Канон святому благоверному князю Довмонту, во святом Крещении Тимофею
Минея, 20 Мая,
Глас 4
Песнь 1
Ирмос: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.
Припев: Святы́й благове́рный вели́кий кня́же Дома́нте, моли́ Бо́га о на́с.
В Ца́рство Христо́во вшед, преблаже́нне кня́же Тимофе́е Дома́нте,/ возлюби́в ве́чная па́че вре́менных,/ сего́ ра́ди своему́ Влады́це сосу́д избра́н показа́ся, сла́вне.
Припев: Святы́й благове́рный вели́кий кня́же Дома́нте, моли́ Бо́га о на́с.
Благочести́ваго ко́рене держа́внаго кня́зя Алекса́ндра исча́дию/ благоволе́нием Бо́жиим сочета́ся,/ с не́юже благоуго́дно пожи́в, преста́вльшеся,/ обрето́сте Христо́во нестаре́емое блаже́нство.
Сла́ва Отцу́ и Сы́ну и Свято́му Ду́ху.
Христолюби́ваго нра́ва никогда́ же отлуча́яся,/ всем убо́гим ми́лостивый пода́тель был еси́, блаже́нне кня́же Дома́нте,/ и си́рым засту́пник.
И ны́не и при́сно и во ве́ки веко́в. Ами́нь.
Богородичен: Благодаре́ние но́во моли́твы Твоея́ пропове́дуем, Чи́стая, усты́ и ду́хом,/ я́ко Тебе́ ра́́ди от напа́стей, и тя́жких печа́лей,/ и греха́ страсте́й вси избавля́емся.
Песнь 3
Ирмос: В Го́споде Бо́зе мое́м/ се́рдце мое́ утверди́ся,/ тем немощству́ющии препоя́сашася си́лою.
Припев: Святы́й благове́рный вели́кий кня́же Дома́нте, моли́ Бо́га о на́с.
Царя́, все́ми ца́рствующего Небе́сными и земны́ми,/ после́дователь был еси́, блаже́нне Дома́нте,/ не возвра́щся вспя́ть, возло́ж ру́ку свою́ на ра́ло ве́ры Христо́вы,/ тем до́бре упра́влен бы́сть в Ца́рство Его́.
Припев: Святы́й благове́рный вели́кий кня́же Дома́нте, моли́ Бо́га о на́с.
Всея́ Росси́и благочести́вым вели́ким кня́зем причте́ся ли́ку,/ а́ще и не от того́ су́щаго ко́рене рожде́ну ти,/ но хра́брость му́жества и благоче́стие ра́зума тем подо́бна показа́ тя.
Сла́ва Отцу́ и Сы́ну и Свято́му Ду́ху.
В ле́та самоде́ржца вели́каго кня́зя Алекса́ндра Не́вскаго был еси́, кня́же Дома́нте,/ тем христоимени́тым лю́дем Росси́йскаго ца́рства забра́ла яви́стеся от нахожде́ния безбо́жных лати́н,/ я́коже в животе́, та́ко и по преставле́нии ва́шем, святи́и.
И ны́не и при́сно и во ве́ки веко́в. Ами́нь.
Богородичен: Написа́ся Сло́во О́тчим персто́м,/ не́когда богогла́сному проро́ку Твоего́ рождества́ та́йна, Богоро́дице,/ тем Тя молю́ в кни́зе мя написа́ти жи́зненней,/ лука́вое рукописа́ние грехо́в мои́х раздра́вши.
Седален, глас 4
Благослове́нному и светоно́сному торжеству́,/ я́ко со́лнцу, возсия́вшу во всем ми́ре, блаже́ннаго кня́зя Тимофе́я Дома́нта,/ к нему́же стеце́мся, ве́рнии, непреста́нно вопию́ще:/ а́ще и прише́л еси́ от земли́, свя́те,/ но та́мо со А́нгелы Пресвяте́й Тро́ице предстои́ши,/ Е́йже моли́ся спасти́ души́ на́ша.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Позна́вше Тобо́ю неопи́санное Сло́во Бо́жие,/ Сы́на Единоча́днаго Вседержи́телева, вопие́м Ти, земни́и:/ ра́дуйся, Благослове́нная Богоро́дице, упова́ние душа́м на́шим.
Песнь 4
Ирмос: Любве́ ра́ди, Ще́дре, Твоего́ о́браза/ на Кресте́ Твое́м стал еси́, Им раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.
Припев: Святы́й благове́рный вели́кий кня́же Дома́нте, моли́ Бо́га о на́с.
Фео́дора Стратила́та дерзнове́нию му́жества подо́бен был еси́/ и сего́ ра́ди че́сти о́наго от Бо́га сподо́бися,/ стражда́ изволе́нием.
Припев: Святы́й благове́рный вели́кий кня́же Дома́нте, моли́ Бо́га о на́с.
Земля́ освяти́ся, прии́мши мо́щи твоя́, блаже́нне кня́же Дома́нте,/ челове́цы же, тобо́ю прие́млют исцеле́ние, Христа́ сла́вяще,/ И́же и́скренно тя просла́вльшаго.
Припев: Святы́й благове́рный вели́кий кня́же Дома́нте, моли́ Бо́га о на́с.
Ре́вность Свята́го Ду́ха в се́рдцы прии́м,/ оте́ческое злове́рие возненави́дев,/ Христа́, И́стиннаго Бо́га, взыска́в,/ ба́нею Креще́ния омы́вся, ча́до Све́ту яви́ся./ Ему́же предстои́ши, моли́ся за рабы́ своя́, ве́рою сла́вящия тя.
Сла́ва Отцу́ и Сы́ну и Свято́му Ду́ху.
Тебе́ мо́лимся, преблаже́нне Тимофе́е,/ сопроти́вных шата́ние низложи́ и неду́ги челове́ком обле́гчи, свя́те,/ я́ко да во гла́сех хвале́ния тебе́ воспева́ем.
И ны́не и при́сно и во ве́ки веко́в. Ами́нь.
Богородичен: Руко́ю милосе́рдия, Богоро́дице, защити́ мя от враг/ и ду́шу мою́, иста́явшую зно́ем греха́,/ прохлади́ хода́тайством Свои́м, Де́во,/ Еди́на бо еси́ челове́ком исправле́ние.
Песнь 5
Ирмос: Ча́сть моя́ еси́, Го́споди,/ и сла́ва лица́ моего́:/ Ты бо мя из тьмы́ неве́дения/ еди́н изба́вил еси́ Богоразу́мием,/ и Тебе́ молю́ся, Христе́:/ да́руй рабу́ Твоему́ мир,/ я́ко Человеколю́бец.
Припев: Святы́й благове́рный вели́кий кня́же Дома́нте, моли́ Бо́га о на́с.
Благослове́нием Святы́я Горы́ и́нока, единоутро́бнаго твоего́ бра́та,/ Бо́жий свет Трисо́лнечныя Тро́ицы всели́ся в твое́ се́рдце/ и Своего́ Божества́ дом тя показа́, блаже́нне.
Припев: Святы́й благове́рный вели́кий кня́же Дома́нте, моли́ Бо́га о на́с.
И́же святу́ю Твою́ па́мять ра́достно от души́ творя́щих/ ско́рби премени́ и душеспаси́тельная пода́ждь проше́ния.
Сла́ва Отцу́ и Сы́ну и Свято́му Ду́ху.
Зако́ном благове́рия научи́вся, прему́дре,/ ревни́тель благоче́стия сади́телю Влади́миру был еси́,/ и́дольскую ле́сть низложи́в,/ Тро́ицы был еси́ селе́ние Пречи́стей.
И ны́не и при́сно и во ве́ки веко́в. Ами́нь.
Богородичен: Многогре́шнаго Твоего́ раба́, Богоро́дице, не отри́ни моле́ния и проше́ния,/ а́ще и недосто́йне моля́щася, Влады́чице,/ изба́ви мя лю́тых страсте́й мои́х/ и уз прегреше́ния зла́го.
Песнь 6
Ирмос: Я́коже проро́ка Ио́ну/ от ки́та изба́вил еси́, Христе́ Бо́же,/ и мене́ из глубины́ прегреше́ний/ возведи́ и спаси́ мя, Еди́не Человеколю́бче.
Припев: Святы́й благове́рный вели́кий кня́же Дома́нте, моли́ Бо́га о на́с.
Святе́йшаго во святы́х Бо́га позна́в, прему́дре кня́же Дома́нте,/ о гра́де твое́м Пско́ве моли́ся,/ и о и́же ве́рою живу́щих в нем,/ изба́вится от вся́ких зол,/ да твою́ па́мять вси благоче́стно почита́ем.
Припев: Святы́й благове́рный вели́кий кня́же Дома́нте, моли́ Бо́га о на́с.
Я́ко пресве́тлая дво́ице,/ я́ко пречестна́я верста́ и богосочта́нная,/ Христу́ от души́ порабо́тасте в жи́зни свое́й, пречестни́и,/ ходя́ще по за́поведей Его́.
Сла́ва Отцу́ и Сы́ну и Свято́му Ду́ху.
Ца́рие и кня́зи, свяще́нницы и вельмо́жи,/ ста́рцы с ю́нотами и всяк во́зраст, све́тло предъигра́йте,/ па́мять прему́драго кня́зя Дома́нта в пе́снех велича́юще.
И ны́не и при́сно и во ве́ки веко́в. Ами́нь.
Богородичен: Служи́теля та́йне, Арха́нгела слы́шала еси́,/ в утро́бе вмеще́ние Невмести́маго прии́мши,/ мы же Гаврии́лово веща́ние прино́сим:/ ра́дуйся, Обра́дованная, Госпо́дь с Тобо́ю/ и Тебе́ ра́ди с на́ми.
Кондак, глас 8
Любо́вию Христо́вою уязви́ся, преблаже́нне кня́же Дома́нте,/ ум впери́в заре́ю Ду́ха,/ и́дольскую пре́лесть оте́ческаго нече́стия возненави́дев,/ порожде́нием святы́я купе́ли Тимофе́й нарече́н еси́,/ слеза́ми и ми́лостынею ко Христу́ присво́ився,/ и жи́зни сей тече́ние до́бре сконча́в,/ ве́ру непоро́чну соблю́д,/ и ны́не мо́лим тя:/ моли́ Пресвяту́ю Тро́ицу и Пречи́стую Богоро́дицу/ за град Псков и за всех, притека́ющих к ра́це моще́й твои́х,/ изба́вится нам от вся́ких зол,/ да тебе́ вси, я́ко те́пла засту́пника, непреста́нно почита́ем.
Икос
Вся́каго безбо́жия неи́стовства избе́г,/ удале́нную страну́ от Бо́га оте́чества весьма́ оста́вль,/ иде́же Бог не познава́шеся, но пре́лесть бесо́вская почита́ема бя́ше,/ вся сия́, оплева́в, попра́, апо́столу Фили́ппу подо́бен быв:/ он бо от Га́зскаго пути́ восхище́н во Азо́т,/ ты же – в богоспаса́емый град Псков;/ он у́бо, еди́наго ка́женика55 крести́в, удиви́,/ ты же вся стра́ны на́ша свои́м креще́нием возвесели́, блаже́нне Тимофе́е Дома́нте,/ и чуде́с де́йство безбо́жных нахожде́ния сокрушавши,/ и па́ки пребу́ди с на́ми защища́ти нас,/ да тебе́ вси, я́ко те́пла засту́пника, непреста́нно почита́ем.
Песнь 7
Ирмос: Не преда́ждь нас до конца́ И́мене Твоего́ ра́ди,/ и не разори́ Заве́та Твоего́,/ и не отста́ви ми́лости Твоея́ от нас,/ Го́споди, Бо́же оте́ц на́ших,/ препе́тый во ве́ки.
Припев: Святы́й благове́рный вели́кий кня́же Дома́нте, моли́ Бо́га о на́с.
Патриа́рха Авраа́ма нра́ву, преблаже́нне кня́же Дома́нте, подо́бник быв,/ вся́ко тре́бование ни́щим неоску́дно разда́л еси́,/ да Христа́ ми́лостива себе́ приобря́щеши.
Припев: Святы́й благове́рный вели́кий кня́же Дома́нте, моли́ Бо́га о на́с.
Просвети́ твое́ житие́ всю вселе́нную пра́вым смы́слом,/ сия́я, в Руси́ я́ко со́лнце,/ Трисо́лнечнаго Божества́ заре́ю просвеща́емь, досточу́дне.
Сла́ва Отцу́ и Сы́ну и Свято́му Ду́ху.
Це́ркви и гра́ду ты бы́сть прави́тель непрело́жный,/ вся́ку е́ресь и ле́сть бесо́вскую отгоня́я,/ и со А́нгелы ны́не лику́еши,/ предстоя́ Святе́й Тро́ице в дерзнове́нии мно́зе.
И ны́не и при́сно и во ве́ки веко́в. Ами́нь.
Богородичен: Изба́ви, Богоро́дице, от обдержа́щих бед ду́ши на́ша/ и при́зри на смире́нныя рабы́ Своя́,/ и весе́лия мя испо́лни, Блага́я.
Песнь 8
Ирмос: На Кресте́ пло́тию пригвожде́ннаго/ и показа́вшаго нам ору́жие во спасе́ние,/ о́троцы, превозноси́те Христа́, Бо́га на́шего, во ве́ки.
Припев: Святы́й благове́рный вели́кий кня́же Дома́нте, моли́ Бо́га о на́с.
И́ова древняго милосе́рдию подо́бяся,/ не изы́де из до́му твоего́ никто́же ско́рбен:/ и́ноком, и свяще́нным, и просты́м, и всем, и́же в недоста́точестве,/ я́ко оте́ц чадолюби́в, был еси́.
Припев: Святы́й благове́рный вели́кий кня́же Дома́нте, моли́ Бо́га о на́с.
В боле́зни к тебе́ прибега́ющих исцеля́й, преблаже́нне кня́же Тимофе́е,/ и пога́ных наше́ствия избавля́й рабы́ своя́, Бо́гу пою́щия:/ благослови́те Христа́ во вся ве́ки.
Сла́ва Отцу́ и Сы́ну и Свято́му Ду́ху.
Весели́тся ны́не и торжеству́ет вели́кий град Псков и вси окре́стнии гра́ди и ве́си,/ тебе́ иму́ще покро́в и забра́ло,/ и крася́тся па́мятию твое́ю честно́ю,/ в нем бо пожи́в, венца́ от Бо́га сподо́бился еси́.
И ны́не и при́сно и во ве́ки веко́в. Ами́нь.
Богородичен: Предвари́шася уже́ беззако́ния моя́/ и, к концу́ жития́ прише́д, рыда́я, молю́ Тя, Богоро́дице Чи́стая:/ поне́ на ста́рость мою́, спаси́ мя, погиба́ющаго.
Песнь 9
Ирмос: Я́ко сотвори́ мне вели́чия Си́льный,/ и свя́то И́мя Его́,/ и ми́лость Его́/ в род и род боя́щимся Его́.
Припев: Святы́й благове́рный вели́кий кня́же Дома́нте, моли́ Бо́га о на́с.
Всея́ Росси́и вели́ким князе́м, благоче́стие храня́щим,/ соо́бщник был еси́, Богому́дре кня́же Дома́нте,/ с ни́ми зе́млю Ру́сскую сохраня́еши от безбо́жных ага́рян и латы́н наве́та,/ и ны́нешняго настоя́ния страсте́й нас изба́ви моли́твами свои́ми.
Припев: Святы́й благове́рный вели́кий кня́же Дома́нте, моли́ Бо́га о на́с.
Чудесы́ свои́ми, я́ко цвет, процве́л еси́, Богому́дре кня́же Дома́нте,/ я́коже рече́ проро́к:/ пра́ведник, я́ко фи́никс, процвете́т./ Сего́ ра́ди тя ублажа́ем.
Сла́ва Отцу́ и Сы́ну и Свято́му Ду́ху.
Певце́м, и́же Тебе́, пою́щим, Тро́ице Пресвята́я,/ согреше́ния на́ша оста́ви, во́льная и нево́льная,/ пребла́га чудотво́рца благове́рнаго кня́зя Дома́нта моли́твами.
И ны́не и при́сно и во ве́ки веко́в. Ами́нь.
Богородичен: Напои́тися бога́тно слеза́ми да́ждь бразда́м стра́стныя моея́ души́/ и плоды́ принести́ стори́чны, Влады́чице, сподо́би,/ се́рдце мое́ вся́каго весе́лия испо́лни,/ да сла́влю Тя, Храни́тельнице моя́.
Светилен
Не челове́ком, ни от челове́к, но от Бо́га зва́ние прие́м,/ и́же пре́жде тьме́ сын,/ ны́не же ча́до и насле́дник Све́ту/ свои́м обраще́нием сотвори́ся, Дома́нте Богому́дре.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Плод чре́ва Твоего́ и́же плодо́м попо́лзшагося/ па́ки ра́еве жи́теля, Чи́стая, соде́лал е́сть.
