На ма́лей вече́рни

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Ду́ха Свята́го теплото́ю, му́дре,/ жела́ния се́рдца твоего́ е́же к Бо́гу согре́яв,/ зи́му страсте́й многоко́зненную умертви́в,/ де́монскую си́лу низложи́л еси́,/ Небе́сное же во́инство// терпе́нием твои́м удиви́л еси́.

Крест Госпо́день взем, преподо́бие Ио́сифе,/ и́стинно после́довал еси́ Христу́,/ нас ра́ди на Кресте́ распе́ншемуея,/ и Его́ ра́ди любве́ вся оста́вил еси́,/ и Того́ Еди́наго возлюби́л еси́,// Его́же моли́ спасти́ся нам.

Я́ко прие́м, о́тче, Небе́сное се́мя в се́рдце,/ плод стори́чествующ доброде́тели прине́сл еси́,/ пита́я благоче́стно/ гла́дом доброде́тели та́ющих ду́ши;/ но, я́ко име́я дерзнове́ние ко Влады́це Христу́,/ моли́ о творя́щих ве́рою и любо́вию па́мять твою́.

Сла́ва, глас 4:

Све́тлый днесь возсия́ нам и всепра́зднственный день,/ я́коже второ́е со́лнце,/ просвеща́я, и наставля́я,/ и отгоня́я мглу помраче́ния на́шею,/ вселе́нную созыва́ет,/ любо́вию к честне́й ра́це припа́дающих/ и любе́зно облобыза́ющих ю./ Моли́, мо́лимся, о́тче,/ ми́ру мир дарова́ти/ и душа́м на́шим ве́лию ми́лость.

И ны́не, пра́здника, глас то́йже: Всечестно́е Твое́ рождество́: 

На стихо́вне стихи́ры преподо́бнаго, глас 2.

Подо́бен: До́ме Евфра́фов:

Дом Ду́ха Свята́го/ был еси́, преподо́бне,/ просвеща́я и наставля́я/ ве́рою и любо́вию// притека́ющия к тебе́.

Стих: Что возда́м Го́сподеви о всех,/ я́же воздаде́ ми?

Блаже́н вои́стину/ и преблаже́н яви́лся еси́,/ прему́дре Ио́сифе,/ мона́шествующих наста́вниче/ и благоче́стия побо́рниче.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Прииди́те, ве́рнии,/ стеце́мся усе́рдно,/ восхва́лим отца́ на́шего,/ и́стины сказа́теля/ и нече́стия обличи́теля.

Сла́ва, самогла́сен, глас то́йже:

Прииди́те, ли́цы мона́шестии,/ днесь ра́достно воспои́м,/ ублажа́юще и прославля́юще нача́льника на́шего,/ Христо́ва уго́дника и Того́ Пречи́стыя Ма́тере,/ преподо́бных сожи́теля и собесе́дника А́нгелов,/ моля́щася Го́споду/ поми́ловатися душа́м на́шим.

И ны́не, пра́здника, глас 4: Всеми́рная ра́дость: 

Тропа́рь пи́сан на вели́цей вече́рни.

Сла́ва, и ны́не, пра́здника.

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры на 8: святы́х богоотце́в на 4 и преподо́бнаго Ио́сифа на 4. Глас 5:

Преподо́бне о́тче, блаже́нне Ио́сифе,/ вельми́ подвиза́лся еси́ на враги́ безпло́тныя,/ пе́сньми, посто́м и моли́твою быв о́браз твои́м ученико́м/ и неле́ностно Христу́ рабо́тая./ Ны́не, преподо́бне, на Небеса́х лику́еши,/ со А́нгелы славосло́вя Тро́ицу Единосу́щную,/ преклоня́я на человеколю́бие Христа́ Бо́га на́шего,/ да спасе́т естество́ челове́ческое./ Того́ у́бо моли́, Тому́ помоли́ся, преподо́бне,/ дарова́ти вселе́нней единомышле́ние// и ча́дом твои́м мир и ве́лию ми́лость.

Преподо́бне о́тче Ио́сифе,/ вельми́ подвиза́лся еси́ на враги́ Креста́ Христо́ва/ и на отмета́ющияся о́браза Спа́сова/ и Его́ Пречи́стыя Богома́тере,/ и посрами́л еси́ ересенача́льники./ Ны́не у́бо, преподо́бне,/ всех нас ко Христу́ помина́й/ и моли́ся о творя́щих ве́рно святу́ю па́мять твою́,/ презре́ти на́ша согреше́ния/ и возвести́ нас на пе́рвое достоя́ние./ Того́ у́бо моли́, Тому́ помоли́ся, преподо́бне,/ дарова́ти вселе́нней единомышле́ние,/ и ве́рным лю́дем на враги́ одоле́ние,// и мир, и ве́лию ми́лость.

Преподо́бне о́тче Ио́сифе,/ вельми́ тя Христо́с просла́ви/ и дарова́ тебе́ сло́во боже́ственнаго ра́зума,/ и́мже отсе́кл еси́ лжу от и́стины,/ и исто́ргл еси́ пле́велы неве́рия,/ и научи́л еси́ сла́вити Тро́ицу Единосу́щную,/ покланя́емаго в Трех Ипоста́сех Еди́наго Бо́га./ Того́ у́бо моли́, Тому́ помоли́ся, преподо́бне,/ дарова́ти прося́щим исцеле́ние,// мир и ве́лию ми́лость.

Сла́ва, глас 6:

Ра́дуйся и весели́ся, це́рковь Бо́жия Ма́тере,/ со свяще́нники же, и с людьми́ благочести́выми,/ и со благоро́дными и христоимени́тыми,/ мона́хи же и просты́ми,/ блаже́ннаго Ио́сифа, отца́ на́шего, днесь па́мять почита́юще,/ духо́вне соше́дшеся, пра́зднуем,/ и, честны́й гроб его́ обстоя́ще, глаго́лем:/ ра́дуйся, о́тче наш Ио́сифе,/ свети́льниче пресве́тлый, врачу́ боля́щих/ и моли́твенниче ко Спа́су Христу́ Бо́гу на́шему/ о ве́рою и любо́вию притека́ющих к ра́це моще́й твои́х,// моли́ спасти́ся душа́м на́шим.

И ны́не, пра́здника, глас 6:

Днесь непло́дная А́нна ражда́ет Богоотрокови́цу,/ от всех родо́в произбра́нную/ в жили́ще Всецаря́ и Зижди́теля, Христа́ Бо́га,/ во исполне́ние Боже́ственнаго смотре́ния,/ и́мже назда́хомся, земноро́днии,// и обнови́хомся от тли к жи́зни неконе́чней.

Вход. Проки́мен дне, и чте́ния.

Прему́дрости Соломо́новы чте́ние (главы́ 5 и 6): Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щий мно́жества и гордя́щийся о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющийся Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.

На лити́и стихи́ры, глас 5.

Подо́бен: Ра́дуйся:

Ра́дуйся, свяще́нная главе́,/ преподо́бне о́тче наш Ио́сифе,/ а́нгельских лико́в собесе́дниче в вы́шних./ На земли́ бо доброде́тельно пожи́л еси́/ и яви́лся еси́ пречи́сто и нескве́рно зерца́ло,/ Ду́ха Свята́го заря́ми блиста́яся, пребога́те,/ и озаря́емь, прозре́л еси́ бу́дущая./ Те́мже Христа́ Бо́га моли́// мир дарова́ти душа́м на́шим и ве́лию ми́лость.

Ра́дуйся, свяще́нная главе́,/ по́стников непоколеби́мый сто́лпе,/ мона́шествующих исправле́ние,/ и ересе́й новоявле́нных богодохнове́нными твои́ми писа́ньми/ злочести́вая их уста́ загради́л еси́,/ и де́монов стремле́ния погуби́л еси́,/ Креста́ ору́жием вся козноде́йства отгоня́я./ И, по преставле́нии твое́м жив, Святе́й Тро́ице предстои́ши,/ о нас моля́ся, ча́дех твои́х,// дарова́ти душа́м на́шим мир и ве́лию ми́лость.

Ра́дуйся, свяще́нная главе́,/ умо́м просвеще́нным ду́шу твою́, о́тче, просвети́л еси́/ и от земны́х преста́вился еси́ во Христо́во Ца́рствие,/ Ио́сифе преблаже́нне,/ в по́стницех ты све́тел яви́лся еси́,/ сла́дости нестаре́емыя ны́не насыща́лся./ О нас, рабе́х твои́х,/ Христу́ Бо́гу моли́ся,// пода́ти нам оставле́ние грехо́в и ве́лию ми́лость.

Сла́ва, глас 6:

Преподо́бне о́тче,/ сохрани́л еси́ добро́ту е́же по о́бразу Бо́жию,/ плоть покори́л еси́ ду́ху,/ сего́ ра́ди всели́ся в тя Пресвяты́й Дух,/ Его́же де́йствием све́тло укра́шен,/ прия́л еси́ дар исцеле́ний/ притека́ющим с ве́рою ко гро́бу моще́й твои́х;/ моли́ся Христу́ Бо́гу,/ дарова́ти нам на враги́ побе́ду,/ и ми́ру мир, и це́рквам единомы́слие,// и душа́м на́шим ве́лию ми́лость.

И ны́не, пра́здника, глас 8: В благознамени́тый день: 

На стихо́вне стихи́ры, глас 2.

Подо́бен: До́ме Евфра́фов:

Прииди́те, ублажи́м/ преподо́бнаго Ио́сифа,/ по́стника, и возде́ржника,/ и мона́хов нача́льника,/ Христо́ва уго́дника.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Днесь, ве́рнии, ублажи́м/ преподобнаго Ио́сифа,/ и́стины сло́ва сказа́теля,/ и по Христо́ве ико́не побо́рника,/ и нече́стия обличи́теля.

Стих: Что возда́м Го́сподеви о всех,/ я́же воздаде́ ми?

Блаже́н еси́, Ио́сифе,/ Христо́в уго́дниче/ и Пречи́стыя Богома́тере,/ пусты́нный жи́телю/ и мона́шествующих наста́вниче.

Сла́ва, глас 2:

Прииди́те днесь, ли́цы мона́шестии,/ притеце́м ко гро́бу преподо́бнаго Ио́сифа,/ моля́щеся Христу́ Бо́гу на́шему,/ прося́ще грехо́в проще́ния,/ и во́инству на́шему на враги́ побе́ды,/ и плене́нным свобожде́ния,/ и ми́ру устрое́ния,/ и це́рквам соедине́ния,/ и душа́м на́шим ве́лия ми́лости.

И ны́не, пра́здника, глас то́йже. Пронарече́нная всех Цари́ца: 

Тропа́рь, глас 5:

Я́ко по́стников удобре́ние/ и отце́в красоту́,/ ми́лости пода́теля,/ разсужде́ния свети́льника,/ вси ве́рнии, соше́дшеся, восхва́лим/ кро́тости учи́теля/ и ересе́й посрами́теля,/ прему́драго Ио́сифа,/ русскую звезду́,/ моля́щася Го́споду/ поми́ловатися душа́м на́шим.

На у́трени

На Бог Госпо́дь: тропа́рь пра́здника и богоотце́в. Сла́ва, преподо́бнаго. И ны́не, пра́здника.

По 1-м стихосло́вии седа́лен, глас 1.

Подо́бен: Ско́ро предвари́:

Досто́йно ублажа́ем тя, преподо́бне Ио́сифе,/ я́ко дерзнове́ние иму́ща ко Го́споду./ О нас при́сно моли́ся изба́витися враго́в належа́щия напа́сти/ и дарова́ти нам, соверша́ющим святу́ю па́мять твою́, ве́лию ми́лость.

Сла́ва, и ны́не, пра́здника.

Аще ли кроме́ попра́зднства:

Сла́ва, и ны́не, Богоро́дичен:

Ум челове́ческий по достоя́нию пе́ти Тя, Влады́чице Пречи́стая Богоро́дице, недоуме́ет,/ но мы зове́м Ти, я́же Арха́нгел Гаврии́л провеща́:/ ра́дуйся, Ада́мово свобожде́ние; ра́дуйся, прама́тере Е́вы оправда́ние;/ ра́дуйся, ми́ра спасе́ние; ра́дуйся, Ма́ти Христа́ Бо́га.

По 2-м стихосло́вии седа́лен, глас 8.

Подо́бен: Взбра́нной Воево́де:

Соше́дшеся, ве́рнии, в па́мять преподобнаго Ио́сифа, духо́вно пра́зднуем,/ восхваля́юще Христа́ Бо́га на́шего, прославля́юща Своего́ уго́дника и да́ром чуде́с обогати́вшаго./ Притеце́м ве́рно ко гро́бу моще́й его́/ и почерпе́м телесе́м здра́вие, ку́пно и душа́м спасе́ние,/ и торжеству́ем све́тло во святу́ю па́мять его́.

Сла́ва, и ны́не, пра́здника.

Аще ли кроме́ попра́зднства:

Сла́ва, и ны́не, Богоро́дичен:

Взбра́нной Воево́де и Засту́пнице на́шей,/ к Тебе́ прибега́ем, Пречи́стая Богоро́дице,/ побори́, Чи́стая, пленя́ющаго ны диа́вола и сводя́ща в стра́сти безчестия./ Те́мже припа́даем к Твоему́, Пречи́стая, о́бразу,/ прося́ще изба́витися вся́кия му́ки и огня́ ве́чнаго,/ заступи́ ны, Ма́ти Христа́ Царя́ Небе́снаго, да зове́м Ти:/ ра́дуйся, Неве́сто Неискусобра́чная.

По полиеле́и седа́лен, глас 5.

Подо́бен: Ра́дуйся:

Ра́дуйся, преподо́бне,/ принесы́й себе́ Христу́ же́ртву жи́ву,/ и, от ю́ности усе́рдно рабо́тая Христу́ Бо́гу/ пе́сньми, посто́м и воздержа́нием,/ водвори́лся еси́ в пусты́ни, еди́н Еди́ному бесе́дуя./ Тем, ви́дев Госпо́дь твое́ до́брое изволе́ние,/ со все́ми учини́ тя преподо́бными и пра́ведными/ водворя́тися в Небе́снем Ца́рствии/ и со А́нгелы Христу́ пе́ти песнь немо́лчную./ Но, я́ко и́маши дерзнове́ние к Нему́,/ моля́, мо́лимся, спасти́ся душа́м на́шим.

Сла́ва, и ны́не, пра́здника, или́ сей Богоро́дичен:

К Богоро́дице возопии́м любо́вию:/ ра́дуйся, гра́де Госпо́день;/ ра́дуйся, ски́птре Дави́дов;/ ра́дуйся, пала́то одушевле́нная;/ ра́дуйся, ста́мно боже́ственныя ма́нны;/ ра́дуйся, неопали́мая купино́,/ ра́дуйся, свеще́ пресве́тлая и свети́льниче златы́й;/ ра́дуйся, горо́ Бо́жия приосене́нная;/ ра́дуйся, огнено́сный престо́ле;/ ра́дуйся, ле́ствице и две́ре Небе́сная;/ ра́дуйся, же́зле, невла́жно прозябы́й;/ ра́дуйся, вся спаса́ющи от вся́ких бед и скорбе́й;/ ра́дуйся, Влады́чице, ми́ра спасе́ние.

Степе́нна, 1-й антифо́н 4-го гла́са.

Проки́мен, глас 4: Честна́ пред Го́сподем/ смерть преподо́бных Его́.

 Стих: Что возда́м Го́сподеви о всех, я́же воздаде́ ми?

Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче Ио́сифе,/ очи́стил еси́ у́мное существо,/ и сохрани́л еси́ добро́ту е́же по о́бразу Бо́жию,/ и плоть покори́л еси́ ду́ху:/ Того́ ра́ди в тя всели́ся си́ла Бо́жия,/ и прия́л еси́ дар исцеле́ний./ Иде́же бо любо́вь и согла́сие,/ та́мо доброде́тели позна́ние,/ а иде́же за́висть и рве́ние,/ та́мо зло́бы явле́ние./ Но у́бо мы бе́гаем сего́ уби́йственнаго по́мысла,/ от него́же да изба́вит ны Христо́с Бог,/ моли́твами твои́ми, преподо́бне Ио́сифе,/ и пода́ст душа́м на́шим мир и ве́лию ми́лость.

Кано́н пра́здника, глас 2, и богоотце́в на 8 и преподобнаго на 6. Аще кроме́ попра́зднства, кано́н Богоро́дицы на 6 и преподобнаго на 8.

Кано́н преподо́бного, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щьшееся же Сло́во всезло́бный грех потреби́ло есть./ Препросла́вленный Господ,// сла́вно бо просла́вися.

Тебе́ твоего́, блаже́нне, уче́ния долг принося́ще,/ воздая́ния простира́ем, вене́ц похва́льный плету́ще:/ ты же, любо́вию увязе́н, пребога́те,/ твои́ми святы́ми моли́твами благода́ть нам пода́ждь духо́вную.

Всегуби́тельное стремле́ние страсте́й, о́тче, увяди́л еси́,/ слове́сным объя́т богому́дрием,/ благопребы́тен был еси́ и благогла́сен, кро́ток же и смире́н,/ сло́вом же прему́дрости, преподо́бне о́тче Ио́сифе, и ра́зумом венча́н.

Свяще́нно украси́л еси́ себе́, преподо́бне о́тче,/ де́тельным ра́зумом благода́ти, богоглаго́ливе Ио́сифе,/ жела́я венца́ сла́вы Христо́вы,/ и своея́ наде́жды изря́дно, блаже́нне, не погреши́л еси́.

Целому́дрие удержа́л еси́ я́ве,/ кра́йнюю же кро́тость и высокогла́сное смире́ние,/ и́миже возвыша́емь, трудо́в твои́х де́йством и виде́нием, ра́дуяся, принесе́ся,/ вене́ц неувяда́емый прии́м трудо́в твои́х воздая́ния.

Богоро́дичен: Тва́рей яви́лася еси́, Чи́стая,/ всех ви́димых и неви́димых превы́шши, Всенепоро́чная,/ Зижди́теля бо родила́ еси́, я́коже изво́ли воплоти́тися во утро́бе Твое́й./ Его́же со дерзнове́нием моли́ спасти́ пою́щия Тя.

Ин кано́н преподо́бнаго, глас 6.

Песнь 1

Ирмо́с: Волно́ю морско́ю/ Скры́вшаго дре́вле/ гони́теля мучи́теля/ под земле́ю скры́ша спасе́нных о́троцы;/ но мы, я́ко отрокови́цы,/ Го́сподеви пои́м,// сла́вно бо просла́вися.

О Бо́жий Сло́ве, ми́лостиве Христе́ Царю́!/ Пре́зри моя́ мно́гая согреше́ния,/ и отве́рзи ми косноязы́чная уста́,/ и дух прав обнови́ во утро́бе мое́й,/ и даждь ми, Христе́, сло́во ра́зума,/ да воспою́ Твоего́ уго́дника, преподо́бнаго Ио́сифа.

Повину́лся еси́, преподо́бне, вседу́шно твоему́ отцу́, преподо́бному Пафну́тию,/ и был еси́ я́ко други́й Исаа́к, ра́ди кра́йняго послуша́ния./ Те́мже, преподо́бне, в тя всели́ся Пресвяты́й Дух,/ Его́же де́йствием све́тло украша́емый,/ и ны́не предстои́ши Святе́й Тро́ице, ра́дуяся.

Уподо́бился еси́, преподо́бне Ио́сифе,/ дре́внему Иа́кову, послу́шавшу своея́ ма́тере,/ о́тчее благослове́ние прие́мшему:/ ты же преподо́бному Пафну́тию повину́лся еси́/ и, от него́ благослове́ние прии́м,/ устроя́ешися па́стырь Христо́ва ста́да в то́йже оби́тели,/ Бо́гу та́ко изво́лыну.

Богоро́дичен: К Тебе́ прибега́ем, Богоро́дице Всепе́тая,/ и, Тебе́ припа́дающе, мо́лимся,/ Твои́м хода́тайством, Влады́чице, и моли́твами Твоего́ уго́дника, преподо́бнаго Ио́сифа,/ ми́лостива нам сотвори́ Его́же пречи́сто и недове́домо родила́ еси́,/ Христа́ Бо́га на́шего.

Песнь 3

Ирмо́с: Процвела́ есть пусты́ня, яко крин, Го́споди,/ язы́ческая неплодя́щая це́рковь/ прише́ствием Твои́м,// в не́йже утверди́ся мое́ се́рдце.

Даждь, Христе́ Спа́се, проще́ние мно́гих на́ших согреше́ний,/ я́ко да и мы почита́ем па́мять Твоего́ уго́дника, преподобнаго Ио́сифа,/ его́же моли́твами спаси́ ны.

Твои́ми моли́твами ми́лостиваго умоля́й Бо́га, преподо́бне о́тче наш Ио́сифе,/ и грехо́вный мрак печа́ли на́шея разори́,/ и благоду́шия утеше́ние низпосли́.

От младе́нства ты, блаже́нне Ио́сифе, позна́н был еси́ Бо́гом/ и на Того́ наде́ялся еси́, наставля́емь на спаси́тельная Его́ повеле́ни́я./ Ему́же ны́не предстоя́, со дерзнове́нием о нас моли́ся.

Богоро́дичен: Еди́наго Святы́я Тро́ицы, Сло́ва Сы́на родила́ еси́, Де́во Пречи́стая,/ Его́же с преподо́бным Ио́сифом о рабе́х Твои́х моли́,/ ве́рою прося́щих грехо́в проще́ния.

Ин

Ирмо́с: Тобо́ю, Христе́, Небеса́ утвержда́ема вся,/ Сло́во Бо́жие и Си́ла,/ испове́дуют сла́ву неизрече́нну,/ и вседе́тельныя руки́ Твоея сотворе́ние:// несть бо пресвя́т, ра́зве Тебе́, Го́споди.

Не преда́ждь, Влады́ко, Твоего́ достоя́ния враго́м, хва́лящимся на ны,/ мо́лим Тя, Ми́лостиве,/ спаси́ правосла́вныя Христиа́ны, и бу́ди ми́лостив Твоим рабо́м,/ и изба́ви ны, Христе́ Царю́, муче́ния и огня́ негаси́маго,/ и сподо́би ны десна́го предстоя́ния,/ моли́твами преподо́бнаго Ио́сифа.

Напо́лнися се́рдце твое́, преподо́бне, благода́ти Христо́вы и пра́ваго уче́ния,/ был еси́ о́браз мона́шествующих, вся́кими добро́тами духо́вными:/ не дал бо еси́ сна твои́м очесо́м, ни ве́ждам дрема́ния,/ но, я́ко стяжа́л еси́ дерзнове́ние ко Го́споду,/ моли́ о нас, мо́лим тя,/ да бу́дет нам ми́лостив в День Су́дный.

Я́ко лев стра́шен из пусты́ни устреми́вся,/ устраши́л еси́ безбо́жныя еретики́,/ име́я, преподо́бие, меч духо́вный, и́же есть глаго́л Бо́жий,/ посе́кл еси́ изни́кшая нече́стия/ и из ко́рене исто́ргл еси́ злосла́вных уче́ния,/ собра́л еси́, я́ко трудолюби́ва пчела́, от всех писа́ний Боже́ственная словеса́/ и си́ми уста́ скве́рная безбо́жных загради́л еси́,/ преподо́бне Ио́сифе.

Богоро́дичен: Дивя́тся, Ма́ти Бо́жия, Небе́снии чи́ни красоте́ души́ Твоея́ и чистоте́ де́вства Твоего́;/ мы же, земни́и, недоуме́ем глаго́лати несказа́ннаго рождества́ Твоего́,/ ему́же та́йно науча́ющеся, позна́хом Тя, ро́ждшую Христа́ Бо́га на́шего,/ Его́же ми́лостива нам сотвори́ в День Су́дный стра́шнаго Прише́ствия Его́.

Конда́к и и́кос пра́здника.

Та́же преподобнаго седа́лен, глас 3.

Подо́бен: Красоте́ де́вства:

Христо́ва уго́дника, Ева́нгельскаго уче́ния послу́шника,/ све́тло пра́зднуем преподо́бнаго Ио́сифа па́мять./ Прииди́те, ублажи́м странноприи́мца су́ща, сирота́м и вдова́м засту́пника те́пла,/ и ни́щим да́теля неску́дна,/ целому́дрия храни́теля, и доброде́телей де́лателя,/ и ересе́й обличи́теля непосты́дна,/ и свети́льника ру́сскаго,/ его́же ра́ди прося́ще от Христа́ душа́м на́шим спасе́ния и ми́ру ве́лия ми́лости.

Сла́ва, и ны́не, пра́здника.

Аще ли кроме́ попра́зднства:

Сла́ва, и ны́не, сей Богоро́дичен:

Земноро́днии Тобо́ю спасе́ни бы́хом, Пречи́стая Богоро́дице,/ пре́жде век бо из Отца́ ро́ждшагося Сы́на Бо́жия породила́ еси́,/ за милосе́рдие мно́гое благоволи́вшаго из Тебе́ роди́тися,/ И́же спасе́ Ада́ма пра́отца и рая́ сотвори́ жи́теля./ Его́же моли́, Ма́ти Преблагослове́нная,/ спасти́ся нам, ве́рно пою́щим Тя.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя челове́ка.// Тем зову́ Ти: сла́ва си́ле Твое́й, Го́споди.

Ты, преподо́бне Ио́сифе, мона́шествующих был еси́ вене́ц,/ не ка́мением многоце́нным укра́шен, но доброде́тельми обложе́н,/ и яви́лся еси́, блаже́нне, благодарова́нное вои́стину украше́ние.

Боже́ственную, богому́дре, почти́л еси́ Му́дрость,/ я́же тя дарова́нии благи́ми обогати́, сла́ву ве́чную тебе́ исхода́тайствовавши,/ преподо́бне о́тче, Ио́сифе всече́стне.

Све́тлостию нра́вов твои́х и о́бразы благода́ти, преподо́бне о́тче Ио́сифе,/ подо́бне пожи́л еси́;/ те́мже благопристу́пен ты всем был еси́, всеблаже́нне досточу́дне.

Богоро́дичен: Умерщвле́ние плодо́м мне Е́ва принесе́,/ Ты же, Жизнь ро́ждши Ипоста́сную, Пречи́стая, а́бие испра́вила еси́./ Те́мже зове́м Ти: сла́ва си́ле Твое́й.

Ин

Ирмо́с: Удиви́ся Твои ра́зум от мене́,/ услы́шавшу пресла́вная веле́ния смотре́ния Твоего́,/ укрели́ся же возлюбле́нием Твоего́ схожде́ния:// Ты бо моея́ нищеты́ не отве́рглся еси́.

Я́коже дре́вле Ио́сифу Прекра́сному зави́девше, бра́тия сове́т лука́в умы́слиша,/ та́ко и на тя, преподо́бне Ио́сифе, сове́товаша лука́вое умышле́ние./ Ты же, любо́вию ко Христу́ вперя́емь, сих негодова́ния в ничто́же вмени́в,/ непреста́нно моли́ся о нас Го́споду.

Изше́л еси́, преподо́бне, от иде́же пре́жде нача́льствуя,/ Христу́ Царю́ Небе́сному моля́ся и Пречи́стей Богоро́дице,/ ше́ствуя на ме́сто, Бо́гом тебе́ пока́занное,/ и та́мо пусты́ню населя́вши Христа́ ра́ди,/ в не́йже зарю́ све́тлу узре́ти сподо́бился еси́ благода́ти духовныя,/ блаже́нне Ио́сифе.

Преподо́бне о́тче, уподо́бился еси́ Ио́сифу Прекра́сному:/ не покори́лся бо еси́ сладостра́стию,/ и зело́ тща́лся еси́ о целому́дрии, мы́сленнаго зми́я победи́л еси́,/ и со́ннаго жития́ небре́гл еси́, из темни́цы те́ла изше́л еси́,/ и царь не Еги́пта, но страсте́й был еси́,/ и доброде́тели пшени́цу собра́л еси́,/ е́юже ны, ча́да твоя́, пита́еши.

Богоро́дичен: Пречи́стая Богоро́дице, ве́мы Тя, христиа́не, тве́рдую Защи́тницу,/ и ско́рую Помо́щницу, и в беда́х избавле́ние./ Те́мже мо́лим Тя:/ испроси́ нам у Христа́ мно́жеству согреше́ний проще́ние и ве́чный му́ки избавле́ние.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же,/ Тобо́ю бо, Влады́ко, к Светонача́льнику Отцу́ Твоему́/ от но́щи неве́дения// приведе́ние и́мамы.

Умо́м чи́стым Писа́нием Боже́ственным бесе́довал еси́,/ богоглаго́ливе Ио́сифе,/ и виде́ния и дея́ния собра́в бога́тство, о́тче преподо́бне.

Прему́дрости глубину́ испыта́в, му́дре Ио́сифе,/ дости́гл еси́ обрести́, ели́ко благопотре́бно,/ и би́сер многоце́нный боле́зньми стяжа́л еси́, преблаже́нне, ра́зума.

Аще земно́е оте́чество, блаже́нне Ио́сифе, оста́вил еси́,/ вся́чески благоимени́тну Бо́жии Ма́тери оби́тель созда́л еси́/ и мно́жество мона́шествующих в ней собра́л еси́,/ сего́ ра́ди пе́рвое Оте́чество Небе́сное прия́л еси́./ Со дерзнове́нием, о́тче, за ны моли́ся Христу́ Бо́гу, рабы́ твоя́.

Богоро́дичен: Се во чре́ве, Богоро́дице Пречи́стая,/ Христа́ Бо́га па́че сло́ва име́ла еси́,/ я́коже Иса́ия провозгласи́,/ и вы́ше естества́ Сего́, Богороди́тельнице, родила́ еси́.

Ин

Ирмо́с: Мир мног лю́бящим Тя, Христе́,/ и нощь просвеще́ния в пи́щи слове́с Твои́х,/ сего́ ра́ди, от но́щи у́тренююще,// про́сим ми́лости от Тебе́, Человеколюбче.

Всяк пи́сменник, научи́вся Боже́ственному Писа́нию, подо́бен есть Ца́рствию Небе́сному;/ ты же, преподобне, поревнова́в Ева́нгельскому уче́нию,/ и от сего́ прия́л еси́ кре́пость духо́вную,/ Сха́рия евре́ина посрами́л еси́ и его́ прокля́тыя ученики́, та́яжде му́дрствующия,/ и ана́феме пре́дал еси́.

Преподо́бне о́тче, дарова́ тебе́ Бог му́дрость и сло́во ра́зума;/ ты же пропове́дал еси́ в Трие́х Ли́цех Еди́наго Бо́га/ и сему́ свиде́тельство приве́л еси́ от Боже́ственных Писа́ний,/ науча́я покланя́тися в Тро́ице Еди́ному Бо́гу.

Преподо́бне о́тче Ио́сифе,/ безу́мныя еретики́, глаго́лющия, я́ко еще́ Христо́с не роди́ся, обличи́в я́сно,/ сказа́л еси́, я́ко роди́ся Христо́с на́шего ра́ди спасе́ния от Пречи́стыя Де́вы Мари́и,/ и нас ра́ди пострада́ во́лею распя́тие, и воскре́се тридне́вно,/ и па́ки гряде́т со святы́ми Ангелы суди́ти весь мир.

Богоро́дичен: О безу́мнии еретицы́ и отсту́пницы и непокори́вии евре́е,/ его́же вы ча́ете, той несть Христо́с, но анти́христ есть, я́коже свиде́тельствуют Боже́ственная Писа́ния./ Мы же испове́дуем Христа́ Бо́га на́шего, ро́ждшагося неискусому́жно от Де́вы Чи́стыя Мари́и;/ Ея́же моли́твами изба́ви нас, Христе́, от таковы́я пре́лести и спаси́ ду́ши на́ша.

Песнь 6

Ирмо́с: В бе́здне грехо́вней валя́лся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́.

Вселе́нней свети́ло пресве́тлое, о́тче, яви́лся еси́, Ио́сифе,/ словесы́ духо́вными просвеща́я/ ве́рою и любо́вию к тебе́ притека́ющия.

Блаже́нное житие́, о́тче, преше́л еси́, назда́в у́бо чу́вства,/ вне был еси́ мирска́го мяте́жа/ и Бо́гу прибли́жился еси́, преподо́бне Ио́сифе.

Зело́ ми́лостива и странноприи́мца показа́ тя Спас наш ми́ру, о́тче,/ и врача́ боля́щим, Ио́сифе,/ сирота́м и убо́гим засту́пника любе́зна.

Богоро́дичен: Па́че естества́, Де́во, родила́ еси́/ и ве́чнуеши Де́ва,/ я́вльшися и́стиннаго Сы́на и Бо́га Твоего́ Ма́ти Чи́стая.

Ин

Ирмо́с: Бе́здна после́дняя грехо́в обы́де мя,/ и волне́ния не ктому́ терпя́,/ я́ко Ио́на, Влады́це вопию́ Ти:// от тли мя возведи́.

Я́ко свяще́нник сый пои́стине, приноси́л еси́ Христу́ Бо́гу Же́ртву Безкро́вну,/ та́йно возложе́нную и от А́нгел сла́вимую,/ от Бо́га Отца́ прие́млему и Святы́м Ду́хом осеня́ему,/ и нам на спасе́ние да́руему.

О безу́мнии еретицы́!/ Что поощря́ете язы́ки богоху́льныя, глаго́люще:/ не можа́ше ли Бог не роди́вся спасти́ мир ина́ко?/ Ты же, преподо́бне Ио́сифе, сих уста́ загради́л еси́,/ науча́я сла́вити Христа́ Бо́га на́шего.

Преподо́бне о́тче Ио́сифе,/ еретико́в уста́ загради́л еси́, приводя́ свиде́тельства от Боже́ственных Писа́ний:/ пыта́йте, рече́, безу́мнии, Писа́ния,/ я́ко яви́лася есть Свята́я Тро́ица Авраа́му в Трех Ли́цах, во Еди́ном Божестве́.

Богоро́дичен: Припа́даем Тебе́, Пречи́стая Богоро́дице, со умиле́нием глаго́люще:/ изба́ви ны, Ма́ти Христа́ Бо́га, вея́ния пре́лести, разлуча́ющий от Бо́га,/ и сподо́би в День Су́дный получи́ти от Христа́ ми́лость/ и не отпа́сти десна́го предстоя́ния.

Конда́к, глас 8.

Подо́бен: Взбра́нной:

Жития́ треволне́ния, и мяте́ж мирски́й,/ и стра́стная взыгра́ния в ничто́же вменя́в,/ пусты́нный граждани́н показа́лся еси́,/ мно́гих быв наста́вник, Ио́сифе преподо́бне;/ мона́хов собра́тель и моле́бник ве́рен, чистоты́ рачи́тель,// моли́ Христа́ Бо́га спасти́ся душа́м на́шим.

И́кос:

Боже́ственными доброде́тельми твои́ми себе́, му́дре, украси́л еси́/ и Спа́са Христа́ жили́ще соде́лал еси́, о́тче, му́жественне,/ я́коже зла́то искуси́вся ве́рою к Бо́гу, и наде́ждею, и любо́вию, обе́ты полага́я:/ воздержа́нием пости́вся, я́ко безпло́тен,/ в целому́дрии и в смире́нии возвы́сился еси́./ Те́мже и мы, моли́твами Твои́ми просве́щшеся, преподо́бне Ио́сифе, вопие́м ти:/ ра́дуйся, я́ко измла́да Бо́гу послужи́л еси́;/ ра́дуйся, я́ко притека́ющих к тебе́ ко спасе́нию хода́тай был еси́;/ ра́дуйся, христолюби́вому во́инству похвала́;/ ра́дуйся, я́ко твои́ми моли́твами проти́внии побежда́ются;/ ра́дуйся, я́ко всем прося́щим дае́ши дар, от Го́спода дарова́нный тебе́;/ ра́дуйся, я́ко чудесы́ тя Бог прославля́ет и всех зва́ти тебе́ науча́ет:/ ра́дуйся, преподо́бне о́тче Ио́сифе, по́стников удобре́ние,/ моли́ Христа́ Бо́га спасти́ся душа́м на́шим.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ богочести́вым отроко́м ро́су духо́вную, // сын Благослове́н и Препросла́влен.

Благоуха́ют, преподо́бне Ио́сифе, твои́х уче́ний сла́дкая словеса́ лю́бящим та́я,/ устраша́ют же еретико́в мудрова́ния./ Благода́тию бо Свята́го Ду́ха глаго́лал еси́,/ Божество́ Еди́но пропове́дуя в Трех Ли́цех;/ Сло́ва же Воплоще́ние поя́, благоуха́вши нас, пребога́те.

Риз ху́дость име́л еси́, преподо́бне Ио́сифе,/ в зиме́ же и ле́те не пременя́я,/ боле́зненно претерпева́л еси́, Бо́га ра́ди соверше́нно;/ те́мже и Небе́снаго прия́тия сподо́бился еси́ насле́дник бы́ти.

Сло́во твое́ со́лию растворе́но, о́тче,/ и житие́ твое́ благода́тию, преблаже́нне, сия́я яви́ся, пречу́дне./ Те́мже и в вы́шния оби́тели, ра́дуяся, всели́лся еси́,/ Христу́ со дерзнове́нием ны́не предстои́ши, о нас моля́ся.

Богоро́дичен: Управля́ющи, Пречи́стая, на́ше житие́,/ к Твоему́ всети́хому приста́нищу напра́ви:/ Бо́га бо родила́ еси́, благи́х Исто́чника,/ всем подаю́щи ве́рным нетле́ния благода́ти.

Ин

Ирмо́с: О́троцы в Вавило́не пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:// благослове́н еси́, Го́споди Бо́же оте́ц на́ших.

Сказу́я, преподо́бне, от Боже́ственных Писа́ний,/ ка́ко и ко́ея ра́ди вины́ подоба́ет Христиа́ном/ покланя́тися и почита́ти святы́я ико́ны, и честны́й Крест Христо́в, и про́чая свяще́нная воображе́ния,/ сим прия́л еси́ от Христа́ дарова́ния, поя́:/ благослове́н еси́, Го́споди Бо́же оте́ц на́ших.

Из Еги́пта страсте́й изше́л еси́, преподо́бне,/ и преше́л еси́ мо́ре жите́йское без истопле́ния,/ и дости́гл еси́ Го́ру Небе́сную,/ мно́гия гре́шных ду́ши приводя́ Христу́ покая́нием и поя́:/ благослове́н еси́, Го́споди Бо́же оте́ц на́ших.

Потопи́л еси́, преподо́бне, фарао́на мы́сленнаго в вода́х слез твои́х,/ и его́ колесни́цы, и́же суть лука́выя де́моны,/ и ко́ни и вса́дники, злоу́мныя еретики́ и безбо́жныя,/ и, ра́дуяся, песнь побе́дную воспе́л еси́:/ благослове́н еси́, Го́споди Бо́же оте́ц на́ших.

Богоро́дичен: Аз, Де́во Чи́стая, к Тебе́ прибега́ю, окая́нный, неки́й Тобо́ю обрести́ спасе́ние:/ вем бо, Пречи́стая Влады́чице, я́ко мо́жеши, ели́ка хо́щеши./ Христа́, Его́же родила́ еси́, Пречи́стая, моли́,/ да бу́дет нам ми́лостив в День испыта́ния, пою́щим:/ благослове́н еси́, Го́споди Бо́же оте́ц на́ших.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпо́дня, Го́спода.

Вене́ц благоле́пен Христо́с Жизнода́вец на верх твой положи́, тезоиме́нне Ио́сифе,/ дея́ньми бо просия́л еси́ и виде́нии, зовы́й:/ благослови́те, вся дела́ Госпо́дня, Го́спода.

Вся преше́д чу́вственная, преблаже́нне, Уму́ Пе́рвому прибли́жился еси́/ души́ твоей чистото́ю, жития́ же све́тлостию, венчено́сче Ио́сифе, зовы́й:/ благослови́те, вся дела́ Госпо́дня, Го́спода.

В души́ твое́й Боже́ственное бога́тство Ду́ха Свята́го собра́в,/ непоро́чную моли́тву и чистоту́ красноле́пную, бде́ние и воздержа́ние,/ сего́ ра́ди жили́ще Святы́я Тро́ицы яви́лся еси́, преподо́бне Ио́сифе.

Богоро́дичен: Влады́чице Пречи́стая, гре́шников спасе́ние, приими́ мольбу́ сию́/ и изба́ви мя от грехо́в мои́х, Твоему́ Сы́ну прибега́ющаго,/ моли́твами уго́дника Твоего́, преподо́бнаго Ио́сифа.

Ин

Ирмо́с: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеца́х вменя́ется в Вы́шних Живы́м/ и во гроб мал странноприе́млется./ Его́же, о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Что, безу́мнии еретицы́, всу́е мяте́теся, глаго́люще,/ я́ко уже́ седмь ты́сящ лет сконча́шася, Христо́во же прише́ствие еще́ несть?/ Сия́ глаго́лющих де́рзостне обличи́л еси́, сказу́я:/ близ есть, при две́рех, прише́ствие,/ я́ко глаго́лют проро́цы и апо́столи, и́мже сказа́ Святы́й Дух, и науча́я пе́ти:/ Его́же, де́ти, благослови́те, свяще́нницы, по́йте и превозноси́те во вся ве́ки.

Стра́шно есть впа́сти в ру́це Бо́га Жи́ва, безу́мнии, не льсти́теся,/ не крести́т Христо́с по сме́рти спасе́нным креще́нием непра́ве о Нем му́дрствующих,/ но во огни́ негаса́ющем му́чит;/ мы же, ве́рнии, у Христа́ про́сим вре́мя покая́ния,/ да бу́дет нам ми́лостив в День стра́шнаго Его́ Прише́ствия./ Сия́, преподо́бне, глаго́лал еси́ и нас учи́л еси́ пе́ти:/ Го́спода, де́ти, благослови́те, свяще́нницы, по́йте и превозноси́те Его́ во ве́ки.

Моисе́й вели́кий в пусты́ни повеле́ Изра́илю выспрь на ме́дный змий взира́ти,/ и та́ко угрызе́ния змии́на избавля́хуся./ Ты же, преподо́бне, нечести́выя науча́я покланя́тися Кресту́ Животворя́щему,/ и сла́вити Святу́ю Тро́ицу во Еди́ном Божестве́,/ и сим избавля́тися пре́лести зми́я мы́сленнаго, диа́вола,/ и нас уча́ пе́ти:/ де́ти, благослови́те Го́спода, свяще́нницы, по́йте и превозноси́те Его́ во ве́ки.

Богоро́дичен: Тобо́ю, Пречи́стая Богоро́дице, от вся́кия напа́сти избавля́емся,/ изба́ви ны, Ма́ти Бо́жия, ве́чнаго осужде́ния, да зове́м Ти немо́лчно:/ ра́дуйся, купино́ неопали́мая; ра́дуйся, горо́ присе́нная;/ ра́дуйся, запеча́танный исто́чниче; ра́дуйся, Де́во Чи́стая, Госпо́дь с Тобо́ю,/ Его́же благословя́т вся тварь и превозно́сит во вся ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы, нам яви́ся,/ омраче́нныя просвети́ти, собра́ти расточе́нная.// Тем Всепе́тую Богоро́дицу велича́ем.

Пречестны́й о́тче Ио́сифе,/ ны́не чи́сто услажда́ешися пи́щею па́че у́мною,/ иде́же собо́ри святы́х о́крест Го́спода лику́ют, блаже́нне;/ и́же ны́не чту́щия тя, хода́тайствуя, к себе́ привлецы́.

Преше́л еси́, ра́дуяся, к жела́нием рая́,/ ко еди́ному и́стинно я́ве блаже́нству,/ к пребо́льшей добро́те и к жи́зни и́стинно нестаре́ющейся,/ и к Све́ту Невече́рнему, богоно́се о́тче Ио́сифе.

Якоже со́лнце, просия́л еси́ в мона́шеских собо́рех,/ от млады́х бо ногте́й освяще́н был еси́,/ я́коже зарю́, испуща́я доброде́тели своего́ жития́,/ преподо́бне Ио́сифе, богоно́се о́тче пребога́те.

Богоро́дичен: Разуме́вше издале́ча прозорли́выми очесы́,/ проро́цы Тя я́ве провозвести́ша,/ хотя́щую Ма́терь бы́ти Вседе́теля и Влады́ки всех./ Тем Тя, Всепе́тая,/ Богоро́дицу испове́дуем.

Ин

Ирмо́с: Не рыда́й, Мене́, Ма́ти,/ зря́щи во гро́бе,/ Его́же во чре́ве без Се́мене зачала́ еси́ Сы́на./ Воста́ну бо и просла́влюся/ и вознесу́ со сла́вою непреста́нно, я́ко Бог,// ве́рою и любо́вию Тя велича́ющия.

Преподо́бне о́тче Ио́сифе,/ помина́й нас, ча́да твоя́, ко Христу́ Бо́гу на́шему,/ да спасе́т от вся́ких бед и скорбе́й/ и сподо́бит ми́лости и десна́го пред стоя́ния в День Су́дный,/ сла́вити Свое́ Божество́, ве́рою и любо́вию Того́ велича́ющия.

Преподо́бне о́тче Ио́сифе,/ мона́шеское житие́ возлюби́л еси́ и ху́лящих то́е уста́ загради́л еси́,/ апо́стола Па́вла я́же к Тимофе́ю словеса́ возвеща́я,/ я́ко мона́шеское житие́ Бо́гу прия́тно есть,/ Ему́же и ты сим благоугоди́л еси́;/ сего́ ра́ди тя ублажа́ем.

Я́ко Иису́с Нави́н подвиза́ся на иерихо́няны,/ та́ко ты, блаже́нне, словесы́ твои́ми безбо́жных уста́ загради́л еси́ отсту́пников/ и мно́гая неве́рия укроти́л еси́,/ науча́я сла́вити Святу́ю Тро́ицу:/ сего́ ра́ди тя ублажа́ем.

Богоро́дичен: О Пресвята́я Влады́чице Богоро́дице!/ Не и́мамы по́мощи ины́я, ра́зве Тебе́,/ моли́ся Сы́ну Твоему́ и Бо́гу на́шему, с преподо́бным Ио́сифом,/ да соблюде́т лю́ди Твоя́ и сохраня́т страну́ на́шу неруши́мо,/ и да спасе́т ны, ве́рою и любо́вию Тя велича́ющия.

Свети́лен преподо́бнаго:

Мирска́го пристра́стия, я́ко скве́рны, уклоня́лся еси́,/ и алчбо́ю плоть твою́ увяди́л еси́, о́тче,/ и Небе́сною сла́вою со А́нгелы обогати́лся еси́;/ те́мже непреста́нно моля́ Христа́ Бо́га, преподо́бне Ио́сифе.

Сла́ва, и ны́не, пра́здника.

На хвали́тех стихи́ры на 4, глас 5.

Подо́бен: Преподо́бне о́тче:

Преподо́бне о́тче,/ ду́шу твою́ с те́лом очи́стил еси́/ и Свята́го Ду́ха прекра́сная оби́тель яви́лся еси́,/ и сла́вна тя конце́м, преблаже́нне Ио́сифе, соде́ла,/ в чудеса́х же вели́ка свети́льника,/ просвети́вшаго су́щия во мра́це неве́дения;// я́ко наста́вника мно́гих мона́хов, соше́дшеся, велему́дренно ублажи́м.

Яви́лся еси́, богоблаже́нне, му́драя плени́ца,/ связу́ющая мно́гая враго́в ополче́ния:/ те́мже и венце́м венча́лся еси́ неувяда́емым,/ весе́лие и ра́дость ве́чную восприя́л еси́,/ богому́дре Ио́сифе./ Моля́ дарова́ти мир ми́ру// и душа́м на́шим ве́лию ми́лость.

Преподо́бне о́тче,/ теле́сныя стра́сти зо́льным воздержа́нием/ и по́стническими моли́твами же и труды́ успи́л еси́,/ сле́зными же пото́ки и по́ты у́глие сладостра́стия погаси́л еси́./ Того́ ра́ди в чудеса́х сла́вна тя показа́ Госпо́дь росси́йским лю́дем,/ Ио́сифе блаже́нне,/ и украси́ тя вы́шними дарова́нии./ Ему́же слу́жиши с Небе́сными Си́лами,// Иису́су Человеколю́бцу и Спа́су душ на́ших.

Сла́ва, глас 6:

Прииди́те, празднолю́бцы/ и по́стников сосло́вие,/ ве́рою соше́дшеся,/ и́стиннаго по́стника днесь почти́м,/ ра́достно ше́ствовавшаго по стопа́м Влады́ки Христа́/ у́зкий путь и безстра́стное житие́./ Я́коже дре́вле Авраа́м пра́ведный,/ преподо́бне о́тче Ио́сифе,/ страннолю́бив притяжа́л еси́,/ та́кожде пресели́лся еси́ от оте́чества твоего́ до ме́ста,/ иде́же ны́не лежа́т честно́е те́ло твое́./ Те́мже вси притека́юще, вопие́м ти:/ о всеблаже́нне и преподо́бне Ио́сифе,/ по́стников похвало́, и собесе́дниче безпло́тных,/ во́инству на́шему на пога́ныя спосо́бниче,/ и наста́вниче мона́хов,/ и о нас моли́ся, раба́х твои́х, Христу́ Бо́гу на́шему,// спасти́ся душа́м на́шим.

И ны́не, пра́здника.

На литурги́и

Блаже́нны от кано́на пра́здника, песнь 1-я, на 4, и преподо́бнаго, песнь 6-я, на 4. Проки́мен, глас 7-й: Честна́ пред Го́сподем// смерть преподо́бных Его́.

Стих: Что возда́м Го́сподеви о всех, я́же воздаде́ ми?

Апо́стол к Гала́том, зача́ло 213.

Аллилу́йя, глас 6-й: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́:

Ева́нгелие от Матфе́я, зача́ло 43.

Прича́стен: В па́мять ве́чную:

Моли́тву зри 18 октября́.

Святи́теля Феодо́сия, архиепи́скопа Черни́говскаго, чудотво́рца