На Го́споди, воззва́х: стихиры, глас 8

Подо́бен: О преславнаго чудесе:

Мучениче Ло́нгине всехвальне,/ крове́й очервле́нии спасительную себе ри́зу обагрил еси,/ болезненными страдании обнажи́в многоко́зненнаго./ И ныне в Вышнем живеши Царствии,/ венцем неувя́дным увенчався, яко победитель,/ тем твою славную память почитаем.

Мучениче Ло́нгине всехвальне,/ на Кресте Сына Божия узре́в,/ страждуща волею/ и смерти вкушающа,/ егда и солнце видел еси, свет свой омрачи́вшее,/ и горы трепе́щущия,/ тогда взывал еси иудейскому соборищу:/ истинно Сын Божий Сей есть и Господь и Царь всех.

Мечем главу́ твою отсекоша еврейстии людие,/ пребеззаконный сонм, народ неблагодарный,/ в гнои́ повергше,/ и убо жена невидящая притекши,/ и сию вземши, свет приемлет./ О всеблаженне Ло́нгине всехвальне,/ за ны молися ко Господу, еже спастися нам.

Слава, глас 6. Иоа́нна монаха:

В стра́сти Твоей, Христе,/ храм узре́в, разсе́дшся Ло́нгин стоначальник,/ Сына Божия Тя быти иудеем проповедаше./ Тем лю́тии Божественную главу́ его/ отсе́кше мечем, в гнои поверго́ша,/ жена же, сию обретши,/ затворенныя зеницы оче́с своих отверзе./ С неюже и мы вопием Ти:/ Иже сего венчавый, за Тя пострадавша,/ того молитвами и наша очеса́ сердечная просвети́/ сла́вити Тя Бога, на Кресте пригвожденнаго плотию,/ во еже спасти нас.

И ныне, Богородичен или Крестобогородичен

Подобен: Все отло́жше:

А́гнца Своего А́гница Нескверная древле/ и Непорочная Владычица/ на Древе Крестнем яко узре, матерски восклица́ше/ и, дивящися, вопияше:/ Чадо Сладчайшее,/ что зрение сие новое и преславное?/ како сонм безблагодатный/ суди́щу Пила́тову предаде́ Тя/ и осуждает на смерть Живота всяческих?/ но воспеваю Твое неизреченное, Слове, снизхожде́ние.

На стиховне Октоиха

Слава мученика, глас 6. Иоанна монаха:

При Кресте́ предстоя́ и бывающая смотря́я,/ распинаема на Древе Бога и Человека видев,/ вопия́л еси к Нему:/ во Царствии Твоем помяни мя, Господи./ Тем и Спас приглаша́ше тебе:/ блажен еси, Ло́нгине,/ и память твоя в род и род.

И ныне, Богородичен или Крестобогородичен

Подобен: Тридневен:

Видящи Тя распинаема, Христе,/ Тебе Рождшая вопияше:/ что странное еже вижу таинство, Сыне Мой?/ како на Древе умираеши плотию повешен,/ Жизни Подателю.

Тропарь, глас 4:

Мученик Твой, Господи, Ло́нгин,/ во страдании своем венец прият нетленный от Тебе, Бога нашего:/ име́яй бо крепость Твою,/ мучителей низложи́,/ сокруши́ и демонов немощныя дерзости./ Того молитвами/ спаси души наша.

На утрени

Оба канона октоиха и святаго канон, егоже краегране́сие: Ло́нгинову великую воспою славу. Иосиф. Глас 4.

Песнь 1

Ирмос: Моря чермну́ю пучину/ невлажными стопами/ древний пешешествовав Израиль,/ крестообразными Моисеовыма рукама/ Амаликову силу в пустыни победил есть.

Божественными светоли́тии, славне, просвеща́емь/ и со Ангельскими чи́нми Христу Богу предстоя́,/ светоносную память твою совершающия просвети́.

Ничто́же тебе к Богу единения, мучениче, разлучи́,/ отлуче́на всякия плотския сласти верою,/ и чисто желания кра́йнейшаго наслаждаешися.

Служа Богу Живому, всемудре, ума чистото́ю,/ мертвым куми́ром, блаженне, никакоже службы принесл еси./ Тем к безконечней жизни, умерщвлен, прешел еси.

Богородичен:

Слово Отчее во утро́бе Твоей словом зачала́ еси,/ безслове́сия изба́вити земныя восхоте́в благосты́нею,/ Дево Мати Пречистая, Благословенная, Всенепорочная.

Песнь 3

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

Позна́в на Кресте́ Сына Божия,/ Истиннаго Господа, за ны стра́ждуща,/ в Того вседу́шно веровал еси.

Земля, якоже напоена́, прии́мши слове́сная се́мена,/ твоя душа клас, мудре, зрел/ Божественнаго благочестия возраста́ла есть.

Ве́трилом Креста́/ мук стра́стную преплы́в пучи́ну,/ тихая приста́нища постигл еси, славне, веселяся.

Богородичен:

Неду́гующую мою ду́шу страсте́й нанесе́ньми исцели́,/ Мати Божия Пречистая,/ и ко спасению напра́ви.

Седален, глас 8

Подобен: Премудрости:

Распина́ема видел еси Изба́вителя,/ и Того заря́ми освети́вся,/ тьмы избегл еси неразумия глубочайшия/ и к Божественному разуму себе сочетал еси,/ веровав, яко есть Бог Видимый./ Тем и пострада́в, лико́м причислился еси,/ Ло́нгине блаженне, мученическим, радуяся./ С нимиже всегда, славне, молися Христу Богу/ согрешений оставление подати/ чтущим любовию святую память твою.

Слава, и ныне, Богородичен:

В напа́сти многоплете́нныя впад от враг видимых и невидимых,/ бу́рею одержимь безчисленных согрешений моих,/ и, яко к теплому заступле́нию и покро́ву моему, Чистая,/ ко пристанищу притекаю Твоея благости./ Темже, Пречистая, из Тебе Воплоще́нному безсе́менно/ моли́ся прилежно о всех рабех Твоих,/ непрестанно моля́щихтися, Богородице Пречистая,/ моля́щи Его присно согрешений оставление дарова́ти/ воспевающим достойно славу Твою.

Крестобогородичен:

А́гнца и Пастыря, и Изба́вителя/ А́гница зря́щи на Кресте, восклицаше, пла́чущи,/ и, горько рыдающи, вопияше:/ мир убо радуется, прие́мляй Тобою избавле́ние,/ утроба же Моя горит, зря́щи Твое распятие,/ еже терпи́ши за милосердие милости./ Долготерпеливе Господи,/ милости бездно и источниче неисчерпаемый,/ умилосердися и да́руй согрешений оставле́ние/ верою поющим Божественныя Страсти Твоя.

Песнь 4

Ирмос: Вознесе́на Тя видевши Церковь на Кресте,/ Солнце праведное,/ ста в чи́не своем,/ достойно взывающи:/ слава силе Твоей, Господи.

Крепча́йший стяжа́в в вере смысл, блаженне,/ некре́пкую пре́лести разруши́л еси твердость/ и, радуяся, взывал еси:/ слава силе Твоей, Господи.

Возвыше́на и к Древу пригвожде́на/ Безстра́стнаго зря Господа славы,/ Того исповедал еси Сына Божия, славне,/ стра́ждуща Своею волею.

Увяда́ему смерть смертию Безсмертнаго видев,/ потща́лся еси, Ло́нгине, Его ради умре́ти/ и жа́ти по смерти со благославно пострада́вшими.

Богородичен:

Уедини́вшася по Ипоста́си во чре́ве Твоем/ и бывша Человека, Пречистая,/ Сло́ва, па́че сло́ва, родила́ еси,/ сугу́ба хоте́ньми и де́йствы являемаго.

Песнь 5

Ирмос: Ты, Господи, мой свет,/ в мир пришел еси,/ Свет Святый, обращаяй из мра́чна неведения/ верою воспевающия Тя.

Земли́ всякия воистинну быв пришле́ц,/ в я́звах страстоте́рпческих украси́лся еси, Ло́нгине,/ и на земли́ кротких вселился еси.

Возмогл еси, Креста силою укрепляем,/ немощно́е мучителей, страстотерпче Ло́нгине, победи́ти безумие.

Поста́вив на тве́рдем основании сердце твое, всехвальне,/ колебания искушений волнением неколе́блен пребыл еси.

Богородичен:

Едину, Бога Рождшую неискусомужно, воспои́м Деву,/ Еюже спасе́ни бывше, и верою ублажи́м.

Песнь 6

Ирмос: Пожру́ Ти со гла́сом хваления, Господи,/ Церковь вопиет Ти,/ от бесовския кро́ве очи́щшися,/ ради милости от ребр Твоих/ истекшею Кровию.

Го́ры же и зе́млю колеба́вшуюся видев в Стра́сти день,/ неверствием стоя́ния поколебался еси/ и верою утверди́лся еси, Ло́нгине, Страждущаго.

Разум истинный и соверше́н, и смы́слен восприя́ти возмогл еси,/ видя тварь изменяющуся,/ и к Божественному изменился еси, Ло́нгине, познанию.

Претерпел еси лю́тую му́ку, радуяся,/ и выю мечу́ несомненною мыслию преклонил еси,/ усекая главы́ врагов верою.

Богородичен:

Изсуши́ и из ко́рене, Всенепорочная, исто́ргни терно́вныя по́мыслы сердца моего,/ и плодоносно сие́ покажи́ хода́тайством Твоим,/ Отрокови́це Всечистая.

Кондак, глас 4

Подобен: Явился еси:

Весело возрадовася Церковь/ в памяти днесь приснопамятнаго страдальца Ло́нгина, взывающи/ Ты моя держава, Христе, и утверждение.

Икос:

Небо, тьмою многою омрача́емо, и землю трясу́щуся,/ и ка́мение разседа́ющася, храма же катапета́сму раздирающуся на дво́е видев,/ в Божественней Страсти Христове Ло́нгин Божия Сына позна́,/ страждуща Своим благоутробием, безстра́стна же су́ща Божеством,/ и Славою со Отцем и Духом Святым содержащаго все и объемлюща,/ яко Бога Истинна и Царя./ Тем радостно страдалец зовяше:/ Ты моя держава, Христе, и утверждение.

Песнь 7

Ирмос: В пещи́ Авраа́мстии о́троцы перси́дстей,/ любовию благочестия па́че,/ не́жели пламенем, опаля́еми, взываху:/ благословен еси в храме славы Твоея, Господи.

Законно пострада́в, мучениче,/ мужеским нра́вом души́ вся беззако́ннующих посрами́л еси советы/ и законно венчался еси:/ благословен еси, вопия, в храме славы Твоея, Господи.

Божественная благодать, нашедши мощем твоим,/ всяку болезнь реши́т благочести́во приходящих к тебе, блаженне,/ и проповедающих тя, истины непобеди́маго свидетеля.

Плоти умирающия не пощади́л еси, Ло́нгине, за Христа,/ жре́ти отреклся еси де́моном/ и тебе само́го Богу жертву непорочну, радуяся, принесл еси,/ мече́м посе́чен, досточудне.

Богородичен:

Яко Чистую Тя, Чистое Слово обре́т, всели́ся, Дево,/ Тобою очи́стити скве́рны человеков изво́лив:/ благословен бо Плод чре́ва Твоего.

Песнь 8

Ирмос: Ру́це распросте́р Даниил,/ львов зия́ния в рове затче́:/ о́гненную же силу угаси́ша,/ добродетелию препоя́савшеся,/ благочестия рачи́тели, о́троцы взывающе:/ благословите вся дела Господня Господа.

Успи́в прежде плотска́я двиза́ния, славне, бде́ньми, су́щими ко Господу,/ усну́л еси сладким сном, блаженне, умертвився Христа ради,/ на Древе Крестнем сном Божественным мертвым Жизнь источившаго.

Копие́м прободе́на в ре́бра, блаженнейше, яко видел еси,/ и, Кровь и во́ду источи́вша, Христа Человека, за милосердие, бывша,/ и уя́звен был еси Того сладким желанием, воспевая:/ благословите вся дела Господня Господа.

Погаси́л еси огни́ще и́дольское крове́й теченьми, Ло́нгине веемудре,/ и поже́гл еси кумиры, и нетве́рдая чти́лища,/ Божественною ревностию ду́шу возпали́в и взывая:/ благословите вся дела Господня Господа.

Очи сердечныя просвети́в Божественными сия́ньми, омрачившагося Солнца всесветлое сияние,/ мрак усердно оставил еси злочестия и звезда яви́лся еси, мудре, просвещающая вопиющия:/ благословите вся дела Господня Господа.

Богородичен:

Усты́ и язы́ком, и душе́ю проповедаю Тя, Богородительницу, и молю Тя, Пречистая:/ сердце мое озари светом Твоим и лютыя мя тьмы свободи́, вопиюща:/ благословите вся дела Господня Господа.

Песнь 9

Ирмос: Камень нерукосечный/ от несекомыя горы Тебе, Дево,/ краеугольный отсече́ся, Христос, совокупивый разстоящаяся естества:/ тем, веселящеся, Тя, Богородице, величаем.

Крепость моя и пение – Слово, Иже на Кресте ру́це распрострый,/ мучениче, беззаконным вопиял еси:/ Того страсть всеблаженную изобразу́я, смерть волею приемлю.

Яко предобрый страстоте́рпец обда́рствован страстьми́ Божественными,/ весь красне́йш яви́лся еси и красному Слову предстои́ши,/ воздая́ния боле́зней твоих богате́йте восприе́мля.

Тя, сиянием страсте́й солнце незаходимое явльшася/ и заря́ми исцелений вселенную всю просветившаго,/ и мрак разгна́вша неразумия, ублажаем.

Взялся еси ко обителем вечным и лико́м сочи́слился еси всех святых мучеников:/ с нимиже, мучениче Ло́нгине, нас поминай,/ благочестно память твою празднующих, всеблаженне.

Богородичен:

Света невечерняго явилася еси жили́ще, Богородице,/ Имже во тьме сущии и се́ни греха свет узре́ша:/ тем и моя просвети сердечная чувствия.

Светилен:

На Кресте висяща яко узре́л еси вся Содержащаго ма́нием и советом неизреченным,/ удиви́лся еси чудеси́/ и Сына нарицал еси Бога Небеснаго:/ егоже славы достойно по подобию истинно причастник был еси.

Богородичен:

Да славлю, Пречистая, Твою нератную благодать, многими прегреше́ньми впа́дшийся безумно:/ постигни ско́ростию Твоею и Твоею мя крепостию исхити́ грехопадений,/ яко спасаеши, яже хо́щеши, от всяческих скорбе́й силою Твоею непобори́мою.

На Литургии: Прокимен, глас 7: Возвеселится праведник о Господе: Апостол к Тимофею, зачало 292. Аллилуия, глас 4. Стих: Праведник, яко фи́никс: Евангелие от Матфея, зачало 113. Причастен: В память вечную: