На ма́лой вече́рни

Стихиры самогласны, глас 1, на 4:

На Вы́шних Престо́лех почива́яй Един Бог,/ превы́ше земны́х по́дал есть ви́дети Своему уго́днику,/ пребоже́ственнеи ру́це моле́бно простира́ющу,/ о гра́де и о лю́дех моля́щуюся Тебе́, Влады́чице./ Покры́й и ны́не, Госпоже́,/ нас омофо́ром ми́лости Твоея́.

Град, почита́ющий Тя и по до́лгу сла́вящий,/ покрыва́еши, Пречи́стая, Твои́м омофо́ром честны́м/ от нахожде́ния проти́вных, от гла́да же и тру́са, и междоусо́бныя бра́ни,/ Де́во Неискусобра́чная, Богоневе́сто,/ челове́ков покро́в и заступле́ние.

Пала́та одушевле́нная Христо́ва,/ ве́рным же стена́, и покро́в, и держа́ва,/ Тобо́ю град Твой, Богома́ти, спаса́ется,/ Твое́ю по́мощию правове́рнии венча́ются,/ Тобо́ю, хва́лящиися при́сно, побе́ды на пога́ныя но́сят:/ покрыва́еши бо омофо́ром ми́лости Твоей.

Слава, и ныне, глас 6:

Прииди́те, празднолю́бных собо́ри,/ Пресвяту́ю Де́ву воспои́м:/ днесь бо А́нгели со святы́ми пра́зднуют/ честны́й Покро́в Бо́жия Ма́тере/ и к похвале́нию нас, земны́х, призыва́ют/ вопи́ти непреста́нным гла́сом:/ радуйся, Це́ркве чу́дное украше́ние/ и всему́ ми́ру преди́вный покро́в./ Ра́дуйся, ве́рным посо́бие на бра́нех и во́ином соблюде́ние;/ ра́дуйся, покро́ве и заступле́ние на́ше:/ Тебе́ бо христиа́нский род непреста́нно блажи́т.

На стиховне стихиры, глас 2

Подобен: До́ме Евфра́фов:

Сла́ва на Небесе́х и на земли́ весе́лие,/ яко Цари́ца со все́ми святы́ми/ за вся ны в це́ркви мо́лится.

Стих: Слы́ши, Дщи, и виждь,/ и приклони́ у́хо Твое́.

Прииди́те, ве́рнии, во святу́ю це́рковь:/ та́мо бо Богоро́дица омофо́ром покрыва́ет лю́ди/ от всех напа́стей вра́жиих.

Стих: Лицу́ Твоему́/ помо́лятся бога́тии лю́дстии.

Пречи́стая Богоро́дице,/ не забу́ди нас, Твои́х рабо́в,/ но за ны моли́ся, ве́рою пою́щия Тя.

Слава, и ныне, глас 3:

Прииди́те, вси празднолю́бцы,/ честны́й Покро́в Бо́жия Ма́тере ублажи́м:/ к Сы́ну бо ру́це ми́лостивно простре́,/ и святы́м Покро́вом Ея мир огражде́н бысть./ Те́мже усты́ и се́рдцем/ и пе́сньми и пе́нии духо́вными/ со все́ми притека́ющими пра́зднуим све́тло.

Тропарь, глас 4:

Днесь благове́рнии лю́дие све́тло пра́зднуем,/ осеняе́ми Твои́м, Богома́ти, прише́ствием,/ и к Твоему́ взира́юще пречи́стому о́бразу, уми́льно глаго́лем:/ покры́й нас честны́м Твои́м Покро́вом/ и изба́ви нас от вся́каго зла,/ моля́щи Сы́на Твоего́, Христа Бога нашего,/ спасти́ ду́ши на́ша.

И отпу́ст

На вели́цей вече́рни

Блажен муж: антифон 1. Стихиры Покрова на 4, аще престол на 8, глас 1

Подобен: О ди́вное чудо:

О вели́кое заступле́ние/ печа́льным еси, Богоро́дице Чи́стая,/ ско́рая Помо́щнице,/ спасе́ние ми́ра и утвержде́ние,/ ми́лости пучи́на, Бо́жия му́дрости исто́чниче,/ ми́ру покро́в;/ воспое́м, ве́рнии, све́тлый омофо́р Ея,/ хва́ляще неизрече́нно:/ Обра́дованная, ра́дуйся, с Тобо́ю Госпо́дь,/ подая́й ми́ру Тобою ве́лию ми́лость.

Ди́вный прорече́ Иса́ия:/ бу́дет бо, рече́, в после́дняя дни/ я́ве гора́ Госпо́дня и дом Госпо́день верху́ горы́;/ уви́дехом же, Влады́чице,/ о Тебе и́стинное сбытие́,/ го́ры бо и хо́лми украси́шася многоимени́тыми церква́ми Твоих пра́здников./ Тем ве́село вопие́м Ти:/ Обра́дованная, ра́дуйся, с Тобо́ю Госпо́дь,/ подая́й ми́ру Тобо́ю ве́лию ми́лость.

О чу́дное украше́ние всем ве́рным еси,/ проро́ческое и́стинное сбытие́,/ апо́столом сла́ва и му́чеником удобре́ние,/ де́вству похвала́ и всему ми́ру преди́вный покро́в./ Покры́й, Влады́чице, омофо́ром ми́лости Твоея́ вся лю́ди, вопию́щия:/ Обра́дованная, ра́дуйся, с Тобо́ю Госпо́дь,/ подая́й ми́ру Тобо́ю ве́лию ми́лость.

Ины стихиры, глас 4

Подобен: Яко до́бля:

Яко Богонасажде́нный рай/ и ме́сто Животнаго дре́ва, напая́емо Ду́хом Святы́м,/ Тебе́, Богоро́дице, све́дуще,/ Творца́ всех ро́ждшую,/ Живо́тным Хле́бом ве́рный пита́юща,/ Емуже о нас с Предте́чею моли́ся,/ честны́м омофо́ром покрыва́ющи лю́ди от вся́кия напа́сти.

Освяща́ется Не́бо и земля́,/ Це́рковь же све́тится, и лю́дие вси веселя́тся:/ се бо Ма́ти Бо́жия/ со А́нгельскими во́инствы, с Предте́чею и Богосло́вом,/ с проро́ки же и апо́столы, неви́димо вше́дши,/ за христиа́ны мо́лится Христу́ поми́ловати град и лю́ди,/ сла́вящия Тоя́ Покро́ва пра́здник.

Добро́ту Тя Иа́ковлю/ и ле́ствицу Небе́сную,/ по не́йже Господь сни́де на зе́млю,/ тех же тогда о́брази/ Твою честь и славу, Богоро́дице, проявля́ху./ Тя, Ро́ждшую Бога всех,/ блажа́т Небе́снии А́нгели и земни́и челове́цы, яко за весь мир мо́лишися,/ покрыва́ющи ми́лостию/ Твой честны́й соверша́ющих пра́здник.

Возсия́ днесь ра́достный пра́здник/ всечестна́го Покро́ва Бо́жия Ма́тере:/ днесь бо Цари́ца и Влады́чица всех,/ ру́це свои просте́рши к Сы́ну Своему́, мо́лится приле́жно,/ прося́щи ми́ра ми́рови,/ покрыва́ющи лю́ди от нахожде́ния иноплеме́нных омофо́ром ми́лости Своея́/ и, Тобо́ю хва́лящеся, побе́ды на сопроти́вныя про́сят/ покрыва́ющеся омофо́ром человеколю́бия Твоего́.

Слава, и ныне, глас 8:

Сра́дуются с нами у́мная вся чинонача́лия,/ духо́вно совоку́пльше чу́вственный лик,/ ви́дяще Цари́цу и Влады́чицу всех/ многоиме́нне ве́рными сла́виму;/ ра́дуются же и ду́си пра́ведных,/ су́щии зри́телие виде́ния/ на возду́се моле́бно простира́ющу всечестне́и Свои ру́це,/ прося́щу умире́ния ми́ру и спасе́ния душ наших.

Вход. Прокимен дне. И чтения:

Бытия чтение (глава 28):

Изы́де Иа́ков от студенца кля́твеннаго и и́де в Харра́нь./ И обре́те ме́сто и спа та́мо, за́йде бо со́лнце./ И взят от ка́мения ме́ста того́ и положи́ возгла́вие себе,/ и спа на месте оном, и сон ви́де:/ и се ле́ствица утвержде́на на земли́, ея́же глава́ досяза́ше до Небе́с, и А́нгели Божии восхожда́ху и низхожда́ху по ней,/ Господь же утвержда́шеся на ней и рече́:/ Аз Бог Авраа́мов, отца твоего, и Бог Исаа́ков, не бо́йся;/ земля́, иде́же ты спи́ши на ней, тебе́ дам ю́ и се́мени твоему./ И будет се́мя твое, яко песо́к земны́й,/ и распространи́тся на мо́ре и ли́ву, и се́вер, и на восто́ки,/ и возблагословя́тся о те́бе вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може аще по́йдеши,/ и возвращу́ тя в землю сию, яко не и́мам тебе оставити,/ до́ндеже сотворити Ми вся, елика глаго́лах тебе./ И воста́ Иа́ков от сна своего́ и рече́:/ яко есть Госпо́дь на месте сем, аз же не ве́дех./ И убоя́ся, и рече́:/ яко стра́шно ме́сто сие,/ не́сть сие, но дом Бо́жий и сия врата́ Небесная.

Пророчества Иезекиилева чтение (главы 43–44):

Та́ко глаго́лет Госпо́дь:/ будет от дне осма́го и про́чее,/ сотворят иереи на олтари́ всесожже́ния вашего, и яже спасе́ния ва́шего, и прииму́ вы, глаго́лет Адонаи́ Господь./ И обрати́ мя на путь врат святых вне́шних, зря́щих на восто́ки, и сия бя́ху затворе́нна./ И рече́ Господь ко мне́:/ врата сия затворе́на будут и не отве́рзутся,/ и никто́же про́йдет сквозе́ их,/ яко Господь Бог Израилев про́йдет и́ми, и будут затворе́на./ Яко Игу́мен ся́дет в ни́х сне́сти хле́б, по пути́ Ела́мских врат вни́дет и по пути его изы́дет./ И введе́ мя по пути врат святых, су́щих к се́веру, пря́мо храму, и ви́дех,/ и се испо́лнь славы храм Господень.

Притчей чтение (глава 9):

Прему́дрость созда себе дом и утверди́ столпо́в седмь./ Закла́ своя же́ртвенная и раствори́ в ча́ши своей вино, и угото́ва свою трапе́зу./ Посла́ своя рабы́, созыва́ющи с высо́ким пропове́данием на чашу, глаго́лющи:/ иже есть безу́мен, да уклони́тся ко мне./ И тре́бующим ума́ рече́:/ прииди́те, яди́те мой хлеб и пи́йте вино, еже раствори́х вам./ Оста́вите безу́мие, и жи́ви будете,/ и взыщи́те ра́зума, да поживете́, и испра́вите разум в ве́дении./ Наказу́яй злыя, прии́мет себе безчестие:/ обличаяй же нечести́ваго, опоро́чит себе́, обличе́ния бо нечести́вому, ра́ны ему./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и премудрший бу́дет;/ сказу́й пра́ведному, и приложи́т приима́ти./ Начало премудрости – страх Господень, и совет святых – разум:/ разуме́ти бо закон, по́мысла есть блага́го./ Сим бо о́бразом многое поживе́ши время, и приложа́тся тебе ле́та живота́.

На литии стихиры, глас 3:

Наста́ днесь пресве́тлый пра́здник, Пречи́стая Де́во,/ честна́го Твоего́ Покро́ва./ Па́че со́лнца освеща́еши лю́ди,/ ве́рою от чи́ста се́рдца Те́бе И́стинную Ма́терь Бо́жию испове́дающия/ и Сы́ну Твоему́ вопию́щия:/ Христе́ Бо́же, моли́твами Присноде́вы,/ чи́сто и без нетле́ния ро́ждшия Тя,/ не преда́ждь враго́м ра́тующим Твое достоя́ние,/ но яко Ми́лостив спаси́ в ми́ре ду́ши на́ша.

Глас 4:

Хвале́ние Тебе́, еже по достоя́нию,/ лю́дие Сы́на Твоего́, Пречи́стая Влады́чице,/ жела́юще воспе́ти, но не возмо́гут./ Всегда́ бо всех ве́рных заступа́еши/ и покрыва́еши честны́м Твоим Покро́вом,/ и мо́лишися спасти́ся всем,/ ве́рою Тебе Чи́стую и И́стинную Богоро́дицу почита́ющим.

Глас 2:

Пренепоро́чную всех Цари́цу, Пречи́стую Де́ву,/ соше́дшеся, ве́рнии, днесь ублажи́м, Матерь Христа Бога:/ при́сно бо к Сыну ру́це ми́лостивно простира́ет./ Ю́же и преди́вный Андре́й ви́де на возду́се,/ честны́м Своим Покро́вом лю́ди покрыва́ющую,/ и Той уми́льно возопии́м:/ ра́дуйся, покро́ве и заступле́ние,/ и спасе́ние душа́м на́шим.

Слава, и ныне, глас тойже:

Смысл очи́стивше и ум,/ со А́нгелы и мы торжеству́ем,/ све́тло начина́юще Дави́дскую песнь Отрокови́це,/ Неве́сте всех Царя Христа Бога нашего,/ воскресни́, Господи, глаго́люще, в поко́й Твой,/ Ты и киво́т святы́ни Твоея́:/ яко бо пала́ту красну́, Сию́ укра́сив,/ и причте́ Ю гра́ду Твоему́, Влады́ко,/ стро́ити и покрыва́ти от сопоста́тных пога́н/ держа́вною силою Твоею, моли́твами Ея.

На стиховне стихиры, глас 2:

Яко всех вы́шши су́щи Небе́сных и земны́х,/ Херуви́м сла́внейши и всея́ тва́ри честне́йши,/ Тебе, Засту́пницу и покро́в держа́вен,/ христиа́нскому ро́ду Христо́с дарова́/ покрыва́ти и спаса́ти лю́ди согре́шшия,/ к Тебе́ притека́ющия./ Те́мже прибе́жище всем, Тебе воспева́ем, Влады́чице,/ и честны́й пра́здник Твоего Покро́ва пра́зднуем све́тло,/ Христа моля́ще дарова́ти нам ве́лию ми́лость.

Глас 5:

Стих: Слы́ши, Дщи, и виждь,/ и приклони́ ухо Твое.

Воспои́м, людие, светло Дави́дскую песнь/ Отрокови́це Неве́сте,/ Бо́жии Матери всех Царя Христа:/ предста́ Цари́ца одесну́ю Тебе, Влады́ко,/ ря́сны златы́ми оде́яна и преукра́шена Боже́ственными ле́потами./ Сию́ бо, избра́нную в жена́х,/ па́че всего ми́ра удобри́в,/ благоизво́ли роди́тися от Нея,/ вели́кия ради ми́лости,/ и Сию Помо́щницу людем Свои́м дарова́/ стро́ити и покрыва́ти от вея́ния беды́ рабы́ Своя,/ Еди́ну Благословенную.

Глас 7:

Стих: Лицу́ Твоему́/ помо́лятся бога́тии лю́дстии.

Гора́ еси вели́ка и пресла́вна,/ па́че горы́ Сина́йския, Богоро́дице:/ она́ бо, не терпя́щи сни́тия Славы Божия во о́бразе и се́нех,/ огне́м возгара́шеся, и гро́ми и мо́лния та́мо бы́ша./ Ты же всего́ в Себе Боже́ственнаго Огня́ су́щи,/ Бо́жия Сло́ва во чре́ве неопа́льно носи́ла еси,/ ма́нием носящаго вся,/ и, ма́терне дерзнове́ние к Нему иму́щи,/ помози́, Влады́чице, ве́рно пра́зднующим/ Твой честны́й пра́здник/ и не забу́ди, ми́лостивно посеща́ющи:/ прия́ла бо еси от Бога дар стро́ити/ и покрыва́ти христоимени́тое Твое ста́до, рабы Твоя.

Слава, и ныне, глас 2:

Яко венце́м пресве́тлым, Всечи́стая Богоро́дице,/ Покро́вом Твоим честны́м Це́рковь Божия приоде́яся/ и светится, ра́дующися, днесь,/ и та́йно ликовству́ет, Влады́чице, вопию́щи Тебе:/ ра́дуйся, одея́ние честно́е и ве́нче Бо́жия сла́вы;/ ра́дуйся, Еди́на сла́вы соверше́ние и ве́чное весе́лие;/ ра́дуйся, к Тебе притека́ющим приста́нище, и избавле́ние,/ и спасе́ние наше.

Ины стихиры, глас 2

Подобен: До́ме Евфра́фов

До́ме Евфра́фов, пала́то Царя Небе́снаго,/ все́му ми́ру покро́ве/ и по́мощь наро́ду на́шему.

Гра́де Бо́жий Небе́снаго Царя́,/ покры́й град Свой/ покро́вом ми́лости Твоея́, Богоро́дице.

Всех проро́к и́стинное сбытие́,/ Ты еси, Богоро́дице,/ покры́й нас омофо́ром ми́лосердия Твоего, Влады́чице.

Все упова́ние мое/ на Тя возлага́ю, Ма́ти Бо́жия,/сохрани́ мя под кро́вом Твои́м.

Таже тропарь, глас 4: Днесь благове́рнии лю́дие:

На у́трени

По 1-м стихословии седален, глас 3:

Боже́ственными сия́нии А́нгельских во́инств обступа́ема/ и с чи́нми проро́к и апо́стол че́стно слу́жбу прие́млющи,/ яко Ма́ти Бо́жия,/ посети́ нас, Твоих раб,/ моля́щи Христа Бога нашего/ дарова́ти нам ве́лию ми́лость.

Слава, и ныне, тойже

По 2-м стихословии седален, глас 6:

Безпо́мощным кре́пость Ты вои́стину,/ Пречи́стая Богома́ти,/ отсю́ду, смире́нии и, Тобо́ю возвыша́емся,/ о Тебе́ высо́це держи́мся:/ всем Ты еси покров/ и к Богу Ходатаица.

Слава, и ныне, тойже

Величание:

Велича́ем Тя,/ Пресвята́я Де́во,/ и чтим Покров Твой святый:/ Тя бо ви́де святы́й Андре́й на возду́се,/ за ны Христу́ моля́щуюся.

По полиелеи седален, глас 4:

Яко дре́вняго вои́стину пречестне́е киво́та/ Твой пречестны́й омофо́р, па́че иле́ктра просвеща́яся,/ не веще́ственне, но духо́вне, нетле́нными Твои́ми пречи́стыми рука́ми простира́ем,/ соблюда́ет ми́лостивно че́ствующих благоукраше́нный праздник Твоего Покро́ва, Влады́чице,/ в о́ньже соше́дшеся, усе́рдно пра́зднуем.

Слава, и ныне:

Приими́, Влады́чице, ве́рою притека́ющих под кров Твой/ и не возненави́ждь мене́,/ ниже́ пре́зри, Блага́я, покая́ния боля́щаго./ Приими́ яже от уст недосто́йных мно́гих мольбу́/ и хода́тайством Своим от сете́й мя изба́ви,/ да со дерзнове́нием вопию́ Ти:/ радуйся, Обра́дованная.

Степенна, 1 антифон 4-го гласа. Прокимен, глас 4: Помяну́ Имя Твое во вся́ком ро́де и ро́де. Стих: Лицу́ Твоему помоля́тся богатии лю́дстии. Всякое дыхание: Евангелие Луки, зачало 4. Псалом 50. Слава, Молитвами Богородицы: И ныне, тойже. Помилуй мя, Боже

По 50-м псалме стихира, глас 8:

Сра́дуются с на́ми у́мная вся чинонача́лия,/ духо́вно совоку́пльше чу́вственный лик,/ ви́дяще Цари́цу и Влады́чицу всех, многоиме́нне ве́рными сла́виму,/ ра́дуются же и ду́си пра́ведных, су́щии зри́телие виде́ния,/ на возду́се моле́бно простира́ющу всечестне́и Свои ру́це,/ прося́щу умире́ния ми́ру/ и спасе́ния душ на́ших.

Канон Богородицы на 6; апостола на 4

и преподобнаго Саввы на 4. Глас 4

Песнь 1

Ирмос: Отве́рзу уста́ моя,/ и напо́лнятся Ду́ха,/ и сло́во отры́гну Цари́це Ма́тери/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

С чи́нми святы́х А́нгел и с собо́ры проро́к и апо́стол,/ в сла́ве вели́цей, яко Ма́ти Бо́жия,/ днесь в це́рковь вше́дши, за Христиа́ны мо́лишися,/ от напа́сти и печа́ли избавля́еши вся,/ покрыва́ющи Твоею ми́лостию.

Ски́нию Тя Моисей и жезл Ааро́нов именова́:/ Ты бо живо́тное дре́во, Христа, процвела́ еси,/ к Нему́же дерзнове́ние иму́щи, за ны, че́ствующия Тя, Цари́це, помоли́ся/изба́вити нас от вся́каго зла,/ да Твоего́ Покро́ва пра́здник сла́вим.

Не яко пред киво́том дре́вле, собра́в, Дави́д, ли́ки, игра́ет,/ но па́че ны́не с чи́нми святы́х пред Тобою теку́ще в це́рковь, Тебе кла́няющеся, глаго́лют:/ моли́ за че́ствующия Тя люди,/ да Твой сла́вяще Покро́в, че́стно пра́зднуем.

Пою́т Тя, Богоро́дице, А́нгельстии чи́ни,/ и сла́вят патриа́рси со святи́тели пред лицо́м Ти, теку́ще в церковь./ С ни́миже Тя тогда святы́й Андре́й ви́де, за ны гре́шныя, к Богу моля́щуюся,/ поми́ловати лю́ди, сла́вящия Твоего Покро́ва пра́здник.

Катавасия, ирмос тойже.

Песнь 3

Ирмос: Твоя песносло́вцы, Богоро́дице,/ живы́й и незави́стный исто́чниче,/ лик Себе́ совоку́пльшия духо́вно, утверди́,/ в Боже́ственней Твоей сла́ве/ венце́в сла́вы сподо́би.

Клас прозя́бшая Боже́ственный,/ яко ни́ва неора́нная я́ве,/ ра́дуйся, одушевле́нная трапе́зо,/ Хле́б Живо́тный вме́щшая./ Ра́дуйся, Животныя воды́ исто́чниче неистощи́мый, Влады́чице.

Твои раби́, Влады́чице,/ в це́ркви Твое́й ве́рою предстоя́ще, Твоея́ ожида́ем ми́лости:/ посети́ на́ше смире́ние и Твои́м святы́м Покро́вом защити́ лю́ди от вся́каго зла.

Многоимени́тая Де́во,/ проро́ки проображена́ че́стно, иже Тебе ны́не со А́нгелы слу́жат./ С ни́миже о нас к Богу моли́ся,/ да Твоего́ Покро́ва святы́й день, ра́дующеся, вси све́тло пра́зднуем.

Гедео́н Тя руно́ прообрази́,/ на Тя бо, яко роса́, Христос Бог сни́де,/ к Нему́же, Богоро́дице, моли́ся, побе́ду да́ти во́инству на́шему на враги́,/ да яко Мадиа́мы низложи́в, просла́вим святы́й Твой пра́здник.

Па́че со́лнечных луч Твои́м блиста́ющим омофо́ром освеща́еши Це́рковь и лю́ди/ и тьму грехо́в наших отго́ниши посеще́нием Твоим, Богоро́дице,/ к Сы́ну Твоему́ и Богу за ны моля́щися.

По 3-й песни седален, глас 5:

Те́плая Предста́тельнице и непобеди́мая,/ упова́ние изве́стное и непосты́дное,/ стене́, и покро́ве, и приста́нище прибега́ющим к Тебе,/ Присноде́во Чи́стая,/ Сы́на Твоего́ и Бо́га моли́ со А́нгелы/ умире́ние дати ми́ру, и спасе́ние,/ и ве́лию ми́лость.

Слава, и ныне, тойже

Песнь 4

Ирмос: Седя́й в сла́ве на Престо́ле Божества́,/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:/ сла́ва, Христе́, си́ле Твое́й.

Во гла́сех пе́ний, Де́во, Тебе́ вопие́м, Всепе́тая:/ ра́дуйся, ту́чная горе́ и усыре́нная Ду́хом./ Ра́дуйся, све́щниче и ста́мно, Ма́нну нося́щая,/ услажда́ющая всех благочести́вых чу́вства.

Па́че Ааро́ня киво́та всю Тя Бог освяти́л есть Ду́хом, Богоро́дице, Святы́м,/ и А́нгелом служи́ти Тебе́ повеле́,/ с ни́миже за град и лю́ди моли́ся,/ Твой сла́вящих честны́й пра́здник.

Прииди́ ны́не в сла́ве в Твою́, Богоро́дице, це́рковь с собо́ры всех святы́х,/ я́коже иногда́ Тя святы́й Андрей ви́де на возду́се све́тле, за христиа́ны моля́щуюся,/ и пода́ждь нам Твою ми́лость.

Укрепи́, Влады́чице, сла́вящее Тя во́инство на́ше на проти́вныя враги́,/ яко Дави́да на Голиа́фа;/ да Тебе́, веселя́щеся, вопие́м:/ ра́дуйся, покро́ве святы́й и Засту́пнице гра́ду на́шему.

Тебе́ припа́даем, Госпоже́, ве́рою и, покланя́ющеся, благода́рно вопие́м Ти:/ ра́дуйся, Богоблагода́тная Де́во, покро́ве, и огражде́ние на́ше, и Помо́щнице в беде́ су́щим,/ спаси́ нас, к Тебе прибега́ющих, на Тя бо наде́емся.

Песнь 5

Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси во утро́бе над все́ми Бо́га/ и родила́ еси Безле́тнаго Сы́на,/ всем воспева́ющим Тя/ мир подава́ющая.

Одр Тя дре́вле Соломо́н написа́/ и ло́жницу Небе́снаго Царя, обступа́ему Серафи́мы, еже о Тебе рече́ся, Богоро́дице./ Тем Тя ны́не мо́лим, Ма́ти Бо́жия Всесвята́я:/ покры́й нас от всех бед.

Тебе́ А́нгелов старе́йшины и честни́и проро́цы со апосто́лы/ яко Ма́тери Божии че́стно слу́жат,/ ви́дяще Тя за мир моли́тву творя́щу;/ Твоя́ же проше́ния послу́шав, Госпо́дь спаса́ет град и люди, на Тя наде́ющияся.

Вели́кий Тя во проро́цех Иса́ия прорече́, глаго́ля, Бога роди́ти неискусобра́чно:/ Ты бо, Чи́стая Мари́е, святе́йши всех была еси,/ Бо́га бо во утро́бе и на руку́ носи́ла еси./ Ему́же за ны моли́ся, Твоим осеня́ющи Покро́вом ве́рою Тя сла́вящих.

Духо́вными паря́ще кри́лы, святы́х собо́ри та́йно приидо́ша Тебе́ послужи́ти, Богоро́дице,/ ви́дяще Тя на ле́гце о́блаце сла́вы, ко Спа́су Христу́ моля́щуюся/ пода́ти побе́ду во́инству на́шему, погуби́ти вою́ющих нас.

Песнь 6

Ирмос: Боже́ственное сие и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Иере́и Богому́дрии, в це́ркви Твоей с людьми́ благочести́выми предстоя́ще,/ Твое́й ожида́ют, Богоро́дице, ми́лости:/ премени́ на ра́дость на́шу печа́ль, Ра́дость бо родила́ еси,/ всех челове́ков грехи́ отпусти́вшаго.

Тебе́ вся земля́ да́ры прино́сит/ яко Цари́це Бо́жии Ма́тери:/ архиере́и кла́няются и лю́дие вси веселя́тся,/ покрыва́еми от вся́каго зла Твои́ми, Богоро́дице, моли́твами.

Го́ру Тя вели́ку Дании́л пронаписа́:/ из Тебе́ бо без Се́мене роди́ся Христо́с/ и сокруши́ всю де́монскую лесть, и всю Своей ве́ры испо́лни зе́млю./ К Не́муже за ны, Богоро́дице, моли́ся, сла́вящия Твоего́ Покро́ва пра́здник.

А́нгельский глас взыва́ем Ти, Пречи́стая:/ ра́дуйся, Престо́ле Бо́жий, на не́мже Иезекии́ль ви́де Го́спода в подо́бии челове́ка, носи́ма Херуви́мы./ С ни́миже за ны, Богоро́дице, моли́ся, да спасе́т ду́ши на́ша.

Кондак, глас 3

Подобен: Дева днесь:

Дева днесь предстои́т в це́ркви/ и с ли́ки святы́х неви́димо за ны мо́лится Бо́гу,/ А́нгели со архиере́и покланя́ются,/ апо́столи же со проро́ки ликовству́ют:/ нас бо ра́ди мо́лит Богоро́дица Преве́чнаго Бо́га.

И́кос:

Тоя́ пресла́вных чуде́с,/ прииди́те, лю́дие, наслади́мся:/ Се́ю бо Ада́м от тли изба́вися./ Та бо и ковче́г, не Но́ем, но Бо́гом сотворе́н бысть./ Дре́вле убо Моисе́й в купине́ о́гненней Бо́га ви́дети не возмо́же,/ ны́не же от Той Ро́ждшагося вся земля́ зна́ет Сы́на Бо́жия,/ к Нему́же за ны мо́лится./ Сего́ ра́ди прославля́ем Ю яко Бо́жию Ма́терь:/ нас бо ради Богоро́дица мо́лит Преве́чнаго Бо́га.

Песнь 7

Ирмос: Не послужи́ша тва́ри Богому́дрии,/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог благослове́н еси.

Неиспи́саная мно́гими проро́ки,/ несве́дома же бысть, Де́во, Небе́сными служа́щими Бо́гу А́нгелы;/ ны́не же вси ве́мы Тя Богоро́дицу,/ и Твоей тре́буем по́мощи и заступле́ния, Благослове́нная.

Гора́, усыре́нная Ду́хом,/ ю́же Авваку́м ви́де точа́щу ве́рным целе́бную сла́дость, Богоро́дице Де́во,/ исцели́ ны, Сы́ну Твоему́ вопию́щия:/ благослове́н Бог отец на́ших.

Преклони́вый Небеса́ в Тя, Де́во, всели́ся/ и ны́не на моли́тву Твою зрит, Богоро́дице Чи́стая, Твое́, Цари́це, исполня́я проше́ние:/ Ему́же за ны усе́рдно помоли́ся, на Тя бо наде́емся, Благослове́нная.

Тво́рче, Спа́се наш, Христе́ Бо́же, приими́ моли́тву Твоея́ Ма́тере,/ ю́же Тебе́ за ны, гре́шныя, прино́сит,/ да Тебе́, ра́дующеся, пое́м:/ препе́тый отец на́ших Бо́же, благослове́н еси.

Песнь 8

Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.

С чи́нми А́нгел, Влады́чице,/ с честны́ми и сла́вными проро́ки, с верхо́вными апо́столы, и со священному́ченики, и со архиере́и за ны, гре́шныя, Бо́гу помоли́ся,/ Твоего́ Покро́ва пра́здник в Росси́йстей земли́ просла́вльшия.

Горды́ню и шата́ния низложи́ и сове́ты непра́ведных разори́,/ зачина́ющих ра́ти погуби́, о Бо́жия Ма́ти, Цари́це Всечестна́я,/ правосла́вных рог возвы́си, да Твой пра́здник сла́вим, Пречи́стая Богоро́дице Де́во, зову́ще:/ Го́спода воспева́йте дела́ и превозноси́те Его во вся ве́ки.

Усты́ принося́ще Тебе́ пе́ние, и душе́ю ве́рно покланя́емся,/ ибо вну́трь сердца́ на́ша горя́т./ Ма́ти Бо́жия Пречи́стая, поми́луй нас, моля́щихся Тебе́, и Го́спода воспева́ющих,/ и превознося́щих Его во вся ве́ки.

Мно́гими отягчи́хся грехи́, недоуме́ю по достоя́нию написа́ти Твоего́ Покро́ва, Богоро́дице, похвалы́,/ но яко Ма́ти Бо́жия украси́ Твой пра́здник чудесы́,/ да вси, ра́дующеся, пое́м Го́спода и превозно́сим Его во вся ве́ки.

Песнь 9

Ирмос: Всяк земноро́дный/ да взыгра́ется, Ду́хом просвеща́ем,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная,/ Богоро́дице Чи́стая Присноде́во.

Высо́кий Царю́, со Отце́м седя́й и от Серафи́м воспева́емый,/ при́зри на моли́тву Ма́терию, юже Тебе́ за ны, гре́шныя, прино́сит,/ и очи́сти грехи́ на́ша, спаси́ град, и лю́ди умно́жи,/ даждь нам здра́вие телесе́ и на пога́ныя побе́ды, моли́твами Ро́дшия Тя.

А́нгельский глас вопие́м Тебе́, Де́во Богоизбра́нная:/ ра́дуйся, яже Ада́ма па́ки в рай вве́дшая;/ ра́дуйся, де́моны прогоня́щи Твои́м и́менем;/ ра́дуйся, наде́жде христиа́н;/ ра́дуйся, освяще́ние душ;/ ра́дуйся, Храни́тельнице гра́да на́шего.

Помяни́ нас во Твоих моли́твах, Госпоже́ Де́во Богоро́дице,/ да не поги́бнем за умноже́ние грехов на́ших./ Покры́й нас от вся́каго зла и лю́тых напа́стей:/ на Тя бо упова́ем и, Твоего́ Покро́ва пра́здник че́ствующе, Тя велича́ем.

Дар от Бо́га прия́ла еси яко Ма́ти Бо́жия/ всех христиа́н неду́ги исцеля́ти, и от бед избавля́ти, и грехи́ отпуща́ти, и от плене́ния спаса́ти и вся́кия ну́жды./ Но и нас не пре́зри, Госпоже́: ве́си бо, ихже тре́буем,/ здра́вия телесе́м и душа́м спасе́ния.

Светилен

Подобен: Жены́, услы́шите

О Пресвята́я Госпоже́, Де́во Богоро́дице!/ Покры́й нас чуде́сным Твои́м омофо́ром,/ сохраня́я град и лю́ди от вся́каго зла,/ я́коже Тя пречу́дный Андре́й ви́де во Влахе́рнстей це́ркви моля́щуюся;/ и ны́не нам, Госпоже́, посли́ вели́кую Твою́ ми́лость.

На хвали́тех стихи́ры на 4, глас 8.

Подобен: О пресла́внаго чудесе́:

Тебе́ припа́даем, Госпоже́,/ уми́льно кла́няющеся, мо́лим Тя:/ ра́дуйся, Богоблаже́нная Влады́чице,/ многоимени́тая Де́во,/ проро́ки проображе́нная че́стно:/ в Тя бо, яко роса́, Христо́с Бог сни́де,/ и родила́ еси, Браконеиску́сная Чи́стая, и на руку́ носи́ла еси всех Творца́ и Го́спода./ Ему́же ны́не о нас моли́ся,/ сла́вящих ве́рно Твоего́ Покро́ва пра́здник.

Пою́т Тя, Де́во Богоро́дице, А́нгельстии чи́ни,/ и сла́вят патриа́рси со архиере́и/ и святи́и апо́столи,/ яко Ма́тери Бо́жии че́стно слу́жат Тебе́,/ ви́дяще Тя за мир моли́тву творя́щую/ ко Спа́су всех, Христу́ Бо́гу./ Ему́же помоли́ся изба́вити град и лю́ди,/ сла́вящия Тя ве́рно/ и Твоего́ Покро́ва пра́здник че́ствующия.

Па́че Ааро́ня киво́та/ всю Тя Бог освяти́/Ду́хом, Богоро́дице, Святы́м,/ и па́че со́лнечных луч/ Твои́м светя́щимся омофо́ром/ освеща́еши Це́рковь и лю́ди/ и тьму грехо́в на́ших отгоня́еши,/ избавля́еши же от бед и скорбе́й/ ве́рою че́ствующия Твоего́ честна́го Покро́ва пра́здник.

Слава, и ныне, глас 6:

Яко ви́де Тя пречу́дный Андре́й на возду́се/ со Арха́нгельским мно́жеством,/ со апо́столы, и проро́ки,/ и мно́жеством му́чеников,/ Сы́ну Твоему́ и Бо́гу на́шему о гра́де и лю́дех моля́щуюся, Влады́чице,/ и честны́м Твои́м Покро́вом покрыва́ющую,/ не оскуде́й и ны́не, Пречи́стая,/ спасти́ изря́дное достоя́ние Твоего́ Сы́на,/ пречестны́й пра́здник Твой пра́зднующе, Многопе́тая.

Славословие великое. И отпу́ст

На литургии: Блаженны от канона, песни 3-я и 6-я. Прокимен: Песнь Богородицы, глас 3: Вели́чит душа́ Моя Го́спода: Стих: Яко призре́ на смире́ние Рабы́ Своея́: Апостол ко Евреем, зачало 320. Аллилуия, глас 8: Слы́ши, Дщи, и виждь: Стих: Лицу Твоему помолятся: Евангелие от Луки, зачало 54: Причастен: Чашу спасения

(службу ему поем на повечерии или во ин день)

На Господи, воззвах: стихиры апостола, глас 4

Подобен: Зва́нный свы́ше:

Иже зарю́ Боже́ственную прие́м,/ егда́ манове́нием лучшим ослепле́н,/ прежде мра́ком держи́м, прии́де к тебе Савл,/ Боже́ственнаго прося́ очище́ния,/ тогда, всеблаже́нне, яко иера́рх мудр/ сынотвори́ши его Креще́нием,/ пото́м хотя́щаго вселе́нную всю осынотвори́ти./ Тем с ним блажи́м тя, Христо́ва апостола, Ана́ние Богому́дре,/ моли́теся спасти́ся нам.

Научи́вся Боже́ственным пресла́вно,/ гро́ма кре́пльше, блаже́нне,/ воструби́л еси Слово Божие спаси́тельное/ и спя́щия во гробе́х суеты́ возбуди́л еси,/ умерщвле́ние отве́ргшия, ме́ртвым сообита́ющее/ и во аде держи́мыя возобраща́ющее,/ яже соде́лал еси Умертви́вшаго ме́ртвость сосу́ды че́стны/ Иисуса Владыки и Спаса душ наших.

Яко светоно́сец, яко Боже́ственный пропове́дник,/ яко свиде́тель Богоизбра́нный Страсте́й Христовых/ и будущий яви́тися неизрече́нныя славы/ снасле́дник же и сприча́стник, сый со Владыкою,/ и наслажда́яся истека́ющаго всегда светоли́тия,/ от незаходи́маго Света, Богоглаго́ливе,/ светлый соверша́ющия твой ныне праздник,/ моли́твами твои́ми от мра́чных бед, Ана́ние, изба́ви.

Ины стихиры Романа, глас 1

Подобен: Небесных чинов:

Краснопе́снивая цевни́ца Боже́ственнаго Духа,/ слави́й и щур Боже́ственных песней,/ свире́ль церковная/ всем нам своя предлагает сладкопе́сненная учрежде́ния/ и теми весели́т Богому́дрыя.

Светле́йший свети́льник и проза́рнейший,/ сладковеща́нная гусль,/ струна́ благознамени́тых Духа слове́с/ пое́т ясно, научая концы/ немо́лчными песньми славословите Божества едину зарю.

Ты, Влады́це всех яко предстоя́/ и дерзнове́ние, отче, к Нему стяжа́в,/ нам, соверша́ющим па́мять твою и све́тлое твое торжество́,/ моли́ изба́витися бед и напа́стей,/ Рома́не Богоблаже́нне.

Слава, апостола, глас тойже. Византиево:

Сосу́д избра́нный, вели́кое прия́телище Духа,/ Павла апо́стола просвети́л еси, преподо́бне,/ Бо́гом по откровению навы́к,/ яко самови́дец Сло́ва и таи́нник чудес Его,/ апостол же прежде учеников/ и верный строи́тель Новаго Завета,/ тем подража́я Учителя Христа,/ твою кровь проявил еси,/ му́ченическою стра́стию испове́дник быв, Ана́ние,/ священнонача́льниче Христо́в,/ и тече́ние соверши́в, веру же некра́дому соблю́д,/ с Вы́шними служи́тели в Высоча́йших водворя́яся,/ моли́ спастися душа́м нашим.

И ныне, Богородичен или Крестобогородичен:

Подобен: Прехва́льнии му́ченицы:

При Кресте предстоя́щи Сына Твоего и Бога/ и долготерпе́ние Его смотря́ющи,/ глаго́лала еси, рыда́ющи, Мати Чистая:/ увы Мне, Чадо Сладча́йшее,/ что сия стра́ждеши непра́ведно, Сло́ве Божий,/ да спасе́ши челове́чество.

Стиховна Октоиха: и апостола стих, глас 4, с припевом: Во всю зе́млю изы́де веща́ние их,/ и в концы́ вселе́нныя глаго́лы их.

Страстоте́рпческое прия́телище, явился еси, Ана́ние апо́столе,/ ка́мением, яко цве́ты, учаща́емь,/ за Пострадавшаго пло́тию нас ради распя́тие во́льне/ кровь твою пролия́л еси./ Тем и Дама́ск хва́лится священным твоим торжеством днесь./ Не то́чию же той, но и вся подсо́лнечная,/ чудес твоих зна́мения Я́ве пропове́дающи, вопие́т:/ моли́ся к Богу дарова́ти нам согреше́ний проще́ние.

Слава, преподобнаго, глас 6:

Пе́рвое до́брых нача́ло/ явился еси спасе́ния вина́, Рома́не, отче наш;/ А́нгельское бо соста́вив песнопе́ние,/ Боголе́пно показа́л еси житие́ твое;/ Христа Бога моли́/ напа́стей и бед изба́вити пою́щия тя.

И ныне, Богородичен или Крестобогородичен:

Подобен: Тридне́вен:

Ви́дящи Тя распина́ема, Христе,/ Тебе Ро́ждшая вопия́ше:/ что стра́нное еже вижу та́инство, Сы́не Мой?/ како на Дре́ве умира́еши,/ пло́тию пове́шен,/ жизни Пода́телю?

Тропарь апостола, глас 3:

Апо́столе святый Ана́ние,/ моли́ Милостиваго Бога/ да прегреше́ний оставле́ние/ пода́ст душа́м нашим.

Слава, преподобнаго, глас 8:

В тебе, отче, известно спасе́ся еже по образу:/ прии́м бо крест, последовал еси Христу/ и, действуя, учил еси презирати убо плоть, преходит бо,/ прилежа́ти же о души вещи безсмертней./ Темже и со Ангелы сра́дуется, преподобне Романе, дух твой.

И ныне, Богородичен или Крестобогородичен

На у́трени

Канон апостола, на 4, егоже краегранесие: Анании слава да прославится. Творение Иоанна монаха. Глас 8

Песнь 1

Ирмос: Во́ду проше́д, яко су́шу,/ и еги́петскаго зла избежа́в,/ Изра́ильтянин вопияше:/ Изба́вителю и Богу нашему пои́м.

Отве́рзем уста́ похва́льная,/ уясни́м язык в памяти, вси вернии, началопа́стыря Ана́нии/ и с ним Богу нашему воспои́м.

Жениху́ Пречи́стому/ невестово́дит нескве́рную Неве́сту Ана́ния пресла́вный,/ Христу сущую зде Церковь,/ с не́юже ясно Богу нашему воспои́м.

Первый был еси учени́к,/ новому дае́ши прозре́ние ученику́, дре́вле гони́телю, Ана́ние, и песнопо́еши:/ воспои́м Богу нашему.

Богородичен:

Чи́ни Тя А́нгельстии и земны́х ро́ди, Безневе́стная Ма́ти, непреста́нно хва́лят:/ Зижди́теля бо их, якоже Младенца, на объятиях Твоих носи́ла еси.

Ин канон преподобнаго Романа, глас 6

(правится в иный день или на повечерии)

Песнь 1

Ирмос: Яко по су́ху пешеше́ствовав Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Богу побе́дную песнь/ пои́м, вопия́ше.

Светосия́нныя лучи́ от Небе́с нам низпосли́/ моли́твами твои́ми, му́дре Рома́не Боже́ственне,/ твою похвали́ти священную память пе́сньми.

От юности весь ты Христу тя сама́го предложи́в,/ после́довал еси Ему,/ светоза́рными сия́ньми ум с Небесе́, Рома́не, облистава́я.

Укра́шен добро́тою Вседе́тельнаго и Святаго Духа,/ яко звезда́ светосия́нная,/ доброде́телей све́тлостию, му́дре, яви́лся еси, Рома́не, ми́ра конце́м.

Богородичен:

Из Тебе про́йде неизрече́нно Божие Слово Собезнача́льное в последняя времена́,/ и перваго человека Адама, во тлю па́дшаго, Богородице, возспасе́.

Песнь 3

Ирмос: Ты еси утверждение/ притека́ющих к Тебе, Господи,/ Ты еси свет омраче́нных,/ и поет Тя дух мой.

Повеле́нию после́дуя Учителя твоего,/ был еси архиерей, страстоте́рпческое же приноше́ние, апо́столе.

Милостива молитвами твоими Богоуве́тливыми соде́лай Изба́вителя/ тебе пою́щим, Ана́ние апо́столе.

Все тебе связа́ зве́ря стремле́ние, Господь явився,/ светом неизрече́нным омрачи́в лице́.

Богородичен:

Тя вси стяжа́хом, прибежище и сте́ну нашу, христиане,/ и Тя славосло́вим немо́лчно, Безневе́стная.

Ин

Ирмос: Несть свят,/ якоже Ты, Господи Боже мой,/ вознесы́й рог ве́рных Твоих, Бла́же,/ и утверди́вый нас на ка́мени/ испове́дания Твоего.

Ум твой, Рома́не му́дре, бысть оби́телище Троицы Святыя,/ исполняем благоче́стно знания истиннаго, источа́я Божественная пропове́дания.

Струи́ искипе́ течений честны́й твой язык, поя́ Божественная/ и уясня́я му́дростно Христо́во к нам от Девы Рождество́ неизрече́нное.

Се пита́еши обильно мудрыми уче́ньми и кра́сными песнопе́нии по́мыслы наша/ и исполня́еши сла́дости Боже́ственнейшия, Рома́не Богогла́се.

Богородичен:

Всех еси во́инств вы́шши, Дево,/ тех бо Соде́теля, Сына Божия, зачала́ еси во утро́бе/ и, ро́ждши, пребыва́еши Присноде́ва.

Кондак преподобнаго, глас 8:

Боже́ственными доброде́тельми духа/ измла́да украси́вся, Рома́не прему́дре,/ Церкви Христо́ве пречестно́е украше́ние был еси:/ пе́нием бо прекра́сным украси́в ю, блаженне./ Тем мо́лим тя: подаждь жела́ющим Божественнаго дарова́ния твоего,/ яко да вопие́м ти:/ радуйся, отче преблаже́нне, красото́ церко́вная.

Седа́лен, апостола, глас тойже

Подобен: Прему́дрости:

Просвеще́н позна́нием Божественным свяще́нник же, и мученик Иису́сов, и Божественный апостол, Ана́ние, был еси./ И иногда́ гони́теля Савла нарица́ема, ослепле́на манове́нием вы́шним, сла́вне,/ в воде погрузи́в, Богосоде́тельным науче́нием лу́чша его показал еси, просвети́теля душа́м нашим./ Сего ради вопие́м ти:/ моли́ Христа Бога грехов оставление дарова́ти честву́ющим любовию святую память твою.

Слава, преподобнаго, глас 5

Подобен: Собезначальное Слово:

Насажде́н, якоже дре́во, отче блаженне, при исхо́дищих вод по́стнических,/ Божественным соде́йством плоды́ боле́зней твоих во вре́мя я́вственно Садоде́лателю и Творцу отда́л еси./ Сего ради святую твою пое́м память, честву́юще тя, Рома́не преподобне.

И ныне, Богородичен:

В Тебе та́инство тре́петное соверша́ется, Деви́це,/ Су́щаго Бога Сло́ва от Отца в ложесна́х зачала́ еси,/ и ражда́еши паче естества Человека соверше́нна.

Крестобогородичен:

На Кресте́ зря́щи Тя, Христе́, Мати Твоя во́льно посреде́ разбойников ви́сяща,/ растерза́ющися утро́бою, ма́терски глаголаше:/ Безгрешный Сы́не, ка́ко непра́ведно на Кресте, якоже злодей, пригвожде́н еси,/ человеческий род хотя оживи́ти, яко Благоутро́бен?

Песнь 4

Ирмос: Услы́шах, Господи,/ смотре́ния Твоего та́инство,/ разуме́х дела́ Твоя/ и просла́вих Твое Божество́.

Тобою, Христе, наказу́ем, страда́льчески побеждает смерть Ана́ния приснопа́мятный,/ от Тебе по́чести восприима́я.

Ученик был еси гони́маго Сло́ва, приснопа́мятне Ана́ние,/ и учитель Богоче́стия гоня́щему.

Яви́ тя Господь Са́влу безоче́сну кры́ющася,/ и показа́ тя хода́тая, Ана́ние, того исцеле́ния.

Богородичен:

Бога, Eгоже родила́ еси, Пречистая Де́во,/ Того моли́ от всякаго обстоя́ния изба́вити вся пою́щия Тя.

Ин

Ирмос: Христос моя сила,/ Бог и Господь,/ честна́я Церковь/ Боголе́пно поет, взыва́ющи,/ от смы́сла чи́ста о Го́споде пра́зднующи.

Прия́телище был еси Боже́ственнаго Ду́ха и о́гнедохнове́нная уста́,/ возглаша́ющая Божественная песнопе́ния и наслажда́ющая ду́ши, Рома́не, притека́ющих ти.

Яко цевни́ца ты был еси Небе́сная и гусль,/ всякую к себе влеку́щи мысль повестьми́ твоими и кра́сными твоими песнопе́нии.

Благодать дхне и всели́ся в светоно́сную твою душу,/ Вседе́тельнаго и Пресвятаго Ду́ха, прехва́льне,/ и тя прия́телище и му́дра Боговеща́теля соде́ла.

Богородичен:

Яд излия́ в прама́терния убо слу́хи змий,/ но Ты, Чистая, сего истрясла́ еси, Арха́нгеловым гла́сом заче́нши и ро́ждши Христа.

Песнь 5

Ирмос: Вску́ю мя отри́нул еси/ от лица́ Твоего, Све́те незаходи́мый,/ и покры́ла мя есть чуждая тьма, окаяннаго;/ но обрати́ мя и к све́ту за́поведей Твоих/ пути́ моя напра́ви, молю́ся.

В бу́ри су́щим приста́нище Божественное приснотеку́щий Источник показа́ тя;/ во тьме же су́щим зарю́ непристу́пный Свет соде́ла тя, Ана́ние блаженне,/ и яко ученика достоявле́нна, ми́лостивно в тебе Воспочива́яй.

Ви́дяй сокрове́нная и прежде бытия́ Ве́дый вся́ческая,/ тебе, тая́щемуся, тая́щагося солнца яви, иногда гони́теля,/ не по мно́зе времени, разоря́емыя от него Истины, апо́стола.

Постиже́ния конец неизсле́димый Твоего строе́ния:/ тем бо, Спа́се, страшная изничто́жися смерть./ Сего ради Ана́ния яко победитель и иерарх за Тя, ра́дуйся, закала́ется.

Богородичен:

Ма́тернее дерзнове́ние еже к Сыну Твоему иму́щи, Пречи́стая,/ сро́днаго промышле́ния еже о нас не пре́зри, мо́лимся:/ яко Тебе и Едину христиане ко Влады́це очище́ние ми́лостивно предлага́ем.

Ин

Ирмос: Бо́жиим све́том Твоим, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Божий,/ И́стиннаго Бога,/ от мрака грехо́внаго взыва́юща.

Яко благоле́пнейшо святилище,/ сосуд яко чистейший, Уте́шителева благодать обре́тши тя, Романе Богомудре,/ храм содела, светом укра́шен, и всели́ся.

Воплоще́ннаго Сына Божия Рождшая и́стинно твою душу просвети́/ и ум Боже́ственнаго знания испо́лни, в нощи́ предста́вши тебе, Приснодева.

Списа́ньми твоих свяще́нных слове́с, приснопа́мятне, яви́вся всем вои́стинну сладчайший,/ вся увеселя́еши, всех просвеща́я ум и вся науча́я знанию спаси́тельному.

Богородичен:

Свет рождшая, О́тчее Сло́во Присносу́щное, Чистая,/ свеща́тельными моли́твами Твои́ми просвети́ ум мой/ и отжени́ тьму души моей, Пречи́стая Владычице.

Песнь 6

Ирмос: Очи́сти мя, Спа́се,/ мно́га бо беззако́ния моя,/ и из глубины́ зол возведи́, молю́ся:/ к Тебе бо возопи́х, и услы́ши мя,/ Бо́же спасе́ния моего.

Служи́ти навы́к Богу Жи́ву свяще́ннейше,/ разруши́л еси многоча́стное безумных злонра́вие,/ Единому науча́я, Ана́ние, покланя́тися Триипоста́сному Божеству́.

Прие́м в ру́це твои церко́вная корми́ла,/ к Ко́рмчию Христу прише́л еси, апосто́ле,/ и сию Духом, яко корабль Боже́ственный, Ана́ние, упра́вил еси.

Созда́вый пра́вый путь,/ правоше́ствующему посыла́ему быти сла́вному Твоему ученику повеле́л еси, Влады́ко,/ пра́веднейшаго Твоего избра́ния сосуд открыва́я, моля́щася.

Богородичен:

Да изба́вимся от лю́тых прегрешений мольба́ми Твоими, Богороди́тельнице Чи́стая,/ и да улучи́м, Пречи́стая, Божественное сия́ние из Тебе неизрече́нно Воплоще́ннаго Сына Божия.

Ин

Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему прите́к, вопию́ Ти:/ возведи́ от тли живо́т мой,/ Многоми́лостиве.

Просвеще́ния исполня́емь и к высоте́ доброде́телей Божественно возводи́мь,/ небре́гл еси о всех земны́х:/ и столп Небе́сный, и свети́льник благоче́стия был еси.

Пло́ти увяди́л еси жела́ния/ и душу твою украси́л еси светле́йшими чистоты́ озаре́ньми,/ и добро́ту рачи́тельную доброде́телей благоле́пием обложи́л еси.

Возненави́дев привре́менное и су́етное, и гнилое, и те́чное наслажде́ние,/ к храму Богоро́дицы прилежа́, ум освяти́л еси, и душу, и тело, достосла́вне.

Богородичен:

Вси предзря́ще проро́цы све́тло будущее по́слежди от Девы, Христе́ мой,/ Твое́ на земли́ пренепоро́чное Рождество́,/ я́вственно Богови́дцы провеща́ша.

Кондак апостола, глас 2

Подобен: В молитвах:

В молитвах тепле́йший засту́пниче/ и прося́щим скоре́йший послу́шателю,/ приими́ моление, Ана́ние, наше/ и Христа моли поми́ловати ны,/ Единаго во святых Почива́ющаго.

Икос:

Просвеще́нием сияния Твоего просвети́в, Христе мой, мрак моего се́рдца и слепоту́,/ даждь ми слово похвали́ти чи́стым смыслом апостола Богоза́рныя доброде́тели и стра́сти блаже́ннаго:/ Источник бо Ты еси мудрости и Пода́тель благи́х, Многоблагоутро́бне./ Тем, уясни́в язык мой, пе́сненное приими́ похвале́ние, Еди́не во святых почива́яй.

Песнь 7

Ирмос: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси.

Да востру́бит му́дренно Богоизбра́нное ста́до благогла́сною трубо́ю страда́ния пастыря Ана́нии,/ вопия́ своему Началопа́стырю Христу:/ отцев наших Боже, благословен еси.

Да славит тя, ученика Божия, Ана́ние, и иера́рха ве́рна,/ и свиде́теля Боже́ственных страда́нии,/ возглаша́ющи, честна́я Церковь Христова:/ отце́в наших Боже, благослове́н еси.

Не смерти боя́знию, но любовию па́ствы скрыва́яся,/ во́лка, якоже агнца, зря укроти́вшася, Ана́ния зовя́ше:/ отце́в наших Боже, благослове́н еси.

Богородичен:

От де́вственных ложе́сн вопло́щся, явился еси, Христе́, на спасение наше./ Темже Твою Матерь ве́дяще Богородицу, правосла́вно зове́м:/ отце́в наших Боже, благослове́н еси.

Ин

Ирмос: О́троцы в Вавило́не/ пе́щнаго пла́мене не убоя́шася,/ но посреде́ пла́мене вве́ржени, ороша́еми, поя́ху:/ благослове́н еси, Господи, Боже отец наших.

Богородицу Марию Богому́дра имел еси Учи́теля,/ вразумля́ющую тя, и науча́ющую, и пе́ти повелева́ющую:/ благословен еси, Господи, Боже отец наших.

Возсия́л еси в мире, яко светле́йшее солнце, Рома́не Богому́дре,/ и све́тло просвеща́я верою зову́щия:/ благословен еси, Господи, Боже отец наших.

Твоих глаго́л веща́ние вселе́нную испо́лни/ и красно́ песнопе́ти Христу челове́ки научи́:/ благословен еси, Господи, Боже отец наших.

Богородичен:

Ныне блажа́т Тя вси ро́ди челове́честии, Богородице Чистая,/ якоже прорекла́ еси,/ и ве́рою славят:/ благословен, Пречистая, Плод чре́ва Твоего.

Песнь 8

Ирмос: Седмери́цею пещь/ халде́йский мучи́тель,/ Богочести́вым неи́стовно разжже́,/ си́лою же лу́чшею спасе́ны сия ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся веки.

Странно слы́шати, мня́ше Ана́ния славный,/ от восхити́тельныя губи́теля ста́да Твоего силы, Влады́ко,/ паче сло́ва премене́ние к па́стырскому чину./ Тем игра́я, вопия́ше:/ о́троцы, благослови́те, свяще́нницы, воспо́йте, лю́дие, превозноси́те во вся веки.

Да ра́дуется днесь и да играет ду́хом всесла́вный и блаженный град твой,/твоего благополучи́в заступле́ния, сла́вне,/ и, благодаря́ Спа́са, да вопие́т:/ о́троцы, благослови́те, свяще́нницы, воспо́йте, лю́дие, превозноси́те во вся веки.

Животворя́щим повеле́нием, Ана́ние прече́стне,/ светотвори́вую Ви́деннаго силу Савлу пропове́дал еси/ и отразил еси ослепле́ние, враче́вственныя твоя возложи́в дла́ни,/ стре́лы змии́ныя исто́ргл еси, яко чешуи́, вопия́:/ превозноси́те Христа во веки.

Троичен:

Трисве́тлое Божество́, Еди́нственную сия́ющую Зарю,/ от Еди́наго Триипоста́снаго Естества́, Роди́теля Безнача́льна,/ Единоесте́ственно же Сло́во о́тчее и сца́рствующаго Единосу́щнаго Духа,/ о́троцы, благослови́те, свяще́нницы, воспо́йте,/ лю́дие, превозноси́те во вся веки.

Богородичен

В ну́ждах спаса́ющая и те́пле предста́тельствующая/ всем су́щим в печа́ли, Всесвята́я Влады́чице,/ умилосе́рдися, спаси́ мя и лю́те па́дша воздви́гни,/ ру́ку по́мощи прежде конца подаю́щи, да не нощь мя сме́ртная обы́мет спяща;/ да Тя по до́лгу сла́влю во веки.

Ин

Ирмос: За зако́ны оте́ческия/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное,/ и, совоку́плени, имже не свари́шася огне́м,/ Дерза́вствующему досто́йную воспева́ху песнь:/ Го́спода пойте дела́/ и превозноси́те во вся веки.

Всю ми́ра красоту́, и сла́дость, и сла́ву оттря́с,/ ду́шу твою впери́л еси к Вы́шним лико́м, к та́мошним сла́вам и све́тлостям, му́дре,/ к добро́там неизрече́нным, к пребыва́нием та́мошним, к свету Богонача́лия, зовя́:/ Тя превозно́сим, Христе́, во веки.

Боже́ственным жела́нием распаля́ем,/ восхожде́ния положи́л еси в се́рдцы твое́м и безпло́тное во пло́ти житие́ стяжа́л еси./ А́нгельским чино́м подо́бяся, му́дре,/ та́мо су́щая возлюбил еси в мире песнопе́ния, верою, Рома́не, взыва́я:/ Тя превозно́сим, Христе, во веки.

Высоковеща́нием Боже́ственных твоих и сладча́йших слове́с, блаже́ннейше Рома́не,/ всяк по́мысл весели́ши человеков и услажда́еши, якоже некий пита́тель богатотво́рный,/ и просвеща́еши све́тло и науча́еши вопи́ти:/ Господа пойте дела и превозноси́те во вся веки.

Богородичен:

Равнобо́жием прельсти́в мя, человекоуби́йца, змий лука́внейший,/ яко пле́нника, исхити́ сладости райския,/ но Владыка, естество́м Сын Божий, вопло́щся, прии́де от Девы Марии, и взят мя на высоту́, обожи́в:/ Eгоже превозно́сим во вся веки.

Песнь 9

Ирмос: Тя, Неискусобра́чную Матерь Бога Вышняго,/ Тя, па́че ума ро́ждшую сло́вом вои́стину Бога,/ вы́шшую Пречи́стых сил,/ немо́лчными славословле́нии велича́ем.

Разруши́л еси, всехва́льне, тьму неве́дения;/ Свет же и́стинный возсия́л еси Дама́ску Триипоста́сный:/ но яко чадолюби́вый отец и любо́вный пастыренача́льник в Правосла́вней вере того сохрани.

Сие́ ле́тное соверша́юще торжество́,/ прииди́те светоза́рно сия́юще душе́вным досто́инством:/ Троицы служи́теля же и пропове́дника Ана́нии трисия́нную добродетель воспои́м.

О паче челове́ча досто́инства твоего, блаженне Ана́ние,/ яко ученик бо возлю́блен был еси, яко пастырь почи́л еси,/ и яко страда́лец Христу спросла́вился еси, венцы́ му́ченически украша́ем.

Богородичен:

Пречи́стая, Всенепоро́чная, сосу́де благово́ния,/ испроси́ у Христа, Eгоже родила́ еси,/ дарова́ти во́инству нашему на враги́ победу и от рабо́тнаго ига да́ти осла́бу лю́дем Твоим:/ Тя бо непреста́нно велича́ем.

Ин

Ирмос: Безсе́меннаго зача́тия/ рождество́ неска́занное,/ Ма́тере Безму́жныя нетле́нен Плод:/ Бо́жие бо рожде́ние обновля́ет естества́./ Темже Тя вси ро́ди,/ яко Богоневе́стную Ма́терь,/ правосла́вно велича́ем.

Го́рнейшим, сла́вне, лико́м совокупи́лся еси безпло́тным,/ иде́же неизрече́нная пребыва́ет ра́дость и всегда́шнее наслажде́ние,/ иде́же о́ный Богонача́лия свет есть и весе́лие,/ иде́же неизглаго́ланная слава, блаже́ннейше.

С пра́ведными внутрь Боже́ственныя славы всели́вся, зри́ши красоту́ неизрече́нную о́ную,/ зри́ши сладость неконча́емую, зри́ши добро́ты Небе́сныя, и́стинно желанныя, му́дре,/ ви́диши патриархов ли́ки, Рома́не славне.

Твою светоно́сную память верно соверша́ющия/ от бед изба́ви моли́твами твои́ми, Богому́дре,/ и от всякаго вре́да, Рома́не, и ско́рби чужда́го/ и Небе́сныя славы получи́ти сподо́би и Ца́рствия Го́рняго, блаже́ннейше.

Богородичен:

От дре́вняго паде́ния челове́ческий род первозда́ннаго бысть тле́нен, Дево Богородице,/ и порабоще́н страстьми́ грехо́вными,/ но из Тебе рожде́йся Преблаги́й Бог Своим благоутро́бием того́ воззва́.

Свети́лен Октоиха. Слава, апостола

Подобен: Жены́, услышите:

Дама́ск, апо́столе, ныне о тебе хва́лится,/ ему́же упространи́л еси крепость муче́нием, Ана́ние,/ учитель быв Христа гоня́щему, яко ученик наро́чит Христа гони́маго,/ к Нему́же о нас моли́ся.

И ныне, Богородичен:

О та́инств Твоих, о чуде́с Твоих!/ Како по рождестве́ Дева пребыла́ еси, якоже прежде рождества́;/ како Бога вмести́ла еси, нигде́же Вмести́маго;/ но вои́стину несказа́нна Твоя суть вся, Благослове́нная Дево Мати, Марие.

На стиховне Октоиха

Слава, апостола, глас 8. Анатолиево:

Учениче́ Спа́сов, иера́рше сла́вне,/ сла́во мучеников, Ана́ние,/ свети́льниче светле́йший, наш же градоде́ржче,/ прилежно моли́ся изба́вити стадо твое от бед/ и спасти́ души наша.

И ныне, Богородичен или Крестобогородичен

Подобен: О преславнаго чудесе́:

Тя ви́дящи пригвожда́ема на Кресте, Иисусе, и стра́сти прие́млюща во́лею,/ Дева и Мати Твоя, Владыко,/ увы Мне, вопия́ше, Чадо Сладкое,/ раны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый милосе́рдием Твоим.

На Литургии: Блаженны гласа на 4 и апостола песнь 3, на 4. Прокимен апостола, глас 8: Во всю землю изы́де веща́ние их: Стих: Небеса пове́дают славу Божию: Апостол Деяний, зачало 21, от полу. Аллилуия, глас 1: Испове́дят Небеса чудеса Твоя, Господи. Стих: Бог прославляем в сове́те святых. Евангелие от Луки, зачало 51. Слу́шаяй вас: Причастен: Во всю землю

(служба ему в сей день поется вкупе

со службами Покрову и апостолу Анании)

На вече́рни

Блажен муж: На Господи, воззвах: поставим стихов 6 и поем стихиры святаго, глас 5

Подобен: Преподо́бне о́тче:

Преподо́бне о́тче Са́вво,/ любо́вию Боже́ственною разжига́емь,/ оте́чество и род оста́вил еси/ и в чужди́х страна́х пусты́ню дости́г,/ и та́мо столп созда́в,/ и в нем до́бре подвиза́лся еси./ Те́мже и по преставле́нии твое́м/ благода́ть от Го́спода прия́л еси чуде́с./ Моли́ спасти́ся тя почита́ющим.

Преподо́бне отче Са́вво,/ любве́ ради Учи́теля твоего́/ вся, яже на земли́, преоби́дел еси/ и в пусты́ню всели́вся,/ пло́ти по́хотное мудрова́ние умертви́л еси/ и по́стническими труды́ твое́ житие́ уясни́л еси,/ отону́дуже и ученики́ собрав, ревну́ющия твоему житию,/ и сия́ Христу приве́л еси,/ егоже моли́ спасти́ся всем пою́щим тя.

Иже непра́ведно разбо́йнически наше́дших на оби́тель твою, преподо́бне,/ хотя́щих оскорби́ти ученики́ твоя,/ от столпа́ яко уви́дев, то́кмо жезла́ ударе́нием устраши́л еси:/ они же, яко позна́вше свое безчелове́чное суровство́,/ с студо́м к бе́гству устреми́шася./ Христу моли́ся, спасти́ся душа́м нашим.

Слава, глас 6:

В чужди́х страна́х водвори́вся, преподо́бне,/ и в пустыню безмо́лвия вшед,/ и та́мо столп созда́л еси,/ в не́мже Небесное богатство стяжа́л еси:/ слеза́ми постя́ся убо се́ял еси,/ радостию же пожина́еши трудо́в твои́х плоды./ Тем оби́тель, юже труды́ твоими стяжа́л еси, со ученики́/ не оста́ви, но ми́лостивно посеща́й,/ и Христу, отче Са́вво, моли́ся спасти́ся душа́м нашим.

И ныне, Богородичен: Кто Тебе не ублажит:

Вход, прокимен дне и, аще престол, чтения 3 преподобническая

На стихо́вне стихи́ры преподо́бнаго, глас 2

Подобен: До́ме Евфра́фов:

Яко преходя́щую жизнь, юже на земли́ презре́л еси, блаже́нне:/ и та́мо сподо́бился еси улучи́ти жизнь блаженную/ и Божия сия́ния при́емлеши, Богоносе.

Стих: Честна́ пред Го́сподем/ смерть преподо́бных Его.

Любве́ ради Христовы, преподо́бне Са́вво,/ плоти рачи́тельное умертви́л еси мудрова́ние/ и от страсте́й ду́шу свобо́дну Богу предста́вил еси.

Стих: Блажен муж, боя́йся Господа,/ в за́поведех Его восхо́щет зело́.

Бо́дренными моли́твами и сле́зными исто́чники/ Церковь верных/ обогати́л еси, Богоблаже́нне.

Слава, глас 2:

В столп яко вшел еси, преподо́бне,/ и отту́ду доброде́тели ра́ди к Небе́сному гра́ду преше́л еси:/ дости́гл пра́ведных поко́я и святых ра́дования./ Темже с ними приле́жно, Са́вво, моли́ся/ о и́же ве́рою жизнь твою почита́ющих/ и честно́е твое успе́ние сла́вящих,/ всякаго сопроти́внаго обстоя́ния изба́витися свяще́нному твоему стаду,/ да сего ради тя вси ве́рно почита́ем.

И ныне, Богородичен

Тропарь, глас 4:

От ю́ности твоей весь Богу порабо́тился еси, блаже́нне,/ и Того ради любве́ оте́чество и род оста́вил еси,/ в пустыню всели́вся/и в ней жесто́кое житие́ показа́в,/ чуде́с дарова́ния от Господа приял еси,/ Са́вво преподо́бне,/ моли́ Христа Бога спасти́ся душа́м на́шим.

На у́трени

На Бог Господь: тропарь дважды. Слава, и ныне, Богородичен: Еже от века утае́нное

По 1-й кафизме седален, глас 4

Подобен: Удиви́ся Ио́сиф:

Удиви́ся, преподо́бне Са́вво,/ во всем мире, Богоно́се, житие́ твое,/ яко от утро́бы ма́терни избра́н еси Богом./ Тем ныне со А́нгелы лику́еши в Небе́сных./ Помина́й нас, творя́щих па́мять твою,/ Са́вво преподо́бне.

Слава, и ныне, Богородичен:

Обнови́ла еси, Чи́стая,/ Боже́ственным Рождеством Твои́м/ истле́вшее во страсте́х земноро́дных ме́ртвенное существо́,/ и воздви́гла еси вся от сме́рти к животу́ нетле́ния./ Темже Тя по до́лгу блажи́м вси, Дево Препросла́вленная,/ якоже прорекла́ еси.

По 2-м стихословии седален, глас 5

Подобен: Собезнача́льное Сло́во:

По́стника Госпо́дня пе́сньми почти́м,/ яко умертви́вша вся прило́ги страсте́й воздержа́нием тве́рдым/ и кре́пким терпе́нием вои́стинну/ и посрами́вша зело́ сопроти́внаго всю горды́ню,/ и ныне моля́щася Го́сподеви/ поми́ловатися душа́м нашим.

Слава, и ныне, Богородичен:

Страшно́ чу́до зача́тия,/ и несказа́нен о́браз рождества́ в Тебе позна́ся, Чистая Присноде́во./ Ужаса́ет ми ум и удивля́ет помышле́ния:/ слава Твоя, Богоро́дице, всем простре́ся на спасе́ние душа́м нашим.

По полиелеи седален, глас 1

Подобен: Гроб Твой, Спа́се

Погре́бл еси страсте́й все воста́ние умерщвле́нием пло́ти, свяще́нный отче,/ жизнь безконе́чную по сме́рти прия́л еси./ Темже днесь Христова Це́рковь пра́зднует/ твою досточу́дную па́мять,/ преподо́бных украше́ние.

Слава, и ныне, Богородичен:

Наста́ви ны на путь покая́ния,/ уклоня́ющияся всегда ко злым безпу́тием и преблага́го Бога прогне́вающия,/ Неискусобра́чная Благослове́нная Мари́е,/ прибе́жище отча́янных челове́ков,/ Божие селе́ние.

Степенна, прокимен: Всякое дыхание: Евангелие преподобническое.

По 50-м псалме стихира, глас 6

Преподо́бне о́тче,/ во всю зе́млю изы́де веща́ние исправле́ний твои́х:/ темже на Небесе́х обре́л еси мзду трудо́в твои́х,/ де́монская разори́л еси по́лчища/ и А́нгельския дости́гл еси чи́ны,/ ихже житию без поро́ка поревнова́л еси,/ дерзнове́ние имея ко Го́споду,/ мир испроси́ душа́м нашим.

Канон преподобнаго Саввы, глас 4

Творение священномонаха Пахомия

Песнь 1

Ирмос: Отве́рзу уста́ моя,/ и напо́лнятся Духа,/ и сло́во отры́гну Царице Матери,/ и явлю́ся све́тло торжеству́я,/ и воспою́, ра́дуяся, Тоя́ чудеса́.

Смири́лся еси Христа ради, о́тче, и крест взем,/ от оте́чества и сро́дников, яко от зми́я, бе́гал еси:/ отню́дуже в пусты́ню вшед/ и в ней трудолю́бно подвиза́лся еси, преподо́бне.

От ю́ности твоея́, о́тче Са́вво, ум к Богу впери́в,/ и тле́нными нетле́нная, яко до́брый купе́ц, купи́л еси:/ темже ныне сше́дшеся,/ па́мять твою́ почита́ем.

Христо́вым раче́нием, о́тче Са́вво, па́че огня распала́емь,/ настоя́щая яко ничто́же су́щая презре́л еси:/ и сего́ ра́ди в поко́ища вселился еси,/ идеже пра́ведных души веселя́тся.

Богородичен:

Боля́ща исцели́ душе́ю и те́лом, Влады́чице, раба Твоего,/ блаже́ннаго Са́ввы моле́нием:/ Тебе бо Предста́тельницу вси су́щии в печа́лех стяжа́хом, яко Ро́ждшую Спасе́ние наше.

Катавасия: Отверзу уста моя

Песнь 3

Ирмос: Твоя́ песносло́вцы, Богоро́дице,/ живы́й и незави́стный исто́чниче,/ лик себе совоку́пльшия, духо́вно утверди́/ в Боже́ственней Твоей славе,/ венце́в сла́вы сподо́би.

Сна твои́м очесе́м не дал еси, блаже́нне Са́вво,/ ни ве́ждом дрема́ния, до́ндеже сподо́бился еси пра́ведных селе́ния,/ яже угото́ва Бог, преподо́бне, лю́бящим Его.

Бо́дренными твоими моли́твами, отче Са́вво, и жесто́ким воздержа́нием/ Богу на земли́ до́бре угоди́л еси:/ сего ради стра́шен враго́м/ и сла́вен челове́ком был еси.

Ра́йскую жизнь и та́мо святых селе́ние/ всегда во уме твое́м помина́л еси, преподо́бне./ Темже во слезах и воздыха́ниих всю твою жизнь, о́тче Савво, преше́л еси./ Сего ради и по смерти Христо́с чудесы́ тя просла́ви.

Богородичен:

Источа́еши исцеле́ний струи́ боля́щим, Де́во, всюду:/ Тя бо исто́чник показа́ милосе́рдия, Владычице,/ Иже ми́лости исто́чник,/ из Тебе рожде́йся па́че ума́.

По 3-й песни седален, глас 4

Подобен: Вознесы́йся:

Ю́ность твою́, преподо́бне, воздержа́нием увяди́л еси,/ стра́сти теле́сныя, яко пле́нника ху́да, связа́в,/ ду́ху повину́л еси:/ и сего́ ра́ди, о́тче Са́вво,/ Христос чудесы́ пресла́вно тебе венча́ет,/ Един прославля́яй святыя Своя.

Слава, и ныне, Богородичен:

Умертви́ся вся кре́пость моя от мно́жества безме́рных моих зол,/ и, мно́гими скорбьми́ одержи́м, уже отча́яхся:/ но помози́ ми, Владычице, Са́ввы блаже́ннаго предста́тельством,/ яко Ра́дость ро́ждшая пла́чущим и утеше́ние.

Песнь 4

Ирмос: Седя́й в сла́ве на Престо́ле Божества́/ во о́блаце ле́гце/ прии́де Иисус Пребожественный,/ нетле́нною дла́нию, и спасе́ зову́щия:/ слава, Христе́, силе Твоей.

Житие́ твое, отче Са́вво,/ чу́дно на земли́ показал еси,/ вели́ко поще́ние и смирение:/ и сего ради та́мошняго жития́ вели́чество насле́дил еси./ Моли́ спасти́ся от бед поющим тя.

Симео́на вели́каго, на столпе́ жи́вшаго,/ житию́ после́дуя, преподо́бне,/ темже тому́ ели́ко мо́щно именова́ние от жития́ стяжа́л еси,/ Са́вво пребога́те.

Посто́м и моли́твами тело твое, отче Са́вво, изнури́л еси/ и сего ради сподо́бился еси ви́дети неизрече́нная блага́я,/ яже святым угото́вана./ С ни́миже, отче Са́вво, о нас моли́ся.

Богородичен:

Кров, и заступле́ние, и прибе́жище бу́ди ми, Дево, рабу Твоему,/ исцели́ мя от безме́рных зол,/ еже мощи́ воспева́ти, Пречи́стая:/ слава Рождеству́ Твоему.

Песнь 5

Ирмос: Ужасо́шася вся́ческая/ о Боже́ственней сла́ве Твоей,/ Ты бо, Неискусобра́чная Де́во,/ име́ла еси во утро́бе над всеми Бога,/ и родила́ еси Безле́тнаго Сына,/ всем, воспева́ющим Тя,/ мир подава́ющая.

Чи́сто житие́ твое/ от юности потща́лся еси, преподо́бне, сохрани́те:/ темже, чистоту́ твою видев, Пресвятый Дух/ в тя всели́ся.

Яко преоби́дев тле́нная, ве́чная, отче, сподо́бился еси прия́ти/ по нело́жному словеси́: проси́те и прии́мете./ Темже яко проси́л еси,/ сия по досто́инству прия́л еси.

Место, еже сподо́бися прия́ти честны́я мо́щи твоя, преподо́бне, освяти́ся/ и по многим страна́м прославля́емо есть,/ яко в себе мо́щи твоя иму́щее.

Богородичен:

Не преста́й моля́щи, Eгоже родила́ еси, Богоневе́сто,/ яко Спа́са и Влады́ку,/ разреше́ние ми пода́ти скорбе́й и боле́зней облегче́ние,/ яко да прииму́ прощение, песносло́вя Тя во веки.

Песнь 6

Ирмос: Боже́ственное сие и всечестно́е/ соверша́юще пра́зднество,/ Богому́дрии, Богоматере,/ прииди́те, рука́ми воспле́щим,/ от Нея ро́ждшагося Бога сла́вим.

Твое великое житие́ и чистоту́,/ к сим же безме́рное смире́ние прови́дев,/ Пресвяты́й Дух, славна тя всем, о́тче, показа́./ Темже от сего жития́ ко о́ному преше́д,/ получи́л еси с пра́ведными та́мо весе́лие.

Днесь наста́вши свяще́нная па́мять твоя, преподо́бне Са́вво,/ весели́т ученики твоя,/ воспева́ющия любо́вию по́двиги твоя,/ иже, честно́е твое успе́ние сла́вяще, торжеству́ют,/ яже моли́твами твои́ми, отче, соблюди́.

Разбо́йницы пе́рвее прише́дше тебе оскорби́ти, преподо́бне,/ но тех разуме́в лука́вство, возви́гнути тем дре́во рекл еси,/ не могу́щим же мно́гим тебе еди́ному проти́витися./ Темже яко посра́млени про́чее со страхом отбежа́ша,/ паче побежде́ни бывше, не́жели победи́ша.

Богородичен:

Твою по́мощь даждь ми/ и изба́ви мя от бед и скорбе́й/ и прегреше́ний моих,/ яже всех ро́ждши Избавле́ние.

Кондак, глас 8

Подобен: Взбра́нной Воево́де:

Оте́чества, преподо́бне, удали́вся/ и всели́вся в пусты́ню,/ и та́мо на столп вшед, иде́же жесто́кое житие́ показал еси,/ и мно́гих житие́м удиви́в,/ отню́дуже дарова́ние чудес от Христа прия́л еси,/ помина́й нас, честву́ющих па́мять твою, да зове́м ти:/ радуйся, Са́вво, отче наш.

Икос:

Ева́нгельский глас, отче, услы́шав,/ вся оста́вил еси плотска́я мудрова́ния,/ бога́тство и славу в ничто́же вмени́в,/ на стра́сти, яко безпло́тен, подвиза́лся еси,/ и Безпло́тных ликостоя́ния чистото́ю сподо́бился еси,/ и ра́зума дарова́ние от Бога прия́л еси,/ еже пода́ждь в пе́снех пою́щему ти си́це:/ радуйся, Са́вво преподо́бне и Богоно́сне, Небе́сный челове́че и земны́й А́нгеле;/ радуйся, Духа Свята́го прекра́сное оби́телище;/ радуйся, Богоблаже́нне, вельми́ подвиза́вся во вре́менней жизни,/ по достоя́нию обогати́лся еси благода́тию Духа,/ ея́же дарова́ние пода́ждь нам, ча́дом твоим, да зовем ти:/ радуйся, преподо́бне Са́вво, отче наш.

Песнь 7

Ирмос: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Господь и Бог благослове́н еси.

Источа́ет чудеса́ честна́я ра́ка твоя, преподо́бне,/ преизоби́лующи благода́тию,/ верою приходя́щим здра́вие да́рует,/ Христу от души́ вопию́щим:/ благослове́н Бог отцев наших.

Дре́вним о́нем и вели́ким отце́м, в посте́ просия́вшим,/ житие́м подо́бяся, преподо́бне,/ в пусты́ню всели́лся еси/ и та́мо в поще́ниих мно́га ле́та пребы́л еси,/ Са́вво, отче наш.

Яко и́стиннаго и кро́ткаго Пастыренача́льника Христа/ незло́бивое овча́, отче Са́вво, был еси./ Темже незло́бив хотя́щим тебе озло́бити был еси,/ Христу вопия́л еси:/ благослове́н Бог отце́в на́ших.

Богородичен:

Обощре́ны боле́зни ра́нам моим от безме́рных моих прегреше́ний, Влады́чице,/ веду́т в смерть душе́вную и теле́сную:/ но исхи́ти яко си́льна вся́ких скорбе́й и неду́г.

Песнь 8

Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ убо образу́емое,/ ныне же де́йствуемое,/ вселе́нную всю воздвиза́ет пе́ти Тебе:/ Го́спода пойте дела/ и превозноси́те Его во вся ве́ки.

Изде́тска, преподо́бне отче,/ потща́лся еси свою со́весть и се́рдце с душе́ю чисто Го́споду предста́вити./ Тем и Христо́с чудесы́ тебе прославля́ет, Тому́ вопию́ща:/ Го́спода воспева́йте дела́/ и превозноси́те Его во веки.

Ныне пусты́ня весе́лием красу́ется, отче,/ иму́щи мо́щи твоя в себе, Савво преподо́бне./ Ученицы́ же твои, твоему́ житию́ ревну́юще,/ о твоей па́мяти ра́дующеся, Творцу вопию́т:/ Го́спода воспева́йте дела́/ и превозноси́те Его во веки.

В пусты́ни, преподо́бне, и деже селе́ние имел еси,/ тамо прече́стен храм в славу Христа воздви́гл еси,/ в нем прославля́тися пречи́стому Того И́мени, и всем вопи́ти:/ Го́спода воспева́йте дела/ и превозноси́те Его во веки.

Богородичен:

Свети́льниче Све́та Трисо́лнечнаго су́щи,/ заре́ю благоутро́бия Твоего́ тьму отыми́ прегреше́ний мои́х, Богороди́тельнице,/ избавле́ние ну́жных боле́зней подаю́щи,/ верою превознося́щему пречи́стое Твое Рождество́.

Песнь 9

Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная/ Богоро́дице, Чи́стая Присноде́во.

От пусты́ннаго жития́ к преми́рней и ве́чней жи́зни, яко преше́д, блаже́нне,/ не преста́й моля Изба́вителя от разли́чных напа́стей и бед изба́вити/ любо́вию честно́е твое успе́ние ныне пе́сньми сла́вящия.

Певцо́в и́скренною любо́вию пою́щих/ и ве́рою тебе пе́ние хвале́ния приноша́ющих, треблаже́нне Са́вво,/ от вся́ких бед и скорбе́й избавля́й, да тя вси велича́ем.

От рук недосто́йных ма́лое сие пе́сней хвале́ние принося́щаго тебе, приими́, блаже́нне Са́вво:/ не бо возмого́х проти́ву твоего вели́чества украси́ти:/ но ма́лое сие яко вели́ко приими́,/ да тебе всегда́ в пе́снех велича́ю.

Богородичен:

Пе́ние с пе́снию и хвале́ние исплете́ное от боле́зненныя души́ приношу́ с любо́вию, Тебе,/ Ро́ждшей Христа, Естество́м Бога,/ еже благоприя́тно прие́мши, проше́ния наша, Богоро́дице, испо́лни/ и моли́твами Твои́ми мя соблюди́.

Светилен. Подобен: Жены́, услышите:

Процве́л еси, яко фи́никс, Дави́дски, отче,/ и оби́тель яви́лся еси Духа Пресвята́го,/ Иже сла́вна тя вселе́нней показа́./ Того о нас непреста́нно моли́,/ почита́ющих верою пречестну́ю па́мять твою, преподо́бне Са́вво.

Слава, и ныне, Богородичен:

Тя пе́сньми немо́лчными ублажа́ем, Де́во,/ яко Тро́ицы Еди́наго родила́ еси, Богоро́дице,/ и но́сиши на Боже́ственную руку́ пребога́тое Сло́во,/ непреме́нно и неизме́нно.

На хвалитех стихиры преподобнаго на 4, глас 8

Подобен: О пресла́внаго чудесе́:

Преподо́бне отче Са́вво,/ ты и́го Христо́во на ра́мо взем,/ до́блественне наи́тие вра́жие попра́л еси./ Темже тя верою вси почита́ем,/ о преблаже́нне, мона́шествующих похвало́./ Темже Христа непреста́нно моли́ спасти́ ду́ши наша.

Ве́рою соше́дшеся вси,/ яко по́стника тя Христова почита́ем, Са́вво:/ ра́дуяся бо, ше́ствовал еси в пусты́ни непрохо́дней, му́дре,/ наста́вник был еси че́стен./ Темже Тебе мы верою взываем, блаже́нне:/ по́стников похвало́,/ о нас моли́ся ко Го́споду поми́ловатися душа́м нашим.

Преподо́бне отче наш,/ бу́дущия ради жизни, на реце́, глаго́лемей Ви́шере, всели́лся еси,/ ника́коже боя́ся неви́димых враго́в,/ мно́гажды толца́ния творя́щих к тебе./ Ты же моли́твами сия безве́стны сотворя́л еси,/ о терпели́вый душе́ю./ Те́мже тя ве́рою вси чтим и ублажа́ем.

Слава, глас 8. Самогласен:

На Небо теку́щею возше́д колесни́цею, чу́дне, доброде́тели,/ дости́гл еси кра́йнее житие́./ Воздержа́нием в пусты́ни живы́й,/ смотря́я Вы́шняго Иерусали́ма красоту́,/ и боле́зненных по́двигов досто́йно по́чести прии́м,/ с Небе́сными ра́дуешися чинонача́лии, преблаже́нне,/ ве́чных благ насле́дник и Ца́рствия жи́тель быв./ Но моли́ся, преподо́бне Са́вво, Спа́су всех,/ умири́ти мир и спасти́ ду́ши наша.

И ныне, Богородичен

Таже, Славословие великое. И отпуст

На Литургии служба преподобных

Зри

Ведомо же буди и сие, яко аще случится праздник Покрова Пресвятыя Богородицы в день седмичный, кроме недели, и изволит кто пети купно с Покровом апостолу Анании и преподобному Савве, да поет сице:

На малой вечерни: Стихиры Покрова на 4, глас 1. Самогласны: Слава, и ныне, глас 6: Прииди́те, празднолю́бных собо́ри: На стиховне стихиры, глас 2. Подобен: До́ме Евфра́фов: Слава, и ныне, глас 3: Прииди́те, вси празднолю́бцы: Тропарь Покрова, глас 4: Днесь благове́рнии лю́дие: Таже, ектения малая и отпу́ст.

На велицей вечерни: Блажен муж: 1-й антифон. На Господи, воззвах: стихиры Покрова, на 4, и апостола 3, и преподобнаго Саввы 3: Слава, апостола: И ныне, Покрова, глас 8: Сра́дуются с нами: Вход. Прокимен дне. Чтения 3, Покрова: 1-е Бытия: Изы́де Иа́ков: 2-е: Пророчества Иезекиилева: Будет от дне осмаго: 3-е: Притчей: Премудрость созда Себе Дом: Ектении обычныя. На литии стихиры Покрова Богородицы, глас 3: Наста́ днесь: Слава, апостола: И ныне, Покрова Богородицы, глас 2-й: Смысл очистивше и ум: На стиховне, стихиры Богородицы, глас 2, самогласны: Яко всех вышши сущи: Слава, преподобнаго: и ныне, Покрова, глас 2-й: Яко венце́м пресветлым: На благословении хлебов, тропарь Покрова, глас 4: Днесь благове́рнии лю́дие: трижды. И Бу́ди Имя Господне: трижды, с пением, и псалом 33: Благословлю Господа: И чтение.

На утрени: На Бог Господь: Тропарь Покрова Богородицы. Таже апостола: Слава, Саввы: И ныне, Покрова. И обычные кафизмы. По кафизмах седальны Покрова. И чтение. По полиелеи седален Покрова. И чтение. Степенна, 1-й антифон, 4-го гласа. Прокимен, глас 4: Помяну имя Твое: Стих: Лицу Твоему помолятся: Всякое дыхание. Евангелие от Луки, зачало 4: Псалом 50. Слава, Молитвами Богородицы: И ныне, тойже. Помилуй мя, Боже: По 50-м псалме стихира, глас 8: Сра́дуются с нами: Канон Покрова Богородицы со ирмосом на 6: и апостола на 4: и преподобнаго на 4. Катавасия: Отве́рзу уста́ моя: По 3-й песни кондак апостола и преподобнаго: и седален апостола: Слава, преподобнаго: И ныне, Покрова. И чтение. По 6-й песни кондак Покрова, глас 3: Дева днесь предстои́т в церкви: и икос. И пролог. По 9-й песни светилен Покрова: Слава, апостола: И ныне, Покрова. На хвалитех, стихиры Покрова, на 4: Слава, апостола: И ныне, Покрова. Славословие великое. По Трисвятом, тропарь апостола: Слава, преподобнаго: И ныне, Покрова: Ектении. И отпуст. И час 1-й. На 1-м часе тропарь Покрова: Слава, апостола: И ныне, Богородичен часов. По Трисвятом кондак Покрова. И совершенный отпуст. Такожде и на прочих часех, вначале глаголем тропарь Покрова: святы́х же тропари пременяем. Кондак же на всех часех глаголем Покрова.

На Литургии: Блаженны: от канона Покрова, песнь 3-я, на 4: и апостола 6-я, на 4. По входе тропарь Покрова, и апостола, и преподобнаго. Кондак апостола: Слава, преподобнаго: И ныне, Покрова. Прокимен, песнь Богородицы, глас 3: Величит душа Моя Господа: Стих: Яко призре на смирение Рабы Своея. И апостола, Во всю зе́млю: Апостол Покрова, ко Евреем, зачало 320: Другой Деяний, зачало 21, от полу: Аллилуия, глас 8: Сльши, Дщи, и виждь. Стих: Лицу́ Твоему помо́лятся: И апостола: Испове́дят Небеса чудеса Твоя: Евангелие от Луки, зачало 54: И апостола, от Луки, зачало 51: Причастен: Чашу спасения: Другий, Во всю землю: Ряд, Апостол и Евангелие, вычитаем напреди.

Зри

Подобает ведати: Аще случится праздник Пресвятой Богородицы, Честнаго Ея Покрова, и святаго апостола Анании в неделю

В субботу вечера, на малой вечерни, на Господи, воззвах: стихиры воскресны гласа, на 4: Слава, и ныне, Покрова. На стиховне стихира воскресна, 1-я. И Покрова стиховна великия вечерни, с припевы их: Слава, и ныне, Покрова, малой вечерни. По Трисвятом тропарь воскресен: Слава, и ныне, Покрова. Ектения малая. И отпу́ст.

На велицей вечерни, на Господи, воззвах: стихиры воскресны 3 и восточен 1, Анатолиев: и Покрова, 3: и апостола Анании, 3: Слава, Покрова: И ныне, Богородичен гласа. Чтения Покрова, 3. На литии стихиры Покрова. Слава, апостола: И ныне, Покрова. На стиховне стихиры воскресны: Слава, апостола: И ныне, Покрова. На благословении хлебов, тропарь Покрова, трижды.

Зри

Аще ли несть бдения, глаголем тропарь воскресен: Слава, апостола: И ныне, Покрова.

На утрени: На Бог Господь: тропарь воскресен, дважды. Слава, апостола: И ныне, Покрова. По кафизмах седальны воскресны, и Богородичны их. Таже полиелей: И тропари, Ангельский собор: Ипакои гласа, и седальны Покрова. Степенны и прокимен, гласа. Евангелие воскресно: и прочая. Канон воскресен на 4: и Покрова на 6: и апостола на 4. Катавасия: Отверзу уста моя: По 3-й песни кондак Покрова, и апостола, и седален апостола. Слава, и ныне, Покрова. По 6-й песни кондак воскресен. На 9-й песни поем, Честнейшую: Светилен воскресен. Слава, апостола: И ныне, Покрова. На хвалитех стихиры воскресны: 4, и Покрова, 3 подобны: и самогласен, иже на Славу, с припевы вечерними. Слава, стихира Евангельская: И ныне, Преблагословенна еси: Славословие великое. По Трисвятом тропарь воскресен. Ектении: И отпуст. И час 1-й. На 1-м часе, тропарь воскресен: Слава, Покрова: И ныне, Богородичен часов. По Отче наш: кондак Покрова: На 3-м часе, тропарь воскресен: Слава, апостола: И ныне, Богородичен часов. По Отче наш: кондак воскресен. Такожде и на прочих часах глаголем кондак воскресен, и Покрова, пременяюще.

На Литургии: Блаженны гласа, на 4: и Богородицы, песнь 3-я, на 4: и апостола, песнь 6-я, на 4. По входе тропарь воскресен, и Покрова, и апостола. Кондак воскресен: Слава, кондак апостола: И ныне, Покрова. Прокимен, Апостол, аллилуиа, Евангелие, и причастен, прежде воскресен: и потом Богородицы. Преподобнаго же Саввы Вишерскаго служба оставляется и поется на повечерии.

Зри

Ины величания

Покрову Пресвятыя Богородицы:

Величаем Тя,/ Пресвятая Дево,/ Мати Христа, Бога нашего,/ и всеславный славим Покров Твой.

Величаем Тя,/ Пресвятая Дево,/ Мати Христа, Бога нашего,/ Иже к Сыну Свои руце простирающи, и о мире молящися,/ и честны́м Своим омофором защищающи/ град и люди от врагов наших.

Зри Сии ирмосы и припевы поются на Святой Афонской горе в праздник Покрова Пресвятыя Богородицы

Песнь 1

Ирмос: Отве́рзу уста моя,/ и напо́лнятся Духа,/ и сло́во отры́гну Царице Матери,/ и явлю́ся све́тло торжеству́я,/ и воспою́, ра́дуяся, Тоя́ Покро́в честны́й.

Песнь 3

Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик себе совоку́пльшия духо́вно, утверди́/ и Святы́м Покрово́м Твоим сла́вящия покры́й.

Песнь 4

Ирмос: Седя́й в сла́ве на престо́ле Божества́,/ во о́блаце ле́гце/ прии́де Иисус Пребоже́ственный/ нетле́нною Девою и спасе́ пою́щия/ Покров Ея честны́й.

Песнь 5

Ирмос: Ужасо́шася вся́ческая/ о Боже́ственней сла́ве Твоей,/ Ты бо, неискусобра́чная Дево,/ во Влахе́рнстем храме Твое́м распросте́рла еси омофо́р Свой/ и моля́щихся покры́ла еси,/ мир и спасе́ние подава́ющи.

Песнь 6

Ирмос: Боже́ственное сие и всечестно́е/ соверша́юще пра́зднество/ Покрова́ Божия Матере,/ прииди́те руками воспле́щим,/ от Нея ро́ждшагося Бога славим.

Ирмосы 7-й и 8-й песен обычнии

Припевы на 9-й песни:

Ангели, Покров Пречистыя зряще, удивишася,/ како покры в церкви молящияся люди.

Ангели, окружающе Деву, удивишася,/ како омофором во Влахе́рне покры благоверныя люди.

Ангели, с лики святых предстояще Деве, удивишася,/ како моляшеся с ними прилежно о мире.

Ангели Богородицу песньми величают,/ како присно покрывает с верою к Ней прибегающих.

Ангели и вси снятии Тя, Богомати, славословят,/ како покрывавши от зол имя Твое призывающих.

Ангели и человецы Покров чтут Владычицы,/ заступает бо всегда требующих Ея помощи.

С Небесными земнии Тя, Госпоже, воспеваем,/ покрывавши бо от бед на Тя уповающих.

Величай, душе моя,/ пречестны́й Покров Божия Матере.

Величай, душе моя,/ Божественный Покров Богоблагодатныя Приснодевы.

Величай, душе моя,/ державный Покров Преславныя Владычицы.

Величай, душе моя,/ необоримый Покров Небесе и земли Царицы.

Величай, душе моя,/ Покров святый Присноблаженныя Богоневесты.

Величай, душе моя,/ Благословенную в женах, Пресвятыя Троицы светоносное селение.

Величай, душе моя,/ Честнейшую горних воинств Деву Пречистую Богородицу.

Ины:

Величай, душе моя,/ честны́й Покров Девы Богородицы.

Величай, душе моя,/ ко Христу Молебницу за мир, Богородицу Деву Марию.

Песнь 9

Ирмос: Всяк земнородный/ да взыграется, Духом просвещаемь,/ да торжествует же верных собрание,/ почитающее Покров Божия Матере,/ покрывающий вся Богомудрыя/ и избавляющий от всякаго зла.

Тропарь, глас 4:

Днесь све́тло красу́ется Богоспаса́емый град Псков/ и вся страна́ Росси́йская/ прише́ствием Ма́тери Бо́га Вы́шняго/ на избавле́ние гра́да сего́ от ва́рварскаго плене́ния./ Услы́ша плач и сле́зы раб Свои́х,/ ско́ро приклони́ся на мольбу́ к Сы́ну Своему́ и Бо́гу на́шему,/ и моле́нием Свои́м гнев Бо́жий укроти́ и весь мир просвети́,/ и град сей от ско́рби на ра́дость премени́./ О, ди́вному зна́мению,/ ка́ко Пресвята́я Влады́чице прии́де на возду́се в це́рковь Свою́/ и на забра́ло гра́да Пско́ва/ и призва́ уго́дников свои́х, благове́рных князе́й,/ и поноси́ в лю́дех беззако́ние./ И Свое́ю пречи́стою руко́ю ука́зоваше на пога́наго зла́го ва́рвара/ и его сове́т на разруше́ние./ Возвесели́ся, Богоспаса́емый гра́де Пско́ве/ и все Правосла́вие, име́юще такову́ Засту́пницу непобори́му./ Днесь притеце́м, ве́рнии,/ в дом спаси́тельный Влады́чицы Богоро́дицы,/ све́тло пра́зднуя,/ и ко свято́му Ея о́бразу со слеза́ми припаде́м, вопию́ще и глаго́люще:/ О Всеми́лостивая Госпоже́ Влады́чице Богоро́дице,/ моли́ся Сы́ну Своему́ Христу Богу на́шему/ спасти́ правосла́вныя лю́ди и град сей изба́вити от о́гненнаго запале́ния/ и от нахожде́ния пога́ных и междоусо́бныя бра́ни,/ и спасти́ ду́ши наша яко Милосе́рдая.

Кондак, глас 8:

Засту́пнице христиа́н, Предста́тельнице гра́ду на́шему Пско́ву,/ услы́ши моли́тву раб Свои́х, Влады́чице Богоро́дице,/ и ско́рым Свои́м прише́ствием светолу́чными заря́ми раб Свои́х возвесели́/ и торжествова́ти устро́й, в беде и в се́товании возвесели́,/ и завеща́ во гра́де моли́ти Святу́ю Тро́ицу,/ и Сама обеща́ся моли́ти Ю./ О, пресла́вному чудесе́,/ ка́ко Небе́сная Цари́це к земны́м прии́де изба́вити рабы́ Своя́ погиба́ющия./ О, ди́вному зна́мению,/ ка́ко вразумля́юще рабы́ Своя́, ка́ко бы умоли́ти Святу́ю Тро́ицу./ О, Всеми́лостивая Влады́чице Богоро́дице,/ аще не бы Ты предстоя́ла, моля́щи за ны,/ кто бы нас изба́вил от толи́кия беды́,/ яко не и́мамы иныя по́мощи и наде́жды, ра́зве Тебе, Влады́чице,/ Твои́ бо раби́, да не поги́бнем,/ и потщи́ся на умоле́ние раб своих при́сно,/ Богоро́дице, чту́щих Тя.

Икос:

Простри́ длани Свои, и́ма же всех Влады́ку я́ко Младе́нца прия́т,/ за мно́жество бла́гости не оста́ви нас всегда́,/ бо́дреною Свое́ю моли́твою и неизче́тною просты́нею уще́дри нас/ и пода́ждь душа́м милосе́рдие Свое́, во ве́ки источа́ющи./ Тебе́ бо и́мамы, гре́шнии, Засту́пницу от находя́щих на ны бед и зол,/ но я́ко иму́щи милосе́рдия щедро́ты,/ ускори́ на моли́тву и потщи́ся на умоле́ние,/ заступа́ющи при́сно, Богоро́дице, чту́щих Тя.