...
Канон великомученику Никите Готфскому kanon velikomucheniku nikite gotfskomu 07ac51b
Канони

Канон великомученику Никите Готфскому

Канон великомученику Никите Готфскому

Минея, 15 Сентября, Кано́н свята́го

Глас 4

Песнь 1

Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть. 

Припев: Святы́й великому́чениче Ники́то, моли́ Бо́га о на́с.

Умертви́в пло́ти моея́ мудрова́ние,/ ум озари́ просвети́тельною све́тлостию,/ твое́ воспе́ти торжество́,/ я́ко победи́тель всеизя́щнейш, умоля́я, о Ники́то, Христа́. 

Припев: Святы́й великому́чениче Ники́то, моли́ Бо́га о на́с.

Яд, от страсте́й бы́вший, отложи́в,/ ра́ны претерпе́л еси́ кре́пце/ и в ри́зу че́стну страда́льчески оде́ялся еси́,/ от твои́х крове́й истка́нную. 

Сла́ва Отцу́ и Сы́ну и Свято́му Ду́ху.

Нов же и чу́ден яви́л еси́ путь страда́ния,/ за ны на Дре́ве пригвозди́вся:/ нача́ло бо был еси́ му́чеников, Влады́ко,/ испове́дания и кре́пости. 

И ны́не и при́сно и во ве́ки веко́в. Ами́нь.

Богородичен: Дверь я́же к нам Твоего́, Го́споди, снизше́ствия,/ Восто́к, и Со́лнце, и Свет та́инственно Тя нарица́ем,/ преесте́ственно просия́,/ сугу́ба естество́м, Человеколю́бца. 

Песнь 3

Ирмос: Весели́тся о Тебе́ Це́рковь Твоя́, Христе́, зову́ще:/ Ты моя́ кре́пость, Го́споди,// и прибе́жище, и утвержде́ние. 

Припев: Святы́й великому́чениче Ники́то, моли́ Бо́га о на́с.

Тве́рдостию души́ мучи́тельская преще́ния претерпе́л еси́,/ му́чениче Христо́в сла́вне,/ Боже́ственною си́лою возмога́емь. 

Припев: Святы́й великому́чениче Ники́то, моли́ Бо́га о на́с.

Пло́ти твоей расточе́ния и уде́с отсече́ние претерпе́в,/ му́чениче Христо́в всехва́льне,/ твою́ ду́шу приобре́л еси́. 

Сла́ва Отцу́ и Сы́ну и Свято́му Ду́ху.

Весели́тся о тебе́ му́чеников Христо́вых собра́ние,/ па́мять твою́ днесь соверша́ему ви́дяще. 

И ны́не и при́сно и во ве́ки веко́в. Ами́нь.

Богородичен: Мари́е, чи́стое де́вства и честно́е селе́ние,/ лю́тыя стру́пы моего́ се́рдца исцели́. 

Седален, глас 4

Непобеди́мь яви́вся во́ин, ва́рварския ко́зни победи́л еси́/ и, пострада́в, сла́вне, крепча́йше полк пора́товал еси́ неви́димых враго́в,/ тем и диади́му прия́л еси́ побе́ды,/ о нас моля́ся не преста́й, блаже́нне Ники́то, ве́рою пою́щих тя.

Песнь 4

Ирмос: Вознесе́на Тя видевши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди. 

Припев: Святы́й великому́чениче Ники́то, моли́ Бо́га о на́с.

Иску́плен Кро́вию Влады́чнею, страда́лец Ники́та/ свою́ кровь, ра́дуяся, прино́сит Христу́,/ те́мже, закала́емь,/ сла́ва Тебе́, Бо́же мой, вопия́ше. 

Припев: Святы́й великому́чениче Ники́то, моли́ Бо́га о на́с.

Разжигаемъ раче́нием Влады́чним,/ и́дольский, му́чениче, попра́л еси́ пла́мень/ и всю де́монскую кре́пость, зовы́й Созда́телю:/ сла́ва си́ле Твое́й, Го́споди. 

Сла́ва Отцу́ и Сы́ну и Свято́му Ду́ху.

Наслажда́яся Госпо́дним виде́нием/ и Того́ све́тлостию насыща́яся,/ му́ченик, стражда́, не ощуща́ше и, ра́дуяся, зва́ше:/ сла́ва си́ле Твое́й, Го́споди. 

И ны́не и при́сно и во ве́ки веко́в. Ами́нь.

Богородичен: Украша́емо разли́чным светоли́тием не́бо одушевле́нное Твое́,/ Царя́ ца́рствующих, Христе́,/ Де́ва Пречи́стая,/ ны́не я́ко Богоро́дица сла́вится. 

Песнь 5

Ирмос: Ты, Го́споди, мой Свет,/ в мир прише́л еси́,/ Свет Святый, обраща́яй из мра́чна неве́дения// ве́рою воспева́ющия Тя. 

Припев: Святы́й великому́чениче Ники́то, моли́ Бо́га о на́с.

Кто мо́жет изрещи́ твои́х, Ники́то, натрижне́ний, всехва́льне, венцы́,/ я́же дарова́ тебе́ Христо́с,/ за Него́ пострада́вшу? 

Припев: Святы́й великому́чениче Ники́то, моли́ Бо́га о на́с.

Му́ченицы, на земли́ по́двиги сконча́вше,/ Небе́сное в высоча́йших от Тебе́, Жизнода́вче,/ воздая́ние прия́ша. 

Сла́ва Отцу́ и Сы́ну и Свято́му Ду́ху.

Ны́не сия́еши, я́ко свети́ло, о Ники́то всехва́льне,/ свет вторы́й быва́еши,/ Све́ту вели́кому сла́вно предстоя́. 

И ны́не и при́сно и во ве́ки веко́в. Ами́нь.

Богородичен: Свет безле́тный нам, подле́тен бывш,/ родила́ еси́, Богома́ти,/ су́щим во тьме жития́,/ и мир весь просвети́ла еси́. 

Песнь 6

Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию. 

Припев: Святы́й великому́чениче Ники́то, моли́ Бо́га о на́с.

Вожделе́в добро́ты Созда́вшаго, сла́вне,/ и отту́ду сия́ния прие́м, му́чениче,/ впери́лся еси́ и, о сме́рти небре́г,/ Тому́ приступи́л еси́. 

Сла́ва Отцу́ и Сы́ну и Свято́му Ду́ху.

Теку́щих по́мыслом прие́м целому́дренным,/ неистощи́мая, му́чениче, предче́ствовав,/ те́ло твое́ му́кам, о Ники́то,/ с весе́лием, ра́дуяся, преда́л еси́. 

И ны́не и при́сно и во ве́ки веко́в. Ами́нь.

Богородичен: Яко я́блоко в дубра́ве еди́ну Тя обре́т,/ и чисте́йший крин,/ и удо́льный цвет, о Богома́ти,/ Жени́х мы́сленный в Тя всели́ся. 

Кондак, глас 2

Пре́лести посе́к держа́ву стоя́нием твои́м/ и побе́ды прии́м вене́ц во страда́льчествех твои́х,/ со А́нгелы, сла́вне, ра́дуешися,/ Ники́то тезоимени́те,// с ни́ми Христа́ Бо́га моля́ непреста́нно о всех нас.

Икос

Зна́ние Твое́ вложи́в души́ мое́й, очи́сти мой по́мысл/ и Твои́х за́поведей де́лателя, Спа́се, покажи́,/ да возмогу́ победи́ти страсте́й мои́х ра́зная привоста́ния,/ победи́тельную по́честь прие́м безстра́стия,/ моли́твами Твоего́ до́бляго страстоте́рпца Ники́ты, Человеколю́бче:/ и́бо сам нас воспомина́ти того́ в па́мяти его́ созва́,/ моля́ся непреста́нно о всех нас.

Песнь 7

Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоей, Го́споди. 

Припев: Святы́й великому́чениче Ники́то, моли́ Бо́га о на́с.

Ны́не непристу́пною заре́ю осия́емь, му́чениче,/ пою́щия ны́не твой пра́здник све́том твои́м просвети́,/ благослове́н еси́, Бо́же мой, зовы́й, и Го́споди. 

Сла́ва Отцу́ и Сы́ну и Свято́му Ду́ху.

Преудиви́шася твоему́ му́жеству во́инства а́нгельская, блаже́нне,/ зря́ще терпели́вно стра́ждуща тя и глаго́люща:/ благослове́н еси́, Бо́же всех и Го́споди. 

И ны́не и при́сно и во ве́ки веко́в. Ами́нь.

Богородичен: С вы́шним ликостоя́нием безпло́тный:/ ра́дуйся, Богоро́дице Чи́стая, Гаврии́л, веселя́ся, зовя́ше Ти:/ благослове́нна Ты в жена́х еси́, Всенепоро́чная Влады́чице. 

Песнь 8

Ирмос: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода. 

Припев: Святы́й великому́чениче Ники́то, моли́ Бо́га о на́с.

Всеце́лу же́ртву и прия́тну тебе́ сама́го прине́сл еси́, му́чениче непобеди́ме,/ и всепло́дие был еси́ благово́нно Влады́це твоему́, распе́ншемуся нас ра́ди,/ с весе́лием вопия́:/ благослови́те, вся дела́ Госпо́дня, Го́спода. 

Припев: Святы́й великому́чениче Ники́то, моли́ Бо́га о на́с.

Зако́нне, я́ко боже́ственный хра́брник, вра́жия полки́ низврати́в,/ досто́йне прия́л еси́ вене́ц побе́ды неувяда́ющий от жизноно́сныя Десни́цы,/ Е́йже ны́не предстои́ши, воспева́я:/ благослови́те, вся дела́ Госпо́дня, Го́спода. 

Сла́ва Отцу́ и Сы́ну и Свято́му Ду́ху.

Возлюби́л еси́ безме́рно Христа́ и Того́ Кро́ви твою́ кровь примеси́л еси́,/ и раздробля́емь ра́нами, и разли́чно убива́емь./ Ему́же и ны́не, я́ко подо́бник, сца́рствуеши, вопия́:/ благослови́те, вся дела́ Госпо́дня, Го́спода. 

И ны́не и при́сно и во ве́ки веко́в. Ами́нь.

Богородичен: Скве́рну естества́ на́шего,/ Христа́ ро́ждши Еди́наго Пречи́стаго,/ я́ве отмы́ла еси́, Чи́стая, Богоро́дице Веенепоро́чная,/ и Херуви́м и Серафи́м была́ еси́ превы́шше, вопию́щих:/ благослови́те, вся дела́ Госпо́дня, Го́спода. 

Песнь 9

Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем. 

Припев: Святы́й великому́чениче Ники́то, моли́ Бо́га о на́с.

Всего́ мене́ само́го тебе́ приношу́, богоблаже́нне Ники́то,/ да обра́щу тя предста́теля ко Влады́це,/ спаса́ти могу́ща от вся́каго обстоя́ния,/ и спасе́ния Боже́ственнаго хода́тая. 

Припев: Святы́й великому́чениче Ники́то, моли́ Бо́га о на́с.

Свиде́тель и́стинно был еси́ и́стины, страстоте́рпче,/ ипоста́сней и честне́й ны́не и́стине, ра́дуяся, предстои́ши,/ по́двигов натрижне́ния со дерзнове́нием прие́мля. 

Сла́ва Отцу́ и Сы́ну и Свято́му Ду́ху.

Ко приста́нищу ти́хому приста́в, почи́ от боле́зней/ и венцено́сец лику́еши в раи́ с му́ченики Христо́выми./ Тем тя ны́не, я́ко богопросла́вленна, вси досто́йно сла́вим. 

И ны́не и при́сно и во ве́ки веко́в. Ами́нь.

Богородичен: Зако́нов есте́ственных кроме́ Законода́вца ражда́еши,/ Плоть бы́вша невра́щно за благоутро́бие неизрече́нное,/ Благослове́нная Чи́стая,/ во двух существа́х познава́ема. 

Светилен

Ору́жием честна́го Твоего́ Креста́ огради́вся,/ страстоте́рпец Твой, Сло́ве,/ проти́вныя си́лы кре́пко препобеди́,/ и мучи́тели посрами́, и за Тя пострада́,/ и с Тобо́ю, Христе́ мой, Всецарю́, Ники́та ца́рствует.

Знайшли помилку