце́м, и Святы́м Ду́хом, ны́не и при́сно, и во ве́ки веко́в, ами́нь.

По моли́тве же седмы́й иере́й взе́млет струче́ц седмы́й, и омочи́в и́ во святы́й еле́й, помазу́ет боля́щаго, глаго́ля моли́тву:

О́тче святы́й, Врачу́ ду́ш и теле́с:

По сконча́нии же сего́ больны́й прие́мляй елеосвяще́ние, а́ще мо́жет, са́м вхо́дит посреде́ свяще́нников, или́ держи́мь от свои́х си́ стои́т, или́ седи́т. А́ще же не мо́жет са́м, свяще́нницы са́ми обстоя́т его́ на одре́ лежа́щаго. Настоя́тель же взе́м свято́е Ева́нгелие, и разгну́в е́, возлага́ет писмены́ на главе́ больна́го, придержа́щым все́м свяще́нником. Нача́льствуяй же не возлага́ет ру́ку, но велегла́сно глаго́лет моли́тву сию́:

Царю́ святы́й, благоутро́бне и многоми́лостиве Го́споди Иису́се Христе́, Сы́не и сло́ве Бо́га жива́го, не хотя́й сме́рти гре́шнаго, но я́ко обрати́тися, и жи́ву бы́ти ему́: не полага́ю ру́ку мою́ гре́шную на главу́ прише́дшаго к Тебе́ во гресе́х, и прося́щаго у тебе́ на́ми оставле́ние грехо́в: но Твою́ ру́ку кре́пкую и си́льную, я́же во свято́м Ева́нгелии се́м, е́же сослужи́тели мои держа́т на главе́ раба́ Твоего́, и́мярек, и молю́ся с ни́ми. И прошу́ ми́лостивное и непамятозло́бное человеколю́бие Твое́ Бо́же, Спаси́телю на́ш, проро́ком Твои́м нафа́ном, пока́явшемуся Дави́ду о свои́х согреше́ниих оставле́ние дарова́вый, и манасси́ину е́же о покая́нии моли́тву прие́мый: Са́м и раба́ Твоего́, и́мярек, ка́ющагося о свои́х си́ согреше́ниих приими́ обы́чным Твои́м человеколю́бием, презира́яй вся́ его́ прегреше́ния. Ты́ бо еси́ Бо́г на́ш, и́же и се́дмьдесят кра́т седмери́цею оставля́ти повеле́вый, па́дающым в грехи́: зане́ я́ко вели́чество Твое́, та́ко и ми́лость Твоя́, и Тебе́ подоба́ет вся́кая сла́ва, че́сть и поклоне́ние, ны́не и при́сно, и во ве́ки веко́в, ами́нь.

Сне́мше же Ева́нгелие с главы́ больна́го, даю́т целова́ти е́.

Диа́кон же: Поми́луй на́с Бо́же:

Еще́ мо́лимся о ми́лости, жи́зни:

И о е́же прости́тися ему́:

Возгла́с: Я́ко ми́лостив, и человеколю́бец Бо́г еси́:

Та́же пою́т сла́ва, самогла́сен, гла́с 4:

Исто́чник исцеле́ний, иму́ще святи́и безсре́бреницы, исцеле́ния подава́ете все́м тре́бующым, я́ко преве́лиих дарова́ний сподо́бльшиися от приснотеку́щаго исто́чника спа́са на́шего. глаго́лет бо к ва́м Госпо́дь, я́ко единоревни́телем апо́стольским: се́ да́х ва́м вла́сть на ду́хи нечи́стыя, я́коже те́х изгони́ти, и цели́ти вся́к неду́г, и вся́ку я́зю: те́мже в повеле́ниих его́ до́бре жи́тельствовавше, ту́не прия́сте, ту́не подава́ете, исцеля́юще стра́сти ду́ш и теле́с на́ших.

И ны́не, гла́с то́йже:

При́зри на моле́ния Твои́х ра́б Всенепоро́чная, утоля́ющи лю́тая на ны́ воста́ния, вся́кия ско́рби на́с изменя́ющи: Тя́ бо еди́ну тве́рдое и изве́стное утвержде́ние и́мамы, и Твое́ предста́тельство стяжа́хом, да не постыди́мся Влады́чице, Тя́ призыва́ющии. потщи́ся на умоле́ние, Тебе́ ве́рно вопию́щих: ра́дуйся Влады́чице, все́х по́моще, ра́досте и покро́ве, и спасе́ние ду́ш на́ших.

Сла́ва, и ны́не:

Го́споди поми́луй, три́жды.

Благослови́. И отпу́ст.

Христо́с и́стинный Бо́г на́ш, моли́твами Пречи́стыя Своея́ Ма́тере: си́лою Честна́го и Животворя́щаго Креста́: свята́го сла́внаго и всехва́льнаго Апо́стола Иа́кова, и пе́рваго архиере́а иерусали́мскаго, бра́та Бо́жия, и все́х святы́х, спасе́т и поми́лует на́с, я́ко Бла́г и Человеколю́бец.

И полага́ет покло́н прие́мый молитвома́слие, глаго́ля:

Благослови́те отцы́ святи́и, прости́те мя́ гре́шнаго. Три́жды.

И прии́м от ни́х благослове́ние и проще́ние, отхо́дит благодаря́ Бо́га