Канон всем святым от века Богу благоугодившим
Канон, глас 8‑й
Песнь 1
Ирмос: Песнь возсле́м лю́дие чу́дному Бо́гу на́шему, свободи́вшему Изра́иля от рабо́ты, песнь побе́дную пою́ще и вопию́ще: пое́м Тебе́ Еди́ному Влады́це.
Припев: Вси святи́и, моли́те Бо́га о нас.
Проро́ческий собо́ре, апо́стольское сосло́вие, му́ченик во́инства, Влады́ку всех моли́те спасти́ся мне, прегреше́нии мно́гими обдержи́мому.
Вси святи́и, моли́те Бо́га о нас.
Иера́ршеский собо́ре, преподо́бнии и пра́веднии вси, благ ве́чных улучи́ти моли́теся, ве́рою вас блажа́щим.
Сла́ва Отцу, и Сы́ну, и Свято́му Ду́ху. Всех святы́х Твои́х, Го́споди, воспева́ем чи́ны, я́ко моли́твами их озаря́еши ду́ши на́ша: Ты бо еси́ Свет непристу́пный, неве́дения мрак отгоня́яй, присносу́щными Твои́ми све́тлостьми.
И ны́не, и при́сно, и во ве́ки веко́в, ами́нь. Пресвята́я Де́во Ма́ти, я́же Бо́га, Пресвято́е Сло́во, родила́ еси́, освяти́ всех ве́рою Тя со все́ми святы́ми сла́вящих, мо́лимтися.
Песнь 3
Ирмос: Ты еси́ утвержде́ние притека́ющих к Тебе́, Го́споди, Ты еси́ Свет омраче́нных, и пое́т Тя дух мой.
Вси святи́и, моли́те Бо́га о нас.
Свяще́ннейший лик вас Боже́ственных проро́к велича́ем, и му́ченик мно́жество, пострада́вших кре́пко, почита́ем моля́щеся: да ю́же сла́ву получи́сте, сея́ и мы прича́стницы бы́ти сподо́бимся ва́шими моли́твами.
Вси святи́и, моли́те Бо́га о нас.
Святе́йшии Христо́вы иера́рси, и честни́и преподо́бных собо́ри, со все́ми святы́ми о всех нас Человеколю́бца Бо́га моли́те, мо́лим вы.
Сла́ва Отцу, и Сы́ну, и Свято́му Ду́ху. Зако́ну повину́ющеся Твоему́, уго́дников Твои́х собо́ри, многообра́зными доброде́тельми освети́шася: сего́ ра́ди насле́дницы бы́ша оби́телей Твои́х Небе́сных, Влады́ко Царю́: и́хже моли́твами, да и нас та́можде всели́ши, Преми́лостиве.
И ны́не, и при́сно, и во ве́ки веко́в, ами́нь. Богора́дованная Чи́стая, со все́ми проро́ки, му́дрыми, апо́столы, священному́ченики и со все́ми пра́ведными, моли́ Го́спода, я́ко да соверше́нное разреше́ние прегреше́ний прии́мем.
Песнь 4
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Вси святи́и, моли́те Бо́га о нас.
Восхваля́ем вас, благоглаго́ливии проро́цы, и воспева́ем богови́дцы апо́столи, со все́ми до́бре о Го́споде тече́ние соверша́вшими: я́ко да моли́твами ва́шими и мы настоя́щаго жития́ тече́ние богоуго́дно соверши́ти возмо́жем.
Вси святи́и, моли́те Бо́га о нас.
Я́ко многосве́тлыя зве́зды, доброде́телей све́тлостию озаря́ете ве́рных исполне́ния, преподо́бнии отцы́ на́ши, и вся Бо́жии уго́дницы: сего́ ра́ди вас ублажа́ем.
Сла́ва Отцу, и Сы́ну, и Свято́му Ду́ху. Совоку́плься собо́р святы́х Твои́х, Го́споди, ра́ди любве́, и тоя́ наслажда́ющеся, со А́нгелы лику́ет о Тебе́, Всеви́дче Го́споди всех: е́гоже ликовствова́ния да и нас сподо́биши, моли́твами уго́дников Твои́х, Всеси́льне.
И ны́не, и при́сно, и во ве́ки веко́в, ами́нь. Еди́на Бо́га Воплоще́ннаго ро́ждши, Всесвята́я, Того́ умоли́ в день стра́шный всех нас спасти́, и жи́зни ве́чныя, и све́та сподо́бити, его́же зрят вси до́бре угоди́вшии.
Песнь 5
Ирмос: У́тренююще вопие́м Ти, Го́споди, спаси́ ны: Ты бо еси́ Бог наш, ра́зве Тебе́ ино́го не ве́мы.
Вси святи́и, моли́те Бо́га о нас.
Святи́телие, проро́цы, преподо́бнейшии отцы́ и богоно́сцы, луча́ми Ду́ха просвеща́юще всю тварь, тму разоря́йте страсте́й на́ших, мо́лим вы.
Вси святи́и, моли́те Бо́га о нас.
Ра́ны ва́ша и я́звы, врагу́ яви́шася я́звы неисце́льныя: я́звы же ны́не исцеля́ют всем ве́рным, страда́льцы Госпо́дни.
Сла́ва Отцу, и Сы́ну, и Свято́му Ду́ху. Иера́рхи Твоя́, и священному́ченики, и вся святы́я просвети́вый, Го́споди, тех моли́твами уще́дри мя, ве́дый безме́рная моя́ прегреше́ния.
И ны́не, и при́сно, и во ве́ки веко́в, ами́нь. Пречи́стая Де́во, похвало́ му́чеников, преподо́бных и пра́ведных, и всех святы́х, от вся́каго мучи́тельства лука́ваго изми́ мя, молю́ся.
Песнь 6
Ирмос: Ри́зу мне пода́ждь све́тлу, одея́йся све́том я́ко ри́зою, Многоми́лостиве Христе́ Бо́же наш.
Вси святи́и, моли́те Бо́га о нас.
Денни́ца светоза́рная позна́ни бы́сте на земли́, благоче́стия све́том озари́вше ве́рныя, пресла́внии Христо́вы ору́жницы и святи́телие пра́веднии.
Вси святи́и, моли́те Бо́га о нас.
Умерщвле́ни бы́вше ран мно́гих наведе́ньми, жизнь и́стинную насле́довасте: вку́пе моли́те Христа́ спасти́ вся ве́рныя, святи́и му́ченицы.
Сла́ва Отцу, и Сы́ну, и Свято́му Ду́ху. Сла́ва прему́дрым святи́телем, и преподо́бным, и всем святы́м, Ты еси́, Христе́: моли́твами их лю́ди Твоя́ уще́дри, и́хже Свое́ю кро́вию, я́ко Человеколю́бец, стяжа́л еси́.
И ны́не, и при́сно, и во ве́ки веко́в, ами́нь. Воспева́ем Тя ве́рнии, Богора́дованная Влады́чице: Препе́таго бо Бо́га роди́ла еси́. Его́же моли́, Пречи́стая, гра́ду и лю́дем Твои́м в ми́ре спасти́ся.
Кондак, глас 8‑й
Я́ко нача́тки естества́ Насади́телю тва́ри, вселе́нная прино́сит Ти, Го́споди, богоно́сныя му́ченики: тех моли́твами в ми́ре глубо́це, Це́рковь Твою́, жи́тельство Твое́, Богоро́дицею соблюди́, Многоми́лостиве.
Икос
И́же по всей земли́ му́чившиися, и на Небеса́ пресели́вшиися, и́же стра́сти Христо́вы подража́вшии, и стра́сти на́ша отъе́млющии, зде днесь собира́ются, перворожде́нных показу́юще Це́рковь, я́ко го́рния о́браз содержа́щу, и Христу́ вопию́щу: Бог мой еси́ Ты, Богоро́дицею соблюди́ мя, Многоми́лостиве.
Песнь 7
Ирмос: О́троцы благочести́вии в Вавило́не о́бразу злато́му не поклони́шася, но посреде́ о́гненныя пе́щи ороша́еми, песнь воспева́ху, глаго́люще: превозноси́мый отце́в и нас, Бо́же, благослове́н еси́.
Вси святи́и, моли́те Бо́га о нас.
Святы́х чи́ни, во святы́х почива́ющаго немо́лчно восхваля́юще, пи́щи небе́сныя наслажда́етеся, и ра́дующеся лику́ете пою́ще: отце́в на́ших Бо́же, благослове́н еси́.
Вси святи́и, моли́те Бо́га о нас.
Светозра́чнии святи́телие, и преподо́бнии, и проро́цы, и священному́ченик досточу́дное мно́жество, и в по́стничестве просия́вшии све́тло, при́сно о нас моли́теся, да поми́ловани бу́дем, пою́щии с ва́ми: отце́в на́ших Бо́же, благослове́н еси́.
Сла́ва Отцу, и Сы́ну, и Свято́му Ду́ху. Ра́дующеся пое́м Твои́х, Го́споди, всех святы́х собо́р отвсю́ду собра́вшихся, и ро́ды вку́пе, и досто́инства, и жи́тельства, и с ни́ми пое́м зову́ще: отце́в на́ших Бо́же, благослове́н еси́.
И ны́не, и при́сно, и во ве́ки веко́в, ами́нь. С му́ченики, Пречи́стая, с преподо́бными отцы́, с проро́ки и все́ми святы́ми, во святы́х Еди́наго Почива́ющаго умоли́ всех освяти́ти нас, славосло́вящих Тя во вся ве́ки.
Песнь 8
Ирмос: Богоглаго́ливии о́троцы в пещи́, со огне́м пла́мень попира́юще поя́ху: благослови́те дела́ Госпо́дня, Го́спода.
Вси святи́и, моли́те Бо́га о нас.
Святи́телие, проро́цы, апо́столи, му́ченицы и вси святи́и, по́двиг сконча́вше, свяще́нное улучи́сте водворе́ние со А́нгелы: с ни́ми же проси́те очище́ния всем нам и ве́лия ми́лости.
Вси святи́и, моли́те Бо́га о нас.
Умертви́вше плоть боле́зньми мно́гими, жи́зни сподо́бистеся бу́дущия, преподо́бнии: ю́же получи́ти и нам моли́теся, уго́дницы Бо́жии, мо́лим вы.
Сла́ва Отцу, и Сы́ну, и Свято́му Ду́ху. Свяще́нницы Твои́, Христе́, пра́вдою облече́ни преподо́бне и вси святи́и от ве́ка, ны́не ку́пно ра́дуются, Твою́ добро́ту зря́ще Боже́ственную ясне́йше: ю́же зре́ти и нас, ра́ди святы́х Твои́х предста́тельства сподо́би, Человеколю́бче.
И ны́не, и при́сно, и во ве́ки веко́в, ами́нь. Богороди́тельнице Чи́стая, со все́ми проро́ки, и му́ченики, и преподо́бными, священному́ченики и со все́ми святы́ми, уще́дрити нас Всеми́лостиваго Спа́са моли́, мо́лимтися.
Песнь 9
Ирмос: Вои́стинну Богоро́дицу Тя испове́дуем, спасе́ннии Тобо́ю, Де́во Чи́стая, с безпло́тными ли́ки Тя велича́юще.
Вси святи́и, моли́те Бо́га о нас.
Вас, священноде́йственнии па́стырие, проро́к святы́х лик, пра́ведных безчи́сленное мно́жество, му́ченик собо́р, по́стников, де́вственников и всех святы́х, свяще́нными пе́сньми ублажа́ем, да мо́лите всех Вла́дыку о спасе́нии душ на́ших.
Вси святи́и, моли́те Бо́га о нас.
Я́ко служи́телие Влады́це, священнотаи́нницы я́вльшеся, совокупи́стеся служи́телем небе́сным: с ни́миже о нас моле́ния приноси́те, мо́лим вас.
Сла́ва Отцу, и Сы́ну, и Свято́му Ду́ху. Со священному́ченики ку́пно, и со все́ми проро́ки, ублажа́ем вся преподо́бныя и пра́ведныя, де́вы и же́ны све́тло до́блествовавшия: тех мольба́ми, Христе́, изба́ви гее́нны ду́ши на́ша.
И ны́не, и при́сно, и во ве́ки веко́в, ами́нь. Щедролюби́ваго Бо́га ро́ждшая пло́тию, со святы́ми все́ми моли́ Того́ при́сно от бед спасти́ нас, всегда́ Тя велича́ющих, Ма́ти Де́во Чи́стая.
Молитва всем святым
Боже святый и во святых почиваяй, трисвятым гласом на небеси от Ангел воспеваемый, на земли от человек во святых Своих хвалимый: давый Святым Твоим Духом комуждо благодать по мере дарования Христова, и тою поставивый Церкви Твоей святей овы Апостолы, овы пророки, овы же благовестники, овы пастыри и учители, их же словом проповеди. Тебе Самому действующему вся во всех, мнози совершишася святии в коемждо роде и роде, различными добродетельми благоугодившии Тебе, и к Тебе нам образ добрых подвигов своих оставивше, в радости прешедшии, готови, в нем же сами искушени быша, и нам напаствуемым помогати. Сих святых всех воспоминая и их богоугодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми грешному последовати их учению, паче же Твоею вседействующею благодатию, небесныя с ними сподобитися славы, хваляще пресвятое имя Твое, Отца и Сына и Святаго Духа во веки. Аминь.
Молитва вторая
О преблаженнии угодницы Божии, вси святии, предстоящии Престолу Пресвятыя Троицы и наслаждающиися неизреченнаго блаженства! Се ныне, в день общаго вашего торжества, милостивно призрите на нас, меньших братий ваших, приносящих вам сие хвалебное пение и ходатайством вашим просящих милости и отпущения грехов у Преблагаго Господа: вемы бо, воистинну вемы, яко вся, елика восхощете, испросити у Него можете. Темже убо смиренно молимся вам: молите милостиваго Владыку, да подаст нам дух вашея ревности к хранению святых Его заповедей, яко да текше по стопам вашим, возможем земное поприще в добродетельном житии без порока прейти и в покаянии достигнути преславных селений райских, и тамо купно с вами прославляти Отца и Сына и Святаго Духа, во веки веков. Аминь.
В традиции Православной Церкви с древних времен в разные дни недели (седмицы) за богослужением воспоминаются те или иные события или святые – это называется «седмичным богослужебным кругом».
Со временем богослужебная традиция Церкви распространилась на домашние (келейные) молитвы.
- Богослужение понедельника содержит молитвословия Небесным Силам, вторника – Иоанну Предтече.
- В среду, пятницу и воскресенье Святая Церковь вспоминает Евангельские события предательства Спасителя, Его Крестной смерти и Воскресения, соответственно и богослужебные тексты посвящены Господу и Пресвятой Богородице.
- Суббота по традиции день поминовения усопших и особого моления всем святым от века Богу благоугодившим.
- В четверг совершается память святых апостолов и святителя Николая Чудотворца.
См. “Богослужебные круги”
